དེ་རིང་པེ་ཅིན་ཁྲིམས་ཁང་ཞིག་གིས་རྒྱ་ནག་བཅིང་འགྲོལ་དམག་གི་དམག་སྤྱི་ཟུར་བ་ཞིག་གི་བུས་བཙན་གཡེམ་བྱས་པའི་ཉེས་མིང་འོག་ལོ་ ༡༠ ཡི་ཁྲིམས་ཐག་བཅད་འདུག
དེ་རིང་སྔ་དྲོར། པེ་ཅིན་ཧེད་ཏན་( Haidian)མི་དམངས་ཁྲིམས་ཁང་གིས་རྒྱ་ནག་དབུས་སྤྱི་ཁྱབ་དམག་སྤྱི་ཟུར་བ་ལེ་ཧྲོང་ཅང་(Li Shuangjiang)གི་བུ་རང་ལོ་ ༡༧ ཡིན་པ་ལེ་ཐན་ཡུན་( Li Tianyi) དང་། ཁོའི་གྲོགས་པོ་བཞིས་བུད་མེད་ཅིག་ལ་བཙན་གཡེམ་བྱས་ཡོད་པའི་ཉེས་འཛུགས་འོག ལེ་ཐན་ཡུན་ལ་ལོ་ ༡༠ ཡི་ཁྲིམས་ཐག་བཅད་ཡོད་པ་དང་། གཞན་བཞི་ནི་ལོ་ན་ ༡༧ ལ་སོན་མེད་སྟབས་ཁྲིམས་འོག་ཏུ་ཚུད་མེད་ཀྱང་མ་འོངས་པར་རིམ་པས་ཁྲིམས་ཐག་གཅོད་རྒྱུ་གསལ་བསྒྲགས་བྱས་འདུག
ད་ལོའི་ཕྱི་ཟླ་ ༢ ཚེས་ ༡༧ ཉིན་གྱི་མཚན་མོར། ལེ་ཐན་ཡན་དང་རོགས་པ་གཞན་བཞི་བཅས་ཀྱིས་བུ་མོ་རུས་མིང་དབྱང་(Yang)ཟེར་བ་ཞིག་ལ་ཆང་བླུད་དེ་ར་བཟི་བཅུག་རྗེས། པེ་ཅིན་མགྲོན་ཁང་ནང་བཙན་ཁྲིད་ཀྱིས་མཉམ་རུབ་ཐོག་བཙན་གཡེམ་བྱས་ཡོད་པ་དང་། བུད་མེད་དེས་ཉེན་རྟོག་པར་ཞུ་གཏུགས་བྱས་ཏེ་ཟླ་དེའི་ཚེས་ ༢༡ ཉིན་ས་གནས་ཉེན་རྟོག་པས་ཁོ་ཚོ་འཛིན་བཟུང་བྱས་ཡོད་འདུག
ཁྲིམས་ཁང་གི་ཕྱོགས་ནས་བརྗོད་པ་ལྟར་ན། ན་གཞོན་ལེ་ཐན་ཡུན་དང་ཁོའི་གྲོགས་པོ་བཞིས་བུད་མེད་དེ་ར་བཟི་བཅུག་རྗེས་མགྲོན་ཁང་དུ་གཡོ་འཁྲིད་བྱས་ཏེ་བཙན་གཡེམ་བཏང་ཡོད་པ་མ་ཟད། རྡུང་རྡེག་ཀྱང་ཚད་མེད་བཏང་ཡོད་པ་དང་། དེའི་རྗེས་ཁོ་མོར་དགོངས་དག་ཞུ་ཆེད་རྒྱ་སྒོར་ ༢༠༠༠ ཙམ་སྤྲད་ཡོད་པ་སོགས་ཤེས་རྟོགས་བྱུང་ཡོད་འདུག ཁོ་ཚོའི་བྱ་སྤྱོད་དེ་དག་གིས་རྒྱ་ནག་གི་སྤྱི་ཚོགས་བརྟན་བརླིང་ལ་གཏོར་བཤིག་བཏང་ཡོད་སྟབས་ནག་ཉེས་ལ་གཞིགས་ཏེ་ཁྲིམས་ཐག་བཅད་ཡོད་སྐོར་སོགས་བརྗོད་འདུག
དེ་སྔོན། ལེ་ཐན་ཡུན་གྱི་ཨ་མ་མེན་ཀུ(Meng Ge) ཡིས་ཁྲིམས་ཁང་ལ་སྙན་ཞུ་ཞིག་བཏང་བའི་ནང་། ཁོ་མོའི་བུ་ཁྲིམས་གཅོད་བྱེད་སྐབས་ཁྲིམས་རའི་ནང་མང་ཚོགས་ཟུར་ཉན་དུ་བཅར་ཆོག་པའི་རེ་འདུན་བཏོན་ཡོད་པ་དེར་ ཁྲིམས་ཁང་གིས་ངོས་ལེན་བྱས་མེད་པ་དང་། ད་ལྟ་ཕ་མ་གཉིས་ཀྱིས་ཁྲིམས་ཁང་གི་ཐག་གཅོད་དེར་འདོད་བློ་མ་ཁེངས་པར་བསྐྱར་དུ་ཞུ་གཏུགས་བྱེད་རྒྱུའི་སྐད་ཆ་གང་ཡང་མི་འདུག
༢༠༡༡ ལོར་ལེ་ཐན་ཡུན་དང་ཁོའི་གྲོགས་པོ་གཉིས་ཀྱིས་ཐོ་འགོད་བྱས་མེད་པའི་རླངས་འཁོར་བྷེ་ཨན་ཌ་བྷོལ་ (BMW) ཞིག་བཏང་སྟེ་མི་གཞན་གྱི་ལམ་ཁ་བཀག་པའི་གནས་ཚུལ་འོག་འཛིན་བཟུང་གིས་ལོ་གཅིག་རིང་བཙོན་འཇུག་བྱས་ཡོད་པ་དང་། སྐབས་དེར་ཁོའི་ཨ་ཕས་བརྙན་འཕྲིན་བརྒྱུད་རྒྱ་རིགས་མང་ཚོགས་ལ་བུ་ཡི་བྱ་སྤྱོད་ངན་པ་དེར་དགོངས་སེལ་ཞུ་དགོས་བྱུང་ཡོད།
ལེ་ཐན་ཡུན་གྱི་ཨ་ཕ་ལེ་ཧྲོང་ཅང་ནི། རྒྱ་ནག་བཅིང་འགྲོལ་དམག་གི་སྤྱི་ཁྱབ་དམག་སྤྱི་ཟུར་བ་དང་དམག་མིའི་བསྟོད་གླུ་ལེན་མཁན་གྲགས་ཅན་ཞིག་ཡིན་པ་དང་། ཨ་མ་མེན་ཀུ་ཡང་དམག་མིའི་བསྟོད་གླུ་ལེན་མཁན་གྲགས་ཅན་ཞིག་ཡིན་འདུག
གསར་འགོད་པ། ལྷ་སྐྱབས་རྒྱལ།
མི་འདིའི་རིགས་ལ་བཙོན་འཇུག་གི་ཁྲིམས་བཅད་དང་ནེ་ནེ་བཅད་ཀྱང་།
བུ་མོ་དེའི་ལུས་སེམས་ཀྱི་རྨ་ཁ་སོས་གི་མ་རེད།
དེར་བརྟེན་སྲོག་ཁྲིམས་བཅད་ན་ཡག་ཤོས་རེད།
རྒྱ་གར་གློག་བརྙན་ནང་ལ་འཁྲབ་པ་དེ་ཚོ། རྒྱ་ནག་ནང་ལ་ལག་ལེན་དུ་བསྟར་བཞིན་ཡོད་པ་འདྲ། ཁྲིམས་བཅད་ལ་རྒྱབ་སྐྱོར་གུས་དུད་ཡོད།
རང་ལོ་༡༧ ལ་སོན་ཙང་ཁྲིམས་གཅོད་ཆོག་པ་དང་གཞན་རྣམས་དེར་སོན་མེད་ཀྱང་རྗེས་སུ་ཁྲིམས་ཐག་འབབ་ངེས་ཡིན་པ་འདྲ། ལྷག་དོན་པར་འདི་ལ་འབྲེལ་བ་གང་ཡོད་དམ། ཨ་ཕའི་པར་རེད་དམ།
ཁྲིམས་ཐག་གཅོད་པ་ལས་ནེ་ནེ་གཅོད་དགོས་པ་རེད། སྔར་ཨ་ཧྥེ་རི་ཀའི་ལུང་པ་འགར་དེ་འདྲ་བྱེད་སྟངས་ཤིག་ཡོད་ས་རེད་པ། དེ་ཡག་ཤོས་མ་རེད་དམ།