འདས་པའི་ལོ་མང་རིང་དཀའ་རྙོག་འོག་ལྷག་ཡོད་པའི་བཙན་བྱོལ་བོད་མིའི་སྐྱབས་བཅོལ་ལག་དེབ་ RC སྟེང་། གནས་སྐོར་ཞེས་འཁོད་ཡོད་པ་དག་ལ། རྒྱ་གར་འབྲེལ་ཡོད་ལས་ཁུངས་ནས་དུས་ཚོད་ཕར་འགྱངས་རག་གི་མེད་པ་དེར། ད་ཆར་འགྱུར་བ་ཐེབས་ཏེ་ཟླ་འདིའི་ཚེས་ ༢༥ ཉིན་ནས་བཟུང་དུས་ཚོད་ཕར་འགྱངས་ཐོ་འགོད་བྱེད་རྒྱུ་ཡིན་འདུག
གོང་གསལ་གནས་ཚུལ་སྐོར་ལ་གསལ་བསྒྲགས་སྤེལ་དོན། བཞུགས་སྒར་དུ་གནས་འཁོད་སྐྱབས་བཅོལ་ལག་འཁྱེར་ཐོག་གནས་སྐོར་འཁོད་པའི་འབྲེལ་ ཡོད་རྣམས་ལ། རྡ་ས་ས་གནས་སྐོར་སྲུང་ལས་ཁུངས་ནས་ཕྱི་ལོ་ ༢༠༡༢ ཟླ་ ༦ ཚེས་ ༣༠ བར་སྐྱབས་བཅོལ་ལག་དེབ་དུས་འགྱངས་ཐོབ་ཟིན་པ་རྣམས་ལ་རྒྱ་གར་དབུས་གཞུང་ནས་དགོངས་པ་ཆེ་བཞེས་ཐོག་རྒྱ་གར་ནང་གནས་སྡོད་སྐྱབས་བཅོལ་བོད་མི་སྤྱི་མཚུངས་ལྟར། ལོ་རེ་བཞིན་ཕར་འགྱངས་གནང་རྒྱུ་བཀའ་འཁྲོལ་ཐོབ་ཟིན་པ་ལྟར། ཕྱི་ལོ་ ༢༠༡༣ ཟླ་ ༩ ཚེས་ ༢༥ རེས་གཟའ་ལྷག་པ་ནས་བཟུང་ཕར་འགྱངས་དེབ་འགོད་མགོ་འཛུགས་ཞུ་རྒྱུ་ཡིན་ཞིང་། འདི་ལོའི་རིང་ལག་འཁྱེར་ཕར་འགྱངས་ཞུ་རྒྱུའི་དུས་ཚོད་རེས་གཟའ་ཟླ་བ་དང་། ལྷག་པ། པ་སངས་བཅས་ཡིན་པ་དང་། བདེ་སྲུང་ཡན་ལག་ལས་ཁུངས་ནས་འགེངས་ཤོག་བཞེས་ཏེ་ས་གནས་ལག་འཁྱེར་ (FRO) ལས་ཁུངས་སུ་དོ་བདག་སོ་སོ་ངོ་བཅར་གྱིས་དུས་འགྱངས་ཞུ་དགོས། སྐྱབས་བཅོལ་ལག་ཁྱེར་དེབ་འགོད་དུས་ཚོད་ངེས་ཅན་རིང་ཡིན་འདུག་སྟབས། དེ་ལུགས་རང་དོན་རང་གཅེས་ཀྱི་དུས་ཐོག་ངོ་བཅར་ངེས་པར་དུ་ཡོང་བ་ཞུ” ཞེས་བཀོད་འདུག
གསལ་བསྒྲགས་ཀྱི་མཇུག་ཏུ། “ ཕྱིན་ཆད་དོ་བདག་རང་ཉིད་རྒྱ་གར་ནང་ཁུལ་གནས་སྤོས་བྱ་དགོས་བྱུང་ཚེ་ཐོན་མཆན་དང་འབྱོར་མཆན་ཞུ་དགོས་པ་དང་། དེ་བཞིན་རྒྱ་གར་ནས་ཕྱི་རྒྱལ་ཡུལ་གྲུ་ཁག་ལ་གཏན་དུ་བསྐྱོད་དགོས་བྱུང་ཚེ་སྐྱབས་བཅོལ་ལག་དེབ་ས་གནས་སོ་སོའི་རྒྱ་གར་ལག་འཁྱེར་ (FRO) ལས་ཁུངས་སུ་རྩིས་འབུལ་ཞུ་དགོས་ཡོད་འདུག” ཅེས་བཀོད་འདུག
དོན་དག་དེ་གནས་སྐོར་བ་གཅིག་པོའི་དཀའ་ངལ་མིན་པར་ཁ་ཤས་ལ་བལ་་ཡུལ་སྣེ་ལེན་ཁང་གིས་གང་འདོད་ལྟར་སློབ་འཇུག་ཅེས་ཐོ་བཀོད་བྱས་ཡོད་རིགས་འདི་གར་སླེབས་རྗེས་ལོ་ཚོད་དགལ་བས་སློབ་ཇུག་མ་ཐུབས་པའི་རིགས་ལ་ལག་དེབ་ཕར་འགྱངས་ཀྱི་དཀའ་ངལ་རབ་དང་རིམ་པ་འཕྲད་ཀྱིན་ཡོད་པ་ཆུ་བཞི་སྒང་དྲུག་ཏུ་རྩད་གཅོད་བྱ་ན་གསལ་ཡང་དེ་དག་རིགས་གཞུང་ངོས་ནས་ཧ་གོ་མེད་པ་འདྲ།