ལུང་ཤར་རྡོ་རྗེ་ཚེ་རྒྱལ་རྗེས་དྲན།

ཟླ་འདིའི་ཚེས་མགོར་ཡུལ་ཤུལ་ནང་ཆེན་དུ་ན་གཞོན་རྩོམ་པ་པོ་སྐོར་ཞིག་གིས། ལུང་ཤར་རྡོ་རྗེ་ཚེ་རྒྱལ་ཞིབ་འཇུག་དང་རྗེས་དྲན་བགྲོ་གླེང་ཞེས་པ་ཞིག་ཚོགས་ཡོད་འདུག

ཟླ་འདིའི་ཕྱི་ཚེས་ ༡༡ ཉིན་ཡུལ་ཤུལ་ནང་ཆེན་རྫོང་ཐོག་ཏུ། ཁམས་སྟོད་ཀྱི་ན་གཞོན་རྩོམ་པ་པོ་སྐོར་ཞིག་གི་གོ་སྒྲིག་འོག ༼ལུང་ཤར་ཞིབ་འཇུག་གི་ཚོགས་འདུ་ཐེངས་དང་པོ།༽ཞེས་པའི་རིག་གནས་བགྲོ་གླེང་ཞིག་ཚོགས་ཡོད་པ་དང་། བགྲོ་གླེང་དེའི་ཐོག་ས་གནས་དེ་ཁུལ་གྱི་ན་གཞོན་རྩོམ་པ་པོ་བེ་དུང་དང་། ཁམས་འཛུམ་གྲོལ། བསམ་གཏན། མཆོད་ཀོང་། ཁེར་འབུད་སོགས་འཛོམས་ཡོད་འདུག འདི་ནི་བོད་རིགས་ན་གཞོན་ཚོས་ལུང་ཤར་རྡོ་རྗེ་ཚེ་རྒྱལ་ལ་རྗེས་དྲན་དང་ཁོང་གི་ལོ་རྒྱུས་སྐོར་ལ་བགྲོ་གླེང་གནང་བ་དང་པོ་དེ་ཆགས་ཡོད་འདུག ལུང་ཤར་མཆོག་གི་སྐོར་ལ་དེ་སྔོན་ནུབ་བྱང་མི་རིགས་སློབ་ཆེན་དུ་ཞོགས་ལྗང་སོགས་ཀྱིས་རྗེས་དྲན་བགྲོ་གླེང་གོ་སྒྲིག་ཐེངས་འགར་ཞུ་རྩིས་བྱས་ཀྱང་ཕྱི་ནང་གི་འགོག་རྐྱེན་འོག་ལེགས་འགྲུབ་བྱུང་ཡོད་མི་འདུག

ལུང་ཤར་མཆོག་གི་ལོ་རྒྱུས་མདོ་བསྡུས། ལུང་ཤར་རྡོ་རྗེ་ཚེ་རྒྱལ་མཆོག་ནི་ ༡༨༨༡ ལོར་ཡབ་ལུང་ཤར་ལྷུན་གྲུབ་རྡོ་རྗེ་དང་། ཡུམ་རྨོའོ་བདེ་ཆེན་པད་མོ་གཉིས་ཀྱི་བུར་གཞིས་རྩེ་མཐོང་སྨོན་རྫོང་རྟ་ནག་ཁུལ་དུ་སྐྱེས། ཤིང་དགུང་ལོ་ ༨ སྟེང་ཡབ་འདས་རྗེས་ཡུམ་གྱི་གཅེས་སྐྱོང་འོག་རིག་གནས་མང་པོར་སློབ་སྦྱོང་གིས་གསོ་བ་རིག་པར་མཁྱེན་རྒྱ་ཡངས་ཤིང་། གཞས་དང་ཞབས་བྲོ་རོལ་ཆ་སོགས་ལ་ཧ་ཅང་མཁས།  

དགུང་གྲངས་ ༢༠ ལ་ཕེབས་སྐབས་རྟ་ནག་སྒེར་ལྷས་ཁུད་པའི་བུ་མོ་མདུན་ཐབས་སུ་བཞེས་ཏེ་ཕྲུ་གུ་ཆ་པ་རུ་ཟུར་དབང་ཆེན་གཡུ་ལྷ་དང་སྒྲོལ་མ་ཕུག་པད་མ་གཉིས་བཙས་ཤིང་། དེའི་རྗེས་ལྷ་སར་ཕེབས་ཏེ་དཔོན་རིགས་ཁོངས་སུ་ཞུགས་ནས་རྩིས་ཁང་གི་རྩིས་པ་གནང་སྐབས་ཁོང་གི་སྐུ་ཟླ་འདས་གྲོངས་སུ་ཕྱིན་ཡོད། ལོ་གསུམ་ཙམ་རྗེས་སླར་ཡང་བསྟན་འཛིན་སྒྲོལ་དཀར་ལགས་དང་འཁྲུངས་ས་བསྐྱོན་ཏེ་ཕྲུ་གུ་བུ་ལྔ་དང་བུ་མོ་གཅིག་འཁྲུངས།   

༡༩༡༡ ལོར་༧གོང་ས་ཏཱ་ལའི་བླ་མ་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ནས་ཕྱིར་ལྷ་ལྡན་དུ་ཞབས་སོར་འཁོད་དེ་བོད་པའི་སྤྱི་ཚོགས་ཡར་རྒྱས་སུ་གཏོང་རྒྱུར་རིག་པ་གསར་བ་བསླབ་དགོས་པའི་ཐུགས་འདུན་འོག ༡༩༡༣ ལོར་སྐུ་དྲག་གི་ཁོང་ནས་བུ་ཕྲུག་ ༤ འདེམ་སྒྲུག་གིས་དབྱིན་ཡུལ་དུ་གཏོང་སྐབས། ལུང་ཤར་ལགས་སྣེ་འཁྲིད་པར་བསྐོ་བཞག་གནང་། སྐབས་དེར་ཁོང་ཅག་གིས་དབྱིན་ཡུལ་དུ་སློབ་སྦྱོང་བྱས་པ་མ་ཟད། ཧྥ་རན་སི་དང་ཨི་ཊ་ལི་སོགས་སུ་ལྟ་སྐོར་དུ་ཕྱིན་ཡོད་པ་དང་། དབྱིན་སྐད་དབྱིན་ཡིག་གང་འཚམ་སློབ་སྦྱོང་གནང་ཡོད་འདུག

ཁོང་ཅག་ཕྱིར་ལོག་རྗེས་ལུང་ཤར་མཆོག་ལ་༧གོང་ས་བཅུ་གསུམ་པས་དམིགས་བསལ་གཟིགས་སྐྱོང་གནང་སྟེ་རྩིས་དཔོན་གྱི་གོ་གནས་གནང་ཡོད་འདུག སྐབས་དེར་བོད་གཞུང་གིས་དམག་བསྡུ་སྐོང་དང་སྒྲིག་གཞི་དག་སྒྲིག་གནང་གི་ཡོད་སྟབས། དམག་ཕོགས་ལྡེང་གི་མེད་སྟབས་འབྲུ་རིགས་འཕར་མ་བསྡུ་རྒྱུའི་འཆར་གཞི་བཟོས་ཏེ “འབབ་ཞིབ” ལས་ཁུངས་ཞེས་པ་བཙུགས་ཤིང་། དོ་དམ་པར་ལུང་ཤར་དང་བློ་བཟང་བསྟན་སྐྱོང་གཉིས་བསྐོས་ཡོད་འདུག ༧གོང་ས་མཆོག་གིས་ཁོང་ལ་ ༼དམག་སྤྱིའི་འཚོ་འཛིན༽ཞེས་པའི་ལས་འགན་ཡང་གནང་ཡོད་ཀྱང་། ༧གོང་ས་བཅུ་གསུམ་པ་སྐུ་གཤེགས་པ་དང་བསྟུན་ཏེ། སྐུ་དྲག་མི་དྲག་དག་གིས་ཁོང་ལ་ངན་སེམས་འཆང་མགོ་བརྩམས་ཡོད།

ལུང་ཤར་མཆོག་དབྱིན་ཡུལ་སོགས་ཕྱི་རྒྱལ་ཁག་ལ་ཕེབས་པའི་ཤུགས་རྐྱེན་གྱིས་བོད་གཞུང་གི་ལམ་ལུགས་ལ་འགྱུར་བ་གཏོང་རྒྱུའི་འདུན་པ་ཆེན་པོ་སྐྱེས་ཏེ། ༼ སྐྱིད་ཕྱོགས་ཀུན་མཐུན ༽ ཞེས་པའི་ཚོགས་པ་བཙུགས་ཤིང་། དེར་སེ་འབྲས་དགའ་གསུམ་དང་ཀོང་པོ་སོགས་ཀྱི་འཐུས་མི་བཅས་ཚོགས་མི་ ༡༠༠ ལྷག་འདུས་ཡོད་འདུག སྐབས་དེར་ལུང་ཤར་གྱི་བློ་འགེལ་གྲོགས་པོ་གཙོ་བོ་ཀ་ཤོད་ཆོས་རྒྱལ་ཉི་མས་བཀའ་བློན་ཁྲི་སྨོན་ནོར་བུ་དབང་རྒྱལ་ལ། ལུང་ཤར་གྱིས་ཚོགས་པ་བཙུགས་ཡོད་པའི་སྐོར་དང་། ད་དུང་བཀའ་བློན་ཚོ་གསོད་རྩིས་ཡོད་སྐོར་སོགས་བརྗོད་དེ་ཕྲ་མ་བཅུག་ཡོད་སྟབས། བཀའ་བློན་ཁྲི་སྨོན་པས་རྭ་སྒྲེང་ལ་ཡར་ཞུ་བྱས་ཏེ་ལུང་ཤར་འཛིན་དགོས་པའི་རེ་བ་བཏོན། ཤོད་གཟིམ་འགག་ནས་ཕོ་ཉ་མངགས་ཏེ་ལུང་ཤར་ཚོགས་འདུ་གལ་ཆེན་ཞིག་ལ་བཅར་དགོས་པའི་བསླུ་བྲིད་འོག རྩེ་ལྟག་སྒོའི་རྒྱབ་ཏུ་བསླེབས་སྐབས་འཛིན་བཟུང་གིས་རྩེ་ཤར་ཆེན་ལྕོག་ཏུ་བཙོན་འཇུག་བྱས།

ཁོང་ལ་ཁྲིམས་ཞིབ་སྐབས་ལུང་ཤར་གྱིས་གོང་གི་ཉེས་འཛུགས་དེ་དག་ཁས་ལེན་བྱས་མེད་པ་མ་ཟད། བཀའ་ཤག་གི་བཀའ་བློན་རྣམས་འདེམ་ཤོག་འཕེན་དགོས་པ་ཞིག་མ་བྱུང་ཐབས་མེད་ཡིན་སྐོར་སོགས་བརྗོད་དེ་དག་འབུལ་བྱས་ཀྱང་ཕན་འབྲས་མ་བྱུང་པར། མཐའ་མར་ཞིབ་དཔྱོད་པས་ཉེས་ཆད་དུ། ལུང་ཤར་མཆོག་གི་མིག་འབྲས་གཉིས་བཏོན་ཏེ་མུ་མཐུད་བཙོན་འཇུག་བྱས་ཡོད་པ་མ་ཟད། ཁོང་གི་བུ་གཉིས་རྒྱང་ཕུད་བཏང་ནས་ལུང་ཤར་མི་རྒྱུད་ཀྱིས་དཔོན་ས་འཛིན་མི་ཆོག་པའི་བཀའ་བསྒྲགས། ལོ་བཞིའི་རྗེས་ཁོང་བཙོན་གྲོལ་ཐོབ་ཀྱང་བཙོན་ཁང་དུ་མནར་གཅོད་མང་པོ་བཏང་སྟེ་གཟུགས་པོར་ནད་གཞི་ཕོག་ཡོད་སྟབས་ ༡༩༤༠ ལོར་འདས་གྲོངས་སུ་ཕྱིན་ཡོད།

ཁོང་བཙོན་དུ་བཞུགས་སྐབས། རྫ་རོང་ཕུའི་བླ་མ་སྐུ་གོང་མ་དེ་ཁོང་གི་ཆོས་ཞུ་སའི་བླ་མ་ཡིན་སྟབས་ཁོང་ལ་འབུལ་རྒྱུའི་ཞུ་ཡིག་ཞིག་ཨེམ་རྗེ་ཐུབ་བསྟན་ལགས་འབྲི་བའི་རེ་སྐུལ་ཞུས་པ་ལྟར། སྤོས་བྲིས་གནང་བའི་རྩོམ་ཡིག་ཚིགས་བཅད་མ་ཞིག་ཏུ་འདི་ལྟར་བཀོད་འདུག སྐྱིད་ཕྱོགས་ཀུན་དགེའི་བྱ་བ་འགའ་རྩོམ་ཚེ།། བར་ཆད་སྤྲིན་ནག་དྲག་པོའི་ཀློང་དུ་ཚུད།། དེ་དུས་གཤེད་མ་བརྒྱ་ཕྲག་མཐའ་ནས་བསྐོར།། རྩུབ་མོའི་ཚིག་བཅས་མིག་གཉིས་ས་ལ་དབྱུངས།། ཆུ་བུར་མིག་གཉིས་ས་ལ་དབྱུངས་ན་ཡང་།། ཡེ་ཤེས་སྤྱན་རས་འདི་ལ་དབྱུངས་ཐབས་ཅི།། མིག་ལོང་རྟག་ཏུ་མུན་པའི་རང་བཞིན་ལ།། བཙོན་ཁང་མུན་ནང་འཇུག་པ་ཨེ་མ་མཚར།། བསགས་པའི་རྒྱུ་ནོར་གཞན་གྱིས་འཕྲོག་ན་ཡང་།། འཕགས་པའི་ནོར་བདུན་འདི་ལ་འཕྲོག་ཐབས་ཅི།། གཞན་གྱིས་བཙོན་ཁང་མུན་པ་གཏིང་རིང་ཟེར།། རང་སྣང་འོད་གསལ་ཀློངས་ཡངས་ཕུག་པ་ནས།། སྙོམས་ལས་འདུ་གསུམ་བཀའ་འབངས་ལུང་ཤར་བ།། རྡོ་རྗེ་ཚེ་རྒྱལ་ཞེས་པའི་ཕྱག་བཅས་ཕུལ།། ཞེས་སོགས་བཀོད་ཡོད་འདུག