རྒྱ་ནག་གཞུང་གིས་རྫ་དབོན་པོ་དགོན་པའི་གྲྭ་བ་གསུམ་ལ་ལོ་གཅིག་ནས་བཞི་བར་གྱི་བཙོན་འཇུག་ཁྲིམས་ཐག་བཅད་འདུག
གྲྭ་བྱམས་པ་ཡོན་ཏན་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་ཕྱི་ལོ་ ༢༠༡༢ ཕྱི་ཟླ་ ༡༠ དང་ ༡༢ བཅས་སྔ་ཕྱིར་སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་རྫ་ཆུ་ཁ་རྫ་སྨད་ཤང་། རྫ་དབོན་པོ་དགོན་དགའ་ལྡན་བཤད་སྒྲུབ་དར་རྒྱས་གླིང་གི་གྲྭ་པ་ ༩ འཛིན་བཟུང་བྱས་ཏེ་ད་བར་ར་རྔ་དང་རོང་བྲག་བཅས་སུ་བཙོན་འཇུག་བཀག་ཉར་བྱས་ཡོད་པ་མ་ཟད། ཟླ་འདིའི་ཕྱི་ཚེས་ ༩ ཉིན་སྔར་ལོའི་ཕྱི་ཟླ་ ༡༠ བའི་ནང་འཛིན་བཟུང་བྱས་པའི་གྲྭ་ཆོས་དར་ལ་ལོ་ ༡ ཁྲིམས་ཐག་དང་། ཟླ་འདིའི་ཕྱི་ཚེས་ ༡༡ ཉིན་སྔར་ལོའི་ཕྱི་ཟླ་ ༡༢ པའི་ཚེས་ ༡༥ ཉིན་འཛིན་བཟུང་བྱས་གྲྭ་བསོད་ནམས་ཆོས་དར་དང་བསོད་ནམས་མགོན་པོ་གཉིས་ལ་ལོ ༤ རེའི་བཙོན་འཇུག་ཁྲིམས་ཐག་བཅད་འདུག
གཞན། རང་ལོ་ ༢༧ ཡིན་པའི་སྐྱབས་བྷེ་དང་། རང་ལོ་ ༢༥ ཡིན་པའི་བློ་བཟང་མི་འཁྲུགས་གཉིས་ལ་ཁེག་ཐག་དཔང་མི་བཞག་ཏེ་ཀློད་གྲོལ་ཐོབ་ཡོད་ཀྱང་། ལོ་ ༣ རིང་ཆབ་སྲིད་ཀྱི་ཁེ་དབང་དང་ཐོབ་ཐང་མེད་པར་བཟོས་ཡོད་འདུག
ཟླ་འདིའི་ཕྱི་ཚེས་ ༡༡ ཉིན་དེ་སྔོན་འཛིན་བཟུང་བཀག་ཉར་བྱས་པའི་དགེ་འདུན་པ་ ༩ ལས། རང་ལོ་ ༢༢ ཡིན་པའི་བློ་བཟང་མཁས་གྲུབ་དང་། རང་ལོ་ ༢༠ ཡིན་པའི་བློ་བཟང་ནོར་བུ། རང་ལོ་ ༡༩ ཡིན་པའི་བློ་བཟང་དབྱིག་གཉེན། རང་ལོ་ ༢༤ ཡིན་པའི་བློ་བཟང་དགེ་འདུན་བཅས་མི་ ༤ གློད་ཀྲོལ་བཏང་ཡོད་འདུག
