ཉེ་བའི་དུས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཨ་རིའི་ནང་གཞུང་འབྲེལ་ཕྱོགས་སྐྱོད་གནང་བཞིན་པ་ལྟར། ཚེས་ ༡༡ ཉིན་སྲིད་སྐྱོང་མཆོག་ཨ་རིའི་གྲོང་ཁྱེར་ནེའུ་ཡོག་ཏུ་ཨ་རིའི་(The Wall Street Journal) གསར་འགྱུར་ལས་ཁུངས་ཀྱི་རྩོམ་སྒྲིག་ཚོགས་ཆུང་གི་ཚོགས་མི་བགྲེས་པ་གཉིས་དང་། ཨ་རིའི་གྲོས་ཚོགས་གོང་མའི་འཐུས་མི་ཟུར་པ་སྐུ་ཞབས་ཇོ་ལེ་བྷར་མན་ (Senator Joe Lieberman) ལགས། ནེའུ་ཡོག་དུས་བབ་ (The New York Times) ཀྱི་གསར་འགོད་པ་སྐུ་ཞབས་ནོ་ཁོ་ལ་སི་ཁི་རེ་སི་ཊོབ་(Nicholas Kristoff) བཅས་དང་མཇལ་འཕྲད་གནང་ཡོད་པ་མ་ཟད། དེ་སྔོན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚན་པར་ཕྱག་ལས་དང་བོད་དོན་དམིགས་བསལ་འབྲེལ་མཐུད་པ་གནང་མྱོང་མཁན་དང་། ད་ལྟ་ཝ་ཤིན་ཌོན་དུ་ཡོད་པའི་གསར་འགྱུར་བརྒྱུད་ལམ་ (The Huffington Post) གྱི་གཙོ་སྐྱོང་གནང་མཁན་ལྕམ་མཱ་རེ་ཡ་ཨོ་ཊེ་རོ་ (Maria Otero) ལགས་དང་། ལྕམ་པོ་ལཱ་ཌོ་བྷེ་རེན་སི་ཀེ་ (Paula Dobriansky) བཅས་དང་མཇལ་འཕྲད་གནང་སྟེ་བོད་དོན་གླེང་མོལ་དང་བསམ་ཚུལ་བརྗེ་ལེན། གྲོས་ཚོགས་འཐུས་མི་ལྕམ་ཛོ་ལོབ་གྷི་རིན་ (Zoe Lofgren) ལགས་དང་ཐུག་འཕྲད་ཀྱིས་ཕྱི་མི་གནས་སྤོར་གྱི་གནད་དོན་དང་འབྲེལ་བའི་བཀའ་མོལ་བཅས་གནང་ཡོད་འདུག
ཚེས་ ༡༤ ཉིན་སྲིད་སྐྱོང་མཆོག་གིས་ཝ་ཤིན་ཊོན་དུ་གྲོས་ཚོགས་གོང་མའི་ཚོགས་གཙོ་དང་དམངས་གཙོ་ཚོགས་པའི་འཐུས་མི་སྐུ་ཞབས་ཧེ་རེ་རེ་ཌིར་ (Harry Reid) དང་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་། འབྱུང་འགྱུར་༸གོང་ས་མཆོག་ཝ་ཤིན་ཊོན་དུ་ཆིབས་སྒྱུར་གྱི་མཛད་འཆར་སོགས་ཀྱི་སྐོར་ལ་བཀའ་མོལ་གནང་ཡོད་འདུག་ལ། སྐབས་དེར་སྐུ་ཞབས་ཧེ་རེ་རེ་ཌིར་ལགས་ཀྱིས་ཁོང་༸གོང་ས་མཆོག་ལ་ཐེངས་འགའ་ཤས་མཇལ་མྱོང་ཡོད་པ་དང་།༸གོང་ས་མཆོག་ནི་ཕུལ་བྱུང་གི་སྐྱེ་བུ་ཞིག་ཡིན་ཚུལ་སོགས་བརྗོད་ཡོད་པ་མ་ཟད།བོད་ནང་བྱུང་བཞིན་པའི་གནས་ཚུལ་དག་བློ་ཕམ་བྱེད་ཡུལ་ཞིག་ཆགས་ཡོད་སྐོར་སོགས་བརྗོད་ཡོད་པ་དང་། སྲིད་སྐྱོང་མཆོག་གིས་ཁོང་གིས་བོད་མིའི་ཆབ་སྲིད་མགོ་ཁྲིད་ཀྱི་ལས་འགན་བཞེས་རྗེས། བོད་མིའིོ་སྒྲིག་འཛུགས་ཀྱི་ངོས་ནས་བོད་མིའི་དཀའ་ངལ་ཐོག་རྒྱལ་སྤྱིའི་དོ་སྣང་བསླེབས་པར་བྱས་ཏེ། བོད་ཀྱི་གནད་དོན་སེལ་ཐབས་ལ་འབད་བརྩོན་གང་ཡོད་གནང་བཞིན་ཡོད་སྐོར་སོགས་གསུངས་ཡོད་འདུག
ཐེངས་འདིའི་ཕྱོགས་སྐྱོད་སྐབས་སྲིད་སྐྱོང་མཆོག་གིས་ཨ་རིའི་སྲིད་འཛིན་དང་སྲིད་བློན་ལས་ཁུངས། ཕྱི་སྲིད་ལས་ཁུངས་བཅས་ཀྱི་གནད་ཡོད་མི་སྣ་དང་། གྲོས་ཚོགས་གོང་འོག་གི་འཐུས་མི་བཅས་ལ་མཇལ་འཕྲད་ཀྱིས་དཔལ་འབྱོར་གཙོས་པའི་རོགས་རམ་ཐབས་འཚོལ་དང་། དམིགས་བསལ་བོད་མི་༥༠༠༠ ཨ་རིའི་ནང་ལེན་འཆར་གྱི་ལས་གཞིའི་ཐོག་འབོད་སྐུལ། ཨ་རིའི་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་བཞག་བཅས་ལས་དོན་ཁག་གི་ཐོག་འབྲེལ་ཡོད་མི་སྣར་ཐུག་འཕྲད་ཀྱིས་ཕྱག་ལས་གནང་བཞིན་པ་མ་ཟད། གཞུང་འབྲེལ་མ་ཡིན་པའི་ཚོགས་པ་ཁག་གི་མི་སྣ་དང་མཁས་དབང་། གསར་འགྱུར་བརྒྱུད་ལམ་གྱི་རྩོམ་སྒྲིག་པ་དང་གསར་འགོད་པ་དང་བཅས་དང་ཐུག་འཕྲད་ཀྱིས་བོད་གླེང་མོལ་དང་བསམ་ཚུལ་བརྗེ་རེས་གནང་ཡོད་འདུག་ལ། ཕྱི་ཚེས་ ༡༧ ཉིན་སྲིད་སྐྱོང་མཆོག་ནེའུ་ཡོག་ཏུ་ཕེབས་ཏེ་དེར་ཡོད་བོད་མི་ཚོར་བོད་དོན་གཏམ་བཤད་གནང་རྒྱུ་ཡིན་འདུག
གསར་འགོད་པ། དོན་གོ
སྲིད་སྐྱོང་བོད་ཀྱི་ཆབ་སྲིད་ཀྱི་དབུ་ཁྲིད་རེད། རྒྱལ་བ་རིན་པོ་ཆེས་སྲིད་དབང་རྩིས་སྤྲོད་གནང་