བོད་མི་མང་སྤྱི་འཐུས་རྣམས་ལས་བགོས་བརྒྱབ་སྟེ་ས་གནས་བོད་མིའི་སྡོད་གནས་ཁག་ཏུ་རྟོག་ཞིབ་གནང་སྟེ། ས་གནས་ཀྱི་གནས་ཚུལ་དང་མི་མང་གི་དཀའ་ངལ་ཁག་ཕྱོགས་བསྡོམས་བཟོས་ཏེ་སྤྱི་འཐུས་རྒྱུན་ལས་དང་བཀའ་ཤག་བཅས་ལ་སྙན་གསེང་ཞུས་ཡོད་པའི་ནང་འདི་ལྟར་བཀོད་འདུག
ཉེ་ཆར་ཕྱི་ཟླ་ ༣ པའི་ནང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་རྗེས། སྤྱི་འཐུས་རྣམ་པ་ཆ་བགོས་བརྒྱབ་སྟེ་བཙན་བྱོལ་བོད་མིའི་ས་གནས་གཞིས་ཆགས་ཁག་དང་ཁ་ཐོར་མི་མང་སྡོད་ས་དག་ལ་གཞུང་འབྲེལ་གཟིགས་སྐོར་གནང་ཡོད་པ་དང་། སྤྱི་འཐུས་སྨོན་ལམ་ཐར་ཕྱིན་ལགས་དང་འཇིགས་མེད་འབྱུང་གནས་རྣམ་གཉིས་སིམ་ལ་དང་སེ་ལ་ཀུའི་སོགས་སུ་ཕྱོགས་སྐྱོད་དང་། སྤྱི་འཐུས་ག་ཟི་དགེ་བཤེས་ཚེ་རིང་པོ་ལགས་དང་སྒྲོམ་མ་ཚེ་རིང་རྣམ་གཉིས་ཀྲི་ཀ་ནལ་དང་ཀོ་ལི་སྒལ་སོགས་སུ་ཕྱོགས་སྐྱོད། སྤྱི་འཐུས་འཇམ་དབྱངས་གཟོད་པ་ལགས་བཀྲ་ཤིས་ལྗོངས་དང་སྦིར་གཞིས་ཆགས་ཁག་གསུམ། སྤྱི་འཐུས་ཀརྨ་ཡེ་ཤེས་ལགས་དང་དབྱངས་ཅན་སྒྲོལ་དཀར་རྣམ་གཉིས་ཤིས་ལོངས་སོགས། སྤྱི་འཐུས་ཆོས་སྐྱོང་དབང་ཕྱུག་ལགས་དང་སྐལ་བཟང་དགྲ་འདུལ་རྣམ་གཉིས་རྡེ་ར་ལྡུན་ཁུལ། སྤྱི་འཐུས་བློ་བཟང་ཡེ་ཤེས་ལགས་དང་དབུ་དཀར་ཚང་གཡུ་སྒྲོན་རྣམ་གཉིས་ཀ་རྡོར་སྒང་གསུམ་བཅས་སུ་ཕྱོགས་སྐྱོད་གནང་སྟེ་ས་གནས་མི་མང་གི་བདེ་སྡུག་ལ་རྟོག་ཞིབ་གནང་ཡོད་འདུག
འདི་གའི་གསར་འགོད་པས་ཕྱོགས་སྐྱོད་སྤྱི་འཐུས་རྣམ་པར་འབྲེལ་བ་ཞུས་ཏེ་ས་གནས་མི་མང་གི་གནས་སྟངས་གང་འདྲ་ཡིན་མིན་བཀའ་འདྲི་ཞུས་པར། སྤྱི་འཐུས་ཁག་ཅིག་གིས་ལས་བསྡོམས་འཐུས་ཚང་བཟོས་ཏེ་སྤྱི་འཐུས་རྒྱུན་ལས་དང་བཀའ་ཤག་ལ་ཕུལ་ཟིན་པའི་ངོ་བཤུས་གསར་འགོད་པར་གནང་བྱུང་། དེ་དག་ཁྲོད་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལཊ་དང་འཇིཊ་མེད་འབྱུང་གནས་རྣམ་གཉིས། ཕྱི་ཟླ་ ༤ ཚེས་ ༡ ནས་ཚེས་ ༢༢ བར་སིམ་ལ་དབྱངས་ཅན་དགའ་ཚལ་གླིང་དང་བོན་གཞིས་ཐོབ་རྒྱལ་གསར་པ། སྤོན་ཊ་ཆོལ་གསུམ། སྤུ་རུ་ཝ་ལ། ས་ཊོན་ཁམས་ཀཿཐོག ཀུམ་རའོ་སྒ་པ། ཧར་པ་སྤུར་འདོད་རྒུ་གཡུལ་རྒྱལ་གླིང་། སེ་ལ་ཀུའི་བོད་ཁྱིམ་དང་ལས་རིགས་སློབ་གཉེར་ཁང་། གླིང་ཚང་གཞིས་ཆཊ་བཅས་སུ་ཕྱོགས་སྐྱོད་གནང་བའི་ལས་བསྡོམས་ནང་བཀོད་པ་ལྟར་ན། ཧར་པ་སྤུར་འདོད་རྒུ་གཡུལ་རྒྱལ་གླིང་དུ་རང་བདེན་ཚོགས་ཆུང་གི་ལས་ཁུངས་བེད་མེད་དུ་གྱུར་ཡོད་པ་དང་། ས་གནས་མི་མང་ལ་འདུ་འཛོམས་བྱ་ཡུལ་ཚོགས་ཁང་མེད་པ། དང་ཟུར་རྒས་གསོ་ཁང་གི་རྒན་རྒོན་ཁག་ཅིག་ལ་དེ་སྔོན་ནང་སྲིད་ནས་ཟླ་རེར་ཧིན་སྒོར་ ༡༥༠ རེ་གནང་གི་ཡོད་ཀྱང་བར་ལམ་མཚམས་བཅད་ཡོད་པ། ཧ་རི་སྤུར་ཁ་འཐོར་མི་མང་ཁག་ཅིག་གིས་སྔོན་མ་བདེ་སྐྱིད་གླིང་གཞིས་ཆགས་གསར་བའི་ཁོངས་ཐོ་འགོད་བྱས་ཡོད་ཀྱང་། ད་ལྟ་དེ་དག་མེད་པར་གྱུར་ཏེ་གནད་དོན་ཁ་གསལ་མེད་པར་ལུས་ཡོད་པ། སྤུ་རུ་ཝ་ལ་གཞིས་ཆགས་སུ་དབྱར་དུས་ཆུ་ལོག་གི་རྐྱེན་པས་གཞིས་མིའི་སྡོད་ཁང་ཁག་ལ་དཀའ་ངལ་འཕྲད་མུས་དང་། ས་གནས་མགོ་འཛིན་དང་གཞིས་དྲུང་ལ་ལས་ཤག་མེད་པའི་དཀའ་ངལ་སོགས་བཀོད་འདུག དེ་བཞིན། གཞིས་ཆགས་ཁག་སྔར་ཡོད་རུམ་གདན་བཟོ་གྲྭ་མང་པོ་ཞིག་རྩ་སྟོང་དུ་གྱུར་ཡོད་པ་དང་། རེ་ཟུང་ལྷག་ཡོད་པ་ཚོས་ཕན་ཚུན་ལ་འབྲེལ་འདྲིས་མེད་པར་གོང་ཚད་གཅིག་གྱུར་མིན་པ་སོགས་བཀོད་ཡོད་འདུག
ལས་བསྡོམས་ནང་མུ་མཐུད་བཀོད་དོན། གླིང་ཚང་གཞིས་ཆགས་སུ་རྒས་གཅོང་ཉམ་ཐག་རེ་ཟུང་ལ་རོགས་ཚོགས་སྔོན་མའི་རོགས་དངུལ་ཆད་ནས་རོགས་ཚོགས་གསར་བ་འཚོལ་མ་ཐུབ་པར་ལྷག་ཡོད་པ་དང་། ཀུམ་རའོ་སྒ་པ་དང་ས་ཊོན་ཁམས་ཀཿཐོག་གཞིས་ཆགས་གཉིས་སུ་ས་གནས་མགོ་འཛིན་གཅིག་ལས་མེད་པ་དང་བཞུགས་གནས་ངེས་གཏན་མེད་སྟབས་ལས་དོན་འཐུས་ཤོར་འགྲོ་བཞིན་ཡོད་པ། ར་ཇ་བྷན་ཞེས་པའི་ཀུམ་རའོ་ཚོགས་པའི་ས་ཆ་བྷི་ཀ་ ༥༧ ཙམ་ཡོད་པར་ས་མཚམས་ཀྱི་དཀའ་ངལ་འཕྲད་ཡོད་པ། སིམ་ལ་སོ་ལན་དུ་ཁ་འཐོར་དུད་ཚང་ ༣༤ ལ་གནས་ཡུལ་ས་ཆ་དང་སྡོད་ཁང་མེད་པའི་དཀའ་ངལ་བཀའ་ཤག་སྐབས་སྔོན་མ་དང་ནང་སྲིད་ལ་ཞུས་ཀྱང་དོན་འབྲས་སོན་མེད་པ། སིམ་ལ་ཁུལ་གྱི་བོད་མིའི་སྡེ་ཁག་བཞི་ཙམ་ལ་ཁ་མཆུའི་དཀའ་ངལ་ཡོད་པ། སིམ་ལ་སངས་རྒྱས་ཆོས་གླིང་གི་ཚོགས་པའི་ས་ཆའི་བོགས་གླ་ལོ་མང་རིང་སྤྲད་རྒྱུ་ལྷག་ནས་དཀའ་ངལ་འཕྲད་བཞིན་པ། དུས་ཐུང་རིང་སིམ་ལ་ས་གནས་མགོ་འཛིན་མང་པོ་བརྗེ་ལེན་བྱས་པར་བློ་ཕམ་ཡོད་སྐོར་སོགས་བཀོད་འདུག
ཡང་ལས་བསྡོམས་ནང་ས་གནས་མི་མང་གི་རེ་སྐུལ་ཁག་ཅིག་བཀོད་པར། མ་འོངས་པར་བཙན་བྱོལ་བོད་མིའི་སྤྱི་ཚོགས་ནང་ཕྲུ་གུ་སྐྱེ་ཚད་ཉུང་དུ་འགྲོ་བཞིན་པའི་ཐད་ཞིབ་འཇུག་མཐིལ་ཕྱིན་བྱས་ཏེ་ཛ་དྲག་གི་སྲིད་བྱུས་ལག་བསྟར་བྱ་དགོས་པ་དང་། ཤེས་རིག་ལས་ཁུངས་ནས་༸གོང་ས་མཆོག་ཕྱི་རྒྱལ་གྱི་མཐོ་སློབ་ཁག་ཏུ་ཆིབས་བསྒྱུར་སྐབས་དང་བསྟུན་ཏེ་བོད་ཕྲུག་སློབ་འཇུག་ཡོང་བའི་ཐབས་ལམ་བསྐྲུན་དགོས་པ། རྒྱ་གར་ཡུལ་མིའི་ནང་བོད་དོན་རྒྱབ་སྐྱོར་བ་ཉུང་ངུ་ལས་མེད་པའི་དཀའ་ངལ་སེལ་ཐབས་ཐབས་བྱེད་དགོས་པ། དང་སློབ་ནས་ཕྱིར་འཕུད་བྱས་པའི་གཞོས་སྐྱེས་མང་པོ་ཞིག་ལ་དཀའ་ངལ་འཕྲད་བཞིན་ཡོད་པ་དང་། དང་སློབ་ཁོངས་སུ་མྱོས་རྫས་ངན་གོམས་ཅན་མང་པོ་འཐོན་བཞིན་པ་རྣམས་ལ་དང་སློབ་རང་ནས་བཅོས་ཐབས་བྱ་དགོས་པའི་འབོད་སྐུལ་སོགས་གནང་འདུག
སྤྱི་འཐུས་ག་ཟི་དགེ་བཤེས་ཚེ་རིང་པོ་ལགས་དང་སྤྱི་འཐུས་སྒྲོལ་མ་ཚེ་རིང་རྣམ་གཉིས་ཕྱི་ཟླ་ ༥ ཚེས་ ༦ ནས་ཚེས་ ༢༡ བར་ཀྲི་ཀ་ནལ་དང་ཨུ་ཀྲི། ཀོ་ལི་སྒལ་དོན་ལྡན་གླིང་བཅས་སུ་ཕྱོགས་སྐྱོད་གནང་བའི་ལས་བསྡོམས་ནང་། ཀོ་ལི་སྒལ་དོན་ལྡན་གླིང་གཞིས་ཆགས་སུ་ལོ་གཉིས་བསྟུད་མར་ཆར་ཆུ་དཀོན་པའི་དཀའ་ངལ་འོག་མི་མང་གིས་ས་ཞིང་འདེབས་མི་ཐུབ་པའི་དཀའ་ངལ་འཕྲད་ཡོད་པ་དང་། གཞིས་ཆགས་ནང་ས་གནས་མགོ་འཛིན་དང་མཉམ་འབྲེལ་སོ་སོར་དབྱེ་འབྱེད་བྱས་ཏེ་སྤྱི་མཐུན་མཉམ་འབྲེལ་གྱི་མགོ་གཙོ་སོགས་ཀྱིས་ས་གནས་ཀྱི་བདེ་སྡུག་ལ་གཟིགས་རྟོག་བྱེད་ཀྱི་མེད་པ་དང་། འདི་ལོ་མཉམ་འབྲེལ་གྱིས་ཨ་ཤོམ་བཙོང་མ་ཐུབ་པ་དང་དངུལ་གཡར་མ་ཐུབ་པ་བཅས་ལ་བརྟེན་ཏེ་སོན་ལུད་ཉོ་ཐུབ་མེད་པ། ཀོ་ལི་སྒར་ཕོ་བྲང་གཡས་གཡོན་གྱི་ཚེར་ཤིང་ཡུལ་མི་ཚོས་གཅོད་འབྲེག་བྱས་སྟབས་རི་ཕག་གི་དཀའ་ངལ་འོག་ས་ཞིང་ཨེ་ཀེར་ ༥།༦ ཉིན་མཚན་མེད་པར་སྲུང་དགོས་བྱུང་ཡོད་པ། ས་གནས་མི་མང་གིས་ཤེས་རིག་གི་མདུན་ལམ་སློབ་སྟོན་པ་ལོ་གཅིག་ནང་ཐེངས་གཉིས་རེར་ཕེབས་རྒྱུའི་རེ་སྐུལ་ཞུས་ཀྱང་ད་ལྟའི་བར་ས་གནས་སུ་འབྱོར་མེད་པ། དེང་སྐབས་གཞིས་ཆགས་ནང་ཕྱི་མི་ཕེབས་པར་ (PAP) བཀའ་འཁྲོལ་མེད་ཚེ་ཡོང་མི་ཆོག་སྟབས་རོགས་ཚོགས་འཚོལ་རྒྱུར་དཀའ་ངལ་འཕྲད་ཀྱི་ཡོད་པ་སོགས་བཀོད་འདུག
སྤྱི་འཐུས་འཇམ་དབྱངས་བཟོད་པ་ལགས་ཕྱི་ཟླ་ ༥ བའི་ཚེས་ ༡༥ ནས་ ༢༧ ཉིན་བར་བཀྲ་ཤིས་ལྗོངས་དང་སྦིར་གཞིས་ཆགས་ཁག་གསུམ། སུན་མཚོ་མན་གསུམ། མ་ན་ལི་བཅས་ཕྱོགས་སྐྱོད་གནང་བའི་ལས་བསྡོམས་ནང་། འདི་ལོའི་གསུམ་བཅུའི་དུས་དྲན་སྐབས་བཀྲ་ཤིས་ལྗོངས་ཡིག་ཚང་དུ་བཀའ་སྤྱི་གཉིས་ཀྱི་གསུང་འཕྲིན་འབྱོར་མེད་སྐོར་དང་། དབྱར་དུས་ས་གནས་ཀྱི་ཚོགས་ཁང་རྒྱབ་ཏུ་ཆུ་ལོག་གི་ཉེན་ཁ་འཕྲད་བཞིན་པ་དང་། མི་མང་ལ་འཐུང་ཆུའི་དཀའ་ངལ་འཕྲད་བཞིན་ཡོད་པ། སྦིར་ས་གནས་ཀྱི་ཉམ་ཐག་ལ་ཞིབ་འཇུག་བྱ་དགོས་པ་སོགས་བཀོད་འདུག དེ་བཞིན། མཚོ་པད་མའི་མི་མང་ལ་ལ་ཚོགས་ཁང་མེད་པའི་དཀའ་ངལ་དང་། མན་ཌི་ས་གནས་མི་མང་ལ་ཁྲོམ་ས་དང་སྡོད་གནས་བཅས་ཀྱི་དཀའ་ངལ། མ་ན་ལིར་དེང་སྐབས་རྒྱ་གར་གྱི་ཚོང་པ་ཇེ་མང་དུ་སོང་སྟེ་ཚོང་ཁང་གི་གླ་ཆ་ལྡབ་འགྱུར་འཕར་ཏེ་བོད་མི་ཉམ་ཆུང་མང་པོར་དཀའ་ངལ་འཕྲད་ཀྱི་ཡོད་སྟབས། བོད་མིའི་ཚོང་པའི་སྒྲིག་འཛུགས་ཀྱིས་ས་གནས་བོད་མི་ཚོང་པ་ཚོ་དངུལ་བསྡུ་རུབ་དང་། དེའི་ཐོག་བོད་མི་སྒྲིག་འཛུགས་ནས་རོག་རམ་ཞུས་ཏེ་བོད་མིའི་ཁྲོམ་ར་(Tibetan Mall)ཟེར་བ་ཞིག་འཛུགས་སྐྲུན་བྱ་རྒྱུའི་རེ་སྐུལ་ཞུ་བཞིན་ཡོད་སྐོར་སོགས་འཁོད་འདུག
གསར་འགོད་པ། དོན་གོ
༼ བོད་ཀྱི་དུས་བབ་ཚགས་པར་ལས་འདིར་བཀོད། ༽
་་་་ གོ་ཐོས་སུ་ཉེ་སྔོན་གཞུང་ཞབས་མ་གཏོགས་རང་ཁུངས་པའི་གླ་ཆ་སྤར་པ་ཕར་ཞོགས་ད་དུང་རང་ཁུངས་ལས་བྱེད་ལོ་དྲུག་ཅུར་སླེབས་པ་ཆ་ཚང་ཕྱིར་ཕུད་བྱེད་པའི་ཡིག་ཆ་སླེབས་ཟིན་པ་འདྲ། རང་ཁུང་མང་ཆེ་བ་གསར་འབྱོར་བ་རེད་འདུག དེའི་ནང་་མི་ལོ་ཉི་ཤུ་ཡས་མས་སུ་ལྷག་བསམ་རྣམ་དག་གིས་ཞབས་ཞུ་བྱས་ཡོད་ཀྱང་།
མཁོ་ཉིན་གྱི་རྡོ་རྗེ་དང་མི་མཁོ་ཉིན་ལ་གདོན་རྫས་ལྟ་བུར་ཕྱིར་ཕུད་བྱེད་རྐྱང་རེད། དེ་དག་རིགས་ཀྱང་སྤྱི་འཐུས་རྣམ་པས་གོ་ཡི་མེད་པ་འདྲ་ཁོ་ཚོས་ཧ་གོ་ཡང་ཡང་སྐད་ཆ་འདྲ་ཆགས་པོ་རེས་ཐག་གཅོད་བྱེད་ངེས་རེད། ་་་་་་ཟེར།
རེད་རེད་བོད་པ་གསར་འབྱོར་བ་མང་པོ་ཞིག་ལོ་རེར་སྐྱབས་བཅོལ་ལག་དེབ་ལོ་སྣོན་བྱེད་པར་དཀའ་ངལ་མང་པོ་འཕྲད་ཀྱིན་པར་སྤྱི་འཐུས་རྣམ་པའི་རྣ་བར་གོ་མྱོང་བ་ཙམ་ལས་ཇུས་གཏོགས་མེད་པ་ལྟ་བུར་ཆགས་ཡོད་རེད། ནམ་རྒྱུན་དེ་དག་གིས་ཁ་སྙན་པོ་བཤད་ནས་དོན་དག་ངོ་མ་ད་ལྟ་བར་དུ་གཡུག་བཞག་ཡོད་པ་རེད། བཙན་བྱོལ་ནང་ཁ་སྙན་པོས་གོང་ཁུག་ནི་རེད། ད དུང་དོན་དག གཞན ཞིག་ཡོད་པ་སྟེ། རྒྱ་གར་ནང་ལོ་རེར་བཞིན་ཟས་གོས་སོགས་ཀྱི་གོང་ཚད་འཕར་བཞིན་པས་གངས་སྐྱིད་གཤོངས་ཀྱི་གཞུང་ཞབས་པར་གླ་ཆ་འཕར་ཟིན་ཡང་རང་ཁུང་ལས་བྱེད་ཚོར་གནས་ལུག་འདྲ་ཆགས་པོ་བཤད་ཀྱིན་ད་དུང་སྤར་ཡོད་པ་མ་རེད། དཔེར་སྣེ་ལེན་ཁང་ལྟ་བུར་མཚོན་ན་རང་ཁུང་ལས་བྱེད་ཀྱི་འཇོན་ཐང་དང་ལྷག་བསམ་གང་ཅི་ཐད་ནས་གཞུང་ཞབས་པ་ལས་ལྷག་ཡོད་ཀྱང་། གོ་ཐོས་སུ་ཉེ་སྔོན་གཞུང་ཞབས་མ་གཏོགས་རང་ཁུངས་པའི་གླ་ཆ་སྤར་པ་ཕར་ཞོགས་ད་དུང་རང་ཁུངས་ལས་བྱེད་ལོ་དྲུག་ཅུར་སླེབས་པ་ཆ་ཚང་ཕྱིར་ཕུད་བྱེད་པའི་ཡིག་ཆ་སླེབས་ཟིན་པ་འདྲ། རང་ཁུང་མང་ཆེ་བ་གསར་འབྱོར་བ་རེད་འདུག དེའི་ནང་་མི་ལོ་ཉི་ཤུ་ཡས་མས་སུ་ལྷག་བསམ་རྣམ་དག་གིས་ཞབས་ཞུ་བྱས་ཡོད་ཀྱང་། མཁོ་ཉིན་གྱི་རྡོ་རྗེ་དང་མི་མཁོ་ཉིན་ལ་གདོན་རྫས་ལྟ་བུར་ཕྱིར་ཕུད་བྱེད་རྐྱང་རེད། དེ་དག་རིགས་ཀྱང་སྤྱི་འཐུས་རྣམ་པས་གོ་ཡི་མེད་པ་འདྲ་ཁོ་ཚོས་ཧ་གོ་ཡང་ཡང་སྐད་ཆ་འདྲ་ཆགས་པོ་རེས་ཐག་གཅོད་བྱེད་ངེས་རེད།
དེ་མཚུངས་བཞུགས་སྒར་རྡ་རམ་ས་ལར་རྟོག་ཞིབ་གནང་མཁན་སྤྱི་འཐུས་སུ་སུ་ཡིན་ནམ། ལྷག་པར་དུ་སྐྱབས་བཅོལ་ལག་དེབ་ཀྱི་ཕྱོགས་ནས་དཀའ་ངལ་ཡོད་མཁན་མང་པོ་ཞིག་འདུག་ལ། ཕྱི་རྒྱལ་དུ་འགྲོ་མཁན་ཉིན་རེར་བཞིན་ཇེ་མང་དུ་འགྲོ་བཞིན་པའི་གནས་སྟངས་སོགས་ཀྱི་ཐད་ལ་ཞིབ་འཇུག་གནད་ལ་སྨིན་པ་ཞིག་བྱས་ཡོད་དམ།
རྡ་སའི་ཁྲོམ་ལམ་གཡས་གཡོན་དུ་ཅ་ལག་ཙག་ཙིག་བཙོང་ནས་འཚོ་བ་སྐྱེལ་མཁན་རྣམ་པའི་གནས་སྟངས་དཀའ་ངལ་ཆེན་པོ་སྟེ་སེལ་ཡོད་པའི་གནས་ཚུལ་ཞིག་གོ་སོང་། དེ་བདེན་པ་ཡིན་ན། ད་ནས་བཟུང་ནས་རྒྱ་གར་ཉེན་རྟོག་སྐོར་སྲུང་བ་རྣམས་ཀྱིས་དུས་ནས་དུས་སུ་ཁྲོམ་ས་གཏོར་བ་དང་ཚོང་རྫས་འཕྲོགས་པ་དངོས་གནས་མི་བྱེད་རྒྱུ་ཨེ་རེད། ཡང་མིན་ན། ཁྲོམ་ས་གསར་བ་ཞིག་རག་པ་ཨེ་རེད།
རྡ་སའི་ཉེ་ཁུལ་གྱི་སྣེ་ལེན་ཁང་སྟོང་བར་གྱུར་བ་དང་། ལོ་རེར་བཞིན་གཞུང་ཞབས་ལས་བྱེད་གསར་བསྡུ་བྱེད་གྲངས་ཇེ་འཕར་དུ་འགྲོ་བཞིན་པའི་གནས་སྟངས། བཞུགས་སྒར་ཁུལ་གྱི་མི་དམངས་ཀྱི་ཉིན་རེའི་འཚོ་བའི་གནས་བབ་དང་དཀའ་ངལ་སོགས་སྐོར་ནས་ཞིབ་འཇུག་གནང་ཡོད་དམ། གལ་སྲིད། གནང་ཡོད་ན། དེའི་ཕྱོགས་སྡོམ་གནས་བབ་གང་འདྲ་ཞིག་ཡིན་ནམ། གལ་སྲིད། མེད་ན་ནམ་ཞིག་ལ་རྟོག་ཞིབ་གནང་རྩིས་ཡོད་དམ།