དེ་རིང་ཕྱི་ཟླ་ ༨ པའི་ཚེས་ ༡༥ ཉིན་གྱི་ཞོགས་པའི་ཆུ་ཚོད་ ༩།༠༠ བའི་ཐོག་དབུས་བོད་མིའི་སྒྲིག་འཛུགས་བཀའ་ཤག་མདུན་ཐང་དུ། སྲིད་སྐྱོང་བློ་བཟང་སེང་གེ་མཆོག་གཙོས་པའི་ཕྱག་རོགས་བཀའ་བློན་རྣམ་པ་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ཟུང་དྲུང་ཡན་གྱི་སྲི་ཞུ་ལས་བྱེད་བཅས་འདུ་འཛོམས་ཀྱིས་རྒྱ་གར་གྱི་རྒྱལ་གླུ་གྱེར་འདོན་དང་། སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་བཅས་གནང་སྟེ། གནས་ཡུལ་རྒྱ་གར་གཞུང་ལ་རང་བཙན་ཐོབ་ཏེ་མི་ལོ་ ༦༧ འཁོར་བའི་དུས་དྲན་ཉིན་མོ་སྲུང་གཙི་གནང་སོང་།
དུས་དྲན་མཛད་སྒོའི་ཐོག་སྲིད་སྐྱོང་མཆོག་གིས་གསར་འགོད་པར། དེ་རིང་ཕྱི་ཟླ་ ༨ པའི་ཚེས་ ༡༥ ཉིན་ནི་རྒྱ་གར་གྱི་གལ་ཆེ་བའི་ཉིན་མོ་ཞིག་ཡིན་པས་བོད་མིའི་སྒྲིག་འཛུགས་ཀྱི་ངོས་ནས་ཉིན་མོ་འདི་སྲུང་གཙི་གནང་གི་ཡོད་པ་དང་། འདས་པའི་ལོ་ ༥༠ ལྷག་གི་རིང་རྒྱ་གར་གཞུང་གིས་བོད་མིའི་སྒྲིག་འཛུགས་དང་། རྒྱ་གར་གནས་སྡོད་བོད་མི་སྐྱབས་བཅོལ་བར་ཁ་ཞེ་གཉིས་མེད་ཀྱིས་མཐུན་འགྱུར་རོགས་རམ་གནང་ཡོད་སྟབས། ཁོང་གིས་བོད་མིའི་སྒྲིག་འཛུགས་ཀྱིས་ཚབ་བྱས་ཏེ་རྒྱ་གར་གཞུང་མང་གཉིས་ལ་རང་བཙན་ཉིན་མོར་འཚམས་འདྲི་དང་སྙིང་ཐག་པ་ནས་ཐུགས་རྗེ་ཆེ་ཞུས་གནང་སོང་།
དེ་བཞིན་སྲིད་སྐྱོང་མཆོག་གིས་གཞིས་བཞུགས་བོད་མི་ཚོར། “ ང་རང་གི་ངོས་ནས་རྒྱ་གར་ང་ཚོའི་མིག་དཔེ་བཟང་པོ་ཞིག་རེད་བསམ་གྱི་ཡོད། ཕྱོགས་གཅིག་ནས་ཁོང་ཚོ་དམངས་གཙོའི་ལམ་ལུགས་རེད་ལ། ཁོང་ཚོའི་རྩ་དོན་འཐབ་རྩོད་དེ་ཡང་ཞི་བའི་ལམ་ནས་འཐབ་རྩོད་གནང་སྟེ་ལེགས་འགྲུབ་བྱུང་ཡོད་པ་རེད། ང་ཚོས་ད་ལྟའི་ཆར་དམངས་གཙོ་ལམ་ལུགས་ལག་བསྟར་དང་ཞི་བའི་ལམ་ནས་རྩ་དོན་རྩོད་བཞིན་ཡོད་སྟབས། རྩ་དོན་དེ་འགྲུབ་ཐུབ་པ་ཞིག་ཡིན་པ་རྒྱ་གར་མིག་དཔེ་ཡག་ཤོས་རེད་བསམ་གྱི་འདུག འཛམ་གླིང་སྤྱི་ཡོངས་སུ་རྒྱལ་ཁབ་དང་རྩ་དོན་འཐབ་རྩོད་བྱེད་མཁན་ ༥༠ མན་གྱིས་ཞི་བའི་ལམ་ནས་རྩ་དོན་འཐབ་རྩོད་བྱས་ཏེ་འགྲུབ་ཡོད་པ་རེད། ང་ཚོའི་ངོས་ནས་ཀྱང་རེ་བ་གཅིག་པུ་མིན་པར་ལོ་རྒྱུས་དང་ཞི་བའི་ལམ་ནས་རྩ་དོན་བསྒྲུབ་བཞིན་ཡོད་སྟབས། རྩ་དོན་འགྲུབ་པའི་དུས་ཚོད་ཅིག་ཏན་ཏན་ཤར་རྒྱུ་རེད་བསམ་གྱི་འདུག ”ཅེས་གསུངས་བྱུང་།
རྒྱ་གར་རང་བཙན་ཐོབ་ནས། མི་ལོ་ ༦༧ འཁོར་བའི་དུས་དྲན་ཉིན་མོར། རྒྱ་གར་མི་སེར་ཡོངས་ལ། བཀྲ་ཤིས་བདེ་ལེགས་ཞུའོ།། །།
སྒྲིག་འཛུགས་ཀྱིས་དུས་ཆེན་སྲུང་གཙི་བྱེད་པ་མ་གཏོགས་གཞན་་་་་་་་་་་་་་་་་་་་།
རྒྱ་གར་རང་བཙན་ཐོབ་པའི་ཉིན་མོ་ལ་བཀྲ་ཤིས་བདེ་ལེགས་ཞུ། སྤྱིར་བཏང་བོད་མི་ཚོས་རྒྱ་གར་རང་བཙན་ཉིན་མོ་སྲུང་བརྩི་ཞུ་དགོས་དང་དགོས། རྒྱ་གར་ནི་ང་ཚོར་གནས་ཚང་གཡར་མཁན་གྱི་རྒྱལ་ཁབ་སྙིང་ཉེ་ཤོས་དང་ཤ་ཚ་ཤོས་དེ་རེད། ཡིན་ནའང་བཙན་བྱོལ་བོད་མི་ཚོར་དུས་དྲན་མང་དྲགས་ན་ལས་ཀ་འཐུས་ཤོར་ལ་འགྲོ་ཉེན་ཆེན་པོ་ཡོད་པ་རེད།
རྒྱ་གར་རྒྱལ་ཁབ་ཆེན་པོའི་རང་དབང་ཉིན་མོར་གཞུང་མང་ཀུན་ལ་མཛའ་བརྩེའི་འཚམས་འདྲིའི་བཀྲིས་བདེ་ལེགས་ཞུ།