རྒྱ་ནག་གཞུང་གིས་རང་ལུས་མེར་བསྲེཊ་དང་འབྲེལ་བ་ཡོད་པའི་ཉེས་མིང་འོག་བོད་མདོ་སྨད་མགོ་ལོག་ཁུལ་གྱི་བོད་མི་གསུམ་ལ་བཙོན་འཇུག་ཁྲིམས་ཐག་བཅད་འདུག
སྔར་ལོའི་ཕྱི་ཟླ་ ༡༢ པའི་ཚེས་ ༣ ཉིན་བོད་མདོ་སྨད་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་པདྨ་རྫོང་དུ། པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས། རང་ལུས་མེར་བསྲེཊ་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྟེ་འདས་གྲོངས་སུ་ཕྱིན་ཡོད་པ་ལྟར། སྐབས་དེར་ས་གནས་མང་ཚོཊ་ཀྱིས་ངོ་རྒོལ་བྱས་ཏེ་སྐུ་ཕུང་ཉེན་རྟོག་པ་དང་དམག་མིའི་ལག་ཏུ་ཤོར་དུ་མ་བཅུག་པར་ཕྱིར་རང་དགོན་དུ་གདན་འདྲེན་ཞུས་ཐུབ་ཡོད་ཀྱང་། རྒྱ་གཞུང་གིས་གནས་ཚུལ་དེར་རྐྱེན་བྱས་ཏེ་བོད་མི་ཁག་ཅིག་འཛིན་བཟུང་བཀག་ཉར་བྱས་ཡོད་པ་མ་ཟད། ཉེ་ཆར་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་ཡོད་པའི་ཁྲིམས་ཁང་ཞིག་གིས། ཉིན་དེར་ས་གནས་སུ་གྲྭ་བློ་བཟང་དགེ་འདུན་ལགས་ཀྱི་སྐུ་ཕུང་ནང་མིར་སྤྲོད་དགོས་པའི་ངོ་རྒོལ་ལས་འགུལ་ནང་ཞུགས་པའི་ཉེས་མིང་འོག མགོ་ལོག་པདྨ་རྫོང་ཡར་ཐང་ཤང་གི་རང་ལོ་ ༥༡ ཡིན་པའི་རྡོབ་ཕྲུག་ལ་ལོ་ ༡༠ བཙོན་འཇུག་ཁྲིམས་ཆད་དང་། རང་ལོ་ ༤༠ ཡིན་པའི་པདྨ་རྫོང་གི་དབུ་རྒྱན་ལ་ལོ་ ༡ དང་ཟླ་ ༩ ཁྲིམས་ཆད། པདྨ་རྫོང་རྡོ་གོང་མ་ཤང་ནས་ཡིན་པ་ཆོས་སྐྱབས་ལགས་སུ་ལོ་ ༡ དང་ཟླ་ ༦ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
