ཚད་མའི་དགུན་ཆོས་ཆེན་མོ་དབུ་འཛུཊ།

ཟླ་འདིའི་ཕྱི་ཚེས་ ༥ ཉིན་རྒྱལ་རོང་ཚོ་བདུན་ཀིརྟིའི་དགོན་དུ་གྲུབ་མཐའ་རིས་མེད་ཀྱི་ཚད་མའི་དགུན་ཆོས་ཆེན་མོ་ཐེངས་བདུན་པ་དབུ་འཛུགས་གནང་ཡོད་འདུག

འདི་གར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༥ ཉིན་གྱི་ཕྱི་དྲོའི་བོད་ནང་གི་ཆུ་ཚོད་ ༥ ཙམ་ལ་བོད་མདོ་སྨད་རྒྱལ་རོང་ཚོ་བདུན་ཀིརྟིའི་དགོན་དུ། ཀིརྟི་ཚང་གི་གདན་ས་གོང་འོག་གི་གཙོས་ཆོས་བརྒྱུད་གྲུབ་མཐའ་རིས་མེད་ཀྱི་ཚད་མའི་དགུན་ཆོས་ཆེན་མོ་ཐེངས་བདུན་པ་དབུ་འཛུགས་ཀྱིས་ཉིན་གྲངས་ ༢༠ རིང་འཚོགས་བཞིན་ཡོད་པ་དང་། ཐེངས་འདིའི་དགུན་ཆོས་ཐོག་ཀིརྟི་ཚང་གི་གདན་ས་ཆེ་ཁག་བཞི་གའི་ཁྲི་པ་དང་། མཁན་པོ། དཔེ་ཁྲིད་དགེ་རྒན། གཞན་ཡང་བློ་རིག་འཛིན་གྲྭ་ནས་མཛོད་ལོ་རིམ་དང་པོའི་བར་གྱི་སློབ་གཉེར་བ་ཡོངས་དང་། དེ་མིན་མདོ་དབུས་ཁམས་གསུམ་ནས་ཆོས་བརྒྱུད་རིས་མེད་ཀྱི་དགོན་སྡེ་ ༧༣ གྱི་དགེ་བཤེས་དང་རིགས་པ་སྨྲ་བ་ ༡༥༧༠ ཙམ་ཆེད་དུ་གདན་འདྲེན་གནང་སྟེ། རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་གཙོས་རྒྱ་བོད་ཀྱི་ཚད་མའི་གཞུང་ཆེན་ཁག་ལ་དྲི་བ་དྲིས་ལན་གྱི་ལམ་ནས་དཀའ་གནས་ཁག་ལ་དོགས་གཅོད་ཚོགས་པ་སོགས། རྒྱ་བོད་ས་མཚམས་དང་ཐག་ཉེ་ཞིང་བོད་ཀྱི་ཆོས་དང་རིག་གཞུང་སྐད་ཡིག་བཅས་ཉམས་ཆག་ཤུགས་ཆེ་འགྲོ་བཞིན་པའི་མཐའ་འཁོབ་ཀྱི་ཡུལ་གྲུ་དེར། རྒྱལ་བའི་བསྟན་པ་རིན་པོ་ཆེ་ཉམས་པ་སླར་གསོ་དང་མ་ཉམས་གོང་སྤེལ་དུ་གཏོང་བར་ཐོས་བསམ་གྱི་མཛད་པ་རྒྱ་ཆེར་སྐྱོང་བཞིན་ཡོད་འདུག  

ཚད་མའི་དགུན་ཆོས་ཆེན་མོ་འདི་སྐྱབས་རྗེ་ཀིརྟི་རིན་པོ་མཆོག་གི་བཀའ་དགོངས་བཞིན་ཕྱི་ལོ་ ༢༠༠༧ ལོར་གདན་ས་ཆེན་མོ་སྟག་ཚང་ལྷ་མོ་ཀིརྟིའི་དགོན་དུ་གསར་དུ་དབུ་འཛུགས་ཀྱིས། ལོ་ལྟར་ཀིརྟི་ཚང་གི་གདན་ས་ཆེ་ཁག་རྔ་བ་ཀིརྟིའི་དགོན་དང་ཚོ་བདུན་ཀིརྟིའི་དགོན། ཧོར་གཙང་ཀིརྟིའི་དགོན་བཅས་སུ་རེས་མོས་ཀྱིས་འཚོགས་བཞིན་ཡོད་ཀྱང་། རྒྱ་ནག་གཞུང་གིས་ཆབ་སྲིད་ཀྱི་དོགས་གཞིའི་འོག་གནད་དོན་འདྲ་མིན་ལ་ཁ་གཡར་ནས་བཀག་འགོག་བསྟུད་མར་བྱས་རྐྱེན་འཆར་གཞི་དང་འགྲོ་ལུགས་ཇི་བཞིན་གྱི་རྒྱས་པ་ཞིག་ཚོགས་ཐུབ་མི་འདུག  

གསར་འགོད་པ། དོན་གོ