རྒྱ་ནག་གཞུང་གིས་ཁམས་ནགས་ཤོད་འབྲི་རུ་རྫོང་གི་རྒན་པོ་ཟླ་གཡང་ལགས་སུ་ལོ་གཉིས་དང་ཟླ་ལྔའི་བཙོན་འཇུག་ཁྲིམས་ཐག་བཅད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། འདི་ལོའི་ཕྱི་ཟླ་ ༩ བའི་ཚེས་ ༣ ཉིན་བོད་རང་སྐྱོང་ལྗོངས་ཀྱི་གོ་སྒྲིག་འོག་ནགས་ཤོད་འབྲི་རུ་རྫོང་དུ་རྒྱ་གཞུང་གི་དམངས་ཁྲོད་ཆབ་སྲིད་དྲིལ་བསྒྲགས་ཚོགས་ཆུང་དང་ཟློས་གར་འཁྲབ་སྟོན་མི་སྣ་བཅས་འབྱོར་ཏེ། ས་གནས་སུ་ཆབ་སྲིད་དྲིལ་བསྒྲགས་ཀྱི་འཁྲབ་སྟོན་བྱེད་སྐབས། ས་གནས་ཀྱི་རྒན་པོ་ཟླ་གཡང་ལགས་ཀྱིས “ བོད་རང་དབང་རང་བཙན་ཡིན། ༧རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག རྒྱ་མི་བོད་ནས་འགྲོ་དགོས། ” ཞེས་སྐད་འབོད་བྱས་ཡོད་པ་དང་། ངོ་རྒོལ་སྐད་འབོད་བྱས་ཏེ་ཅང་མ་འགོར་བར་ཉེན་རྟོག་པས་འཛིན་བཟུང་བཀག་ཉར་བྱས་ཡོད་པ་མ་ཟད། ཉེ་ལམ་རྒྱ་ནག་གཞུང་གིས་ཁོང་ལ་ལོ་ ༢ དང་ཟླ་ ༥ བཙོན་འཇུག་ཁྲིམས་ཐག་བཅད་ཡོད་འདུག
རང་ལོ་ ༦༨ ཡིན་པའི་རྒན་པོ་ཟླ་གཡང་ལགས་ནི། ཁམས་ནགས་ཤོད་འབྲི་རུ་རྫོང་ཚ་ཆུ་ཤང་གདོང་ལ་རུ་མདོ་གྲོང་ཚོའི་མི་ཡིན་པ་དང་། ཉེ་ལམ་རྒྱ་གཞུང་གིས་ཁོང་ལ་བཙོན་འཇུག་ཁྲིམས་ཐག་བཅད་རྗེས། ཟླ་འདིའི་ཕྱི་ཚེས་ ༧ ཉིན་ལྷ་སའི་སྨན་ཁང་ཞིག་ཏུ་ཉེན་རྟོག་པའི་ལྟ་སྲུང་འོག་སྨན་བཅོས་བྱེད་ཀྱི་ཡོད་སྐོར་འབྲེལ་ཡོད་མི་སྣས་ཤེས་རྟོགས་བྱུང་ཡོད་འདུག
