གྲོཊ་མཆོག་ཅིག་སྐུ་གྲོངས་པར་མྱ་ངན།

དེ་རིང་སྔ་དྲོར་སྤྱི་འཐུས་གྲོས་ཚོགས་ནང་། ཁ་སང་ཚེས་ ༢༢ ཉིན་ལྡི་ལིར་འདས་གྲོངས་སུ་ཕྱིན་པ། བོད་དོན་རྒྱབ་སྐྱོར་གནང་མཁན་སྐུ་ཞབས་མོ་ཧན་སེན་ལགས་སུ་གཞུང་འབྲེལ་མྱ་ངན་གྲོས་ཆོད་བཞག་སོང་།

ཁ་སང་ཕྱི་ཚེས་ ༢༢ ཉིན་གྱི་ཉིན་རྒྱབ་ཆུ་ཚོད་ ༤།༡༥ ཐོག རྒྱ་གར་ས་མཱ་ཇི་ཝ་ཊི་ (Smajwati) ཆབ་སྲིད་ཚོགས་པའི་དྲུང་ཡིག་ཆེ་མོ་དང་། ཡུན་རིང་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་སྐུ་ཞབས་མོ་ཧན་སེན་ (Mohan Singh) མཆོག ཡུན་རིང་སྙུང་གཞིའི་རྐྱེན་པས་ལྡི་ལིའི་ཨེམ་སི་སྨན་ཁང་དུ་འདས་གྲོངས་སུ་ཕྱིན་ཡོད་འདུག

འདིའི་ཐད་དེ་རིང་སྐབས་བཅོ་ལྔ་བའི་གྲོས་ཚོགས་ཚོགས་དུས་དྲུག་པའི་ཐོག བཀའ་སྤྱི་གཉིས་ཀྱིས་དམ་པ་ཁོང་གི་མཛད་རྗེས་ལ་ཡི་རངས་བསྔགས་བརྗོད་དང་། ཤུལ་ལུས་ནང་མིར་ཐུགས་གསོའི་འཚམས་འདྲི་ཆེད་གཞུང་འབྲེལ་ཐོག་མྱ་ངན་གུས་འདུད་ཀྱི་གྲོས་ཆོད་ཅིག་བཞག་ཡོད་པ་དང་། ནང་སྲིད་བཀའ་བློན་གཙོས་པའི་སྤྱི་འཐུས་ ༣ བཅས་ཀྱིས་ཁོང་གི་མཛད་རྗེས་དང་བོད་དོན་ལ་ཐུཊ་ཁུར་རྒྱབ་སྐྱོར་གནང་ཕྱོགས་སྐོར་བཅས་ལ་གཏམ་བཤད་གནང་སོང་།

སྤྱི་འཐུས་ཀྱི་མྱ་ངན་གྲོས་ཆོད་ནང་བཀོད་དོན་ལྟར་ན། སྐུ་ཞབས་མོ་ཧན་སེན་མཆོག་ནི། ༡༩༤༥ ལོར་རྒྱ་གར་གྱི་ཡུ་པེ་མངའ་སྡེའི་རྡེའུ་རི་ཡཱ་ཇཱ་ཡེ་ན་གྷར་ (Jai Nagar) དུ་སྐྱེས་པ་དང་། ༡༩༦༨ ནས་ ༡༩༦༩ ལོའི་བར་སློབ་གཉེར་གྱི་ཞོར་དུ་ཨ་ལཱ་བྷ་ངྷ་གཙུག་ལག་སློབ་གཉེར་ཁང་གི་སློབ་ཕྲུག་ཚོགས་པའི་ཚོགས་གཙོ་དང་། སྐབས་དེའི་རྒྱ་གར་སྤྱི་ཚོགས་རིང་ལུགས་པའི་དབུ་ཁྲིད་གྲགས་ཅན་རཱ་ཇི་ན་རཱན་ (Raj_Narain) མཆོག་དང་། སྐུ་བས་རཱམ་མཱ་ནོ་ཧར་ལོ་ཡེ་ཡཱ་ (Dr.Ram Manohar Lohiya) རྣམ་གཉིས་ཀྱིལ་སྣེ་འཁྲིད་ལས་འགུལ་ནང་མཉམ་ཞུགས་གནང་བ་དང་། ལས་འགུལ་གང་མང་དུ་ཞུགས་པའི་དབང་གིས་ཐེངས་མང་བཙོན་ཁང་དུ་ཚུད་དགོས་བྱུང་ཡོད་འདུག 

༡༩༧༧ ལོ་ནས་ ༡༩༨༥ ལོའི་བར་ཡུ་པེ་མངའ་སྡེའི་གྲོས་ཚོགས་འཐུས་མི་དང་། སྐབས་བཅུ་བ་དང་བཅུ་གཉིས། བཅུ་བཞི་བཅས་ཀྱི་རྒྱ་གར་གྲོས་ཚོགས་འོག་མའི་ཚོགས་མི། སྐབས་གཉིས་རིང་རྒྱ་གར་གྲོས་ཚོགས་གོང་མིའི་ཚོགས་མི། ས་མཱ་ཇི་ཝ་ཏི་ཆབ་སྲིད་ཚོགས་པའི་མགྲིན་ཚབ་པ་དང་གྲོས་ཚོགས་ཀྱི་ཚོགས་པའི་སྣེ་འཁྲིད་པ་བཅས་གནང་སྟེ། ༢༠༠༨ ལོར་གྲོས་ཚོགས་འཐུས་མི་ལེགས་ཤོས་ཀྱི་གཟེངས་རྟགས་ཐོབ་མྱོང་ཡོད་འདུག་ལ། ཁོང་བཟང་སྤྱོད་ལྡན་པའི་གྲོས་ཚོགས་འཐུས་མི་ཞིག་ཡིན་པ་མ་ཟད། བརྩམས་ཆོས་ཁག་ཅིག་ཀྱང་རྩོམ་གནང་མཛད་ཡོད་འདུག

སྐུ་ཞབས་མོ་ཧན་སེན་མཆོག་ནི། དུས་ཡུན་རིང་པོར་བོད་དོན་ཐོག་རྒྱབ་སྐྱོར་ཤུགས་ཆེར་གནང་མཁན་ཞིག་ཡིན་པ་མ་ཟད། ༡༩༩༤ ལོར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེ་ཐེངས་དང་པོ་ལྡི་ལིར་ཚོགས་སྐབས། སྐུ་ཞབས་ཇོར་ཇི་ཧྥར་ནན་ཌི་(Georj Fernandes) མཆོག་དང་ལྷན་གོ་སྒྲིག་འགན་འཁུར་གཙོ་བོ་གནང་མཁན་དང་། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་སྔ་རྗེས་སུ་མཉམ་ཞུགས་གནང་ཡོད་ལ། ནམ་རྒྱུན་བོད་དོན་དང་འབྲེལ་བའི་གནད་དོན་གྲོས་ཚོགས་ནང་གླེང་སློང་གནང་མཁན་དང་། སློབ་སྟོན་ཞུ་ཡུལ་གཙོ་བོ་ཞིག་ཡིན་པ་མ་ཟད། ཁོང་ནི་༸གོང་ས་མཆོག་ལ་དུས་རྟག་ཏུ་དད་གུས་ཆེན་པོ་ཡོད་མཁན་ཞིག་དང་ཐེངས་མང་མཇལ་ཁ་གནང་མྱོང་མཁན་ཞིག་བཅས་ཡིན་འདུག

གསར་འགོད་པ། དོན་གོ