རྣལ་འབྱོར་གྱི་ལུས་གནད་བཅོས་ཚུལ་དང་དབུཊ་སྦྱོང་ལ་སློབ་སྦྱོང་བྱོས།

བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་གཏན་འབེབས་ལྟར། ༢༠༠༦ ལོའི་མཇུག་ནས་བཟུང་སཾ་བྷོ་ཊའི་ཁྱབ་ཁོངས་སློབ་གྲྭ་ཁག་ ༡༢ ཀྱི་དགེ་ལས་སློབ་ཕྲུག་ཚོར་རྣལ་འབྱོར་གྱི་ལུས་གནད་བཅོས་ཚུལ་དང་། དབུགས་སྦྱོང་རིགས་ལག་བསྟར་གནང་གིན་ཡོད་སྟབས། སཾ་བྷོ་ཊ་བོད་སློབ་སྤྱི་ཁྱབ་ཡིག་ཚང་དུ་ཕྱག་ལས་གནང་བཞིན་པའི་ལུས་དབུགས་སྦྱོང་བརྡར་དགེ་རྒན་ཆོས་དར་ལགས་སུ་བཅར་འདྲི་ཞུས་ཡོད།

དྲི་བ། ཐོག་མར་རྒན་ལགས་ཀྱིས་རྣལ་འབྱོར་གྱི་ལུས་གནད་བཅོས་ཚུལ་དང་དབུགས་སྦྱོང་ལ་མྱོང་གོམས་གནང་བའི་བརྒྱུད་རིམ་མདོར་བསྡུས་ཤིག་གསུངས་རོགས།

        ལན། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ནང་སློབ་ཕྲུག་ཚོར་བོད་སྲོལ་རྒྱུན་གྱི་རྣལ་འབྱོར་གྱི་ལུས་གནད་བཅོས་ཚུལ་དང་དབུགས་སྦྱོང་རིགས་ལག་བསྟར་བྱེད་དགོས་པའི་གཏན་འབེབས་གནང་ཡོད་པ་ལྟར། ༢༠༠༦ ལོའི་ཕྱི་ཟླ་ ༩ པའི་ནང་སཾ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཀྱིས། རྒྱ་གར་གྱི་ཨུ་ཌར་ཁན་མངའ་སྡེའི་གྲོང་ཁྱེར་ཧཱ་རི་ཝར་གྱི་ལུས་སྦྱོང་བསྟི་གནས་ (Patanjali Yogpeeth Hardwar)སུ་སཾ་བྷོ་ཊའི་ཁྱབ་ཁོངས་གཏན་སློབ་ཁག་ ༥ ཡི་ལུས་རྩལ་དགེ་རྒན་རྣམ་པ་བཅས་ང་ཚོ་མི་ ༧ ཆེད་མངགས་ཀྱིས། རྒྱ་གར་ལུས་སྦྱོང་(Yoga)སློབ་དཔོན་སུ་ཝཱ་མཱི་རམ་ཌི་ཇི་ (Swami Ramdevji) ཡི་དྲུང་ནས་ལུས་སྦྱོང་དང་དབུགས་སྦྱོང་སྐོར་སློབ་སྦྱོང་བྱས་ཏེ་མཐར་ཕྱིན་རྗེས། ༢༠༠༦ ལོའི་ལོ་མཇུག་ནས་བཟུང་ཐོག་མའི་དམིགས་ཡུལ་ལྟར་སཾ་བྷོ་ཊའི་ཁྱབ་ཁོངས་ཀྱི་སློབ་གྲྭ་ཁང་གི་དགེ་ལས་སློབ་ཕྲུག་ཚོར། ལུས་དབུགས་སྦྱོང་བརྡར་གྱི་ཐབས་ལམ་ངོ་སྤྲོད་དང་འབྲེལ་ལག་ལེན་གནང་མགོ་བརྩམས་ཡོད་པ་དང་། ང་རང་ལྟ་བུ་ཡིན་ན། སློབ་མཐར་ཕྱིན་པ་དང་སཾ་བྷོ་ཊའི་ཁྱབ་ཁོངས་མེས་དབོན་གཙུག་ལག་དཔེ་སྟོན་སློབ་གྲྭ་དང་གངས་སྐྱིད་ཉིན་སློབ་ཀྱི་དགེ་ལས་སློབ་ཕྲུག སྨན་རྩིས་ཁང་མཐོ་སློབ་ཀྱི་དགེ་སློབ། དེ་བཞིན་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་གི་མ་ཚབ་རྣམ་པ་དང་། བདེ་སྐྱིད་གླིང་ས་གནས་མི་མང་དང་ས་གནས་ཉིན་སློབ་ཀྱི་དགེ་ལས་སློབ་ཕྲུག ཀམ་རའོ་དང་སྦན་ད་ར་ནོར་རྒྱས་གླིང་སོགས་སུ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་རེ་སྐུལ་ལྟར། དྭང་བླངས་ཀྱིས་ལུས་སྦྱོང་དང་དབུགས་སྦྱོང་གི་ཐབས་ལམ་ངོ་སྤྲོད་དང་འབྲེལ་སྦྱོང་བརྡར་ཕུལ་བའི་ཞབས་ཞུ་ཞུས་དང་ཞུ་མུས་ཡིན།

དྲི་བ། ལུས་དབུགས་སྦྱོང་བརྡར་ལ་རྩ་བའི་རྣམ་པ་མི་འདྲ་བ་ཅི་ཙམ་ཡོད་པ་དང་།  དེ་དག་གི་ཕན་ནུས་མདོར་བསྡུས་ཤིག་ངོ་སྤྲོད་གནང་རོགས།

ལན། སྤྱིར་བཏང་ལུས་སྦྱོང་ལ་རིགས་མང་པོ་ཞེ་དྲག་ཡོད་ཀྱང་། ང་ཚོར་དུས་ཚོད་མེད་སྟབས་ལུས་སྦྱོང་ ༧ དང་དབུགས་སྦྱོང་ ༧ སྦྱོང་གི་ཡོད་པ་དང་། ལྷག་པར་དུ་དབུགས་སྦྱོང་གལ་ཆེ་ཤོས་ཡིན་སྟབས། དཔེར་ན། ཆུ་ཚོད་གཅིག་རིང་སྦྱོང་བརྡར་བྱས་པ་ཡིན་ན། སྐར་མ་ ༤༥ དབུགས་སྦྱོང་ལ་གཏོང་བ་དང་། སྐར་མ་ ༡༥ ལུས་སྦྱོང་ལ་གཏོང་གི་ཡོད་པ་རེད། དབུགས་སྦྱོང་ལ་རྣམ་པ་མི་འདྲ་བ་ ༧ ཡོད་པ་ལས། དང་པོ། བདུད་རྩི་འབེབ་སྦྱོང་ནི་སྣ་བུག་གཉིས་ལས་དབུགས་ཆེན་པོ་རྔུབ་རྗེས། ཅུང་ཙམ་རིང་དབུགས་ཁོག་པའི་ནང་དུ་ཉར་ནས་ག་ལེར་སྣ་བུག་གཉིས་ལས་ཕྱིར་འདོན་དགོས་ལ། དབུགས་སྦྱོང་འདིས་ཆམ་པ་དང་གློ་ལུད། ཟས་རིགས་མི་འཕྲོད་པའི་ནད་རིགས། དབུགས་གཏོང་ལེན་དང་འབྲེལ་བའི་ནད་རིགས་སོགས་བཅོས་ཐུབ་པ་མ་ཟད། གློ་བའི་སྟོབས་རྒྱས་ཤིང་སྙིང་དང་མགོ་བོའི་རྩ་འཁོར་ལ་རླུང་གི་ནུས་པ་འདང་ངེས་ཐོབ་པར་ཕན་པ་དང་། དེ་བཞིན། མིད་པ་དང་འབྲེལ་བའི་ནད་རིགས་དང་། རླུང་མཁྲིས་བད་གསུམ་གྱི་ནད་གཞི་སྙོམས་པར་བྱེད་པ། ཁྲག་གཙང་མ་བཟོ་བ། རླུང་གི་ཚད་གཞི་ཆ་སྙོམས་པར་བྱས་ཏེ་སེམས་རྒྱུད་ཞི་ཞིང་བདེ་བ་སོགས་ལ་ཕན་གྱི་ཡོད། དབུགས་སྦྱོང་འདི་སྐར་མ་ ༢ ནས་ ༣ བར་སྦྱོང་དགོས་ཀྱང་། ཁྲག་ཤེད་མཐོ་བའི་ནད་རིགས་དང་སྙིང་ནད་ཡོད་མཁན་ཚོར་དབུགས་སྦྱོང་འདི་ཡག་པོ་ཡོད་པ་མ་རེད། དབྱར་དུས་ཚ་བ་ཆེ་སྐབས་སྦྱོང་བརྡར་གྱི་དུས་ཡུན་ཐུང་དགོས། དབུགས་སྦྱོང་འདི་ལ་དལ་འབྲིང་མགྱོགས་གསུམ་བཅས་མྱུར་ཚད་རིམ་པ་གསུམ་ཡོད་སྟབས། དང་ཐོག་དལ་བོ་ནས་མགོ་བཙུགས་ཏེ་རིམ་གྱིས་ཇེ་མགྱོགས་སུ་གཏོང་དགོས་པ་རེད།  གཉིས་པ། དབུགས་ལེན་གཟི་འབར་དབུགས་སྦྱོང་གི་ནང་ནས་ནད་རིགས་གསོ་བཅོས་དང་སྔོན་འགོག་ལ་ཆེས་ཕན་ཤོས་ཤིག་ཡིན་ལ། ངེས་པར་དུ་གསོལ་གྲོད་སྟོང་པ་ཡིན་སྐབས་སྦྱོང་བརྡར་བྱེད་དགོས། གང་ཡིན་ཟེར་ན། སྣ་བུག་གཉིས་ལས་དབུགས་འབྱིན་པ་དང་བསྟུན་ཏེ་གསོལ་གྲོད་ཡར་སྐུམ་པ་དང་། དབུགས་རྔུབ་པ་དང་གསོལ་གྲོད་མར་གློད་དགོས་ཀྱི་ཡོད་པ་རེད། དུས་ཚོད་ཡོད་ན་སྔ་དགོང་གཉིས་ལ་སྐར་མ་ ༡༠ ནས་ ༡༥ བར་སྦྱོང་དགོས་ལ། དུས་ཚོད་གཏན་ནས་མེད་ཀྱང་སྔ་དགོང་གཉིས་སུ་སྐར་མ་ ༥ རེར་རྒྱུན་ལྡན་གྱིས་སྦྱོང་ཐུབ་པ་ཡིན་ན། ལུས་ཀྱི་བཀྲག་མདངས་རྒྱས་པ་དང་། བཤང་འགགས་ཀྱི་དཀའ་ངལ་དང་ཁྲག་རྩ་འཁོར་རྒྱུག་སྙོམས་པ། ལུས་ཀྱི་ལྗིད་ཚད་མར་ཆགས་པར་ཕན་པ་མ་ཟད། རྒྱུ་ལོང་དང་ཕོ་བའི་འཇུ་སྟོབས་རྒྱས་པར་ཕན་ཐོགས་ཆེན་པོ་ཡོད། འོན་ཀྱང་། ཚ་བ་ཆེ་བའི་དབྱར་དུས་སུ་སྐར་མ་ ༢ ལྷག་ལས་རྩེ་མི་རུང་། གསུམ་པ། ཕྱིའི་རླུང་སྦྱོང་ལ་གནོད་སྐྱོན་གྱི་ཆ་གང་ཡང་མེད་ལ། སྣ་བུག་གཉིས་ལས་དབུགས་ཡར་རྔུབ་རྗེས། དབུགས་ཆ་ཚང་ཕྱིར་འབྱིན་པ་དང་གསོལ་གྲོད་ཡར་སྐུམ་དགོས། དེ་ནས་སྐར་ཆ་ ༡༠ ཙམ་གྱི་རྗེས་ནས་སླར་ཡང་དབུགས་རྔུབ་དགོས་པ་རེད། དབུགས་སྦྱོང་འདི་ཉིན་རེར་ཐེངས་ ༣ ནས་ ༤ སྦྱོང་ཐུབ་པ་ཡིན་ན། སེམས་པ་བག་ལྷོད་དང་བློ་རིག་བཀྲ་བ། ཕོ་བའི་འཇུ་སྟོབས་རྒྱས་ཤིང་ལུས་སྟོབས་འཕེལ། སྐྱེས་པའི་ཁུ་བ་འཕེལ་བ་སོགས་ལ་ཕན་ནུས་ཆེན་པོ་ཡོད། བཞི་པ། གཏོང་ལེན་རླུང་སྦྱོང་ནི་སྣ་བུག་གཡས་པ་ནས་དབུགས་རྔུབ་རྗེས། སྣ་བུག་གཡོན་པ་ནས་དབུགས་མར་འབྱིན་པ་དང་།  དེ་ནས་ཡང་སྣ་བུག་གཡོན་པ་ནས་དབུགས་རྔུབ་སྟེ་སྣ་བུག་གཡས་པ་ནས་མར་འབྱིན་པ་བཅས་རེས་མོས་ཀྱིས་ཉིན་རེར་ཉུང་མཐར་སྐར་མ་ ༥ ལ་སྦྱོང་བརྡར་བྱེད་ཐུབ་པ་ཡིན་ན། གྲུམ་བུ་དང་དྲེག་ནད། གཅིན་པ་དང་མཁལ་མའི་ནད་རིགས། ཆམ་པ། མིག་འགྲིབ། ཡ་མ་སོགས་ཀྱི་ནད་གཞི་རྙིང་པ་དང་། རླུང་མཁྲིས་བད་གསུམ་གྱི་ནད་རིགས་བཅོས་ཐུབ་པ་མ་ཟད། ཟླ་བ་ ༣ ནས་ ༤ བར་རྒྱུན་མཐུད་དེ་སྦྱོང་ཐུབ་པ་ཡིན་ན། ཁྲག་རྩ་འགགས་པའི་ནད་རིགས་བརྒྱ་ཆ་ ༣༠ ནས་ ༤༠ བར་གཙང་བཟོ་ཐུབ་སྟབས། གསོལ་གྲོད་སྟོང་པ་ཡིན་མིན་ལ་མ་ལྟོས་པར་ཉིན་གཅིག་གི་དུས་གསུམ་ལ་སྦྱོང་ཐུབ་ན་ཡག་པོ་ཡོད་པ་རེད། ལྔ་པ། བུང་བའི་སྙན་འཇོ་ནི་དམིགས་བསལ་གྱིས་སྒོམ་སྒྲུབ་དང་འབྲེལ་བ་ཡོད་པ་རེད། དཔེར་ན་བྱམས་སྙིང་རྗེ་དང་སྟོང་ཉིད་སྒོམ་པ།  རྩ་བའི་བླ་མ་སོགས་སྒོམ་ནས་མིག་གཉིས་དང་ཁ་བཙུམ་ཏེ། ལག་པའི་མཐེ་བོང་གཉིས་ཀྱིས་རྣ་གཡས་གཡོན་བཀབ། མཛུབ་མོ་གཞན་བཞི་ཡིས་དཔྲལ་བ་དང་མིག་གཉིས་ཡང་པོ་མནན་རྗེས། སྣ་བུག་གཉིས་ནས་དབུགས་ཤུགས་ཆེན་རྔུབ་སྟེ་ཅུང་ཙམ་འགོར་རྗེས། དལ་བུར་ངང་དབུགས་མར་གཏོང་བ་དང་མཉམ་དུ་ཨྂ་ཞེས་སྦྲང་བུའི་སྒྲ་ལྟར་སྣ་བུག་ནས་འདོན་དགོས་ལ། འདི་ཡིས་དྲན་ཤེས་བརྟན་ཞིང་ཤེས་རབ་འཕེལ་བ། ཁྲག་ཤེད་སྙོམ་པ་སོགས་ལ་ཕན་པ་མ་ཟད། སྒོམ་སྒྲུབ་ཀྱི་ཉམས་ལེན་ཚུལ་བཞིན་དུ་ཡོང་བར་ཕན་པ་དང་། དབུགས་སྦྱོང་འདི་ཉིན་རེར་ཐེངས་ ༡༡ ནས་ ༢༡ བར་སྦྱོང་ཐུབ་ན་ཕན་ཐོགས་ཆེན་པོ་ཡོད་པ་རེད། དྲུག་པ། མགྲིན་བརྒྱུད་རླུང་སྦྱོང་ནི་མགྲིན་པ་བརྒྱུད་ནས་རླུང་ཡར་རྔུབ་སྟེ་ཅུང་ཙམ་བཀག་རྗེས། སྣ་བུག་གཡོན་མ་ནས་དབུགས་ཕྱིར་འབྱིན་དགོས་ལ།  དེ་སྔུར་པ་ཆེན་པོ་འཐེན་པ་དང་དབུགས་འཚང་གི་ན་ཚ་སོགས་ལ་ཕན་པ་ཆེན་པོ་ཡོད་པ་རེད། བདུན་པ། ལྕེ་བརྒྱུད་རླུང་སྦྱོང་ནི་ལྕེའི་སྣེ་བུ་གའི་ཚུལ་དུ་བཀུག་སྟེ་དབུགས་རྔུབ་ནས་ཅུང་ཙམ་བསྡད་རྗེས། སྣ་བུག་གཉིས་ལས་དབུགས་འབྱིན་དགོས་པ་དང་། དེ་ཡིས་མིད་པ་དང་མཚེར་པའི་ནད། ཟས་མི་འཇུ་བ། བཀྲེས་སྐོམ་གྱི་ནད། ཁྲག་ཤེད་མཐོ་བ་དང་ཁྲག་གཙང་མ་མེད་པ། མཁྲིས་ནད་སོགས་མ་སྙོམས་པ་ལས་བྱུང་བའི་ཚ་བ་དང་འབྲེལ་བའི་ནད་རྣམས་སེལ་བར་ཕན་ཐོགས་ཆེན་པོ་ཡོད་ལ། སྦྱོང་བརྡར་དེ་ཚ་བ་ཆེ་ས་རུ་དུས་ཡུན་རིང་བ་དང་གྲང་ངར་ཆེ་ས་རུ་དུས་ཡུན་ཐུང་དགོས་པ་རེད། ཡིན་ནའང་། ཆམ་པ་དང་གློ་རྒྱག་པ། ལྕེའི་རྨེན་བུའི་ནད་སོགས་ཡོད་རིགས་ཚོར་མི་བཟང་། གོང་ནས་བརྗོད་པའི་ལུས་དབུགས་སྦྱོང་བརྡར་རིགས་བྱས་ཀྱང་ཟས་སྤྱོད་བསྟེན་སྟངས་ནོར་བ་ཡིན་ན་རྐང་རྗེས་ལག་བསུབ་ལྟ་བུ་ཆགས་འགྲོ་བའི་ཉེན་ཁ་ཡོད་སྟབས། སྨན་པར་བསྟེན་གཏུག་གིས་སོ་སོའི་ལུས་ཁམས་ཀྱི་རང་བཞིན་ཤེས་པར་བྱ་རྒྱུ་ཧ་ཅང་གལ་ཆེན་པོ་རེད། ལུས་དབུགས་སྦྱོང་བརྡར་དང་མཉམ་དུ་ཟས་སྤྱོད་ཚུལ་བཞིན་བསྟེན་ཐུབ་པ་ཡིན་ན། ལུས་ཁམས་བདེ་ཞིང་ཚེ་རིང་བ་ལ་ཕན་ཐོགས་ངེས་ཅན་ཡོད་པ་རེད། 

དྲི་བ། ཧབ་ཆ་རྒྱག་པའི་དབུགས་སྦྱོང་དེས་གཙོ་བོ་ག་རེ་ལ་ཕན་པ་རེད།

ལན། སྤྱིར་བཏང་རྒྱུན་དུ་གད་མོ་ཤོར་མཁན་ཚོར་གཟུགས་པོ་ཐང་པོ་འདྲ་བོ་ཡོད་ལ། གད་མོ་བགད་ན་སྙིང་གི་ན་ཚ་དང་རྩ་བུག་གསེང་ནས་ལུས་སེམས་བདེ་བོ་ཡོང་བར་ཞེ་དྲག་ཕན་པོ་ཡོད་སྟབས། སྙིང་གི་ན་ཚ་ཡོད་མཁན་ཚོས་ངེས་པར་དུ་ཧབ་ཆ་མང་པོ་རྒྱག་དགོས་པ་རེད།

དྲི་བ། སྦྲུམ་མས་དབུགས་སྦྱོང་རིགས་ག་རེ་བྱས་ན་མ་དང་སྦྲུམ་བུའི་འཕྲོད་བསྟེན་ལ་ཕན་པ་རེད། 

ལན། སྦྲུམ་ལྡན་མའི་སྐབས་སུ་དབུགས་ལེན་གཟི་འབར་ལྟ་བུ་ཁྱོན་ནས་སྦྱོང་རྒྱུ་ཡོད་པ་མ་རེད། སྐབས་དེར་བདུད་རྩི་འབེབ་སྦྱོང་དང་གཏོང་ལེན་རླུང་སྦྱོང་། བུང་བའི་སྙན་འཇོ། མགྲིན་པའི་རླུང་སྦྱོང་། ལྕེ་བརྒྱུད་རླུང་སྦྱོང་། ཧབ་ཆ་རྒྱག་པའི་དབུགས་སྦྱོང་བཅས་སྔ་དགོང་ལ་གནང་ཐུབ་ཚེ་ཡག་པོ་ཡོད་སྟབས། དབུགས་སྦྱོང་འདི་རིགས་སྦྲུམ་ལྡན་མས་ངེས་པར་དུ་སྦྱོང་དགོས་པ་རེད། དེ་དང་མཉམ་དུ་ཤ་སྨན་དང་སི་པེན་མང་པོ་མི་ཟ་བ་དང་། ཆུ་ཤིན་ཏུ་གྲང་མོ་མི་འཐུང་བ་སོགས་ཟས་སྤྱོད་ལའང་ཧ་ཅང་གཟབ་གཟབ་བྱེད་དགོས་པ་རེད།

དྲི་བ། ལས་ཁུངས་ཀྱི་སྲི་ཞུ་བ་ཚོར་སྟབས་བདེའི་ལུས་དབུགས་སྦྱོང་བརྡར་རིགས་ག་རེ་བཟང་བ་རེད།

ལན། ལས་ཁུངས་ནང་ཕྱག་ལས་གནང་མཁན་ཞིག་ཡིན་ཚེ་ཉིན་གང་བཞུགས་བསྡད་པར་བརྟེན། ཁོག་སྟོད་ན་བ་དང་ཁྲག་གི་འཁོར་རྒྱུག་འགགས་པ། རྐང་ལག་གི་ནད་གཞི་བྱུང་བ་སོགས་ནད་རིགས་མང་པོ་ཞིག་རིམ་གྱིས་འབྱུང་བཞིན་ཡོད་སྟབས། དེ་ལ་གསོ་བཅོས་དང་སྔོན་འགོག་གི་ཆེད་དུ་དབུགས་སྦྱོང་ཡང་བོའི་རིགས་དབུགས་ལེན་གཟི་འབར་དང་གཏོང་ལེན་རླུང་སྦྱོང་གཉིས་སྔ་དགོང་ལ་སྐར་མ་ ༥ རིང་སྦྱོང་ཐུབ་པ་ཡིན་ན་ཕན་ཐོགས་ཆེན་པོ་ཡོད། སྤྱིར་བཏང་དབུགས་སྦྱོང་རིགས་མང་པོ་ཡོད་ཀྱང་། གོང་དུ་བརྗོད་པའི་དབུགས་སྦྱོང་དེ་གཉིས་རྒྱུན་དུ་གནང་ཐུབ་ན་སྐར་མ་ ༥ ལས་མི་འགོར་ལ་ཕན་ཐོགས་ཆེན་པོ་ཡོད་པ་རེད།

དྲི་བ། དེང་སང་སྤྱི་ཚོགས་ཐོག་རང་དགར་ལུས་དབུགས་སྦྱོང་བརྡར་རིགས་རྩེ་མཁན་མང་པོ་ཡོད་སྟབས། གལ་སྲིད་སྦྱོང་བརྡར་གྱི་བྱེད་ཐབས་ནོར་བ་ཡིན་ན་གནོད་སྐྱོན་ཡོད་དམ།

ལན། དྲི་བ་དེ་ཧ་ཅང་གལ་གནད་ཆེན་པོ་ཞིག་རེད། དཔེར་ན། དབུགས་ལེན་གཟི་འབར་ལྟ་བུས་ལུས་ཀྱི་ནད་རིགས་གསོ་བཅོས་དང་སྔོན་འགོག་གི་ཕན་ནུས་ཆེན་པོ་ཡོད་ཀྱང་། སྦྱོང་བརྡར་བྱེད་སྟངས་ནོར་བ་ཡིན་ན། ཕན་པའི་ཚབ་ལ་གནོད་ཀྱི་ཡོད་པ་རེད། དབུགས་ལེན་གཟི་འབར་དབུགས་འབྱིན་པ་དང་གསོལ་གྲོད་ཡར་སྐུམ་དགོས་པ་རེད། ཡིན་ནའང་བྱེད་སྟངས་མ་ཤེས་པར་གསོལ་གྲོད་སྐུམ་པ་དང་དབུགས་རྔུབ་ཚེ་གནོད་ཀྱི་ཡོད་པ་རེད། དེ་དང་དེ་ལྟ་བུའི་གནོད་སྐྱོན་མང་པོ་འབྱུང་སྲིད་སྟབས། ངེས་པར་དུ་ལུས་དབུགས་སྦྱོང་བརྡར་སྐོར་ཡག་པོ་ཤེས་མཁན་ཞིག་ནས་ལམ་སྟོན་དགོས་པ་རེད།

གསར་འགོད་པ། པདྨ་མཚོ།