ཆོས་དད་མེད་མཁན་ཚོར་ཡང་བློ་སྐྱེད་སྟེར་ཐུབ་པ་ཞིག་རེད།

དེ་རིང་༧གོང་ས་མཆོག་གིས་བཞུགས་སྒར་དུ་མཱ་ལེ་ཤི་ཡའི་ཆོས་ཞུ་བ་གཙོས་པའི་དད་ལྡན་སུམ་སྟོང་བརྒལ་བར་ལམ་གཙོ་རྣམ་གསུམ་གྱི་བཀའ་ཆོས་བསྩལ་པ་དང་སྦྲགས་སྐྱ་སེར་གཉིས་ཀྱིས་ནང་ཆོས་ལ་སློབ་གཉེར་གནང་རྒྱུ་གལ་ཆེན་ཡིན་སྐོར་ནན་གྱིས་གསུངས་སོང་།

དེ་རིང་ཕྱི་ཚེས་ ༡༡ ཉིན་གྱི་ཞོགས་པའི་ཆུ་ཚོད་ ༨།༣༠ སྟེང་། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མཱ་ལེ་ཤི་ཡའི་ཐུབ་བསྟན་བཤད་སྒྲུབ་གླིང་དགོན་པ་དང་ཆོས་ཚོགས་ཀྱིས་གསོལ་འདེབས་ཞུས་དོན་ལྟར།  ༸གོང་ས་མཆོག་གིས་ཐུབ་བསྟན་བཤད་སྒྲུབ་གླིང་གི་དགོན་བདག་དགེ་སློང་དཀོན་མཆོག་བསམ་འགྲུབ་མཆོག་གཙོས་པའི་མཱ་ལེ་ཤི་ཡའི་ཆོས་ཞུ་བ་ ༤༠ ཙམ་དང་། བཞུཊ་སྒར་ཁུལ་གྱི་གྲྭ་བཙུན་དང་ཕྱི་རྒྱལ་བ། མི་མང་བཅས་ཁྱོན་མི་ ༣༠༠༠ ཡས་མས་ལ་རྗེ་ཙོང་ཁ་བའི་མཛད་པས་༼ལམ་གཙོ་རྣམ་གསུམ༽ དང་སྒྲོལ་དཀར་གྱི་ཚེ་དབང་བཅས་གནང་སོང་།   

༧གོང་ས་མཆོག་གིས་གསུང་ཆོས་དབུ་འཛུགས་སྐབས། པཱ་ལི་དང་ལེགས་སྦྱར་གང་ཡིན་ཡང་སྡེ་སྣོད་གསུམ་གྱི་ཁོངས་སུ་མ་འདུས་པ་གཅིག་ཀྱང་མེད་པ་དང་། པཱ་ལིའི་གཞུང་ནང་སྡེ་སྣོད་གསུམ་དེ་བདེན་བཞིའི་ཆོས་འཁོར་དང་འབྲེལ་ཡོད་པ་ཞིག་ཡིན་ཞིང་། འདུལ་བའི་ཉམས་ལེན་རིགས་ཐེག་པ་ཆེ་ཆུང་ཧ་ལམ་གཅིག་པ་ཡིན་པ་དང་། མདོ་སྡེའི་སྡེ་སྣོད་ལས་ཏིང་ངེ་འཛིན་གྱི་རྣམ་གྲངས་ལ་ཁྱད་པར་ཏོག་ཙམ་ཡོད་པ་ལས་གཅིག་པ། འོན་ཀྱང་ཤེས་རབ་ཀྱི་བསླབ་པ་མངོན་པའི་སྡེ་སྣོད་ཀྱི་ཐོག་ནས་ཁྱད་པར་ཏོག་ཙམ་ཡོད་ཅིང་། པཱ་ལིའི་གཞུང་ནང་གང་ཟག་གི་བདག་མེད་ཙམ་ཞིག་གསུངས་པ་ལས་མང་པོ་མེད་པ་དང་། ལེགས་སྦྱར་ཆོས་རྒྱུད་ནང་གྲུབ་མཐའ་བཞི་བཤད་ཡོད་ཡོད་པ་དང་། ཐེག་པ་ཆེན་པོའི་ལམ་བསླབ་པའི་སྤྱོད་པ་དང་འབྲེལ་བའི་ཐོག་ནས་ལྟ་བ་གསུང་བ་དེར་དབུ་སེམས་གཉིས་མི་འདྲ་བ་བྱུང་ཡོད་པ། དེ་གཉིས་ཀྱིས་ཆོས་ཀྱི་བདག་མེད་གསུང་གི་ཡོད་སྟབས་གང་ཟག་གི་བདག་མེད་ཐོག་ལ་ཆོས་ཀྱི་བདག་མེད་གསུངས་བ་དེ་གནད་འགག་ཆེན་པོ་ཡིན་སྐོར་སོགས་གསུངས་སོང་།  

བོད་དུ་ནང་ཆོས་དར་ཚུལ་སྐོར་ལ། “ ང་ཚོ་བོད་ལ་ཡོད་པའི་སངས་རྒྱས་ཆོས་དེ་གཙོ་བོ་མཁན་སློབ་ཆོས་གསུམ་ཞེས། ཆོས་རྒྱལ་ཁྲི་སྲོང་ལྡེ་བཙན་གྱི་ཡུམ་དེ་རྒྱ་མོ་རེད། ཆོས་རྒྱལ་སྲོང་བཙན་གྱི་སྐབས་ནས་གཉེན་འབྲེལ་མཛད་དེ་ཐུན་མོང་མ་ཡིན་པའི་འབྲེལ་བ་ཞིག་ཡོད་པ་རེད། དཔེར་ན། ལྷ་སའི་གཙུག་ལག་ཁང་གི་ཇོ་བོ་དང་ར་མོ་ཆེར་ཡོད་པའི་ཇོ་བོ་དེ་དག་རྒྱ་ནག་དང་བལ་ཡུལ་ནས་གདན་ཞུ་གནང་བ་དང་། བོད་ནང་སངས་རྒྱས་ཀྱི་ཆོས་ཞིབ་ཚགས་པོས་ཐོག་ནས་དར་སྤེལ་གནང་བ་དེ། རྒྱ་ནག་ནང་སངས་རྒྱས་ཆོས་དེ་པཱ་ལི་དང་ལེགས་སྦྱར་གྱི་ཆོས་རྒྱུད་གཉིས་དར་ཞིང་རྒྱས་ཏེ་གང་འཚམ་ཡོད་ཀྱང་། རྒྱ་ནག་བརྒྱུད་ནས་མ་ཡིན་པར་རྒྱ་གར་ནས་ཐད་ཀར་ཤེས་རྒྱུའི་དགོངས་པ་བཞེས་ཏེ། ཆོས་རྒྱལ་ཁྲི་སྲོང་ལྡེ་བཙན་གྱིས་མཁན་ཆེན་ཞི་བ་འཚོ་གདན་ཞུ་གནང་བ་རེད། ཞི་བ་འཚོས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གནང་བའི་འགལ་རྐྱེན་སེལ་ཆེད་སློབ་དཔོན་ཐུགས་རྗེ་ཅན་གདན་ཞུ་གནང་སྟེ། མཁན་སློབ་ཆོས་གསུམ་ཞེས་ཡོངས་སུ་གྲགས་ཡོད་པ་དེ་ཡིན་པ་དང་། དེ་འདྲ་ཞིག་གི་ཐོག་ནས་བོད་ལ་སངས་རྒྱས་ཆོས་དེ་དཔལ་ནཱ་ལེནྜའི་ཆོས་རྒྱུད་དྲི་མ་མེད་པའི་སྲོལ་བྱུང་བ་རེད།” ཅེས་གསུངས།

སྐྱ་སེར་གཉིས་ཀས་ནང་ཆོས་ལ་སློབ་གཉེར་གནང་དགོས་པའི་ཐད། “ད་ལྟའི་དུས་རབས་ཉེར་གཅིག་པའི་ནང་དཔལ་ནཱ་ལེནྜའི་མཁས་པ་ཚོས་བརྩམས་པའི་གཞུང་མང་པོ་ཞིག་རྩ་བ་བློར་བཟུང་། འགྲེལ་བ་ཡང་ཁ་ཤས་ཀྱིས་བློར་འཛིན་གྱི་ཡོད་པ་རེད། གང་ལྟར། དེ་དག་ཐོག་སློབ་སྦྱོང་བྱས་ཏེ་ལོ་ ༢༠ དང་ ༣༠ རིང་སྡོད་ཀྱི་ཡོད་པ་དེ་ཕལ་ཆེར་ང་ཚོ་བོད་གཅིག་པུ་མ་གཏོགས་མེད་པ་གསལ་བོ་རེད། ང་ཚོས་སྦྱངས་ཟིན་པའི་གཞུང་དེ་ཁོ་ན་མ་ཡིན་པར་གཡས་གཡོན་ལ་ལྟ་ཐུབ་ན་དཔལ་ནཱ་ལེནྜའི་མཁས་པ་ཚོས་བརྩམས་པའི་གཞུང་དེ་དག་གིས་ང་ཚོའི་རྣམ་དཔྱོད་དང་བློ་མིག་ཕྱེས་ཏེ་བལྟས་པ་ཡིན་ན། ད་ལྟའི་འཛམ་གླིང་གི་ཤེས་ཡོན་སྤྱི་དང་ལྷག་པར་དུ་ཚན་རིག་གི་ཤེས་ཡོན་ཐོག་ནས་འཛམ་གླིང་ནང་ཡིད་སྨོན་སྐྱེས་ས་དང་། ཆ་འཇོག་བྱེད་ཡུལ་ཞིག་ཆགས་ཡོད་པ་རེད། དཔལ་ནཱ་ལེནྜའི་མཁས་པ་ཚོས་ལམ་སྟོན་གནང་ཡོད་པའི་གཞུང་དེ་དག་དང་སྦྲེལ་ཡོང་པ་ཡིན་ན་དམིགས་བསལ་གྱིས་བྲོ་བ་ཁ་ཁ་ཡོད་པ་ཞིག་ཡོང་གི་ཡོད་པ་རེད། དེར་བརྟེན། བོད་གངས་ཅན་ལྗོངས་ལ་ཡོད་པའི་སངས་རྒྱས་ཆོས་དེ་དུས་རབས་རྙིང་པའི་ལྟ་གྲུབ་ཡིན་པ་ཙམ་དུ་མ་ཟད། ད་ལྟའི་དུས་རབས་ ༢༡ དང་འབྲེལ་བ་ཡོད་པའི་ལྟ་གྲུབ་ཡོད་པ་གསལ་བོ་རེད། དེ་ང་ཚོས་ཤེས་དགོས་པ་རེད། རྩ་ཆེན་པོ་རེད་ཅེས་པ་ཙམ་གྱིས་འགྲིག་གི་ཡོད་པ་མ་རེད། དེ་ཤེས་པར་བྱ་རྒྱུ་དང་སྦྱོང་དགོས་རྒྱུ་ཧ་ཅང་གལ་ཆེན་རེད། དེ་ཡང་རབ་བྱུང་བ་རྐྱང་དང་། གཞུང་ཆེན་ལྟ་མཁན་བཤད་གྲྭ་བ་རྐྱང་རྐྱང་གིས་སྦྱོང་དགོས་པ་དེ་འདྲ་མ་རེད། ཆོས་ལ་དད་པ་ཡོད་མཁན་སྐྱ་སེར་དབྱེ་མེད་ཀྱིས་ལྟ་དགོས་པ་ཞིག་དང་། ཆོས་ལ་དད་པ་མེད་མཁན་ཚོར་ཡང་གཞུང་དེ་དག་ནང་ནས་ལེགས་ཆ་བླངས་ན་བློ་སྐྱེད་ཆེན་པོ་ཡོང་བ་ཞིག་ཏན་ཏན་རེད། བོད་གངས་ཅན་ལྗོངས་སུ་ཡོད་པའི་སངས་རྒྱས་པའི་ཆོས་དེ་དཔལ་ནཱ་ལེནྜ་ནས་རྒྱུད་པ་ཞིག་རེད། གང་ལྟར། ཕུལ་དུ་བྱུང་བའི་མིའི་རྣམ་དཔྱོད་ཀྱི་རྩལ་ལས་ཐོན་པའི་ལེགས་བཤད་སྨད་དུ་བྱུང་བ་ཞིག་རེད། བོད་གངས་ཅན་ལྗོངས་རང་ལའང་མཁས་པ་མང་པོ་བྱུང་ཡོད་པ་རེད། དེ་དག་གིས་ཁུངས་བཅོལ་ས་རྒྱ་གར་མཁས་པའི་གཞུང་དེ་ཆགས་ཡོད་པ་རེད།  ད་ལྟ་ང་རང་ཚོས་རྩ་བ་དེར་ཐོས་བསམ་སློབ་གཉེར་བྱ་རྒྱུ་གལ་ཆེན་རེད”ཅེས་གསུངས་བྱུང་།

༧གོང་ས་མཆོག་གིས་བོད་གངས་ཅན་གྱི་ལྗོངས་སུ་འཇམ་དབྱངས་རྣམ་གསུམ་གསུང་སྲོལ་ཡོད་པ་ལས། ས་པཎ་དང་ཀུན་མཁྱེན་ཀློང་ཆེན་པ། འཇམ་མགོན་བླ་མ་ཙོང་ཁ་པ་གསུམ་ཡིན་པ་དང་། སྐབས་སུ་བབས་པ་འཇམ་མགོན་བླ་མ་ཙོང་ཁ་པར་གསུང་པོ་ཏི་བཅོ་བརྒྱད་ཡོད་པ་དག་ལ་ཡག་པོ་མཇལ་བ་ཡིན་ན། གྲོང་ཆོག་ལ་རྒྱུག་རྒྱུ་དང་འདོན་པ་འདོན་རྒྱུའི་རིགས་ཉུང་ཉུང་ཡིན་པར་མང་ཆེ་བ་གཞུང་ཆེན་ཁག་ལ་འགྲེལ་བ་བསྐྱོན་ཡོད་པའི་སྨད་དུ་བྱུང་བའི་ལེགས་བཤད་རྐྱང་ཡིན་སྐོར་སོགས་གསུངས་སོང་། ཁོང་གིས་དེ་རིང་༼ལམ་གཙོ་རྣམ་གསུམ༽ གྱི་གསུམ་གྱི་ཆོས་འབྲེལ་གནང་བ་ལྟར། ཉམས་ལེན་དང་བསམ་བློ་གཏོང་རྒྱུ་གལ་ཆེན་ཡིན་པ་དང་། ཉམས་ལེན་གྱི་ཕྱོགས་ནས་གཙོ་བོ་དཔྱད་སྒོམ་བྱས་ནས་བསམ་བློ་བཏང་བ་ཡིན་ན་སེམས་ལ་ངེས་པ་ཐོབ་པ་ལས། དཔྱད་པ་མ་བྱས་པར་ཡིད་གཙོ་འཇོག་བྱས་ཏེ་བསྡད་པ་ཡིན་ན་ངེས་པ་ཐོབ་རྒྱུ་མེད་ཚུལ་དང་། སྐྱེས་རིམ་དང་རྫོགས་རིམ། ཞི་གནས་སོགས་སྒྲུབ་སྐབས་དང་གནས་ཚུལ་ཁ་ཁ་ཡིན་སྟབས། དཔྱད་པ་བྱས་ནས་འགྲོ་རྒྱུ་གཙོ་བོ་ཡིན་པ་དང་། ཁོང་རང་ཉིད་ལ་མཚོན་ནའང་བློ་སྐྱེད་བྱུང་བ་དེ་གཙོ་བོ་དཔྱད་པ་ལ་བརྟེན་ནས་བྱུང་བ་ལས་བློ་རྩེ་གཅིག་ཏུ་སྒོམ་ནས་ཡོང་བ་ཞིག་མིན་སྟབས། ཚང་མས་ཐོས་བསམ་སྒོམ་གསུམ་དང་དཔེ་ཆ་ལྟ་རྒྱུ། ལམ་གཙོ་རྣམ་གསུམ་ནང་གསུང་བ་ལྟར་ཤེས་པར་བྱས་ཏེ་བསམ་བློ་གཏོང་རྒྱུ་ཧ་ཅང་གལ་ཆེན་ཡིན་སྐོར་གསུངས་བྱུང་།

ཟླ་འདིའི་ཕྱི་ཚེས་ ༡༣ ཉིན་གྱི་སྔ་དྲོར་༸གོང་ས་མཆོག་ལྡི་ལིར་ཆིབས་བསྒྱུར་གྱིས་ལྡི་ལི་བོད་ཁང་གིས་གོ་སྒྲིག་གནང་བཞིན་པའི་ནཱ་ལེནྜའི་ཆོས་རྒྱུད་ཀྱི་སྐོར་ལ་བཀའ་སློབ་དང་། ཉིན་རྒྱབ་གྷན་ངྷིའི་སྒྱུ་རྩལ་ལྟེ་གནས་ཁང་དུ་གནད་ཡོད་མི་སྣར་བཀའ་སློབ་གནང་རྒྱུ། ཚེས་ ༡༧ ནས་ ༢༥ བར་ཉི་ཧོང་དུ་ཆིབས་བསྒྱུར་གྱིས་མཛད་འཕྲིན་བསྐྱང་རྒྱུ་ཡིན་འདུག