དེ་རིང་ཉི་ཧོང་གཞུང་གིས་འཛམ་གླིང་ནང་གི་ལོ་ན་མཐོ་ཤོས་སྟེ། རང་ལོ་༡༡༦ཡིན་པའི་ཉི་ཧོང་གི་རྒན་པོ་ཀེ་མུ་རཱ་འདས་གྲོངས་སུ་གྱུར་བའི་གནས་ཚུལ་ཕྱིར་བསྒྲགས་བྱས་འདུག
དེ་རིང་ཕྱི་ཚེས་ ༡༢ ཉིན་གྱི་ཞོགས་པར་འཛམ་གླིང་ནང་གི་མི་རྒན་ཤོས་འདས་གྲོངས་སུ་ཕྱིན་ཡོད་འདུག་ལ། ཁོང་ནི་ད་ལྟ་རང་ལོ་ ༡༡༦ སོན་ཡོད་པ་དང་། ཉི་ཧོང་གི་ཀེ་ཡོ་ཊང་གྷོ་ (Kyotango) གྲོང་ཁྱེར་ནས་ཡིན་འདུག གྲོང་ཁྱེར་སྲིད་གཞུང་གིས་སྤེལ་བའི་གནས་ཚུལ་ལྟར་ན། རྒན་པོ་ཀེ་མུ་རཱ་ (Jiroemom Kimura) ཁོང་འབྱུང་ཁམས་ཀྱིས་རྐྱེན་པས་གཟའ་ལྷག་པའི་ཞོགས་པར་སྨན་ཁང་དུ་འདས་གྲོངས་སུ་གྱུར་ཡོད་འདུག
༢༠༡༢ ལོར་འཛམ་གླིང་གི་ཡ་མཚན་དངོས་བྱུང་ཟིན་ཐོའི་ནང་ཁོང་འཛམ་གླིང་ནང་མི་རྒན་ཤོས་ལ་ངོས་འཛིན་བྱས་ཡོད་པ་དང་། འཛམ་གླིང་གི་ལོ་རྒྱུས་ཁྲོད་ཀྱི་ཚེ་རིང་ཤོས་ཨང་གཉིས་པ་དེ་ཡིན་པར་བཀོད་འདུག འཛམ་གླིང་ལོ་རྒྱུས་ནང་གི་མི་ཚེ་རིང་ཤོས་ནི་ཧྥ་རན་སིའི་བུད་མེད་ཀལ་མེན་ཊི་ (Jeanne Calment) ཞེས་པ་ཡིན་ཞིང་། ཁོ་མོ་ ༡༩༩༧ ལོར་རང་ལོ་ ༡༢༢ ལ་སོན་སྐབས་འདས་གྲོངས་སུ་གྱུར་ཡོད་འདུག འདི་ལོའི་ཕྱི་ཟླ་ ༤ ནང་ཀེ་མུ་རཱ་ཡི་ལོ་ ༡༡༦ སོན་པའི་སྐྱེ་སྐར་ལ་ཉི་ཧོང་སྲིད་བློན་ཨེ་པེ་ (Shinzo Abe) ཡིས་འཚམས་འདྲིའི་བརྙན་རིས་ཤིག་ཆེད་དུ་ཁོང་ལ་བཏང་ཡོད་འདུག
འདི་ལོར་ཀེ་ཡོ་ཊང་གྷོ་གྲོང་ཁྱེར་ནང་གི་རྒན་ཁོག་གྲངས་༩༤ ལོ་ ༡༠༠ དང་དེ་ལས་མཐོ་བར་སོན་བཞིན་ཡོད་སྟབས། ད་ལྟའི་ཆར་གྲོང་ཁྱེར་དེའི་ནང་གི་མིའི་ཚེ་ཐག་རིང་བོར་གནས་ཐུབ་ཀྱི་ཡོད་པའི་ལྐོག་གྱུར་གྱི་གསང་བ་ཅི་ཞིག་ཡིན་མིན་ཐད་ཞིབ་འཇུག་གི་ལས་གཞི་སྣ་ཚོགས་ཤིག་མགོ་འཛུགས་བྱེད་ཀྱི་ཡོད་འདུག
