དེ་རིང་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༦ པ་མཇུག་བསྒྲིལ་བའི་གསལ་བསྒྲགས་སྤེལ་བའི་ནང་། ད་རེབ་བོད་མིའི་རང་ལུས་མེར་བསྲེགས་དང་བོད་ནང་གི་གནས་སྟངས་སྐོར་ལ་གྲོས་བསྡུར་གནང་ཡོད་པ་དང་། ཚོགས་འདུ་ཐེངས་ ༢༧ པ་ལོ་རྗེས་མའི་ལོ་མགོར་ཚོགས་རྒྱུ་ཡིན་སྐོར་བཀོད་འདུག
དེ་རིང་ཉིན་རྒྱབ་ཆུ་ཚོད་ ༣།༠༠ སྟེང་། གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་རྒྱ་ཞི་མོལ་ལས་དོན་ཚོགས་ཆུང་གི་མགྲིན་ཚབ་པ་ཐུབ་བསྟན་བསམ་འཕེལ་ལགས་ཀྱིས། འདས་པའི་ཉིན་གསུམ་རིང་གི་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༦ པ་དེ་མཇུག་སྒྲིལ་ཡོད་པའི་ཡིག་ཐོག་གི་གསར་འགོད་གསལ་བསྒྲགས་སྤེལ་སོང་། གསལ་བསྒྲགས་ནང་། ད་རེབ་ཚོགས་འདུའི་སྐབས་བོད་དང་རྒྱ་ནག་ནང་བྱུང་བའི་འགྱུར་འགྲོས་ཀྱི་གནས་ཚུལ་ཁྱོན་ཡོངས་ལ་བསྐྱར་ཞིབ་དང་། ཁྱད་པར་རང་ལུས་མེར་བསྲེགས་ཀྱིས་མཚོན་པའི་ད་ལྟའི་བོད་ནང་གི་ཛ་དྲག་གནས་སྟངས་སྐོར་བཀའ་བསྡུར་གནང་ཡོད་སྐོར་བཀོད་འདུག
ལས་དོན་ཚོགས་ཆུང་ནས་བོད་ཀྱི་ས་ཁུལ་ནང་ལག་བསྟར་བྱེད་བཞིན་པའི་ད་ལྟའི་དྲག་གནོན་གྱི་སྲིད་བྱུས་ནི་རྒྱ་ནག་གཞུང་གིས་གལ་ཆེར་བརྩིས་པའི་གཅིག་སྒྲིལ་དང་བརྟན་ལྷིང་གི་འགལ་ཟླ་ཡིན་པ་གསལ་འདོན་དང་སྦྲགས། ཉེ་ཆར་རྒྱ་ནག་ནང་མི་རིགས་ཀྱི་གནད་དོན་སྤྱི་དང་། ཁྱད་པར་བོད་རིགས་སྐོར་བགྲོ་གླེང་ཤུགས་ཆེ་འགྲོ་བཞིན་པ་སོགས་བརྡ་སྟོན་སྣ་ཚོགས་འཐོན་བཞིན་པ་ཁག་ལའང་བསམ་གཞིག་གྲོས་བསྡུར་གནང་ཡོད་ཟེར།
གསལ་བསྒྲགས་ནང་བཀོད་དོན། “ཚོགས་འདུའི་སྐབས་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གི་མགོ་འཁྲིད་གསར་པའི་སྐུ་ཚབ་དབར་ཞི་མོལ་བརྒྱུད་བོད་དོན་དཀའ་རྙོག་སེལ་ཐབས་བྱ་རྒྱུའི་ཐབས་བྱུས་ཁག་སྐོར་གྲོས་བསྡུར་སྦྱང་བཤད་ཁ་གསལ་གནང་ཡོད” ཅེས་བཀོད་འདུག
བོད་རྒྱ་ཞི་མོལ་ལས་དོན་ཚོགས་ཆུང་ནི་རྒྱ་ནག་གཞུང་དང་མཉམ་ཞི་མོལ་གྱི་ལམ་ནས་བོད་དོན་འགྲིག་ཆགས་ཡོང་བར་ལས་དོན་ལག་བསྟར་བྱེད་ཕྱོགས་ཇི་དགེ་མཐུན་འགྱུར་ཞུ་ཆེད་བཙུགས་པ་ཞིག་ཡིན་པ་དང་། ཐེངས་འདིའི་ཚོགས་འདུའི་སྐབས་བཀའ་བློན་ཁྲི་ཟུར་ཟམ་གདོང་རིན་པོ་ཆེས་དབུས་པའི་རྒྱ་ནག་སྐོར་མཁས་མྱོང་ཅན་གྱི་ཚོགས་མི་དྲུག་གསར་སྣོན་གནང་ཡོད།
ཚོགས་འདུ་གཙོ་སྐྱོང་བ་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས། ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་སྲིད་བྱུས་རྒྱུན་འཛིན་མུ་མཐུད་བྱ་རྒྱུའི་ཆོད་སེམས་བརྟན་པོ་ཡོད་པ་བསྐྱར་ནན་གནང་ཡོད། སྐབས་རྗེས་མའི་ཚོགས་འདུ་ཕྱི་ལོ་ ༢༠༡༤ ལོའི་ལོ་མགོར་སྐོང་ཚོགས་གནང་འཆར་ཡོད། ཅེས་སོགས་བཀོད་འདུག
བསམ་འཕེལ་ལགས་ཀྱིས་ཐེངས་འདིའི་ཚོགས་འདུའི་ནང་དོན་ཁག་ཡིག་ཐོག་ཏུ་གང་བཀོད་ཡོད་པ་དེ་ལས། མཇུག་ཏུ་གསར་འགོད་པ་ཚོའི་དྲི་བར་ལན་འདེབས་སོགས་ཀྱི་དབང་ཚད་ཁོང་ལ་མེད་སྐོར་བརྗོད་བྱུང་།
ལོ་གཅིག་དང་གཉིས་ཟེར་ནས་དུས་ཚོད་མ་འགྱངས་རོགས། བོད་ནང་གི་གནས་སྟངས་ལ་གཟིགས་དང་།སྐུ་ངོ་ཐུབ་བསྟན་བསམ་འཕེལ་མཆོག
མཁས་དབང་ཚོ། འབྲེལ་མོལ། གྲོས་མོལ། ཞི་མོལ། ཞིབ་མོལ། ཚིག་འདི་ཚོ་གཞུང་གིས་འགྲེལ་བཤད་གང་འདྲ་ཡིན་མིན་འགྲེལ་བཤད་སྐྱོན་རོགས་།།།།།།།ང་མགོ་སྦོས་སོང་་་་
ད་དུང་ཚོགས་འདུ་ཚོགས་ནས་འདུག་གི་ཡིན་ནམ། སྐུ་མཁྱེན། རྒྱ་ནག་གི་དཔོན་རིགས་ཚོ་གཙོ་བྱས་ཏེ་ང་ཚོས་ཤེས་འདོད་པ་ནི་ཚོགས་ཐོག་ནས་གནད་དོན་ཅི་ཞིག་ཇི་ལྟར་གཏན་འཁེལ་བྱས་བ་དེ་ཡིན། ཚོགས་འདུ་ཚོགས་མིན་དང་ཚོགས་འདུ་རྗེས་མ་ག་དུས་འཚོག་མིན་གཙོ་བོ་མ་རེད། ཚོགས་འདུ་ཚོགས་འདུ། ཚོགས་འདུ་བཞི་ལྔ་ཞིག་ཚོགས་སོང་། སྟོན་རྒྱུ་སྣ་གཅིག་མི་འདུག
ཚོགས་འདུ་ཞིག་ཉིན་འགར་ཚོགས་ཁུལ་བྱས། །
རྒྱ་ནག་ལ་བསྐྱར་ཞིབ་བྱས་ཡོད་ཟེར། །
ཚིག་སྣེ་གཅིག་ཕྱི་ལ་བསྟན་རྒྱུ་མེད།།
མིང་མི་གཙོ་དོན་གཙོ་གང་དུ་ཕྱིན།།
སྲིད་བྱུས་ཉམས་ཞིབ་ཁང་གི་ར་བཟི་དེས།།
གསར་འགོད་གསལ་བསྒྲགས་ཡི་གེ་སྟོང་པ་སྤེལ།།
ནང་དོན་སྟོང་པ་བློ་སེང་བསྟོད་པ་དེས།
རྒྱ་ནག་གད་མོ་ཤོར་བ་ཐག་ཆོད་རེད།།
བློ་སེང་རྩ་གཟུགས་ལས་རོགས་ར་བཟི་དང།།
སྐུ་ཚབ་མ་བསྐོས་དམ་ཚིག་འཁྲུགས་པ་ཡི།།
ཞི་མོལ་ཚོགས་ཆུང་མིང་དུ་བཏགས་ནའང།།
བློ་སེང་སྐབས་ལ་འབྲེལ་མོ་སེམས་ཐག་རེད།།
དེ་ལས་ཁྲི་ལས་བཤོལ་ཏེ་དགོངས་ཞུས་ཀྱིས།།
མ་འཇོན་མ་ནུས་གནས་སྟངས་གསལ་བཤད་ཀྱིས།།
སྲིད་སྐྱོང་གསར་པའི་ཕྱག་ཏུ་ལས་དོན་རྣམས།།
ཕུལ་ཅིག་ཨ་རིའི་བློ་བཟང་སེང་གེ་ལགས།།
གཞན་ལྔ་བོ་མི་ཤེས་མོད་བཀའ་ཟུར་ཟམ་གདོང་རིན་པོ་ཆེ་ལས་ལྷག་ཅིག་བཙན་བྱོལ་ལ་མེད་པར་མཐོང་གི་འདུག