རྒྱ་ནག་གི་དམངས་གཙོ་དོན་གཉེར་བ་དང་གཞུང་ལ་ངོ་རྒོལ་གནང་མཁན་སན་ཏིག་ཧྲིན་ལགས་ཀོང་ཀྲུག་ཏུ་བཙོན་འཇུག་བྱས་ཡོད་ཅིང་ཁོང་གི་ཁྲིམས་རྩོད་པའི་ཞུ་གཏུག་ཁག་ལ་གཞུང་གིས་ཡ་ལན་སྤྲད་མི་འདུག
ཁ་སང་ཨེ་ཕོ་ཆི་དུས་བབ་ ( Epoch Times )གསར་ཁང་གིས་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༣༠ ཉིན་རྒྱ་ནག་གི་འགྲོ་བ་མིའི་ཐོབ་ཐང་ཉེན་སྲུང་ཚོགས་པའི་མི་སྣ་ཞིག་གིས་རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་སན་ཏིག་ཧྲིན་(Sun Desheng)ལགས་ཀྱི་ནང་མིར་ཐུག་འཕྲད་བྱས་ཏེ་རྒྱུས་ལོན་བྱུང་པ་ལྟར་ན། རྒྱ་གཞུང་གིས་སན་ཏིག་ཧྲིན་ལགས་ནི་༼ ཆབ་འབངས་གསར་པའི་ལས་འགུལ་ (New Citizen’s Movement )ཚོགས་པ།༽ ཞེས་པའི་ཚོགས་མི་ཡིན་པ་དང་། ཚོགས་པ་དེ་དང་ཚོགས་མི་ཚོས་རྒྱལ་ཁབ་བརྟན་བརླིང་ལ་གཏོར་བཤིག་གཏོང་གི་ཡོད་སྟབས། སན་ཏིག་ཧྲིན་གྱིས་མེས་རྒྱལ་གོང་བུ་གཅིག་གྱུར་ལ་ངོ་རྒོལ་བྱས་པའི་ཉེས་མིང་འོག་ད་ལོའི་ཕྱི་ཟླ་ ༨ པའི་ནང་འཛིན་བཟུང་གིས་ད་བར་ཀུང་ཀྲུག་གྲོང་ཁྱེར་ (Guangzhou )དུ་བཙོན་བཅུག་བྱས་ཡོད་འདུག
ཆབ་འབངས་གསར་པའི་ལས་འགུལ་ཚོགས་པ་ཞེས་པ་དེ་ནི་རྒྱ་རིགས་དམངས་གཙོ་དོན་གཉེར་བ་ཞོ་ཏྲིན་ཡུང་(Xu Zhiyong)ལགས་ཀྱིས་གསར་འཛུགས་བྱས་པ་ཞིག་ཡིན་ཞིང་། ཁོང་གིས་རྒྱ་ནག་གཞུང་གིས་མི་མང་གི་རྒྱུ་ནོར་ཧམ་ཟ་བྱས་པར་ངོ་རྒོལ་དང་། རྒྱ་ནག་ནང་ཆབ་སྲིད་འཕོ་འགྱུར་དང་འགྲོ་བ་མིའི་ཐོབ་ཐང་དགོས་སྐོར་ངོ་རྒོལ་སྐད་འབོད་བྱས་སྟབས། ད་ལོའི་ཕྱི་ཟླ་ ༧ ནང་འཛིན་བཟུང་གིས་གར་སོང་ཆ་མེད་ཆགས་ཡོད་འདུག
མི་མང་ལས་འགུལ་བ་སན་ཏིག་ཧྲིན་བཙོན་གྲོལ་འཐོབ་ཆེད། ཁོང་གི་ཁྲིམས་རྩོད་པ་གེ་བིན་ཞའོ་ (Ge Wenxiu)ལགས་ཀྱིས་རྒྱ་གཞུང་ལ་ཁྲིམས་གཏུག་ཞུ་སྙན་ཐེངས་གཉིས་འཕུལ་ཡང་། གཞུང་ཕྱོགས་ནས་ཡ་ལན་གང་ཡང་བྱས་མེད་པར། སན་ཏིག་ཧྲིན་གྱིས་མི་མང་གི་རྒྱུ་ནོར་གཞུང་གིས་ཧམ་ཟ་བྱས་པའི་དཀྲོག་གཏམ་འོག་མང་ཚོགས་བསྡུ་སྐོང་གིས་གཞུང་ལ་ངོ་རྒོལ་སྐད་འབོད་བྱས་སྟབས་བཙོན་འཇུག་བྱས་པ་ཡིན་ཚུལ་བརྗོད་ཡོད་འདུག
སན་ཏིག་ཧྲིན་ལགས་ཀྱིས་རྒྱ་ནག་གི་ཁྲིམས་ལུགས་དང་རྩ་ཁྲིམས་བསྐྱར་བཅོས་དགོས་པར་ལས་འགུལ་སྤེལ་མཁན་ཞོ་ཏྲིན་ཡུང་འཇུ་བཟུང་བྱས་ཟིན་པ་དེར་ངོ་རྒོལ་ཆེད། ད་ལོའི་ཕྱི་ཟླ་ ༨ པའི་ནང་ཀུང་ཀྲུག་གྲོང་ཁྱེར་བདེ་འཇགས་ལས་ཁུངས་སྒོ་ཁར་ལག་ཏུ་ “ཞོ་ཏྲིན་ཡུང་ལ་ཉེས་པ་མེད། ཞི་ཅིན་ཕིན་ངོ་ཚ་དགོས་’’ ཞེས་པའི་འབོད་ཚིག་འཁོད་པའི་འཕྲེད་དར་བསྣམས་ཏེ་སྐད་འབོད་བྱས་མཐར་ཉེན་རྟོག་པས་འཛིན་བཟུང་བྱས་ཡོད་འདུག
རྒྱ་གཞུང་གིས་ད་བར་གོང་མཚུངས་ལྟར་མེས་རྒྱལ་བརྟན་བརླིང་ལ་གཏོར་བཤིག་གཏོང་མཁན་གྱི་ཉེས་མིང་དང་ཞ་མོ་འདྲ་མིན་གཡོགས་ཏེ་མི་ ༦༠ ཙམ་འཇུ་བཟུང་བཀག་ཉར་བྱས་ཡོད་འདུག
