སྨན་རྩིས་ཁང་བཙུཊ་ཏེ་ལོ་ ༡༠༠ འཁོར་བའི་དུས་དྲན་སྲུང་གཙི་བྱེད་རྒྱུ་རེད།

དེ་རིང་ངྷ་ས་དབུས་སྨན་རྩིས་ཁང་གིས་གསར་འགོད་གསལ་བསྒྲགས་སྤེལ་ཏེ། ཕྱི་ལོ་ ༢༠༡༦ ཟླ་ ༣ པ་ནས་བཟུང་༧གོང་ས་བཅུ་གསུམ་པ་ཆེན་པོ་མཆོག་གིས་སྨན་རྩིས་ཁང་གསར་འཛུགས་གནང་སྟེ་ལོ་ ༡༠༠ འཁོར་བའི་དུས་དྲན་སྲུང་གཙི་ཞུ་རྒྱུ་ཡིན་ཟེར།

དེ་རིང་སྔ་དྲོའི་ཆུ་ཚོད་ ༡༢ སྟེང་ངྷ་རམ་ས་ལའི་དབུས་སྨན་རྩིས་ཁང་གི་ཚོགས་ཁང་དུ་དབུ་ལས་སློབ་ཕྲུག་དང་། གསར་འགོད་པ་བཅས་ལྷན་འཛོམས་ཐོག སྨན་རྩིས་ཁང་གི་དབུ་འཛིན་བཀྲ་ཤིས་ཚེ་རིང་དང་དྲུང་ཆེ་ཚེ་རིང་ཕུན་ཚོགས་རྣམ་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། འབྱུང་འགྱུར་ ༢༠༡༦ ལོའི་ཕྱི་ཟླ་ ༣ ཚེས་ ༢༣ ཉིན་ནས་བཟུང་ལོ་གཅིག་ཧྲིལ་བོར། རྒྱ་གར་གཙོས་རྒྱལ་ཁབ་ཁ་ཤས་ཀྱི་གྲོང་ཁྱེར་ནང་། རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་ ༡༩༡༦ ལོར་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཐོག་མར་གསར་འཛུགས་གནང་སྟེ་ལོ་ ༡༠༠ འཁོར་པའི་དུས་དྲན་རྒྱ་ཆེན་པོ་ཞིག་སྲུང་གཙི་བྱ་འཆར་ཡོད་པ་དང་། དུས་དྲན་དེའི་ལས་རིམ་ནང་གཙོ་བོ་སྨན་རྩིས་ཁང་དབུ་བརྙེས་ནས་ལོ་བརྒྱ་འཁོར་བའི་རིང་གི་གནས་ཚུལ་དང་དར་རྒུད་ཅི་བྱུང་། ༧སྐུའི་བླ་སྨན་ཞིང་གཤེགས་པ་བསྟན་འཛིན་ཆོས་གྲགས་དང་བླ་སྨན་བློ་བཟང་དབང་རྒྱལ་སོགས་ཀྱིས་རྒྱ་དམར་གྱི་བཙོན་འོག་ནས་དཀའ་སྡུག་མནར་གཅོད་མྱངས་པའི་ལོ་རྒྱུས་ཁྱབ་བསྒྲགས། ལྷ་ས་སྨན་རྩིས་ཁང་དང་ངྷ་ས་སྨན་རྩིས་ཁང་གཉིས་ཀྱི་ཐོན་དངོས་སྨན་དང་དཔེ་དེབ་རིགས་འགྲེམས་སྟོན་བཅས་ནང་རྒྱུ་ཡིན་འདུག  

དུས་དྲན་དེའི་ཆེད་གྲ་སྒྲིག་ཚོགས་ཆུང་འཛུགས་ཕྱོགས་སྐོར་བཀོད་དོན། “གཞི་རྒྱ་ཆེ་ལ་གལ་གནད་ཆེ་བའི་ལས་འགུལ་འདིར་ཚོགས་ཆུང་བཞི་སྟེ། ལས་འགུལ་ཚོགས་ཆུང་དང་འབྲེལ་མཐུད་ཚོགས་ཆུང་། འཛིན་སྐྱོང་ཚོགས་ཆུང་། དངུལ་རྩིས་ཚོགས་ཆུང་བཅས་རིམ་བཞིན་ཆེད་འཛུགས་དང་། ལྷ་ས་སྨན་རྩིས་ཁང་ལ་རམ་འདེགས་བྱ་རྒྱུ། སྨན་རྩིས་ཁང་དབུ་བརྙེས་ཏེ་ལོ་ངོ་བརྒྱ་ཐམ་པ་འཁོར་བའི་དུས་དྲན་སྲུང་གཙི་ཞུ་རྒྱུའི་དགོས་དངུལ་ས་བོན་དུ། སྨན་རྩིས་ཁང་གི་ལས་བྱེད་དང་ལས་མི་སོ་སོའི་ཕོགས་གླ་ནས་ཆུ་ཚོད་ ༡༠༠ འབབ་དངུལ་ཞལ་འདེབས་འབུལ་གནང་ཡོང་བའི་རེ་སྐུལ་དང་། སྨན་དང་སྐར་རྩིས་སློབ་ཕྲུག་ཚོའི་ངོས་ནས་སྨན་སྦྱོར་ཁང་ངམ་ལས་ཡུལ་གཞན་དུ་ཆུ་ཚོད་ ༡༠༠ པའི་ཞབས་ཞུ་གནང་སྐྱོང་ཡོང་བ་ཞུ་རྒྱུ་ཡིན་”ཞེས་འཁོད་འདུག

ཡང་གསར་འགོད་གསལ་བསྒྲགས་དེར་ “༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོས་བོད་ཀྱི་རྒྱལ་ས་ལྷ་སར་སྨན་རྩིས་ཁང་གསར་འཛུགས་གནང་སྟེ། སྐུའི་བླ་སྨན་དང་སྤྱི་ཁྱབ་མཁན་པོ་གཅིག་ལྕོགས་གནང་མཁན་མི་རྗེ་བཀྲས་ཁང་དངོས་གཞི་བྱམས་པ་ཐུབ་དབང་གི་དངོས་སློབ་མཁྱེན་རབ་ནོར་བུ་མཆོག་སྨན་རྩིས་དང་ལྕགས་པོ་རི་རིག་བྱེད་གྲྭ་ཚང་གཉིས་ཀའི་འགན་འཛིན་གཅིག་ལྕོགས་གནང་དགོས་པའི་ཕྱག་རྟགས་ཕེབས། ༡༩༤༧ ལོར་ཐེངས་ལྔ་བའི་སློབ་མ་བསྡུ་རྒྱུའི་གསལ་བསྒྲགས་བསྐྱངས་ཏེ། མདོ་དབུས་ཁམས་གསུམ་ནས་སློབ་ཕྲུག་བསྡུས་པའི་ཐོག འབྲུག་དང་ལ་དྭགས་སོགས་ནས་ཀྱང་བསྡུས་ཡོད”ཅེས་བཀོད་འདུག

གསར་འགོད་གསལ་བསྒྲགས་དེར་མུ་མཐུད་ལྷ་ས་སྨན་རྩིས་ཁང་དང་བཙན་བྱོལ་དུ་བཙུགས་པའི་སྨན་རྩིས་ཁང་གཉིས་ཀྱི་སྐོར་ལ་ “༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་དང་བོད་མི་ཁྲི་ཕྲག་ཁ་ཤས་བོད་དུ་བཞུགས་མ་ཐུབ་པར་ཁྱིམ་མཚེས་རྒྱ་གར་དང་བལ་ཡུལ། འབྲུག འབྲས་ལྗོངས་སོགས་སུ་བཙན་བྱོལ་དུ་ཕེབས་རྗེས་རྒྱ་དམར་གཞུང་གིས་སྨན་རྩིས་ཁང་གི་རྗེས་ཤུལ་ཙམ་ཡང་ལྷག་མེད་བཟོ་འཆར་གྱིས། ༡༩༧༠ ལོར་སྨན་རྩིས་ཁང་དུ་གྲོང་ཁྱེར་མི་དམངས་སྨན་ཁང་སྤོ་རྒྱུ་དང་། མཁས་དབང་མཁྱེན་རབ་ནོར་བུའི་བཞུགས་གནས་སྤོར་དགོས་པ་བཟོས་ཡོད་ཀྱང་། ལྷ་ས་སྨན་རྩིས་ཁང་དུ་ནད་བསྟེན་གཏུག་བྱེད་མཁན་མང་པོ་བྱུང་བའི་དབང་གིས་འགྱུར་ལྡོག་གཏོང་མ་ཐུབ་པར་ད་བར་མུ་མཐུད་འཛིན་སྐྱོང་བྱེད་དགོས་བྱུང་ཡོད། ༡༩༦༡ ཟླ་ ༣ ཚེས་ ༢༣ ཉིན་ངྷ་སར་སྨན་རྩིས་ཁང་བསྐྱར་འཛུགས་དང་། སྨན་པའི་ཐུགས་འགན་བླ་སྨན་ཡེ་ཤེས་དོན་ལྡན་གྱིས་གནང་སྟེ་སྨན་རྒྱུའི་མ་རྩ་སྐུ་སྒེར་ཡིག་ཚང་ནས་གསོལ་བསྩལ་གྱིས་རྒྱུན་བཀོལ་སྨན་སྣ་གྲངས་འགའ་སྡེབས་སྦྱོར་དང་། རྡོ་གཞོང་ཆུང་ངུ་ཞིག་གི་ནང་བརྡུང་སྦྱོར་བྱས་ནས་ནད་པར་སྨན་སྦྱིན་གནང་མགོ་ཚུགས་”ཞེས་གསལ་འདུག

ངྷ་ས་སྨན་རྩིས་ཁང་འདི་ཉིད་རྒྱ་གར་གཞུང་གིས་སྨན་སྦྱོར་ཆོག་མཆན་ཇི་ལྟར་ཐོབ་པའི་སྐོར་བཀོད་དོན། “༡༩༦༣ ལོར་རྒྱ་གར་དབུས་གཞུང་འཕྲོད་བསྟེན་ལྷན་ཁང་ནས་རྟོགས་ཞིབ་ཆེད་རྒྱ་གར་ཚེ་ཡི་རིག་བྱེད་ལ་མཁས་པ་སྨན་པ་ཌ་ཤཱི་(Dr. Baghwan Dash) ཟེར་པ་ངྷ་སར་ཆེད་གཏོང་གིས་རྒྱ་གར་ས་ཐོག་ཏུ་དབུས་འཕྲོད་བསྟེན་ལྷན་ཁང་གི་ཆོག་མཆན་མེད་པར་བོད་སྨན་ལག་ལེན་མི་ཆོག་པར་བཤད་ཀྱང་། རིམ་བཞིན་བོད་སྨན་གྱིས་མི་དམངས་ལ་ཕན་ནུས་ཅི་འདྲ་ཡོད་མེད་ཕྱི་ནང་གསང་གསུམ་གྱི་ལམ་ནས་ཉམས་སད་དང་ཚོད་ལྟ། འདྲི་རྩད་སྔ་ཕྱིར་གནང་མཐར་བོད་སྨན་འདི་ལོ་རྒྱུས་ཁུངས་བཙན་པ་དང་། ཚན་རིག་དང་མཐུན་པའི་རིག་གཞུང་ཚད་ལྡན་ཞིག་ཡིན་པ་ཤེས་རྟོགས་དང་། ཡིད་ཆེས་ངེས་པ་རྙེད་དེ་ཆོག་མཆན་ཐོབ་པ་མ་ཟད། རྒྱ་གར་གཞུང་འཕྲོད་བསྟེན་ལས་ཁུངས་ཀྱིས་ཉམ་ཐག་ནད་པ་རྣམས་ཀྱི་ཆེད་ནད་པ་བཅུའི་ཉལ་ཁྲི་དང་ཉལ་ཆས། བཤག་བཅོས་ཡོ་བྱད། ནད་གཡོག་གཅིག་དང་མ་བྱན་གཅིག་གི་གྲོན་དངུལ་བཅས་མཐུན་འགྱུར་གནང་”ཞེས་གསལ་འདུག

གསར་འགོད་པས་དབུ་འཛིན་བཀྲ་ཤིས་ཚེ་རིང་ལགས་སུ་ལྷ་སའི་སྨན་རྩིས་ཁང་ལ་རམ་འདེགས་ཅི་ལྟར་གནང་འཆར་ཡོད་མེད་དྲིས་པར་ཁོང་གིས། དུས་དྲན་དེ་ཉིད་ཧ་ཅང་གལ་ཆེན་པོ་ཡིན་སྟབས་ལྷ་ས་སྨན་རྩིས་ཁང་ནས་ཀྱང་དུས་དྲན་སྲུང་གཙི་བྱ་ངེས་པ་དང་། དེར་ཁོང་ཚོའི་ངོས་ནས་རམ་འདེགས་གང་དགོས་ཞུ་འཆར་ཡོད་ཚུལ་དང་། སྨན་རྩིས་ཁང་དང་དུས་དྲན་སྲུང་གཙི་ནི་ཆབ་སྲིད་དང་འབྲེལ་བ་མེད་སྟབས། དུས་དྲན་གོ་སྒྲིག་དང་དུས་དྲན་སྲུང་གཙི་སོགས་ཀྱི་ཐད་ཕན་ཚུན་བར་གོ་བསྡུར་དང་སྨན་པ་གདན་ཞུ་ཡོང་ཐབས་ལ་འབད་བརྩོན་བྱ་འཆར་ཡོད་སྐོར་བརྗོད་བྱུང་།