ཁམས་ཡུལ་ཤུལ་དགེ་འབྲོང་རྫ་སྟོད་རྫོང་དུ་རྒྱ་མི་མང་པོ་ཡོང་སྟེ་གཏེར་ཁ་སྔོག་རྩིས་བྱེད་སྐབས། ཡུལ་མི་ཚོས་ངོ་རྒོལ་བྱས་ཏེ་བཀག་འགོག་བྱས་ཡོད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༡༣ ཉིན་ཁམས་ཡུལ་ཤུལ་ཁུལ་དགེ་འབྲོང་རྫ་སྟོད་རྫོང་ཨ་སྟོད་ཡུལ་ཚོའི་སྟོད་ཕྱོགས་སུ་རྒྱ་མིའི་གཏེར་ཁ་སྔོག་འདོན་པ་ ༡༠༠ ཙམ་དང་། སྤྱི་རྫ་ཡུལ་ཚོར་གཏེར་ཁ་སྔོག་འདོན་པ་ ༢༠༠ ཙམ། རྫ་ཆེན་ཡུལ་ཚོར་གཏེར་ཁ་སྔོག་འདོན་པ་ ༡༥༠ ཙམ་ཡོང་སྟེ་ས་གནས་སུ་གཏེར་ཁ་སྔོག་རྩིས་བྱེད་སྐབས། ཡུལ་ཚོ་དེ་གསུམ་གྱི་མི་མང་ ༤༠༠༠ ཡས་མས་ཤིག་འཛོམས་ཏེ་རྒྱ་མིའི་གཏེར་ཁ་སྔོག་འདོན་པར་ངོ་རྒོལ་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཐེངས་འདིར་རྒྱ་ནག་ས་ཁམས་བརྟག་དཔྱད་པས་ས་གནས་དེ་དག་ནང་ཕ་ལམ་དཀར་པོའི་གཏེར་ཁ་ཡོད་པ་ཤེས་རྟོགས་བྱུང་སྟེ། གཏེར་སྔོག་པ་ཚོས་རྫ་ཆེན་གྱི་རི་བོ་ར་འདྲའི་མགར་བ་མཆེད་བརྒྱད་ཀྱི་ཕྱོགས་དང་། སྤྱི་རྫ་རྫ་དགུའི་གཞུང་། ཨ་སྟོད་ཕྱོགས་ཀྱི་རི་བོ་སྟོང་དཔོན་རྡོ་རྗེ་རབ་གསལ་བཅས་སུ་གཏེར་ཁ་སྔོག་འཆར་བྱས་སྐབས། ས་གནས་དེ་གསུམ་གྱི་མི་མང་འདུ་འཛོམས་ཀྱིས་ངོ་རྒོལ་བྱས་ཏེ་གནས་སྐབས་རིང་བཀག་འགོག་བྱས་ཐུབ་ཡོད་ཀྱང་། ཉེ་ལམ་རྒྱ་གཞུང་གིས་མི་མང་གི་སྣེ་འཁྲིད་པ་ཡིན་པའི་ཉེས་འཛུགས་འོག་རྫ་ཆེན་རྒྱལ་མཚན་དང་བསྟན་འོད། ཨ་སྟོད་ཁེ་ཚ་བསོད་རྡོར་དང་། ན་ག་བུ་རྫི། གཡག་སྦྲའི་ཁྲ་རྦོ། སྤྱི་རྫ་ཁྲོམ་པའི་བུ་ཁྲ་བཅས་ལ་འཇུ་བཟུང་བྱ་རྒྱུའི་ཉེན་བརྡ་བཏང་བ་དང་། ད་ཆར་ཡང་ས་གནས་སུ་དམག་མི་མང་པོ་འགྲེམས་འཇོག་གིས་འཇིགས་སྐུལ་དྲག་གནོན་བྱེད་ཀྱི་ཡོད་པ་སོགས་ལས། མི་མང་གིས་མི་འགྱངས་པར་རྒྱ་གཞུང་གིས་བཙན་དབང་འོག་དངོས་སུ་གཏེར་ཁ་སྔོག་འདོན་བྱ་ངེས་པའི་ཚོད་དཔག་བྱེད་ཀྱི་ཡོད་འདུག
སྔར་ལོའི་ཕྱི་ཟླ་ ༧ ནང་ས་གནས་མི་མང་གིས་དགེ་འབྲོང་རྫ་སྟོད་རྫོང་རི་བོ་རྫ་ཆེན་ར་འདྲའི་མགར་བ་མཆེད་བརྒྱད་དུ་གཏེར་ཁ་སྔོག་འདོན་པར་ངོ་རྒོལ་བྱས་སྐབས། རྒྱ་ནག་གཞུང་གིས་མི་མང་ལ་འཇིགས་སྐུལ་ཉེན་བརྡ་བཏང་ཡོད་པ་མ་ཟད། སྐབས་དེར་གཏེར་ཁ་སྔོག་བྱེད་ཀྱི་འཕྲུལ་ཆས་དེར་ཐོག་གིས་བརྒྱབ་ནས་སྐྱོན་བྱུང་བ་དེ་ཡང་མི་མང་གིས་ཆེད་དུ་བཟོས་ཡོད་ཚུལ་གྱི་སྐྱོན་འདོགས་བྱས་ཏེ་སུན་གཙེར་རབས་དང་རིམ་པ་བཟོས་ཡོད་འདུག
བོད་ནང་གཏེར་ཁ་སྔོག་འདོན་གྱིས་ཐོན་རྫས་བྱུང་བའི་རིན་བབ་དེ། རྒྱ་གཞུང་གི་དཔལ་འབྱོར་གྱི་བརྒྱ་ག་ཚོད་ཙམ་ཟིན་ཡོད་དམ།