རྒྱ་ནག་གཞུང་གིས་ཁམས་འབྲི་རུ་རྫོང་ཁོངས་སུ་དར་དམར་བསྒྲེངས་འཛུགས་དགོས་པའི་བཙན་བཀའ་བཏང་བར། མི་མང་གིས་དང་ལེན་མ་བྱས་སྟབས་མི་མང་ལ་དམ་དྲག་དང་འཛིན་བཟུང་བྱས་འདུག
ཕྱི་ཟླ་ ༩ ཚེས་ ༡༠ ཉིན་ནས་འབྲི་རུ་རྫོང་ལ་བོད་རང་སྐྱོང་ལྗོངས་དང་ནག་ཆུ་ས་གནས་དང་། དེ་བཞིན། ས་གནས་ཁག་གི་རྒྱ་གཞུང་གི་ལས་བྱེད་ ༡༨༠༠༠ ལྷག་ཙམ་འབྱོར་ཏེ། ཡུལ་མི་ཚོར་ཏང་དང་རྒྱལ་ཁབ་ལ་དགའ་ཞེན་དགོས་པ་དང་། རྒྱ་ནག་གི་རྒྱལ་དར་ཁང་ཐོག་ལ་བསྒྲེངས་འཛུགས་དགོས་པའི་བཙན་བཀའ་དང་། བསམ་བློའི་སློབ་གསོ་རྒྱག་མགོ་ཚུགས་ནས་མང་ཚོགས་དང་ལས་བྱེད་བར་མི་མཐུན་པའི་འགལ་ཟླ་མགོ་ཚུགས་ཡོད་འདུག
ངག་དབང་ཐར་པ་ལགས་ཀྱིས་གནས་ཚུལ་བཏང་འབྱོར་ལྟར་ན། ཟླ་ ༩ ཚེས་ ༢༨ ཉིན་བཙན་ཤེད་ཀྱིས་དར་དམར་འཛུགས་དགོས་པའི་བཀའ་ཕབ་ཡོད་ཀྱང་། མོ་བ་གྲོང་ཚོའི་གྲོང་མི་ཚོས་མི་འདོད་པའི་རྣམ་འགྱུར་བསྟན་ཏེ་དར་དམར་ཚང་མ་ཆུ་ལ་གཡུགས་ཡོད་སྟབས། རྒྱ་གཞུང་གིས་ཉེན་རྟོག་པ་དང་དམག་འབོར་ཆེན་འབྱོར་ཏེ་མང་ཚོགས་དང་དམག་མིའི་བར་གདོང་ཐུག་བྱུང་ནས་ཆུ་ཚོད་ ༣ རིང་ཕན་ཚུན་རྡོ་དང་མེ་མདའི་དྲག་འཐབ་བྱུང་མཐར་མོ་བ་གྲོང་ཚོ་དང་། སྨོན་ཆེན་གྲོང་ཚོ་ཚང་མ་དམག་གིས་བསྐོར་ཡོད་འདུག ཉིན་དེར་ཉེ་འགྲམ་གྱི་སྟག་ལྷས་གྲོང་དང་། བ་རོ། སྣེ་ཤོད། ཕྲ་རིང་བཅས་ནས་དྲག་གནོན་མ་བྱེད་རོགས་ཞེས་འབོད་སྐུལ་ཞུ་མཁན་བོད་མི་ ༤༠ རྒྱ་གཞུང་གིས་འཛིན་བཟུང་བྱས་ཡོད་པ་མ་ཟད། མང་ཚོགས་ནང་གནས་ཚུལ་བཟོ་མཁན་དང་ངོ་རྒོལ་བྱེད་མཁན་རྣམས་ཀྱི་ཕྲུ་གུ་སློབ་གྲྭར་འགྲོ་མི་ཆོག་པ་དང་། ནད་པ་སྨན་ཁང་དུ་སྨན་བཅོས་བྱེད་མི་ཆོག་པ། རྗེས་སུ་དབྱར་རྩ་དགུན་འབུ་བརྐོ་བར་འགྲོ་མི་ཆོག་བཅས་ཀྱི་བཙན་བཀའ་བཏང་ཡོད་སྟབས། ས་གནས་དེ་གའི་སློབ་མ་མང་པོ་སློབ་གྲྭ་ནས་ཐོན་ནས་སོ་སོའི་ནང་ལ་ལོག་ཡོད་འདུག
ཚེས་༢༨ དགོང་མོའི་ཆུ་ཚོད་༧ ཙམ་ནས་རྫོང་སྲིད་གཞུང་གི་སྒོ་འགྲམ་དུ་མང་ཚོགས་ ༡༠༠༠ ལྷག་ཙམ་གྱིས་ཆུ་ཚོད་ཉེར་བཞིའི་རིང་ཉལ་ནས་ཟས་བཅད་ཞི་རྒོལ་གྱི་ལས་འགུལ་སྤེལ་འདུག ངོ་རྒོལ་བྱེད་མཁན་གྲོས་ཟླ་བ་གཉིས་ལས་མ་སོན་པའི་ཕྲུ་གུ་དམར་འབྱར་སོགས་ཀྱང་ཁྱེར་ནས་འབྱོར་ཡོད་པ་དང་། ལོ་ན་རྒན་ཤོས་ལོ་ ༨༣ བསླེབས་པ་ཡང་ཡོད་འདུག མཚན་མོ་དེར་རང་སྐྱོང་ལྗོངས་ཀྱི་དབུ་ཁྲིད་ཝུ་དབྱིང་ཅིས་དང་ས་གནས་དབུ་ཁྲིད་རྡོ་ཐོགས་བཅས་བསླེབས་ཏེ། འཛིན་བཟུང་བྱས་པའི་མི་སྣ་དེ་དག་ཀློད་གྲོལ་བཏང་ཡོད་འདུག་ཀྱང་། མི་དེ་དག་གི་མགོ་ལུས་ཡོངས་རྫོགས་ལ་ལྕགས་དབྱུག་གཞུས་ནས་རྨས་སྐྱོན་ཚབས་ཆེན་བཏང་ཡོད་པ་དང་། མར་གཏོང་སྐབས་པར་མང་པོ་བརྒྱབ་པ་མ་ཟད། ལག་རིས་སོགས་ཀྱང་པར་བརྒྱབ་ནས་ཀློད་གྲོལ་བཏང་ཡོད་འདུག འཛིན་བཟུང་བྱས་པའི་མི་དེ་དག་ནི་སྟག་ལྷས་དང་། བ་རོ། སྣེ་ཤོད། ཕྲ་རིང་ས་གནས་བཅས་ནས་ཡིན་འདུག
དེ་བཞིན། མོ་བ་གྲོང་དུ་དམག་སྒར་ཆེ་བ་གཅིག་དང་སྨོན་ཆེན། ཕྲ་རིང་བཅས་ལ་དམག་སྒར་ཆུང་བ་ཁག་གཅིག་དང་ཞིབ་བཤེར་ས་ཚུགས་ཁག་ ༦ ཙམ་བརྒྱབ་ཡོད་འདུག ཟླ་ ༡༠ ཚེས་ ༡ ཉིན་བོད་རང་སྐྱོང་ལྗོངས་ཀྱི་ལྷ་ས་དང་། གཞིས་རྩེ། ལྷོ་ཁ་བཅས་ནས་དམག་མི་སྟོང་ཕྲག་མང་པོ་འབྲི་རུར་ཕྱིན་སོང་ཟེར་གྱི་འདུག
ད་དུང་ཉེན་རྟོག་པས་བོད་མི་མང་པོ་ཞིག་ཉིན་རེ་བཞིན་འཛིན་བཟུང་བཙོན་འཇུག་བྱེད་བཞིན་ཡོད་འདུག་ཀྱང་། ཁ་པར་དང་བརྡ་འཕྲིན་གྱི་བརྒྱུད་ལམ་ཡོངས་རྫོགས་བཀག་ཡོད་སྟབས། མི་དེ་དག་ལ་མནར་གཅོད་གང་འདྲ་གཏོང་གི་ཡོད་མེད་ཤེས་རྟོགས་དཀའ་བ་དང་། གྲོང་པ་ཁག་གཅིག་གི་མི་ཚང་རེ་རེའི་སྒོ་ཁར་དམག་མི་བདུན་ནས་བཅུའི་བར་ཉིན་མཚན་རེས་མོས་བཞིན་སྡོད་བཞིན་འདུག་ཟེར། མ་གཞི་ཛ་དྲག་གི་གནས་ཚུལ་འདི་དག་གྲོང་སྡེ་གཅིག་གཉིས་ཤིག་མ་ཡིན་པར་འབྲི་རུའི་ལུང་པ་སྤྱི་ཡོངས་ལ་དཀའ་ངལ་འཕྲད་ཡོད་འདུག
དེང་སྐབས་ཁམས་འབྲི་རུ་རྫོང་དུ་རྒྱ་དམར་གུང་ཁྲན་ཚང་གིས་རིག་གནས་གསར་བརྗེ་ཆེན་མོའི་ལས་འགུལ་སླར་ཡང་བསླེབས་པ་ལྟ་བུ་འདུག་ཅེས་ས་གནས་མང་ཚོགས་ཀྱོས་རྗོད་བཞིན་ཡོད་འདུག ༢༠༠༨ ལོ་ནས་བཟུང་བོད་ས་ཡོངས་ལ་མང་ཚོགས་ཁྲོད་དུ་བཅའ་སྡོད་ལས་བྱེད་འབོར་ཆེན་བཏང་སྟེ། ཏང་ལ་དགའ་ཞེན་དང་རྒྱལ་ཁབ་ལ་དགའ་ཞེན་དགོས་པའི་ཆབ་སྲིད་ཀྱི་དྲིལ་བསྒྲགས་ཤུགས་ཆེན་སྤེལ་བའི་བརྒྱུད་རིམ་ཁྲོད་འབྲི་རུ་རྫོང་ལ་ད་ལྟའི་བར་གྲུབ་འབྲས་གང་ཡང་ཐོན་ཡོད་མི་འདུག
རེ་ཞུའི་ཡིག་ཆུང་འདི་རུ་བཀོད་འདུག་ཀྱང་། གསུང་ལན་འདི་ཡིན་ཐོས་རྒྱུ་མི་འདུག་གོ།
བཙན་དབང་མེ་མདའི་འོག་ཏུ། རང་དབང་མགོ་བོ་མི་སྒུར།
དམར་དབང་དམག་ཤུགས་ཅན་གྱི། སྲིད་དབང་དམངས་ཀྱིས་འཕྲོག་ངེས།
ངའི་འཕྲུལ་གྲོགས་ཤིག་གི་འདི་འདྲ་ཞིག་སྤེལ་འདུག
༼༢༠༡༣ལོ་ཟླ་བ་༩ ཚེས་༢༩ དགོང་མོ་སློབ་མ་༤༠༠༠ ཙམ་གྱི་སློབ་གྲའི་ནང་ལ་རྒྱ་གཞུང་ལ་ངོ་རྒོལ་བྱས་འདུག་།
སྐབས་དེ་དུས་དགེ་རྒན་ཚོའི་བཀག་འགོག་བྱས་སྐབས་སློབ་མ་ཚོའི་དགེ་རྒན་ཁག་གཅིག་ལ་ཉེས་རྡུང་གཏོང་འདུག་།
སྤྱིར་འབྲི་རུ་རྫོངས་ཀྱི་ནང་ལ་སློབ་ཕྲུག་བཞི་སྟོང་ཡོད་པའི་ནང་ནས་སློབ་མ་༦༠ མ་ཏོག་སློབ་མ་ཆ་ཚང་ཐོག་མར་ཕྱིར་འབུད་གཏོང་འདུག།
སློབ་མ་༦༠ ཐམ་པ་ནི་ལས་བྱེད་པའི་ཕྲུ་གུ་རེད་འདུག་། སློབ་མ་ཚང་མ་ཁ་འཐོར་ཡ་འཐོར་དུ་སོང་ནས་སློབ་མ་
ཁག་གཅིག་ད་ལྟའི་གནས་སྐབས་སུ་ནང་ལ་འབྱོར་མི་འདུག་པའི་ཕ་མ་དང་ནང་མི་རྣམས་ཧ་ཅང་སེམས་ཁྲལ་དང་སྡུག་བསྔལ་ངང་གནས་འདུག། དེ་རིང་༢༠༡༣ ཟླ་བ་༡༠ ཚེས་༢ ཉིན་ད་དུང་ཡུལ་མི་མང་པོ་ཞིག་གི་རྒྱ་གཞུང་གི་བོད་མི་རྩ་མེད་གཏོང་ཡག་གི་ཆབ་སྲིད་ཀྱི་བྱ་ངན་དེ་དག་ལ་ངོ་རྒོལ་བྱེད་ནས་མུ་མཐུད་གཞུང་ལམ་ལམ་ཆེན་ཐོག་ཉལ་ནས་སྡད་འདུག་།
མི་དམངས་དེ་ཚོའི་འཕྲོད་རྟེན་དང་བདེ་ཐང་ལ་ཧ་ཅང་ཉེན་ཁ་ཆེན་པོ་རེད་འདུག་།
གཙོ་བོ་ཞི་རྒོལ་དེ་ལྟར་བྱེད་དགོས་པའི་རྒྱུ་མཚན་གཙོ་བོ་ནི། ༼སློབ་མ་སློབ་གྲ་ནས་ཕྱིར་འབུད་གཏོང་བ་དང་གཅིག་། ༽
༼ནད་པ་སྨན་བཅོས་བྱེད་ཀྱི་མིན་ལབ་པ་དང་གཉིས་།༽ ༼འབྲོག་པ་དབྱར་རྩ་དགུན་འབུ་བརྐོ་རུ་འཇུག་རྒྱུ་མིན་ལབ་པ་དང་གསུམ།༽ ༼སྐར་ལྔའི་དར་དམར་ཁང་ཐོག་ཏུ་བསྒྲེངས་དགོས་པའི་བཙན་བཀའ་གཏོང་བ་དང་བཞི།༽ དེང་རབས་ཅན་གོ་མཚོན་ཆ་ཚང་བའི་དམག་མི་དང་ཉེས་རྟོགས་པ་ཁྲི་གཅིག་ལྷག་དང་བཅའ་སྡོད་ལས་བྱེད་ཆིག་ཁྲི་བརྒྱད་སྟོན་ཙམ་འབྲོག་པ་མང་ཚོགས་ཐོག་ལ་རྒྱ་སྟག་ལུག་ལ་མཆོང་བ་ནང་བཞིན་ཞི་བའི་ཉམས་ཆུང་མང་ཚོགས་ཐོག་ལ་མཆོང་ཡོང་བ་སོགས་ལ་རྟེན་ནས་ཞི་རྒོལ་མི་བྱེད་དཀའ་མེད་བྱུང་བ་རེད་འདུག་། ༢༠༡༣ ཟླ་བ་༡༠ ཚེས་༢ ཉིན་འབྲི་རུ་བ་༼མིག་ཆུ་༽ནས་བྲིས། ཡིག་ནོར་མང་བའི་དགོངས་དག།༽
ཤར་ཕྱོགས་ཁུག་རྟ་དེང་སང་དྲ་སྣང་ན་མཐོང་རྒྱུ་མིན་འདུག་པས། འབྲི་རུ་རྫོང་དུ་ཕྱིན་པ་མིན་ནམ་སེམས། གང་ལ་ཞེ་ན་འབྲི་རུ་རྫོངས་ཀྱི་བོད་མི་ཚོས་རྒྱ་དར་ཆུ་ལ་བསྐྱུར་བཞིན་པའི་སྐབས་ཡིན་པ་དང་། ཕལ་ཆེར་ཁོས་རྒྱ་དར་དེ་ཚོ་ཕྱིར་བསླངས་ནས་འབྲི་རུ་རྫོངས་པ་ཚོས་ཁ་ཐོག་ཏུ་བཙུགས་ན་དབུ་མའི་ལམ་དང་མཐུན་ལུགས་ཁ་ཏ་བྱེད་ཀར་ཕྱིན་པ་མིན་འགྲོ སྐུ་རྩེད་ཡིན། ཁྱེད་ཚེ་རིང་།
གཞི་ལུས་བོད་པས་དམར་དར་བགྲེང་བ་ལ།
རང་སྲོག་བློས་བཏང་ངོ་རྒོལ་བྱེད་བཞིན་དང་།
བཙན་བྱོལ་མི་སྣས་དམར་དར་མགོ་ཐོག་བགྲེང་།
བོད་ལ་ལོག་རྒྱུའི་བསམ་པ་གོད་རེ་བྲོ།
གཞི་བྱེས་འབོད་སྒྲ་གཅིག་མཐུན་མེད་པ་འདི།
བོད་དོན་སྒྲུབ་པའི་དགག་རྡོ་དང་པོ་ཡིན།།
བོད་ཀྱི་དུས་བབ་རྩོམ་སྒྲིག་པ་ལགས། གུས་མོས་ཟིན་བྲིས་ཀྱི་སྒོ་ཕྱེ་ཐུབ་ཀྱི་མི་འདུག་ན། རྒྱུ་མཚན་ག་རེས་ཡིན་ལམ་སྟོན་ཞིག་གནང་རོགས། ཞབས་མཆན་འཇོག་ཐུབ་ཀྱི་འདུག འོན་ཀྱང་དེ་ཙམ་པོས་ཟིན་བྲིས་སྒོ་འབྱེད་ཐུབ་ཀྱི་མི་འདུག སྒོ་མ་ཕྱེས་ནས་དུས་ཚོད་ཡུན་རིང་འགོར་སོང་བས་རེད་དམ། གསུང་ལན་ཞིག་གནང་བར་མཁྱེན།།