ཁ་སང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་དགུ་བཅུ་གསུམ་ལས་འགུལ་ཚོགས་པ་ཐུན་མོང་ཐོག་རྒྱལ་སྤྱིའི་མནར་གཅོད་འགོག་པའི་ཉིན་མོ་སྲུང་གཙི་གནང་སོང་།
ཁ་སང་ཕྱི་དྲོའི་ཆུ་ཚོད་ ༤ པའི་སྟེང་ངྷ་ས་མེག་གྷན་ཉིན་སློབ་ཚོགས་ཁང་དུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་དགུ་བཅུ་གསུམ་ལས་འགུལ་ཚོགས་པ་ཐུན་མོང་གིས་བཀོད་སྒྲིག་འོག་རྒྱལ་སྤྱིའི་མནར་གཅོད་ཉིན་མོ་སྲུང་གཙིའི་ལས་འགུལ་ཞིག་སྤེལ་སོང་ལ། ལས་འགུལ་དེའི་ཐོག་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་དགུ་བཅུ་གསུམ་དྲུང་ཆེ་གངས་ལྷ་མོ་ལགས། ཆབ་སྲིད་བཙོན་ཟུར་རྒན་བློ་བཟང་ཡོན་ཏན་ལགས། དེ་མིན། ཆབ་སྲིད་བཙོན་ཟུར་དང་མང་ཚོགས་བཅས་མཉམ་ཞུགས་གནང་སོང་།
ལས་འགུལ་གྱི་ཐོག་མར་བོད་དོན་ཆེད་ཚེ་སྲོག་ཤོར་བ་རྣམས་ལ་མྱ་ངན་གུས་འདུད་ཞུས་རྗེས། རྒྱ་ནག་དམར་གཞུང་གིས་བོད་ནང་དུ་མི་སྤྱོད་ལས་འདས་པའི་མནར་གཅོད་གཏོང་བཞིན་པའི་ཐད་བསྒྲགས་གཏམ་སྤེལ་བ་དང་། རྒྱ་དམར་གྱིས་བོད་ས་ཡོངས་རྫོགས་བཙན་བཟུང་བྱས་རྗེས་ཀྱི་ལོ་རྒྱུས་པར་རིས་འགྲེམས་སྟོན། བོད་ཀྱི་ཆབ་སྲིད་བཙོན་མ་རྣམས་ལ་མནར་གཅོད་གཏོང་སྟངས་ཀྱི་གཏམ་བརྗོད་འཁྲབ་སྟོན་དང་དངོས་བྱུང་གློག་བརྙན་༼གངས་ལྗོངས་མེ་ལྕེ༽ཞེས་པ་མི་མང་ལ་གཟིགས་འབུལ། དེ་བཞིན། ཆབ་སྲིད་བཙོན་ཟུར་རྒན་བློ་བཟང་ཡོན་ཏན་ལགས་ཀྱིས་སྒེར་གྱི་ཉམས་མྱོང་ལོ་རྒྱུས་གསུང་བཤད་བཅས་གནང་སོང་། གཞན། མི་མང་ལ་བརྗོད་ཚིག་འདྲ་མིན་འཁོད་པའི་སྟོད་ཐུང་རིན་མེད་ཐོག་འགྲེམས་སྤེལ་བཅས་གནང་སོང་།
སྐབས་དེར་འཕྲོད་བསྟེན་དྲུང་ལགས་ཀྱིས། “དེ་རིང་ང་ཚོ་འཛོམས་དགོས་པ་དེ་རྒྱལ་སྤྱིའི་མནར་གཅོད་ཉིན་མོ་སྲུང་གཙི་ཞུ་བཞིན་ཡོད་པ་རེད། སྤྱིར་བཏང་མནར་གཅོད་ལ་རིགས་འདྲ་མིན་ཞིག་ཡོད་ཀྱང་། ང་ཚོས་སྲུང་གཙི་བྱེད་པའི་དམིགས་ཡུལ་གཙོ་བོ་ནི་ང་ཚོའི་རྒྱལ་ཁབ་དང་མི་རིགས་ཀྱི་དོན་དུ་སྡུག་སྦྱོང་མནར་གཅོད་གཏོང་གི་ཡོད” ཅེས་བརྗོད་སོང་། ཁོང་གིས་ ༢༠༡༣ ལོའི་ནང་རྒྱལ་སྤྱིའི་མནར་གཅོད་མྱོང་མཁན་བསྐྱར་གསོ་ལྷན་ཁང་གི་ལས་འགུལ་གཙོ་བོའི་བརྗོད་གཞི་༼བསྐྱར་གསོ་རང་དབང༽ སྐོར་གྱི་གཏམ་བཤད་སྤེལ་ནང “ དེ་རིང་ ༢༠༡༣ ལོའི་ཟླ་ ༦ པའི་ཚེས་ ༢༦ ཉིན་ནས་བཟུང་ང་ཚོས་རྡོག་རྩ་གཅིག་སྒྲིལ་གྱིས་ཡར་ལངས་ཏེ་འཛམ་གླིང་ཡོངས་ལ་མནར་གཅོད་ནི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བ་ཞིག་ཡིན་པར་དྲན་སྐུལ་བྱེད་ཀྱི་ཡོད་པ་དང་། མནར་གཅོད་མྱོང་མཁན་ཚང་མར་རང་དབང་བསྐྱར་གསོ་ངེས་པར་ཡོད་དགོས་ཤིང་། ཁོང་ཚོ་ལ་ཁ་ཡོད་ལག་ཡོད་ཀྱི་སྟེང་ནས་ལུས་སེམས་སྨན་བཅོས་དང་རྒྱུན་སྤྱོད་མཁོ་དངོས་སོགས་ཀྱི་རོགས་སྐྱོར་གནང་དགོས” ཞེས་བཀོད་འདུག
དགུ་བཅུ་གསུམ་དྲུང་ཆེ་གངས་ལྷ་མོ་ལགས་ཀྱིས། ཁ་བ་གངས་ཅན་པའི་མི་རིགས་འདི་རྒྱ་ནག་དྲག་པོའི་བཙན་འཛུལ་འོག་འཇམ་རྩུབ་གཉིས་སྣ་མང་གི་མནར་གཅོད་མྱོང་བཞིན་པའི་མི་རིགས་ཤིག་དང་། བོད་ཆོལ་གསུམ་ཡོངས་རྫོགས་བཙོན་རྭ་ཆེན་མོ་ཞིག་རེད་ཅེས་བཤད་ན་མི་འགྲིག་རྒྱུ་གང་ཡང་མེད་སྐོར་དང་། བོད་མི་ཚོས་བོད་པའི་རང་དབང་འཐབ་རྩོད་དོན་དུ་རྒྱ་ནག་དམར་གཞུང་ལ་ངོ་རྒོལ་བྱས་པའི་སྐོར་ལ་བརྗོད་དོན། “ ༡༩༥༩ ནས་ ༢༠༡༣ ལོའི་བར་བོད་མི་རིགས་འདིས་རྒྱལ་གཅེས་ཀྱི་འོས་ལངས་ཆེན་པོ་ཐེངས་ ༤ ཙམ་བྱུང་ཡོད། དེའང་ ༡༩༥༩ ལོར་བོད་ཀྱི་རྒྱལ་ས་ལྷ་སར་ཆོལ་གསུམ་བོད་མི་རྣམས་ཀྱིས་རྒྱ་གཞུང་ལ་ངོ་རྒོལ་འོས་ལངས་བྱས་པ་དང་། ༡༩༨༧ ནས་ ༡༩༨༩ ལོའི་བར་ལོ་གསུམ་རིང་བོད་རིགས་སེར་སྐྱ་མི་མང་གིས་འོས་ལངས་བསྟུན་མར་བྱས་པ་ནི་བོད་མི་རིགས་ཀྱི་སྙིང་སྟོབས་དང་དཔའ་ངར་མཚོན་ཐུབ་པ་དང་། ༢༠༠༨ ལོར་མདོ་སྟོད་སྨད་གཙོས་བོད་ས་ཡོངས་སུ་གཅིག་རྗེས་གཉིས་མཐུད་ཀྱིས་རྒྱ་ནག་དྲག་པོའི་མནར་གཅོད་དང་གདུག་རྩུབ་ལ་སྤོབས་པ་ཞུམ་མེད་པའི་སྒོ་ནས་ངོ་རྒོལ་ལུས་འགུལ་སྤེལ་ཡོད་ཅེས་བརྗོད་སོང་།
ཁོ་མོས་མུ་མཐུད་དུ་བརྗོད་པར། རྒྱ་ནག་སྲིད་དབང་དྲག་འཛིན་པས་ཁོ་ཚོའི་དབང་བསྒྱུར་འོག་གནས་པའི་མི་མང་ཚང་མ་བདེ་སྐྱིད་ཀྱི་འཚོ་བ་དང་དགའ་སྤྲོའི་དཔལ་ལ་རོལ་བཞིན་ཡོད་པ་སོགས་ཧམ་བཤད་ཀྱིས་འཛམ་གླིང་མི་མང་བསླུ་བྲིད་དང་མགོ་སྐོར་གཏོང་ཐབས་སྣ་ཚོགས་བྱེད་བཞིན་ཡོད། དམར་པོའི་སྲིད་གཞུང་འོག་ཏུ་མི་མང་ལ་བདེ་སྐྱིད་དང་འཆམ་མཐུན་ཡོད་པར་རློམ་བཞིན་པའི་དུས་འདིར། བོད་ཆོས་ལྡན་གྱི་ཞིང་འདིར་སེར་སྐྱ་ཕོ་མོ་རྒན་གཞོན་མེད་པར་ད་བར་མི་གྲངས་ ༡༡༩ ཡིས་རང་གི་ལུས་སྲོག་བློས་གཏོང་གིས་རྒྱ་ནག་དམར་པོའི་གཞུང་གི་འུར་བརྗོད་ཀྱི་རྫུན་གཏམ་དེ་དག་རྩ་གཏོར་དུ་བཏང་ཟིན་ཡོད་པ་རེད་ཅེས་སོགས་བརྗོད་བྱུང་།
མཐའ་མར། ཆབ་སྲིད་བཙོན་ཟུར་རྒན་བློ་བཟང་ཡོན་ཏན་ལགས་ཀྱིས་ཁོ་རང་གིས་མངོན་སུམ་དུ་མྱངས་པའི་གནས་ཚུལ་སྐོར་དང་། རྗེས་སུ་རྒྱ་གར་ནང་བཙན་བྱོལ་དུ་འབྱོར་རྗེས་ཀྱི་མི་ཚེའི་བསམ་བློ་འགྱུར་བ་འགྲོ་སྟངས་སྐོར་སོགས་བཤད་སོང་།
རང་དབང་བསྐྱར་གསོ་ཡོང་ས་མ་རེད། ཕྱི་ཟླ ༥ཚེས༨ཉིན། སྲིད་སྐྱོང་བློ་བཟང་སེང་གེ་ལགས་ཀྱིས་ཨ་རིའི་གྲོས་ཚོགས་ཀྱི་ཚོགས་མི་ཁག་ཅིག་ལ་གཏམ་བཤད་སྤེལ་སྐབས། ཁས་ལེན་གསུམ་གནང་འདུག ༡ གུང་ཁྲན་ཏང་གི་དབུ་ཁྲིད་ངོས་ལེན་གྱིས་མང་གཙོ་རྩོད་ཀྱི་མིན། ༢ རང་སྐྱོང་དེའང་དུས་བཀག་ནང་ག་ལེར་སྤྲད་ཆོག ༣ བོད་ནང་དམག་མི་ག་ཚད་འཇོག་མིན་དབུས་གཞུང་གི་ཐག་གཅོད་གནང་ཆོག
མནར་གཅོད་མྱངས་ཟིན་པའི་བཙོན་ཟུར་ཞིག་གིས།
ལུས་སེམས་གཉིས་ཀའི་མནར་གཅོད་མྱོང་བ་པོ།།
གངས་ཅན་བོད་འབངས་སྙིང་རྗེའི་ཡུལ་དུ་གྱུར།།
ཞུ་འབོད་སྙན་ཞུ་བསྒྲགས་གཏམ་ལ་སོགས་པ།།
སེམས་ཁམས་གསོ་བའི་སྨན་ཐུན་ཙམ་དུ་གྱུར།།