ཁ་སང་ཕྱི་ཚེས་ ༧ ཉིན་རྒྱ་ནག་གི་སྲིད་འཛིན་ཞཱི་ཅིན་ཕིན་དང་ཨ་རིའི་སྲིད་འཛིན་ཨོ་བྷ་མ་གཉིས་ཁཱ་ལེ་ཧྥོ་ནེ་ཡའི་ཌེ་སར་ཊི་ཨའོ་སེ་སི་ (Desert Oasis) གླིང་གར་ཐུག་འཕྲད་བྱེད་པའི་སྐབས་དང་བསྟུན། བོད་མི་དང་བོད་དོན་རྒྱབ་སྐྱོར་བ། གཞན། ཆོས་འཁོར་རྩ་རླུངས་སྒོམ་སྒྲུབ་ཚོགས་པའི་མི་ ༢༠༠ ཙམ་བཅས་ཀྱིས་གླིང་གའི་ཕྱི་ལོགས་སུ་རྒྱ་ནག་གི་སྲིད་འཛིན་ལ་ངོ་རྒོལ་སྐད་འབོད་བྱས་ཡོད་འདུག
སྐབས་དེར་བོད་མི་དང་བོད་དོན་རྒྱབ་སྐྱོར་བ་ཚོས། “ རྒྱ་མི་བོད་ནས་ཕར་རྒྱུག ” ཅེས་པ་སོགས་འབོད་ཚིག་འདྲ་མིན་སྒྲོག་བཞིན། རྒྱ་ནག་གིས་བོད་ནང་དབང་སྒྱུར་མཚམས་འཇོག་དགོས་པ་དང་། བོད་མིར་རང་དབང་དགོས་པ། སྲིད་འཛིན་ཨོ་བྷ་མས་ཞཱི་ཅིན་ཕིན་དང་མཉམ་དུ་བོད་དོན་གླེང་སློང་བྱ་དགོས་པའི་འཕྲེད་དར་དང་བོད་ཀྱི་རྒྱལ་དར་སོགས་འཕྱར་བཞིན་ངོ་རྒོལ་སྐད་འབོད་བྱས་འདུག
ཆོས་འཁོར་རྩ་རླུང་སྒོམ་སྒྲུབ་ཚོགས་པས་ཚོགས་མི་ཚོས། རྒྱ་ནག་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པར་དྲག་གནོན་དང་། བཙོན་འཇུག་དམར་གསོད་བཏང་པར་ངོ་རྒོལ་སྐྱོན་བརྗོད་ཀྱི་སྐད་འབོད་སོགས་བྱས་ཏེ། རྒྱ་ནག་ནང་ཆོས་འཁོར་རྩ་རླུང་སྒོམ་སྒྲུབ་པར་རང་དབང་མེད་པའི་རྣམ་འགྱུར་ཤུགས་ཆེར་བསྟན་ཡོད་འདུག ཆོས་འཁོར་རྩ་རླུངས་སྒོམ་སྒྲུབ་ཚོགས་པ་དང་བོད་རིགས་ངོ་རྒོལ་བ་ཐུན་མོང་གི་རེ་སྐུལ་གཙོ་བོ། རྒྱ་ནག་ནང་འགྲོ་བ་མིའི་ཐོབ་ཐང་མེད་པ་དང་། ཐེངས་འདིར་ཨོ་བྷ་མས་ཞཱི་ཅིན་ཕིན་ལ་གནད་དོན་དེ་དག་ཐོག་གླེང་སློང་བྱ་དགོས་པའི་སྐོར་ཆགས་ཡོད་འདུག
གསར་འགོད་པ། བནྡེ་སྐྱབས།
ཨ་ཤ་ཡའི་རང་དབང་རླུང་འཕྲིན་ཁང་ནས།
ཨ་མི་རི་ཀའི་ནང་གཏན་སྡོད་བོད་མིའི་སྒྲིག་འཛུགས་ཁག་གིས་ཨ་རིའི་སྲིད་འཛིན་Obama མཆོག་ལ། རྒྱ་ནག་གི་སྲིད་འཛིན་དང་མཇལ་འཕྲད་གནང་བའི་སྐབས། བོད་དོན་གླེང་གློང་གནང་སྐྱོང་ཡོང་བའི་འབོད་སྐུལ་གྱི་སྙན་ཞུ་ཞིག་ཕུལ་གནང་འདུག ཨ་རིའི་སྲིད་འཛིན་ལ་ཕུལ་བའི་སྙན་ཞུ་དེའི་ནང་ཞུ་དོན་གསུམ་ཡོད་པ་ནི། དང་པོ་སྲིད་འཛིན་Xi Jinping ལ་བོད་དོན་སྐོར་གཞུང་འབྲེལ་དང་སྐུ་སྒེར་གཉིས་ཐོག་ནས་གླེང་གློང་དང་སྦྲགས་ཡོངས་ཁྱབ་གསལ་བསྒྲགས་གནང་དགོས་རྒྱུ། གཉིས་པ་བོད་མིའི་ས་ཁུལ་ཁག་ནས་དྲག་པོའི་དཔུང་དམག་ཕྱིར་འཐེན་དགོས་རྒྱུའི་འབོད་སྐུལ་རྒྱ་ནག་གི་སྲིད་འཛིན་ལ་གནང་དགོས་རྒྱུ། གསུམ་པ་རྒྱ་གཞུང་གིས་བཙན་བྱོལ་བོད་མིའི་སྒྲིག་འཛུགས་དང་གྲོས་མོལ་བསྐྱར་གསོ་དགོས་པའི་སྐུལ་མ་གནང་རྒྱུ་བཅས་རེད་འདུག།
་་་་ཟེར།