ནོར་བསམ་གྱིས་བསྒྱུར།
སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་དགུང་གྲངས་ ༧༨ ལ་ཕེབས་པའི་༸སྐུའི་འཁྲུངས་སྐར་ཉིན་མོར་བཀའ་དྲིན་རྗེས་དྲན་ཆེད་ 《ཏཱ་ལའི་བླ་མ། སྙིང་རྗེའི་རྒྱ་མཚོ།》 ཞེས་པའི་ཕྱག་དེབ་ནང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ པའི་༸སྐུའི་འཁྲུངས་སྐར་དུས་ཆེན་ལ་རྒྱལ་སྤྱིའི་ཆེས་སྙན་གྲགས་ཅན་གྱི་མི་སྣས་ཕུལ་བའི་འཚམས་འཕྲིན་ཁག་ལས་རེ་ཟུང་བོད་བསྒྱུར་ཞུས་པ་དགེའོ།།
ལྡི་ལི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་གིས་བརྩམས།
སྔོན་གླེང་།
༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ནི་འགྲོ་བ་མིའི་མངོན་འདོད་ཚད་མཐོ་ཤོས་ཏེ་སྡུག་བསྔལ་ཞི་བར་བྱེད་མཁན་དང་། བདེ་སྐྱིད་བསྐྲུན་མཁན་ལ་ཡུལ་ལུང་ཀུན་གྱི་མི་རྣམས་ཀྱིས་ངོས་འཛིན་ཞུ་བཞིན་ཡོད། ༸གོང་ས་༸སྐྱབས་མགོན་ཆེན་པོས་འགྲོ་བ་མིའི་བཟོད་སྒོམ་གྱི་བརྡ་ལན་སྤྲོད་ཆེད་སྐུ་ངལ་མཛད་མེད་ཀྱིས་རྒྱལ་ཁབ་ ༦༢ ལ་ཆིབས་བསྒྱུར་བསྐྱངས་ཏེ་སྟོབས་དང་དབང་ཤུགས་ལྡན་པའི་མི་དང་། ཉམ་ཆུང་རང་དབང་བྲལ་བའི་མི་ཀུན་ལ་བྱམས་བརྩེའི་གཟིགས་པ་གཅིག་མཚུངས་གནང་གི་ཡོད།
༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ལ་ཕེབས་ཀྱི་ཡོད་རུང་འཛམ་གླིང་ཡོངས་ཀྱི་དབུ་འཁྲིད་དང་། སྙན་གྲགས་ཅན་གྱི་མི་སྣ། རིག་གཞུང་སྒྱུ་རྩལ་ཆེད་མཁས་ཀྱི་མི་སྣ་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་བྱུང་བ་ལས་ཁོང་ཚོའི་མི་ཚེར་བསྒྱུར་བ་བྱུང་སྐོར་ཁོང་གི་བཀྲ་ཤིས་པའི་འཁྲུངས་སྐར་དུས་བཟང་ལ་འཚམས་འཕྲིན་ཕུལ་ཡོད། རྣལ་འབྱོར་བ་ཅི་དྷ་ནན་དྷ། ས་ར་ས་ཝ་ཏི། (Swami Chidananda Saraswati) མཆོག་གིས་སྤྱི་ནོར་༸གོང་ས་ཏཱ་ལའི་བླ་མ་མཆོག་ནི་ “གོ་ལའི་སྟེང་གི་ནམ་ཡང་བརྗིད་ཆགས་ངང་གནས་ཞིང་བློ་མུན་ཡོངས་སུ་སངས་པའི་གང་ཟག་ཁྲོད་ནས་གཅིག་ཡིན་པ་དང་། ཁོང་གི་གཟི་འོད་འཛམ་གླིང་ས་ཐག་རིང་ཐུང་ཚང་མར་འཕྲོ་གི་ཡོད་ལ། ཁོང་ནི་དོན་དངོས་སུ་འོད་ཀྱི་ཁང་པ་ཞིག་དང་འདྲ་བར་འཛམ་གླིང་དེ་ཉིད་དོན་དམ་པའི་ཞི་བདེ་དང་། བྱམས་བརྩེའི་ཕྱོགས་སུ་འཁྲིད་ཀྱི་ཡོད།”
བོད་ནང་༸སྐུ་གཞོན་ནུའི་སྐབས།
༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ལྷ་མོ་དོན་གྲུབ་མཆོག་བོད་བྱང་ཤར་ཁུལ་སྟག་འཚེར་གྲོང་གསེབ་གཅིག་གི་ནང་ཞིང་པའི་ཁྱིམ་ཚང་ཞིག་ཏུ་ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་འཁྲུངས་པ་དང་། དགུང་གྲངས་གཉིས་ལ་ཕེབས་སྐབས་༸རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོའི་ཡང་སྲིད་སྐུ་ཕྲེང་བཅུ་བཞི་པར་ངོས་འཛིན་ཞུས། ཕྱི་ལོ་ ༡༩༤༠ ཟླ་ ༡༠ ཚེས་ ༢༢ ཉིན་ལྷ་སའི་ཕོ་བྲང་པོ་ཏཱ་ལར་ཁོང་གཞུང་འབྲེལ་ཁྲི་གསོལ་ཞུས་པ་དང་ཟུར་དུ་གནས་པའི་བོད་ནང་ནས་ཁོང་ལ་དགོན་སྡེའི་ཤེས་ཡོན་ཐོབ་ཡོད།
ཕྱི་ལོ་ ༡༩༤༩ ལོ་རྒྱ་ནག་གིས་བོད་ལ་བཙན་འཛུལ་བྱས་རྗེས་༸གོང་ས་༸སྐྱབས་མགོན་ཏཱ་ལའི་བླ་མ་དགུང་གྲངས་ ༡༥ ཕེབས་སྐབས་ཕྱི་ལོ་ ༡༩༥༠ ལོར་ཁོང་གིས་ཆབ་སྲིད་སྐུ་དབང་ཡོངས་རྫོགས་བཞེས། ཕྱི་ལོ་ ༡༩༥༤ ལོར་༸གོང་ས་༸སྐྱབས་མགོན་ཆེན་པོ་མཆོག་མའོ་ཙེ་ཏུང་དང་། ཏིང་ཞའོ་ཕིང་། ཀྲའོ་ཨི་ལན་སོགས་རྒྱ་ནག་འགོ་འཁྲིད་ལྷན་དུ་ཞི་བའི་གྲོས་མོལ་ཆེད་པེ་ཅིང་ལ་ཆིབས་བསྒྱུར་གནང་། ཕྱི་ལོ་ ༡༩༥༩ དགུང་གྲངས་ ༢༤ ལ་ཕེབས་སྐབས་རྒྱ་ནག་དམར་ཤོག་གི་དྲག་གནོན་ཤུགས་ཆེ་རུ་ཕྱིན་པར་བརྟེན་ཁོང་རྒྱ་གར་དུ་བཙན་བྱོལ་ལ་མི་ཕེབས་ཀ་མེད་བྱུང་།
༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་ལ་མ་ཕེབས་སྔོན་ཕུགས་གྱང་རིང་པོའི་འཛིན་སྐྱོང་དང་ས་ཞིང་ལེགས་བཅོས་གཏོང་ཆེད་ཁོང་གིས་མི་མང་གིས་གཞུང་གི་དཔོན་རིགས་ཞུ་གཏུགས་བྱས་པ་ཁག་ལ་ཉན་ཞིབ་བྱེད་མཁན་གྱི་དམིགས་བསལ་ལེགས་བཅོས་ལས་ཁུངས་བཙུགས་གནང་ཀྱང་། རྒྱ་མི་བཙན་འཛུལ་བྱས་པར་བརྟེན་འབད་རྩོལ་གནང་ཡང་འགལ་རྐྱེན་བཟོས་ཡོད།
བཙན་བྱོལ་ནང་གི་མང་གཙོ།
ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་བོད་མི་མང་སྤྱི་འཐུས་འོས་བསྡུ་ཐོག་མར་དབུ་བཙུགས་ཞུས་པ་དང་། ཕྱི་ལོ་ ༡༩༦༣ ལོར་མ་འོངས་བོད་ཀྱི་རྩ་ཁྲིམས་ཟིན་བྲིས་བཟོས་པ་རེད།
ཕྱི་ལོ་ ༡༩༩༠ ཟླ་ ༥ ནང་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་སྤྱི་ཚོགས་ནང་དོན་དང་ལྡན་པའི་མང་གཙོའི་འཛིན་སྐྱོང་དགོས་པར་གཟིགས་ནས་རྨང་ནས་ལེགས་བཅོས་གཏོང་སྒོ་བརྩམས་པ་རེད། བཙན་བྱོལ་ནང་གི་འཛིན་སྐྱོང་དབང་ཚད་ཡོད་པའི་སྡེ་ཚན་མཐོ་ཤོས་ནི་བཀའ་ཤག་གྲོས་ཚོགས་ཚོགས་དུས་བཅུ་པ་བར་ཁོང་གི་བསྐོ་བཞག་གནང་གི་ཡོད་ཀྱང་། བཙན་བྱོལ་ནང་གི་གྲོས་ཚོགས་ཚོགས་དུས་བཅུ་པ་ནས་མེད་པ་ཆགས་པ་རེད། བར་བརྒལ་དུས་སྐབས་སུ་ཕྱོགས་མཐའ་ཁག་གི་བོད་མིའི་འཐུས་ཚབ་ཡོད་པའི་དམིགས་བསལ་ཚོགས་ཆེན་ཐོག་བཀའ་ཤག་གི་མི་སྣ་གསུམ་འོས་འདེམས་བྱས་པ་དང་། ལོ་འདི་རང་ལ་བོད་མི་ཚོས་སྤྱི་འཐུས་འོས་འདེམས་བྱས་པ་དང་། གྲོས་ཚོགས་ནས་བཀའ་བློན་རྣམ་པ་འོས་འདེམས་བྱས་པ་རེད།
ཕྱི་ལོ་ ༢༠༡༠ ཟླ་ ༣ ཚེས་ ༡༠ ཉིན་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཁོང་གི་ཆབ་སྲིད་སྐུ་དབང་འོས་འདེམས་བྱས་པའི་འགོ་འཁྲིད་ལ་གནང་རྒྱུ་ཁྱབ་བསྒྲགས་གནང་བ་རེད། ཕྱི་ལོ་ ༢༠༡༡ ཟླ་ ༥ ཚེས་ ༢༩ ཉིན་བོད་མི་མང་སྤྱི་འཐུས་གྲོས་ཚོགས་ནས་བཅའ་ཁྲིམས་ནང་གསལ་༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པའི་ཆབ་སྲིད་སྐུ་དབང་ལ་བསྐྱར་བཅོས་གནང་བར་བརྟེན་ལོ་ངོ་ ༣༦༩ ལོ་རྒྱུས་ལྡན་པའི་ཏཱ་ལའི་བླ་མས་བོད་ཀྱི་ཆོས་དང་འཇིག་རྟེན་གཉིས་ཀའི་ཐོག་ནས་བོད་ལ་དབང་བསྒྱུར་བྱས་པའི་མཇུག་རྫོགས་པ་རེད། མཉམ་རུབ་ཀྱི་ནུས་པས་མ་འོངས་པར་ཡོང་རྒྱུ་བསྡད་པའི་ལོ་ངོ་དུ་མའི་ནང་འཐབ་རྩོད་རྒྱུན་གནས་ཐུབ་རྒྱུ་ཡིན་པས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཐུགས་ཐག་བཅད་པ་དེས་མི་མང་ལ་དོན་དམ་པའི་དབང་ཚད་གནང་བ་རེད།
གྲོས་མོལ་དང་། འགྲིགས་འཇགས།
ཕྱི་ལོ་ ༡༩༨༧ ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་བོད་ནང་ཞི་བདེ་དང་འགྲོ་བའི་མིའི་ཐོབ་ཐང་སླར་གསོ་ཡོང་ཆེད་ཞི་བའི་གྲོས་འཆར་དོན་ཚན་ལྔ་སྤེལ་བ་རེད། བོད་རིགས་གནས་སྡོད་བྱེད་སའི་ས་ཁུལ་ལ་མིང་དོན་མཚུངས་པའི་རང་སྐྱོང་ཡོང་ཐབས་སུ་ཁོང་གི་མི་མང་ཚོར་ཚད་ལས་བརྒལ་བའི་དྲག་གནོན་དང་འཚེ་བ་བྱས་རུང་མུ་མཐུད་དེ་འཚེ་མེད་ཞི་བའི་ལམ་ནས་གྲོས་མོལ་དང་། གཞན་གྱི་ཚོར་བར་མྱོང་རོལ་གྱིས་སྙིང་རྗེའི་ལམ་ནས་ཞུ་གཏུགས་སྐྱོན་གྱི་ཡོད། ཕྱི་ལོ་ ༢༠༠༢ ལ་རྒྱ་ནག་དང་ཐད་ཀར་འབྲེལ་བ་བསྐྱར་གསོ་བྱས་པ་ནས་བཟུང་༸གོང་ས་༸སྐྱབས་མགོན་མཆོག་གིས་སྐུ་ཚབ་དང་། རྒྱ་ནག་གཞུང་གི་སྐུ་ཚབ་དབར་སྐད་ཆ་ཐེངས་ཁ་ཤས་བཤད་ཡོད། བསམ་ཚུལ་བརྗེ་ལེན་གནང་རིང་དམིགས་བསལ་སྐུ་ཚབ་རྣམ་པས་རྒྱ་ནག་གི་དབུ་ཁྲིད་ཚོར་ “བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ཀྱི་བསམ་འཆར།” ཞེས་པ་དང་། ཞུ་སྙན་དེའི་གལ་ཆེའི་གནད་དོན་ཁག་ལ་གསལ་བཤད་ སྤྲད་ཡོད་ཀྱང་རྒྱ་ནག་ཕྱོགས་ནས་ཞི་བའི་གྲོས་འཆར་ཁག་ལ་བཟང་ཕྱོགས་ཀྱི་ཡ་ལན་གང་ཡང་སྤྲད་མེད། ༸གོང་ས་༸སྐྱབས་མགོན་ཆེན་པོ་མཆོག་གིས་ཞི་བའི་ཐོག་དང་གཉིས་ཕན་ལམ་ནས་བོད་ཀྱི་རྩ་དོན་སེལ་རྒྱུར་དབུ་མའི་ལམ་ཐོག་ནས་མུ་མཐུད་འཐབ་རྩོད་གནང་གི་ཡོད།
༸སྐུ་ཚེའི་ཐུགས་བསྐྱེད་དམ་བཅའ་གསུམ།
༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ལ་དམ་བཅའ་གསུམ་ཡོད་ཅེས་གསུངས་ཀྱི་ཡོད། འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་། ཆོས་ལུགས་ཕན་ཚུན་མཐུན་གཤིབ། ཁོང་གི་མི་མང་གི་ངོ་ཚབ་བྱས་ཏེ་གོ་རྟོགས་སྤེལ་ཆེད་བཀའ་སློབ་གནང་རྒྱུ་བཅས་གསུམ་རེད། ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཐུགས་བསྐྱེད་དམ་བཅའ་གསུམ་པོ་འཁྱེར་ནས་བོད་དང་རྒྱ་ནག་དབར་གྲོས་མོལ་གནང་བ་ཙམ་མིན་པར་ནང་ཆོས་དང་དེང་དུས་ཚན་རིག་དབར་ལ་ཡང་གྲོས་མོལ་གནང་གི་ཡོད། གང་ཡིན་ཟེར་ན་བོད་ཀྱི་ནང་ཆོས་ཀྱི་རིག་གཞུང་དར་ཁྱབ་ཀྱི་རིན་ཐང་ལ་རྒྱ་ནག་ནང་དང་ཕྱི་ཕྱོགས་ཀྱི་རྒྱ་རིགས་ཚོས་བརྩི་མཐོང་བྱེད་ཤུགས་ཆེ་རུ་འགྲོ་བ་མ་ཟད་ཚན་རིག་གི་སྡེ་ཁག་ནས་ཀྱང་བརྩི་མཐོང་ངམ་བསྔགས་བརྗོད་བྱེད་ཤུགས་ཆེ་རུ་འགྲོ་གི་ཡོད།
འཛམ་གླིང་ཁྱོན་ཡོངས་ཀྱི་ངོས་འཛིན།
༸གོང་ས་ཏཱ་ལའི་བླ་མ་མཆོག་གིས་བོད་མི་མང་གི་ཐོབ་ཐང་དང་རང་དབང་གི་ཆེད་དུ་འཚེ་མེད་ཞི་བའི་ལམ་ནས་འཐབ་རྩོད་གནང་བར་ཕྱི་ལོ་ ༡༩༨༩ ཟླ་ ༡༢ ཚེས་ ༡༠ ཉིན་ནོར་བེལ་ཞི་བདེའི་གཟེངས་རྟགས་ཐོབ་པ་དང་། ༸གོང་ས་༸སྐྱབས་མགོན་ཆེན་པོ་མཆོག་ནོར་བེལ་གཟེངས་རྟགས་ཐོབ་མཁན་འཁྲོད་ནས་གོ་ལ་ཡོངས་ཀྱི་ཁོར་ཡུག་གི་དཀའ་ངལ་ཐུགས་སྣང་གནང་མཁན་ཐོག་མ་དེ་རེད།
ཕྱི་ལོ་ ༢༠༠༧ ཟླ་ ༡༠ ཚེས་ ༡༧ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གཞུང་ནས་རྒྱལ་ཁབ་ཀྱི་ཡུལ་མིའི་ཆེ་བསྟོད་གཟེངས་རྟགས་ཚད་མཐོ་ཤོས་དེ་ཕུལ་ཡོད། ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཞི་བདེ་དང་། འཚེ་བ་མེད་པ། འགྲོ་བ་མིའི་ཐོབ་ཐང་། ཆོས་ལུགས་གོ་རྟོགས་བཅས་ཀྱི་ཐོག་ལ་གཞན་དང་མི་འདྲ་བའི་ལེགས་སྐྱེས་ཕུལ་བར་བརྟེན་གཟེངས་རྟོགས་འབུལ་བཞེས་མཛད་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་འགྱུར་བ་མེད་པའི་ཐོག་ནས་ཞི་བ་དང་། འཚེ་བ་མེད་པ། ཆོས་ལུགས་ཕན་ཚུན་མཐུན་གཤིབ། ཀུན་ཁྱབ་སེམས་འཁུར། སྙིང་རྗེ་བཅས་ཀྱི་ལམ་སྟོན་གནང་བར་བརྟེན་ཆེ་བསྟོད་ཀྱི་མཁས་དབང་གི་ཕྱག་འཁྱེར་དང་། གཟེངས་རྟགས། བྱ་དགའ་བརྒྱ་ལྷག་ཐོབ་ཡོད་ལ། ཆིབས་བསྒྱུར་མཛད་འཆར་ཧ་ལས་པ་ཡོད་མིན་ལ་མ་ལྟོས་པར་ཁོང་གིས་དབྱིན་ཡིག་ཐོག་ཕྱག་དེབ་བརྒྱ་ལྷག་རྩོམ་བྲིས་གནང་ཡོད།
དེང་སྐབས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ནི་གུས་བརྩི་ཚད་མཐོ་ཤོས་ཞུ་སའི་ཆོས་ཕྱོགས་ཀྱི་དབུ་འཁྲིད་གཅིག་དང་། ཡོངས་ཁྱབ་ཀྱི་ཞི་བདེ་དང་། འཚེ་བ་མེད་པ། སྙིང་རྗེའི་མཚོན་རྟགས། རང་དབང་དང་། ཐོབ་ཐང་། ཆེ་མཐོང་བཅས་ཀྱི་ཆེད་དུ་བོད་མི་མང་གི་ཞི་བའི་འཐབ་རྩོད་ཀྱི་ནུས་པའི་མཚོན་རྟགས་ཆེ་ཤོས་བཅས་རེད།
ཨ་རིའི་སྲིད་འཛིན་ཟུར་པ་སྦིལ་ཁི་ལིན་ཀྲོན་གྱིས་ཁོང་ལ་ཕུལ་བའི་འཚམས་འདྲིའི་ནང་དེ་ལྟར་བྲིས་ཡོད་ “ང་ཚོས་ཁོང་གི་འཁྲུངས་སྐར་ལ་འབུལ་རྒྱུའི་ཕྱག་རྟགས་ལེགས་ཤོས་ནི་ང་ཚོས་ཁོང་གིས་བསྟན་པའི་དཔེ་མཚོན་འཚེ་བའི་ལས་གཡོལ་ནས་གྲོས་མོལ་བྱེད་རྒྱུ་དང་། འགྲོ་བ་མིའི་རང་གཤིས་བཟང་པོ་ཉམས་སུ་ལེན་རྒྱུ། ལྷན་སྐྱེས་ཀྱི་ཡོན་ཏན་ལ་ངོས་འཛིན་བྱེད་རྒྱུ། འགྲོ་བ་མི་ཀུན་གྱི་ཆེ་མཐོང་དང་། འགྲོ་བ་མིའི་ལུས་རྟེན་དང་འཚོལ་ཞིབ་བྱེད་རྒྱུའི་རྣམ་དཔྱོད་ཐོབ་པར་དགའ་ཚོར་བྱེད་དགོས་པ། དམའ་ས་འཛིན་པའི་ཀུན་སྤྱོད། སྤྲོ་སྣང་ལྡན་པའི་སེམས་པ་བཅས་ཀྱི་རྗེས་སུ་འཇུག་རྒྱུ་དེ་རེད།“
དང་པོ། བི་ཇི་པི་ (BJP) ཆབ་སྲིད་ཚོགས་པའི་གྲོས་ཚོགས་ཀྱི་ཚོགས་གཙོ་དང་། རྒྱ་གར་གྱི་སྲིད་བློན་གཞོན་པ་ཟུར་པ་ ལཱལ། ཀིར་ཤི་ན། ཨཌ་ཝ་ནི་ (Lal Krishna Advani) མཆོག་གིས་༸སྐུའི་འཁྲུངས་སྐར་ལ་ཕུལ་བའི་འཚམས་འཕྲིན།
༸གོང་ས་ཏཱ་ལའི་བླ་མ་མཆོག་དྲག་གནོན་འོག་བོད་ནས་བྲོས་འབྱོལ་ལ་ཕེབས་ཏེ་རྒྱ་གར་ནང་ཕ་ཡུལ་གཉིས་པ་བཟུང་བ་ནས་ངས་ཁོང་དང་ལྷན་དུ་ཐེངས་མང་པོ་མཇལ་འཕྲད་དང་བཀའ་མོལ་ཞུས་མྱོང་ཡོད་ལ། ངོས་གཉིས་དབར་མཛའ་བརྩེ་དང་། གཉིས་མོས་ཀྱི་གུས་བརྩི་ཆེན་ཆེན་པོ་ཡོད།
ཕྱི་ལོ་ ༢༠༡༠ ཟླ་ ༡༡ ནང་ཧ་རི་དི་ཝར་ (Haridwar) དང་། རི་སཧི་ཀི་ཤ (Rishikesh) ལ་བསྐྱོད་སྐབས་ཏཱ་ལའི་བླ་མ་མཆོག་གིས་ང་ལ་བག་ཆགས་གཏིང་ཟབ་པོ་བཞག་བྱུང་། སྐབས་དེ་དུས་ང་ཚོ་དཔེ་དེབ་དབུ་འབྱེད་ཀྱི་མཛད་སྒོ་ཞིག་གི་ཐོག་ལ་ཡོད་པ་དང་། ཏཱ་ལའི་བླ་མ་མཆོག་གི་ཉེ་འཁྲིས་སུ་སྙན་གྲགས་ཆེ་བའི་རྣལ་འབྱོར་(Yoga)སློབ་འཁྲིད་པ་སློབ་དཔོན་རམ་དེབ་ (Swami Ramdev) བཞུགས་ཡོད་པས་ཐོག་མར་ཁོང་གིས་རམ་དེབ་མཆོག་ལ་འཚམས་འདྲི་གནང་བ་དང་། དེ་ནས་ཁོང་གིས་རམ་ཌིབ་མཆོག་གི་ཨག་ཚོམ་ཤུགས་དྲག་ཆེན་པོས་འཐེན་གནང་སོང་། ང་རང་ཡ་མཚན་བྱུང་བར་བརྟེན་རྣལ་འབྱོར་བ་རམ་དེབ་མཆོག་གིས་བཞད་མོ་བཞད་ནས་བརྗོད་དོན། ཁོང་གིས་ང་ཚོ་ག་དུས་ཐུག་ཀྱང་རྟག་ཏུ་དེ་ལྟར་གནང་གི་རེད། དེ་ནི་ཁོང་གི་བྱིས་པ་ལྟ་བུའི་ལྷད་མེད་ཀྱི་ངང་ཚུལ་ཞིག་ཡིན་པས་ཁོ་རང་མཉེས་པོ་ཡོང་གི་ཡོད།
ང་རང་སྡོད་སའི་རི་ཤི་ཀི་ཤའི་ཨ་ཤ་རམ་དེའི་ནང་ཏཱ་ལའི་བླ་མ་མཆོག་ལ་ཡི་རངས་ཞུ་མཁན་དང་། རྗེས་སུ་འཇུག་མཁན་མང་པོ་འདུག་པ་ལས་གཅིག་ནི་རྒྱ་མི་ཝིག་ཀྲོར་ཆན་ཡིན་པ་དང་། ཁོང་གིས་ཏཱ་ལའི་བླ་མ་མཆོག་གི་སྐོར་ལ་བྲིས་པའི་ཕུལ་བྱུང་གི་དཔེ་དེབ་ བཟོད་སྒོམ་ཀྱི་ཤེས་རབ། བཅོས་མིན་གྱི་གྲོས་མོལ་དང་འགྲུལ་བཞུད། ཞེས་པའི་ངོ་བཤུས་ཤིག་སྤྲད་བྱུང་།
དཔེ་དེབ་དེའི་ནང་ཏཱ་ལའི་བླ་མ་མཆོག་ཡེ་ཤུའི་ཆོས་ལུགས་གསར་མའི་བློན་ཆེན་ཞིག་དང་། ཡེ་ཤུའི་རྣམ་དག་ཆོས་ལུགས་ཀྱི་མཆོད་དཔོན་གཅིག་གི་དཀྱིལ་ལ་བཞུགས་ཏེ་དངོས་བདེན་ཐོག་ཁོང་གི་རང་ཆས་སུ་གྲུབ་པའི་ཐུགས་བརྩེ་དང་། ཆོས་ལུགས་དང་མཐུན་པའི་མིག་ལྟོས་བཟང་པོ་ཞིག་སྟེ་མི་གཉིས་པོ་ཁོང་གི་ཉེ་འཁྲིས་སུ་འཐེན་ནས་འཐམ་འཁྱུད་གནང་བ་དང་། ཁོང་གི་སྤྱན་གྱི་གཟི་འོད་འཕྲོས་པ་དང་ལྷན་ཁོང་ཚོའི་ཨག་ཚོམ་འཐེན་སྐབས་མི་ཚོགས་ཡོངས་དགའ་སྤྲོ་རབ་ཏུ་འཕེལ་སྐོར་གསལ་འདུག
དཔེ་དེབ་དེ་ཀློག་སྐབས་ཏཱ་ལའི་བླ་མ་མཆོག་གི་གུས་ཞབས་དང་། ཁ་ཞེ་གཉིས་མེད་ཀྱི་འཁོན་འཛིན་སྤངས་བའི་སྤྱོད་བཟང་། དྲང་བདེན་གྱི་ཁ་ནང་དུ་ཕྱོགས་པའི་དཔྱད་པ་མཉམ་བསྲེས་དུ་མ་བཅས་གསལ་སྟོན་བྱེད་ཀྱི་འདུག ཏཱ་ལའི་བླ་མ་ཁོང་གི་ཧ་ཅང་སྙན་གྲགས་ཆེ་བའི་ཡོན་ཏན་དེ་དག་སེམས་པ་བཟང་པོ་དང་། ཡ་རབས་ཀྱི་སེམས་པ་ཞེས་པ་ལྟ་བུ་གནད་དོན་ཆུང་ཆུང་ཞིག་གི་ཐོག་ནས་བརྗོད་ཀྱི་འདུག ཁོང་གིས་ “སྐབས་རེ་ང་ལ་སུན་སྣང་ཕྲན་བུ་སླེབས་ཀྱི་འདུག་ཀྱང་ངའི་སེམས་ནས་གཞན་ལ་ལེན་ཁ་སྤྲད་པ་དང་། གཞན་ལ་ལྡོག་ཕྱོགས་ཀྱི་བསམ་བློ་རྩ་བ་ཉིད་ནས་བཏང་མྱོང་མེད།” ཅེས་ཁོང་གི་དེབ་ནང་བརྗོད་འདུག ཁོང་ལ་མི་ཚང་མ་འགྲོ་བ་མི་ཡིན་པའི་ཆ་ནས་བདེ་སྐྱིད་ཀྱི་རྗེས་སུ་སྙེག་མཁན་གཅིག་མཚུངས་ཡིན་པ་གཟིགས་ཐུབ་པའི་མཁྱེན་འཇོན་མངའ་ཡོད་སྐོར་ལུང་འདྲེན་དེ་ལྟར་བྱས་འདུག “ལུས་ཀྱི་པགས་་པ་འདིའི་འོག་རང་གཤིས་དང་། དགོས་འདུན། སེམས་ཚོར་བཅས་གཅིག་མཚུངས་ཡོད་པས་ངས་དུས་རྒྱུན་དུ་མི་གཞན་ལ་བདེ་སྐྱིད་ཀྱི་ཚོར་སྣང་སྦྱིན་གྱི་ཡོད།“
གཉིས་པ། ཨ་རིའི་སྲིད་འཛིན་ཟུར་པ་ཇོར་ཇི་ ཌབ་ལུ་ སྦུ་ཤི་ (George W. Bush) མཆོག་གིས་༸སྐུའི་འཁྲུངས་སྐར་ལ་ཕུལ་བའི་འཚམས་འཕྲིན།
༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་མི་ལོ་ ༧༥ རིང་བོད་ནང་དང་། འཛམ་གླིང་ཁྱོན་ཡོངས་ལ་ཕྱག་ལས་ཡག་པོ་གནང་བ་ཁག་ལ་ཆེ་བསྟོད་ཀྱི་འཚམས་འདྲི་ཞུ་རྒྱུ་ཡིན། ང་རང་སྲིད་འཛིན་ཡིན་པའི་ཆ་ནས་ང་ལ་དུས་བཟང་ཁ་ཤས་ཀྱི་སྐབས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་མཇལ་རྒྱུའི་བསྐལ་བཟང་བྱུང་། མི་ཧ་ཅང་མང་པོ་ཞིག་ལ་བསྐལ་བ་བཟང་པོ་བྱུང་བ་ལྟར་ངས་མི་བཟང་པོ་ཁོང་ནི་ཞི་བདེ་དང་། ལྷག་བསམ། དཀའ་རྙོག་བར་སྡུམ་གནང་མཁན་གྱི་མི་ཞིག་ལ་ངོས་འཛིན་ཞུ་གི་ཡོད།
ང་ཚོའི་ལོ་རྒྱུས་ཐོག་ནས་ཨ་རིས་གཉའ་གནོན་མྱོང་མཁན་དང་། བཙན་གནོན་ཕོག་མཁན་ལ་རང་དབང་དང་རེ་བའི་བསླབ་བྱ་གནང་མཁན་གྱི་ཕྱོགས་སུ་ལང་གི་ཡོད་པས་ང་ཚོའི་རྒྱལ་ཁབ་ཀྱིས་འཛམ་གླིང་དང་བར་ཐག་རིང་བའི་ཡུལ་ལ་བཞུགས་པའི་ཆོས་ཀྱི་དབུ་འཁྲིད་དམའ་ས་འཛིན་མཁན་ཁོང་དང་། འཇིག་རྟེན་བཟོད་སྒོམ་དང་ཞི་བདེའི་དཔེ་མཚོན། ཡིད་ཆེས་གནང་མཁན། རང་གི་མི་མང་ཆེད་དུ་རེ་བའི་མེ་ལྕེ་བཟུང་མཁན་ཁོང་གདན་འདྲེན་ཞུས་པ་རེད་ལ། ཁོང་གི་ཐུགས་སེམས་བཟང་པོ་དེས་ང་དང་ལུ་ར་ (Laura) ཚུད་པའི་ཨ་རིའི་མི་མང་ཡོངས་ཀྱི་དགའ་མོས་དང་བརྩེ་སེམས་ཐོབ་ཡོད།
ངས་ཚོར་སྣང་ཟབ་པོའི་ཐོག་ནས་ཏཱ་ལའི་བླ་མ་མ་ཆོག་གིས་གུས་བརྩི་དང་ཆོས་ལུགས་རང་དབང་གི་དཔེ་སྟོན་གནང་བར་བཀའ་དྲིན་རྗེས་དྲན་ཞུ་གི་ཡོད་ལ། ཁོང་གིས་དགུང་ལོ་ ༧༥ བཟང་ཕྱོགས་སུ་སྐྱེལ་བར་ཐུགས་རྗེ་ཆེ་ཞུ་གི་ཡིན། ༸གོང་ས་༸སྐྱབས་མགོན་ཆེན་པོ་མཆོག་ལ་ང་དང་ལུ་ར་ (Laura) ཚུད་པའི་ཨ་རི་བ་ཡོངས་ཀྱིས་ད་དུང་ལོ་མང་པོའི་རིང་ཕྱག་ལས་ཡག་པོ་གནང་ཐུབ་པའི་སྨོན་འདུན་ཞུ་གི་ཡོད། ང་ཚོས་མུ་མཐུད་ནས་ཁྱེད་དང་ཁྱེད་ཀྱི་རླབས་ཆེན་གྱི་དགོངས་གཞིའི་ཆེད་གསོལ་འདེབས་ཞུ་རྒྱུ་དང་། ང་ཚོའི་སྨོན་འདུན་ལེགས་ཤོས་དེ་འབུལ་གི་ཡོད།
