ཁ་སང་གཟའ་པ་སངས་ཉིན་བོད་མདོ་སྨད་ཀན་ལྷོ་རྨ་ཆུ་རྫོང་ཆུ་ཁ་མ་ཡུལ་ཚོའི་ནང་བོད་སྐད་ཡིག་སྲུང་སྐྱོབ་སྐོར་གྱི་བགྲོ་གླེང་ཞིག་ཚོགས་ཡོད་འདུག
ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཁ་སང་ཕྱི་ཚེས་ ༡༤ ཉིན་བོད་མདོ་སྨད་ཀན་ལྷོ་ཁུལ་རྨ་ཆུ་རྫོང་ཆུ་ཁ་མ་ཡུལ་ཚོའི་མདུན་ཕྱོགས་རྒྱུ་མདོའི་བཀྲ་ཤིས་ཐང་དུ། ས་གནས་ཀྱི་བོད་ཕ་སྐད་དམ་སྲུང་མཐུན་ཚོགས་ཀྱིས་ཆུ་ཁ་མའི་མི་མང་གི་བསམ་བློ་གོང་འཕེལ་དང་ཀུན་སྤྱོད་ལེགས་ལམ་དུ་འགོད་ཕྱིར་ ༼ འཇིག་རྟེན་མི་ཆོས་དང་བོད་སྐད་ཡིག་སྐོར་གྱི་སློབ་གསོ། མི་ཚེའི་ལམ་སྟོན༽ ཞེས་པའི་བགྲོ་གླེང་ཞིག་གོ་སྒྲིག་གནང་ཡོད་འདུག་ལ། བགྲོ་གླེང་གི་གདན་ཞུ་སྐུ་མགྲོན་དུ་ཁ་ཤུལ་ཚུལ་ཁྲིམས་རྒྱ་མཚོ་དང་དམར་ཤུལ་འཇིགས་མེད་ཚུལ་ཁྲིམས། རྩོམ་པ་པོ་ནགས་ཚང་ནུས་བློ། རྩོམ་པ་པོ་རྨ་ཆུའི་བསམ་གཏན་ཕེབས་ཡོད་པ་དང་། གཞན། ཨ་མཆོག་མཚན་ཉིད་དགོན་གྱི་ཚོགས་ཆེན་ཁྲི་བ་དང་། བོད་ཕ་སྐད་དམ་སྲུང་ཚོགས་པའི་ཚོགས་མི་ཁྱོམ་མཆོག་སྤྲུལ་བློ་བཟང་བཟོད་པ། ཆུ་ཁ་མ་ཡུལ་ཚོའི་སེར་སྐྱ་མང་ཚོགས་དང་ས་གནས་གཞན་ནས་ཡོང་བའི་བོད་མི་བཅས་མི་ ༢༠༠ ལྷག་འདུ་འཛོམས་བྱུང་ཡོད་འདུག
བགྲོ་གླེང་ཐོག་བཀྲ་ཁྱོམ་མཆོག་སྤྲུལ་བློ་བཟང་བཟོད་པ་རྣམ་རྒྱལ་ལགས་ཀྱིས་བསམ་བློ་ཀུན་སྤྱོད་དང་གཙང་སྤྲ་འཕྲོད་བསྟེན་སྐོར་ལ་གཏམ་བཤད་དང་། ཁ་ཤུལ་ཚུལ་ཁྲིམས་རྒྱ་མཚོ་ལགས་ཀྱིས་ཁོར་ཡུག་སྲུང་སྐྱོབ། དམར་ཤུལ་འཇིགས་མེད་ཚུལ་ཁྲིམས་ཀྱིས་བོད་སྐད་ཡིག་སྲུང་སྐྱོབ་སྐོར། ནགས་ཚང་ནུས་བློ་ལགས་ཀྱིས་ཁྲིམས་ལུགས་སྐོར། རྩོམ་པ་པོ་རྨ་ཆུ་བསམ་གཏན་ལགས་ཀྱིས་རིག་གནས་སློབ་གསོའི་སྐོར་བཅས་ཀྱི་གཏམ་བཤད་བགྲོ་གླེང་གནང་ཡོད་འདུག་ལ། ཐེངས་འདི་ནི་ ༢༠༡༣ ལོར་བོད་ཕ་སྐད་དམ་སྲུང་ཚོགས་པའི་ས་གནས་སུ་སྤེལ་བའི་སྐད་ཡིག་སྲུང་སྐྱོབ་སྐོར་གྱི་བྱ་འགུལ་ཐེངས་གཉིས་པ་ཆགས་ཡོད་འདུག
བོད་ཕ་སྐད་དམ་སྲུང་མཐུན་ཚོགས་དེ་ནི། ཕྱི་ལོ་ ༢༠༡༡ ལོའི་ཕྱི་ཟླ་ ༤ ཚེས་ ༡༥ ཉིན་རྨ་ཆུ་རྫོང་ཆུ་ཁ་མ་ཡུལ་ཚོའི་བོད་མི་ཁག་ཅིག་གིས་མ་སྐུལ་དང་བླངས་ཐོག་གསར་འཛུགས་གནང་བ་ཞིག་ཡིན་འདུག་ལ། ད་ལྟའི་བར་ཚོགས་པ་འདིས་ལོ་ལྟར་ས་གནས་སྐྱ་སེར་གཉིས་ལ་ཕ་སྐད་དང་ཁོར་ཡུག་སྲུང་སྐྱོབ་ཀྱི་བྱ་འགུལ་རབ་དང་རིམ་པ་སྤེལ་ཡོད་པ་མ་ཟད། འདི་ལོའི་རྒྱལ་སྤྱིའི་སྐད་ཡིག་ཉིན་མོ་སྲུང་གཙི་གནང་ཡོད་འདུག་ལ། མ་འོངས་པར་ཚོགས་པ་འདིས་ས་གནས་སུ་ཐ་སྙད་གསར་བ་དང་འོད་སྡེར་འགྲེམས་སྤེལ་སོགས་ཀྱི་ལམ་ནས་ཕ་སྐད་སྲུང་སྐྱོབ་ཀྱི་བྱ་འགུལ་སྤེལ་འཆར་ཡོད་འདུག
གསར་འགོད་པ། དོན་གོ
