སྐྱབས་བཅོལ་བ་ས་ཡ་ ༢ ལྷག་ཆཊ་འདུག

ལོ་གཉིས་ལྷག་རིང་གི་སེི་རི་ཡའི་ནང་ཟིང་འཁྲུག་ཁྲོད་མི་ ༡༡༠༣༧༡ ལྷག་རྐྱེན་འདས་དང་མི་ས་ཡ་ ༢ ལྷག་ཁྱིམ་མཚེས་རྒྱལ་ཁབ་ཁག་ནང་སྐྱབས་བཅོལ་དུ་ཕྱིན་ཡོད་འདུག

དེ་རིང་ཡུ་རོབ་སུད་སིའི་གྲོང་ཁྱེར་ཇི་ནེ་བཱ་(Geneva)བརྟེན་གཞི་བྱས་པའི་མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཁང་གིས་སྙན་ཐོན་ཞིག་ཁྱབ་བསྒྲགས་བྱས་ཡོད་པའི་ནང་། ཉེ་བའི་ལོ་གཉིས་ལྷག་རིང་གི་སེ་རི་ཡའི་ཟིང་འཁྲུག་ཁྲོད། ད་བར་མི་གྲངས་ས་ཡ་ ༢ ལྷག་ཁྱིམ་མཚེས་རྒྱལ་ཁབ་ཁག་ནང་སྐྱབས་བཅོལ་དུ་ཕྱིན་ཡོད་ཚུལ་བཀོད་འདུག དེ་དག་ཁྲོད་བརྒྱ་ཆ་ ༥༢ ཙམ་རང་ལོ་ ༡༧ མན་གྱི་བྱིས་པ་རྐྱང་ཡིན་པ་དང་། སེ་རི་ཡའི་ཁྱིམ་མཚེས་རྒྱལ་ཁབ་ཨི་ཇིབ་དང་ཨི་རག ལེ་སྤད་ནོན་( Lebanon) ཇོར་ཌན། ཏུར་ཀི་( Turkey) བཅས་ཀྱི་ནང་། ཉིན་རེར་ཆ་སྙོམས་སེ་རི་ཡའི་སྐྱབས་བཅོལ་བ་ ༥༠༠༠ ལྷག་རེ་འབྱོར་བཞིན་ཡོད་འདུག

རྒྱལ་ཚོགས་སྐྱབས་བཅོལ་ལྷན་ཁང་གི་འགན་འཛིན་ཨན་ཌོ་ནོལ་(Antonio Guterres) ལགས་ཀྱིས་སྦི་སྦི་སི་གསར་འགོད་པར་བརྗོད་དོན། ཉེ་རབས་ལོ་རྒྱུས་ནང་འགྲོ་བ་མིའི་རིགས་ཧ་ཅང་མང་པོ་ཞིག་ལ་རྐྱེན་ངན་གོད་ཆག་དང་བཙན་གནོན་གྱི་དཀའ་ངལ་འོག་ཡུལ་ལུང་གཞན་ལ་སྐྱབས་བཅོལ་དང་བཙན་བྱོལ་དུ་མི་གྱར་ཐབས་མེད་འབྱུང་གི་ཡོད་ཀྱང་། སེ་རི་ཡ་ནི་དུས་རབས་ཉེར་གཅིག་པའི་ནང་གི་ཡིད་སྐྱོ་བའི་དོན་རྐྱེན་ཆེ་ཤོས་འབྱུང་ཡུལ་ཞིག་ཆགས་འདུག་ཅེས་བརྗོད་འདུག རྒྱལ་ཚོགས་སྐྱབས་བཅོལ་ལྷན་ཁང་གིས་ད་བར་སེ་རི་ཡའི་སྐྱབས་བཅོལ་བའི་ཐད། ཨ་སྒོར་ཐེར་འབུམ་ ༢།༩ ཙམ་གྱི་འགྲོ་སོང་བཏང་ཡོད་ཀྱང་། ད་དུང་སྐྱབས་བཅོལ་བའི་འཕྲོད་བསྟེན་དང་སྡོད་གནས། ཟས་རིགས་སོགས་ལ་མུ་མཐུད་དཀའ་ངལ་ཆེན་པོ་འཕྲད་བཞིན་ཡོད་འདུག

གློག་བརྙན་འཁྲབ་སྟོན་མ་གྲགས་ཆེན་དང་རྒྱལ་ཚོགས་སྐྱབས་བཅོལ་ལྷན་ཁང་གི་སྐུ་ཚབ་ལྕམ་ཨན་ཇི་ལེ་ནཱ་ ( Angelina Jolie) ལགས་ཀྱིས་ “ གལ་སྲིད་སེ་རི་ཡའི་སྐྱབས་བཅོལ་བའི་གྲངས་འབོར་དང་གནས་སྟངས་མུ་མཐུད་ཇེ་སྡུག་ཏུ་སོང་ན་སྐྱབས་བཅོལ་བ་ཚོ་འགྲོ་སའི་རྒྱལ་ཁབ་ཚོས་རོགས་རམ་བྱེད་པར་ཚད་འཛིན་བྱེད་སྲིད་པའི་སེམས་ཁུར་བྱེད་ཀྱི་ཡོད་” ཅེས་གསར་འགོད་པར་བརྗོད་འདུག

གཟའ་འཁོར་སྔོན་མའི་ནང་སི་རེ་ཡའི་སྐྱབས་བཅོལ་བ་ལེན་མཁན་གྱི་རྒྱལ་ཁབ་ཨི་རག་དང་ཇོར་ཌན། ལེ་སྤད་ནོན། ཏུར་ཀི་བཞིའི་བློན་ཆེན་ཁག་ཅིག་གིས་སེ་རི་ཡའི་སྐྱབས་བཅོལ་བའི་དཀའ་ངལ་དང་མཐུན་རྐྱེན། རྒྱལ་སྤྱིའི་རོགས་དངུལ་འཚོལ་སྒྲུབ་ཇི་ལྟར་བྱེད་མིན་སྐོར་ལ་ཚོགས་འདུ་ཞིག་རྒྱལ་ཚོགས་ཀྱི་བསྟི་གནས་ཇི་ནེ་བཱ་རུ་ཚོགས་ཡོད་འདུག

ཕྱི་ཚེས་ ༢༡ ཉིན་སེ་རི་ཡའི་གཞུང་གིས་གྱེན་ལོག་མི་མང་ཐོག་མཚོན་བེད་སྤྱོད་བཏང་སྟེ་མི་ ༡༤༢༩ ཙམ་རྐྱེན་ལམ་དུ་བཏང་ཡོད་སྟབས། ད་ཆར་སེ་རི་ཡའི་མི་མང་ཚོས་ཨ་རི་གཙོ་བྱས་པའི་ནུབ་ཕྱོགས་རྒྱལ་ཁབ་ཁག་གིས་མཁའ་དམག་བརྒྱུད་སེ་རི་ཡའི་གཞུང་ལ་འཇབ་རྒོལ་བྱེད་སྲིད་པའི་འཇིགས་སྣང་འོག་སྐྱབས་བཅོལ་དུ་འགྲོ་མཁན་ཇེ་མང་དུ་འགྲོ་བཞིན་ཡོད་འདུག

༢༠༡༡ ལོའི་ཟླ་ ༣ ཚེས་ ༡༥ ཉིན་ནས་བཟུང་སེ་རི་ཡའི་མང་ཚོགས་ཀྱིས་སྲིད་འཛིན་སྦ་ཤཱར་(Bashar al-Assad) སྲིད་འཛིན་གྱི་གོ་གནས་ནས་དགོངས་ཞུ་བྱེད་དགོས་པའི་དགོས་འདུན་འོག་གྱེན་ལངས་བྱས་ཤིང་། གཞུང་གིས་དེ་ལ་ཁ་གཏད་བཅག་སྟེ་ད་བར་ཟིང་འཁྲུག་ཞི་འཇགས་བྱུང་མེད། སེ་རི་ཡའི་ཟིང་འཁྲུགས་འདི་ནི་ཨ་རིབ་གསར་བརྗེ་དོན་རྐྱེན་བརྒྱུད་དེ་བྱུང་བ་ཞིག་ཡིན།