རྒྱལ་ཚོགས་དྲུང་ཆེར་ཞུ་གཏུག་བྱས།

མདོ་སྨད་དབུས་རྒྱུན་ཁང་གིས་གསར་འགོད་གསལ་བསྒྲགས་སྤེལ་ཏེ་རྒྱ་གཞུང་ལ་ངོ་རྒོལ་དང་རྒྱལ་སྤྱིར་འབོད་སྐུལ་ཆེད་མཚན་རྟགས་བསྡུ་རུབ་གནང་ཡོད་པ་ཁག་མཉམ་འབྲེལ་རྒྱལ་ཚོགས་ཀྱི་དྲུང་ཆེར་འབུལ་བཞིན་ཡོད་སྐོར་བརྗོད་སོང་། 

དེ་རིང་སྔ་དྲོའི་ཆུ་ཚོད་ ༡༠།༠༠ སྟེང་། ངྷ་ས་མེག་གྷན་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གིས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་གཞུང་གིས་བོད་མི་ཉེས་མེད་ཁག་ཅིག་ལ་སྲོག་ཁྲིམས་བཅད་པའི་བྱ་སྤྱོད་དེར་ངོ་རྒོལ་དང་། མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་ཐོག་ལ་ཞུ་གཏུག་བཅས་ཀྱི་ཆེད། འདས་པའི་ཟླ་གཉིས་ལྷག་རིང་རྒྱ་གར་གཙོས་ཨ་རི་དང་སུད་སི། སྦེལ་ཇམ། ཨོ་སི་ཊོ་ལི་ཡ་བཅས་སུ་ཁྱོན་མཚན་རྟགས་ ༡༣༠༠༠ ལྷག་བསྡུ་རུབ་བྱས་ཡོད་པ་དེ་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་མཚན་ཐོག་ལ་འབུལ་བཞིན་ཡོད་སྐོར་བརྗོད་སོང་། ཚོགས་གཙོ་བསྟན་པའི་དངོས་འགྲུབ་ལགས་ཀྱིས་བརྗོད་པ་ལྟར་ན། དེབ་གཟུགས་ཅན་གྱི་མཚན་རྟགས་དེ་དག་ཁ་སང་ཚེས་ ༡༢ ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་མཇུག་བསྡོམས་སྟེང་འབུལ་འཆར་ཡོད་ཀྱང་ས་གནས་ཁག་ནས་མཚན་རྟགས་དབུས་ལ་འབྱོར་མིན་གྱི་དབང་གིས་དེ་རིང་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་མཚན་ཐོག་ལ་གཏོང་གི་ཡོད་འདུག

མཚན་རྟགས་བསྡུ་རུབ་ཀྱི་དམིགས་ཡུལ་སྐོར་བརྗོད་དོན། ད་ལོའི་མདོ་སྨད་ཚོགས་ཆེན་ཐོག་མཚན་རྟགས་བསྡུ་རུབ་བྱ་རྒྱུའི་གྲོས་ཆོད་ཅིག་བཞག་ཡོད་པ་ལྟར། རྒྱ་ནག་གིས་ཀིརྟི་དགོན་པའི་གྲྭ་བློ་བཟང་དཀོན་མཆོག་ལ་མི་བསད་པའི་ཉེས་མིང་འོག་ལོ་གཉིས་རིང་འཕར་འགྱངས་ཀྱི་སྲོག་ཁྲིམས་དང་། སྒྲོལ་མ་སྐྱབས་ལགས་ཀྱིས་ཁོང་གི་བཟའ་ཟླ་དཀོན་མཆོག་དབང་མོ་བསད་པའི་ཉེས་མིང་འོག་སྲོག་ཁྲིམས་བཅད་ཡོད་སྟབས། ཁོང་གཉིས་གཙོས་བོད་ཀྱི་ཆབ་སྲིད་བཙོན་མ་ཡོངས་རྫོགས་ལ་ཆ་རྐྱེན་གང་ཡང་མེད་པར་ཀློད་གྲོལ་ཡོང་ཆེད། རྒྱ་གཞུང་གི་དྲང་བདེན་མིན་པའི་ཁྲིམས་ཆད་དེ་དག་ལ་མཉམ་འབྲེལ་རྒྱལ་ཚོགས་ལ་ཞུ་གཏུག་ཆེད་ཡིན་པ་དང་། གཞན། མཉམ་འབྲེལ་རྒྱལ་ཚོགས་ཀྱིས་ངེས་པ་དུ་འཛམ་གླིང་ཡོངས་དང་ལྷག་པར་དུ། རྒྱ་ནག་ནང་གི་འགྲོ་བ་མིའི་ཐོབ་ཐང་དང་རང་དབང་ལ་སྲུང་སྐྱོབ་བྱེད་པར་ཤུགས་རྒྱག་དགོས་པ། མཉམ་འབྲེལ་རྒྱལ་ཚོགས་དྲུང་ཆེ་ཡིས་རང་དབང་ལྡན་པའི་ཚོགས་སྡེ་ཆེད་འཛུགས་བྱས་ཏེ་བོད་ནང་ཇི་བྱུང་གནས་ཚུལ་ལ་རྟོག་ཞིབ་གཟིགས་སྐོར་ཕེབས་དགོས་སྐོར་སོགས་བརྗོད་སོང་།