སྤྱི་འཐུས་ཀརྨ་ཆོས་འཕེལ་གྲོས་ཚོགས་ནས་འཕུད་དགོས་ཟེར།

དེ་རིང་ཞོགས་པར་བོད་མིའི་སྒྲིག་འཛུཊ་བཀའ་ཤག་སྒོ་འགྲམ་དུ་བཞུགས་སྒར་ཁུལ་གྱི་རྒན་རྒོན་ལྔ་ཡིས་སྦྱར་ཡིག་བཟུང་སྟེ་སྤྱི་འཐུས་ཀརྨ་ཆོས་འཕེལ་གྲོས་ཚོགས་ནས་འཕུད་དགོས་པའི་རེ་འདུན་བཏོན་སོང་ལ། དེ་བཞིན་ཉིན་རྒྱབ་མདོ་སྟོད་ཆུ་བཞི་སྒང་དྲུག་གིས་གསར་འགོད་གསལ་བསྒྲགས་སྤེལ་ཏེ་སྤྱི་འཐུས་ཀརྨ་ཆོས་འཕེལ་གྱི་གནང་སྟངས་ལ་གདོང་ལེན་བྱེད་རྒྱུ་ཡིན་སྐོར་བརྗོད་བྱུང་།  

ཉིན་འདི་འགར་བོད་མིའི་སྒྲིག་འཛུགས་བཀའ་ཤག་ཡང་སྟེང་ཚོགས་ཁང་དུ། བོད་མི་མང་སྤྱི་འཐུས་གྲོས་ཚོགས་འཚོགས་བཞིན་ཡོད་པ་དང་བསྟུན་ཏེ། དེ་རིང་ཕྱི་ཚེས་ ༢༣ ཉིན་གྱི་ཞོགས་པའི་ཆུ་ཚོད་ ༩།༠༠ སྟེང་། བཀའ་ཤག་སྒོ་འགྲམ་དུ་བཞུགས་སྒར་ཁུལ་དུ་གནས་སྡོད་ཆབ་སྲིད་བཙོན་ཟུར་རིག་འཛིན་ཆོས་ཉིད་དང་། བློ་བཟང་ནོར་བུ། དིང་རི་ངག་དབང་བཅས་རྒན་པོ་གསུམ་དང་། ཨ་ནེ་ངག་དབང་སྒྲོལ་མ་དང་ཨ་ནེ་གཞན་གཅིག་བཅས་རྒན་རྒོན་ལྔ་ཡིས། ལག་ཏུ“ སྤྱི་འཐུས་ཀརྨ་ཆོས་འཕེལ་གྲོས་ཚོགས་ནས་འཕྲལ་དུ་ཕྱིར་འཕུད་གཏོང་དགོས།” ཞེས་པའི་སྦྱར་བྱང་བཟུང་སྟེ་སྤྱི་འཐུས་ཀརྨ་ཆོས་འཕེལ་གྲོས་ཚོགས་ནས་འཕུད་དགོས་པའི་རེ་འདུན་བཏོན་སོང་།

དེ་བཞིན། དེ་རིང་ཕྱི་དྲོའི་ཆུ་ཚོད་ ༢།༤༠ སྟེང་དྷ་ས་སྟོད་པ་སྐྱིད་སྡུག་ཚོགས་ཁང་དུ། ཉིན་གྲངས་གསུམ་རིང་གི་མདོ་སྟོད་ཆོལ་ཁའམ་ཆུ་བཞི་སྒང་དྲུག་འགན་འཛིན་ལྷན་ཚོགས་ཐེངས་ ༣༩ པ་མཇུག་བསྒྲིལ་བ་དང་སྦྲགས་ཏེ་དབུས་ས་ཐུན་མོང་ནས་གྲོས་ཆོད་བཞག་པ་ལྟར་གསར་འགོད་གསལ་བསྒྲགས་ཤིག་སྤེལ་ཏེ། བཀའ་བརྒྱུད་སྤྱི་འཐུས་ཀརྨ་ཆོས་འཕེལ་ལགས་ངེས་པར་དུ་གྲོས་ཚོགས་ནས་ཕྱིར་འཕུད་གཏོང་དགོས་པའི་འབོད་སྐུལ་གནང་སོང་།

གོང་གསལ་རྒན་རྒོན་དེ་དག་གིས་མཚན་རྟགས་འཁོད་པའི་ཡི་གེ་ཞིག་དགའ་ལྡན་ཕོ་བྲང་ཡིག་ཚང་དང་། བཀའ་ཤག་དང་སྤྱི་འཐུས། དཔལ་རྒྱལ་བ་ཀརྨ་པ་མཆོག་གཙོས་པའི་བླ་ཆེན་རྣམ་པ་དང་དགོན་སྡེ་ཁག གཞུང་འབྲེལ་མིན་པའི་ཚོགས་པ་ཁག བཞུགས་སྒར་མེག་ལོར་ཁྲོམ་གཞུང་དང་གངས་སྐྱིད་སྒོ་ཆེན་གཡས་གཡོན་སོགས་སུ་སྤྱར་འགྲེམས་བྱས་ཡོད་པའི་ནང་། “ གུས་འབངས་ཆབ་སྲིད་བཙོན་ཟུར་རིག་འཛིན་ཆོས་ཉིད་དང་། དིང་རི་ངག་དབང་། བློ་བཟང་ནོར་བུ་སོགས་ནས་ཞུ་སྙིང་། དེ་ཡང་དགོངས་དབྱིངས་སུ་མངའ་བ་བཞིན་ད་ལྟའི་སྤྱི་འཐུས་ལས་ཐོག་པ་ཀརྨ་ཆོས་འཕེལ་གྱིས་སྔ་ཕྱི་བར་གསུམ་དུ་བྱ་ངན་སྤྱོད་ལོག་ཇི་སྙེད་བྱས་པ་གཞུང་འབངས་ཚང་མས་མཁྱེན་ཆུབ་ཞིབ་ཞུ་མ་དགོས་པ་དང་། དམིགས་བསལ་ད་རེ་ཞུ་དོན་སྙིང་པོར་འདི་ལོ་ཕྱི་ཟླ་ ༣ གྲོས་ཚོགས་ཐོག་སྤྱི་འཐུས་ཀརྨ་ཆོས་འཕེལ་ནས་༸གོང་ས་མཆོག་གིས་ལམ་དབུ་མ་གསུང་བཞིན་པ་ཡང་ཐུགས་ནང་རང་བཙན་ཡོད་ལུགས་སོགས་གཏམ་བཤད་མང་དག་བྱས་པ་ལྷ་མི་ཀུན་ཤེས་དེ་ལྟར་ཡང་།

ད་རེ་ཕྱི་ཟླ་ ༩ ཚེས་ ༦ ཉིན་སྤྱི་འཐུས་ཀརྨ་ཆོས་འཕེལ་ནས་གསལ་བསྒྲགས་བྱས་ཏེ་གོང་གསལ་གཏམ་བཤད་རྩ་བ་ནས་བྱས་མེད་ལུགས་སོགས་བརྗོད་པ་མ་ཟད། འོན་ཀྱང་སྙན་གསེང་སྒྲོན་སྟངས་ནས་༸གོང་ས་མཆོག་མི་ལེགས་པའི་དགོངས་ཚུལ་ཞིག་བྱུང་ཡོད་གཤིས་ཟེར་བ་སོགས་མདོ་དོན་རང་ཉེས་ཁས་ལེན་མེད་ཁར། ༸གོང་ས་མཆོག་དང་བཀའ་ཤག་ལྷན་རྒྱས། བོད་མི་མང་སྤྱི་འཐུས་གྲོས་ཚོགས། རྒྱ་ཆེའི་མང་ཚོགས། བོད་ཕྲུག་སློབ་གྲྭ་བ་བཅས་ལ་ཚུལ་མིན་གྱི་བསྙོན་དཀྲི་དང་སྡིགས་དམོད་བྱེད་པ་སོགས་ཀརྨ་ཆོས་འཕེལ་ནི་ཡ་རབས་བཟང་སྤྱོད་ཀྱི་དྲི་མ་ཙམ་མེད་པར་མ་རབས་ཐ་ཤལ་ཅན་གྱི་མི་ཞིག་སྤྱི་འཐུས་ཀྱི་འོས་བབ་མི་ལྡན་པར་གྲོས་ཚོགས་ནས་འཕྲལ་དུ་ཕྱིར་འཕུད་ཡོང་བར་གྲོས་ཚོགས་ལྷན་སྟེང་ནས་དགོངས་བཞེས་མཐའ་གཅིག་ཏུ་ཡོང་བ་ལས། མུ་མཐུད་གནས་ན་གྲོས་ཚོགས་ལའང་མཚན་ཤས་ཡོང་ངེས་ལ་གུས་འབངས་མིང་བཀོད་རྣམས་ནས་རེ་འབོད་ཤུགས་དྲག་ཞུ་རྒྱུ་མ་ཟད། མུ་མཐུད་རེ་འབོད་ཞུ་སྐུལ་སོགས་ལས་འགུལ་ཅི་ཆེ་ཞུ་དགོས་སྤྱི་འཐུས་ཀརྨ་ཆོས་འཕེལ་གྲོས་ཚོགས་ནས་ཕྱིར་འཕུད་མ་བྱུང་བར་རྒྱུན་མཐུད་ཞུས་ཆོག་པའི་སྙན་ཞུ་རུ། ཞེས་འཁོད་འདུག

དེ་བཞིན། མདོ་སྟོད་ཆུ་བཞི་སྒང་དྲུག་གི་གསར་འགོད་གསལ་བསྒྲགས་ནང་། “བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་མི་བཀའ་བརྒྱུད་སྤྱི་འཐུས་ཀརྨ་ཆོས་འཕེལ་ལགས་ནི་ད་ཕན་གྱི་བཙན་བྱོལ་བའི་གནས་སྐབས་ཀྱི་འདས་པའི་ལོ་རྒྱུས་དང་ད་ལྟའི་ཆབ་སྲིད་དང་སྲིད་དོན་གྱི་རྒྱབ་ལྗོངས། བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་གླེང་ཕྱོགས་དང་ཤུགས་རྐྱེན་གང་ལ་གཞིགས་ཀྱང་སྤྱི་འཐུས་ཀྱི་མཚན་གནས་བཞེས་རྒྱུར་སྤྱི་སྒེར་གཉིས་ལ་ཕན་ལས་གནོད་ཆེ་བ་ཞིག་ལས་མེད་པ་ནི་ཁོང་གི་འདས་པའི་ལོ་རྒྱུས་ནས་དུས་ད་ལྟ་བར་གྱི་བྱེད་བབ་ལ་གཟིགས་ན་མཁྱེན་ཐུབ་པ་ཞིག་དང་། འདིར་ཁོང་གི་མཛད་རྗེས་ཇི་རྙེད་ཅིག་ཡོད་པ་ནས་ཉེ་ལམ་སྐབས་ ༡༣ དང་ ༡༤ བཅས་ཀྱི་སྤྱི་འཐུས་ལས་རྒྱུན་རིང་ཤེས་བཞིན་དུ་རང་བཙན་ལ་ཁ་གཡར་ཏེ་བོད་གཞུང་དམངས་གཉིས་ནས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ལ་དངོས་ཡོད་མངོན་སུམ་དུ་འགོག་རྒོལ་བྱས་པའི་གནས་ཚུལ་རིམ་པར་བྱུང་ཡོད།”ཅེས་བཀོད་འདུག  

མུ་མཐུད་དུ་བཀོད་དོན། “ ཁོ་པའི་ཐོག་མཐའ་བར་གསུམ་གྱི་བྱ་ངན་སྤྱོད་ངན་གྱི་རང་གཤིས་ལྡོག་ཏུ་མེད་པའི་བརྟུལ་ཞུགས་རྒྱུན་འཛིན་བྱས་ཏེ་ཁས་ལེན་མ་ཞུས་པར་མ་ཟད། ༸གོང་ས་སྐྱབས་མགོན་ཆེན་པོ་མཆོག་དང་བོད་གཞུང་བཀའ་ཤག བོད་མི་མང་སྤྱི་འཐུས་གྲོས་ཚོགས་དང་རྒྱ་ཆེ་མི་མང་བཅས་པར་བརྩིས་མེད་རྡོག་རོལ་བཏང་དང་གཏོང་བཞིན་ཡོད་པར་བརྟེན། བོད་མི་མང་སྤྱི་འཐུས་གྲོས་ཚོགས་ནས་ཁོ་པ་ཕྱིར་འཕུད་གཏོང་དགོས་པའི་རེ་འབོད་ཤུགས་དྲག་ཞུ་བཞིན་ཡོད། ཉེ་ཆར་སྤྱི་འཐུས་གྲོས་ཚོགས་སུ་ཁོ་པར་འགེབ་སྲུང་དང་རྒྱབ་སྐྱོར་གནང་མཁན་འགའ་ཞིག་གྲོས་ཚོགས་ཚོགས་ཐེངས་འདིའི་ཐོག་མངོན་གྱི་འདུག་པར། ང་ཚོ་ཆེས་བློ་ཕམ་དང་བཅས་ཏེ་སྤྱི་འཐུས་བྱེ་བྲག་པ་དེ་ཚོར་ཀརྨ་ཆོས་འཕེལ་དང་ངོས་འཛིན་གཅིག་མཚུངས་ཀྱིས་གདོང་ལེན་ངེས་པར་དུ་བྱེད་ངེས་ལས་རང་བཞིན་འཇོག་ཐབས་གཏན་ནས་མེད། དེ་དག་གི་མཇུག་འབྲས་ངན་པ་ཇི་ཆགས་སྐབས་ ༡༥ པའི་སྤྱི་འཐུས་ལྷན་ཚོགས་ནས་ཐུགས་སྣང་དགོངས་བཞེས་དགོས་པའི་གསོལ་འདེབས་ཞུ། ”ཞེས་སོགས་བཀོད།

གཞན། ཟླ་འདིའི་ཚེས་ ༡༩ ཉིན་བོད་མི་མང་སྤྱི་འཐུས་གྲོས་ཚོགས་ནང་། ཉེ་ལམ་༧གོང་ས་མཆོག་ཐུགས་ཕམ་གྱི་བཀའ་སློབ་ཅིག་གནང་བའི་ཐད། སྤྱི་མོས་ཐོག་ལྷ་དགོངས་དྭངས་གསལ་ཡོང་བའི་གཞུང་འབྲེལ་གྲོས་ཆོད་ཅིག་བཞག་པ་དང་། ཉིན་དེར་གྲོས་ཆོད་དེ་དང་འབྲེལ་ཏེ་སྤྱི་འཐུས་ ༣༠ ཙམ་གྱིས་དགོངས་ཚུལ་གསུངས་ཡོད་ལ། སྐབས་དེར་སྤྱི་འཐུས་ཀརྨ་ཆོས་འཕེལ་ལགས་ཀྱིས་གསུངས་དོན། “གཞུང་འབྲེལ་གྲོས་ཆོད་དེ་ལ་རྒྱབ་སྐྱོར་ཡོད་དང་ཡོད། སྤྱི་འཐུས་རྒྱུན་ལས་ཀྱི་གཞུང་འབྲེལ་གྲོས་ཆོད་གྲོས་འཆར་རེད། རང་ཉིད་སྤྱི་འཐུས་རྒྱུན་ལས་ཡིན་པའི་ཆ་ནས་རྒྱབ་སྐྱོར་ཡོད། འགྲོ་སྟངས་ལྟར་བྱས་ན། གྲོས་ཆོད་གྲོས་འཆར་འོག་ཏུ་སྤྱི་མོས་སམ་མང་མོས་ཞེས་རྒྱག་དགོས་ཀྱང་། མང་མོས་ཟེར་མི་དགོས་པར་སྤྱི་མོས་རང་ལ་འགྲོ་དགོས་ངེས་ཡིན་སྟབས་མང་མོས་བརྒྱབ་ཡོད་པ་མ་རེད། ༸གོང་ས་མཆོག་ཐུགས་ཕམ་བྱུང་བའི་ཐོག་བོད་མི་སུ་ཡིན་ཡང་ཚོར་བ་རྣོན་པོ་ཞིག་སྐྱེས་པ་དེ་ཐུགས་ཁག་ཡོད་པ་མ་རེད། སྐྱེས་དགོས་པ་ཞིག་ཀྱང་རེད། རང་ཉིད་ལ་མཚོན་ནའང་ཚོར་བ་ཤུགས་ཆེན་པོ་ཡོད། ནམ་ཀུན་ལྟ་བ་གཅིག་པ་ཤོད་མཁན་ཡིན་ཡང་༧གོང་ས་མཆོག་ལ་མཚན་སྨད་ཞུ་མཁན་ལ་མཉམ་དུ་མེད་ཅེས་ལབ་བསྡད་མཁན་དང་བསམ་བསྡད་མཁན་ཞིག་ཡིན་སྟབས། ༸སྐུ་མདུན་ཐུགས་ཕམ་འབྱུང་གཞིའི་གནས་ཚུལ་ཐོག་ང་ཚོས་དོན་ཚན་གསུམ་ཅན་གྱི་གྲོས་ཆོད་འཇོག་གི་ཡོད་དེ་ཡག་པོ་རེད།

ང་དང་འབྲེལ་བ་ཡོད་པའི་གནད་དོན་ཞིག་བཀུར་འོས་སྤྱི་འཐུས་ཁག་ཅིག་གིས་དེ་དང་མཉམ་དུ་གླེང་གནང་བ་རེད། ཐུགས་ཁག་ཡོད་པ་མ་རེད། ཡིན་ནའང་། གྲོས་ཚོགས་ཀྱི་ཟིན་ཐོའི་ནང་གསལ་བོར་གནས་དགོས་པ་དེ། ང་ལ་གླེང་གཞི་ཡོད་བསྡད་པ་དེ་དང་གྲོས་ཆོད་འདི་དང་འབྲེལ་བ་སྤུ་ཙམ་ཡོད་པ་མ་རེད།

ད་ལྟའི་ཆར་ངས་༸གོང་ས་མཆོག་ལ་མཚན་འཁོད་སྙན་ཞུ་ཕུལ་བཞག་ཡོད། དགའ་ལྡན་ཕོ་བྲང་ལས་ཁུངས་སུ་བཅར་ཏེ། དྲུང་ཆེ་དང་མཉམ་དུ་དགོངས་སེལ་དང་གསལ་བཤད་ཞུས་ཡོད། མཚན་འཁོད་སྙན་ཞུ་ཕུལ་ཡོད། དེའི་ནང་སྔོན་མ་གྲོས་ཚོགས་ནང་བཤད་པ་དེ་ལས་འཕྲོས་ཏེ་༧གོང་ས་མཆོག་དགོངས་ཚུལ་མི་ལེགས་པ་གསུངས་བ་དེ་ལྷ་དགོངས་དྭངས་བའི་དགོངས་སེལ་ཞུ་རྒྱུ་ཡིན། དགོངས་སེལ་ཞུ་རྟེན་དུ་ངས་གྲོས་ཚོགས་ནང་ཞུས་པའི་སྐད་ཆ་ཆ་ཚང་ཕྱིར་འཐེན་ཡིན། དེའི་སྔོན་ལ་ངག་ཐོག་ནས་དྲུང་ཆེར་ཞུས་ཡོད། མཚན་འཁོད་སྙན་ཞུ་དང་དེ་མ་ཕུལ་བའི་སྔོན་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་ལ་སྙན་ཞུ་ཕུལ་ནས་དེའི་སྐབས་ངས་སྙན་ཞུ་ཕུལ་བཞག་པ་ཆ་ཚང་གྲོས་ཚོགས་ཀྱི་ཡིག་ཆ་ལས་བཏོན་རོགས་ཞེས་སྙན་ཞུ་ཕུལ་ཡོད། དེར་བརྟེན། ང་ཚོའི་འགྲོ་སྟངས་ལྟར་སྔ་རྗེས་ལ་འགྱོད་སེམས་ཞུས་ཡོད། དེ་དང་མཉམ་དུ་ཕྱིན་ཆད་སྤང་བླངས་བྱ་དགོས་སྟབས། དེ་ལ་མ་འོངས་པར་གནད་དོན་དེའི་སྐོར་ལ་གླེང་སློང་ནམ་ཡང་ཞུ་རྒྱུ་མིན་པའི་དམ་བཅའ་ཕུལ་ཡོད། ཅེས་བརྗོད་བྱུང་།

གསར་འགོད་པ། དོན་གོ་དང་པདྨ་མཚོ།