ལོ་ངོ་གཉིས་ཙམ་རིང་བོད་དུ་བསྡད་དེ་ཉེ་ཆར་དྷ་རམ་ས་ལ་རུ་འབྱོར་བའི་གྲྭ་དཀོན་མཆོག་ལགས་དང་མཉམ་དུ། རྒྱ་གཞུང་གི་ལྐོག་ཇུས་སྣ་ཚོགས་འོག་ཁོའི་ཕ་ཡུལ་གྱི་བོད་མི་ཚོར་དཀའ་རྙོག་སྣ་ཚོགས་འཕྲད་ཀྱི་ཡོད་སྐོར་སོགས་ལ་ཁ་བརྡ་བྱས་ཡོད།
གྲྭ་དཀོན་མཆོག་ལགས་རྒྱ་གར་དུ་འབྱོར་ནས་ལོ་ངོ་ ༩ ཙམ་འགྲོ་བཞིན་ཡོད་པ་དང་། ༢༠༡༡ ལོར་ཕ་ཡུལ་ལ་གཉེན་འཕྲད་དུ་སོང་སྟེ། ལོ་ངོ་ ༢ ཙམ་གྱི་རིང་བོད་ནས་བསྡད་དེ་ཉེ་ཆར་ཕྱིར་དྷ་རམ་ས་ལར་འབྱོར་འདུག་སྟབས། ཟླ་འདིའི་ཕྱི་ཚེས་ ༡༤ ཉིན་གསར་འགོད་པས་ཁོང་དང་མཉམ་དུ་ལམ་བར་ནས་དཀའ་ངལ་འཕྲད་མིན་དང་ཕ་ཡུལ་ཨ་མདོ་མཛོད་དགེ་ཐེ་བོ་ཕྱོགས་ཀྱི་གནས་སྟངས་ཐོག་ཁ་བརྡ་བྱས་སྐབས། ཁོའི་ཕ་ཡུལ་གྱི་སློབ་ཆུང་གི་སློབ་ཚན་ཚང་མ་རྒྱ་ཡིག་ཏུ་བསྒྱུར་ཏེ་བོད་རིགས་སློབ་མ་ཚོའི་བོད་ཡིག་གི་ཤེས་ཚད་སྐྱོ་བོ་ཡིན་པའི་སྐོར་ལ་ཁོང་གིས། “ངའི་ཕ་ཡུལ་དུ་སློབ་ཆུང་འཛིན་རིམ་ ༦ པ་བར་ཡོད་ཀྱང་། ཁོ་ཚོའི་བོད་ཡིག་གི་ཤེས་ཚད་ཧ་ཅང་སྐྱོ་བོ་རེད། ཡིན་ནའང་། ཉེ་བའི་ལོ་འདི་ཚོར་དབྱར་དགུན་གྱི་གུང་གསེང་སྐབས་སུ་བོད་མི་སྒེར་ངོས་ནས་བོད་ཡིག་དགེ་རྒན་ཚད་ལྡན་གདན་འདྲེན་ཞུས་ཏེ། སློབ་མ་ཚོར་བོད་ཡིག་ཟབ་སྦྱོང་འཛིན་གྲྭ་ཆེད་འཛུགས་བྱས་ཡོད་སྟབས། བོད་ཡིག་གི་ཤེས་ཚད་ཡར་རྒྱས་གཏོང་བར་ཕན་ཆེན་པོ་ཐོགས་ཀྱི་འདུག གུང་གསེང་ཟླ་གཉིས་ཀྱི་བོད་ཡིག་ཟབ་སྦྱོང་གི་གྲུབ་འབྲས་དེ་སློབ་གྲྭའི་ལོ་གཅིག་གི་སྦྱངས་འབྲས་ལས་ཀྱང་ཡག་པོ་འདུག་ཅེས་ས་གནས་བོད་མི་ཚང་མས་ཤོད་ཀྱི་འདུག་ལ། སྐད་ཆ་དེ་དངོས་གནས་བདེན་པ་རེད། སྔོན་ཆད་ང་ཚོའི་ཕ་ཡུལ་དུ་བོད་སྐད་ཡིག་ཐོག་དོ་སྣང་བྱེད་མཁན་དེ་ཙམ་མང་པོ་མེད་ཀྱང་། དེང་སང་གཞོན་སྐྱེས་ཚོས་རང་གི་སྐད་ཡིག་ལ་དགའ་ཞེན་དང་དོ་སྣང་ཆེན་པོ་བྱེད་ཀྱི་འདུག”ཟེར།
རྒྱ་གཞུང་གིས་བརྒྱུད་ལམ་ཁག་ཏུ་ཞིང་འབྲོག་མང་ཚོགས་ལ་རོགས་སྐྱོར་ཤུགས་ཆེན་བྱེད་ཀྱིན་ཡོད་པའི་དྲིལ་བསྒྲགས་སྣ་ཚོགས་བྱེད་ཀྱི་ཡོད་ཀྱང་། མཐར་གཏུགས་ན་བོད་མི་ཚོས་སོ་སོའི་རྩོལ་བ་ལ་བརྟེན་ནས་འཚོ་བ་རོལ་གྱི་ཡོད་པའི་སྐོར་ཁོང་གིས། “རྒྱ་གཞུང་གིས་རྒྱ་སྒོར་ཁྲི་ཕྲག་མང་པོས་རོགས་སྐྱོར་བྱེད་བཞིན་ཡོད་པའི་དྲིལ་བསྒྲགས་བྱེད་ཀྱི་ཡོད་ཀྱང་། མི་མང་གི་ལག་ཏུ་ཅི་ཡང་འབབ་ཀྱི་ཡོད་པ་མ་རེད། ངའི་ཁྱིམ་ཚང་ལ་ཆ་བཞག་ན། སྤུན་མཆེད་གཉིས་ཀྱིས་དངུལ་མང་པོ་བུ་ལོན་དུ་བླངས་ནས་རླངས་འཁོར་བཏང་སྟེ་ཁྱིམ་ཚང་གི་ཁ་གསོ་ཐབས་བྱེད་ཀྱི་ཡོད་ལ། བུ་ལོན་མང་པོ་བླངས་ཏེ་རང་གི་ངལ་རྩོལ་ལ་བརྟེན་ནས་འཚོ་བ་སྐྱེལ་མཁན་ངེད་ཚང་གཅིག་པུ་མ་རེད། ང་ཚོའི་གྲོང་པའི་ན་གཞོན་ལོ་ ༡༦ ཙམ་ནས་ཞིང་ཆེན་དང་ཞིང་ཆེན་བར་རླངས་འཁོར་བཏང་སྟེ་ཚོང་ཟོག་སྐྱེལ་འདྲེན་གྱི་ཞོར་ལས་བྱེད་ཀྱི་ཡོད་པ་དང་། དཔལ་འབྱོར་འགྲན་རྩོད་ཁྲོད་ནས་གཞོན་སྐྱེས་མང་པོའི་སློབ་སྦྱོང་གི་གོ་སྐབས་ཤོར་གྱི་ཡོད་པ་མ་ཟད། ཐ་ན་གཞོན་སྐྱེས་མང་པོའི་རང་གི་ཚེ་སྲོག་ཀྱང་ཤོར་གྱི་འདུག ས་ཁུལ་གཞན་ནས་སོ་སོའི་ས་གནས་སུ་ཚོང་ལས་གཉེར་ཏེ་དཔལ་འབྱོར་འཚོལ་སྒྲུབ་བྱེད་ཀྱི་ཡོད་ཀྱང་། ང་ཚོའི་ཕ་ཡུལ་དུ་ཚོང་ལས་རིགས་དེ་ཙམ་སྟབས་བདེ་མེད་པས་ས་གནས་གཞན་དུ་ཕྱིན་ཏེ་རླངས་འཁོར་གྱིས་ཚོང་ཟོག་སྐྱེལ་འདྲེན་བྱས་ཏེ་འཚོ་བ་སྐྱེལ་གྱི་ཡོད་པ་ལས། རྒྱ་གུང་ཁྲན་གྱི་རོཊ་སྐྱོར་ལ་བརྟེན་ནས་ཁ་གསོ་ཡི་མི་འདུག ”ཅེས་བརྗོད་སོང་།
རང་ལུས་མེར་བསྲེགས་གཏོང་མཁན་ལ་རྒྱབ་སྐྱོར་མེད་པའི་མིང་རྟགས་མ་བཀོད་ན། གཞུང་གི་རོགས་སྐྱོར་ཚང་མ་མེད་པར་གཏོང་རྒྱུ་ཡིན་པའི་འཇིགས་སྐུལ་བྱེད་ཀྱི་ཡོད་སྐོར་ཁོང་གིས། “ད་ལོའི་ལོ་གསར་སྐབས་ང་རུ་སྡེ་ཞིག་གི་ནང་ཞབས་བརྟན་བསྒྲུབ་དུ་ཕྱིན་སྐབས། ཞང་ཉེན་རྟོག་ཁང་གི་མི་སྣ་ཆེད་མངགས་ཀྱིས་ས་གནས་བོད་མི་ཚོར། རང་ལུས་མེར་བསྲེགས་གི་གནས་ཚུལ་བྱུང་བའི་ཁྱིམ་ཚང་ལ་དངུལ་དངོས་ཀྱིས་རོགས་སྐྱོར་དང་འདས་པོར་མ་ཎི་འདོན་པ་སོགས་གདུང་སེམས་མཉམ་སྐྱེད་བྱས་པ་ཡིན་ན། ལོ་ ༣ བཙོན་འཇུག་ཁྲིམས་ཐག་གཅོད་རྒྱུ་ཡིན་པ་སོགས་ཀྱི་ཤོག་ངོས་ ༣ ཅན་གྱི་ཡིག་ཆ་ཞིག་ལ་བཙན་གྱིས་མིང་རྟགས་འགོད་དུ་བཅུག་ཡོད་པ་མ་ཟད། གལ་སྲིད་མིང་རྟགས་མ་བཀོད་ཚེ། གཞུང་གི་རོགས་དངུལ་ད་ལོ་ལས་སང་ལོ་མང་བ་ཡོད་པ་དེ་མེད་པར་གཏོང་རྒྱུ་ཡིན་ལུགས་དང་། མིང་རྟགས་མ་བཀོད་ན་མ་འོངས་པར་ཁུལ་དང་རྫོང་ཉེན་རྟོག་ཁང་གི་མི་སྣ་ཡོང་ནས་དཀའ་ངལ་འཕྲད་རྒྱུ་ཡིན་སྐོར་སོགས་ཀྱི་འཇིགས་སྐུལ་བྱས་འདུག ཡིན་ནའང་། ས་གནས་བོད་མི་ཚོས་ “ང་ཚོས་ད་ལྟའི་བར་རང་ཁ་རང་གསོ་བྱས་ནས་བསྡད་ཡོད། རྒྱལ་ཁབ་ཀྱི་རོགས་དངུལ་སྐར་གང་མི་དགོས”ཞེས་དུས་ད་ལྟ་ཡིན་ནའང་མིང་རྟགས་འགོད་རོགས་བྱས་མི་འདུག འོན་ཀྱང་། དེང་སང་རྒྱ་གཞུང་གིས་ས་གནས་གང་སར་ཉུལ་མ་བཞག་སྟེ། བོད་མི་ནང་ཁུལ་དུ་ཁ་མི་འཆམ་དང་རྩོད་རྙོག་སྣ་ཚོགས་བཟོ་བཞིན་འདུག ”ཅེས་དང་།
ཡང་ཁོང་གིས། ལྷ་སར་འགྲོ་མཁན་གྱི་བོད་རིགས་འགྲུལ་བ་ཚོར་དམིགས་བསལ་གྱིས་དཀའ་རྙོག་མང་པོ་བཟོ་བཞིན་ཡོད་སྐོར་བརྗོད་དོན། “ང་ལྷ་སའི་མེ་འཁོར་འབབ་ཚིགས་སུ་འབྱོར་སྐབས། རྒྱ་རིགས་འགྲུལ་བ་ཚོ་མེ་འཁོར་ལས་བབས་ཏེ་གང་དུ་འགྲོ་མིན་རང་དབང་རེད། ཡིན་ནའང་། བོད་རིགས་ཚོ་ཉེན་རྟོག་ཁང་དུ་ཁྲིད་སོང་ནས་ལམ་ཡིག་ལ་ཞིབ་བཤེར་དང་། ལུས་དང་ཅ་དངོས་ཚང་མར་སྔོག་བཤེར་བྱས་སོང་པ་མ་ཟད། ལྷ་སར་ཅིའི་ཕྱིར་ཡོང་བ་སོགས་ཀྱི་འདྲི་རྩད་བྱས་ཏེ་ཆུ་ཚོད་ ༥ ལྷག་ལ་བཀག་ཉར་བྱས་སོང་བ་དང་། དེ་ནས་ཡང་འཐབ་ཕྱོཊ་གཅིག་གྱུར་ཁང་དུ་སོང་ནས་ཉིན་ཤས་རིང་ལྷ་སར་འདུག་ཆོག་པའི་དེབ་སེར་པོ་ཞིག་བཟོ་དགོས་ཀྱི་འདུག གལ་སྲིད་དེབ་སེར་པོའི་ནང་དུ་སྤྲད་པའི་དུས་ཡུན་ནང་ལྷ་ས་ནས་འགྲོ་མ་ཐུབ་པ་ཡིན་ན། ཡང་བསྐྱར་ལས་ཁུངས་སུ་ཕྱིན་ནས་དུས་ཡུན་ཕྱིར་འགྱངས་དགོས་ཀྱི་འདུག ཡིན་ནའང་། ང་ལྷ་སར་ཉིན་གཅིག་མ་གཏོཊ་བསྡད་མེད། ལམ་ཞོར་དུ་ལྷ་སར་མཇལ་སྐོར་ལ་ཡོང་བ་ཡིན་སྟབས། འབྲས་སྤུངས་དང་སེ་ར་རུ་མཆོད་མཇལ་དུ་ཕྱིན་ཡང་སྒོ་ཚང་མ་བརྒྱབ་སྟེ་མཆོད་མཇལ་རག་མ་སོང་ལ། དགོན་པ་སྟོང་པ་ལྟ་བུ་ཆཊ་འདུག”ཅེས་སོཊ་ངོ་སྤྲོད་གནང་བྱུང་།
གསར་འགོད་པ། པདྨ་མཚོ།
ང་ཚོའི་བཙན་བྱོལ་སྤྱི་ཚོགས་ནང་དུ་ཡང་སློབ་ཕྲུག་ཚོར་གུང་གསེང་གི་སྐབས་དང་བསྟུན་ཏེ་ནང་མི་དང་གྲོང་པས་སྒེར་གྱི་བོད་ཡིག་དང་ནང་ཆོས་ཀྱི་འཛིན་གྲྭ་གོ་སྒྲིག་ཞུ་རྒྱུ་ཧ་ཅང་གལ་ཆེན་པོ་རེད། དེས་ཕྲུ་གུ་ཚོར་སློབ་གྲྭའི་ནང་སློབ་སྦྱོང་གནང་བ་ལས་ལྷག་གི་བག་ཆགས་ཤིག་འཇོག་ཐུབ་གི་རེད། གོང་གི་གསར་འགྱུར་ནང་གི་མི་སྣ་དེས་ ” ཉེ་བའི་ལོ་འདི་ཚོར་དབྱར་དགུན་གྱི་གུང་གསེང་སྐབས་སུ་བོད་མི་སྒེར་ངོས་ནས་བོད་ཡིག་དགེ་རྒན་ཚད་ལྡན་གདན་འདྲེན་ཞུས་ཏེ། སློབ་མ་ཚོར་བོད་ཡིག་ཟབ་སྦྱོང་འཛིན་གྲྭ་ཆེད་འཛུགས་བྱས་ཡོད་སྟབས། བོད་ཡིག་གི་ཤེས་ཚད་ཡར་རྒྱས་གཏོང་བར་ཕན་ཆེན་པོ་ཐོགས་ཀྱི་འདུག གུང་གསེང་ཟླ་གཉིས་ཀྱི་བོད་ཡིག་ཟབ་སྦྱོང་གི་གྲུབ་འབྲས་དེ་སློབ་གྲྭའི་ལོ་གཅིག་གི་སྦྱངས་འབྲས་ལས་ཀྱང་ཡག་པོ་འདུག་ཅེས་ས་གནས་བོད་མི་ཚང་མས་ཤོད་ཀྱི་འདུག” ཅེས་གསུངས་འདུག་པ་དེ་ཧ་ཅང་བདེན་པ་ཞིག་ཏུ་མཐཽང་སོང་།