མདོ་སྨད་སྤྱི་འཐུས་བར་མའི་འོས་བསྡུ་སྐབས་ཀྱི་བསམ་གཞིཊ།

ཆབ་འགག་དཔལ་ལྡན། སྦེལ་ལྗམ་ནས།

མི་རིགས་ཤིག་གི་རང་དབང་འཐབ་རྩོད་ཀྱི་དོན་དུ་དོ་སྣང་དང་འབད་འབུངས་གནང་མཁན་གྱི་མི་བུ་སུ་ཞིག་གིས་གདོད་མ་ཉིད་ནས་སློབ་སྦྱོང་དང་ཆིག་སྒྲིལ་གྱི་རྨང་གཞི་བརྟན་པོ་ཞིག་གི་སྒོ་ནས་འཐབ་རྩོད་ཀྱི་ཁ་ཕྱོགས་གདེང་འཁེལ་བ་བསྐྲུན་ཏེ་སྲི་ཞུ་སྒྲུབ་པ་ཞིག་སྲིད་ན་དཀོན།  མི་རིགས་ཀྱི་འཐབ་རྩོད་པ་ཞིག་བྱེད་འདོད་ཚེ་ཆེས་ཐོག་མར་མི་རིགས་ཀྱི་སྐད་གཤིས་སུ་གྲུབ་པའི་སྲོལ་རྒྱུན་རིག་གནས་ལ་སློབ་གཉེར་གནང་དགོས་ཤིང་།  སློབ་གཉེར་གནང་བའི་བརྒྱུད་རིམ་ཁྲོད་ནས་མི་རིགས་ཀྱི་རྒྱལ་རབས་ལོ་རྒྱུས་ཀྱི་དོན་སྙིང་རྟོགས་ཐུབ།  རྒྱལ་རབས་ལོ་རྒྱུས་ཀྱིས་ཆིག་སྒྲིལ་དང་འཐབ་རྩོད་ཀྱི་ཁ་ཕྱོགས་གདེང་འཁེལ་བ་ཞིག་བསྐྲུན། ཆིག་སྒྲིལ་དང་འཐབ་རྩོད་ཀྱི་ཁ་ཕྱོགས་གདེང་འཁེལ་བའི་མི་སུ་ཞིག་ཡིན་རུང་དེ་ལ་ཆེ་ཆུང་ལ་མ་ལྟོས་པའི་སྤྱི་ལས་ཀྱི་ལྷག་བསམ་དང་།  རིགས་ཞེན་གྱི་ལ་རྒྱ་ཞིག་ཡོད་པ་མངོན་སུམ་ཚད་གྲུབ་རེད།  སྤྱི་ལས་ལྷག་བསམ་དང་རིགས་ཞེན་ལ་རྒྱ་ཡོད་མཁན་གྱི་མི་དཀྱིལ་མ་སུ་འདྲ་ཞིག་ཡིན་ཡང་མིང་གྲགས་དང་ཕྱོགས་ཞེན་ཏིལ་འབྲུ་ཙམ་ཡང་མི་དགོས་པ་དང་མེད་མཁན་ཤིན་ཏུ་ནས་དཀོན།  ང་ཚོས་བློ་གཟུ་བོའི་ལམ་ནས་འདས་ཟིན་ལོ་རྒྱུས་ཀྱི་བྱུང་རབས་སྤྱི་དང་།  ཡང་སྒོས་བོད་རྒྱ་ལག་ཏུ་ཤོར་རྗེས་ཀྱི་བཙན་བྱོལ་ནང་གི་བྱུང་རབས་ཁག་ལ་བསྐྱར་འདང་ཞིག་རྒྱོབས་དང་གསལ་ལྷང་ངེར་དྲན་ཡོང་།

ང་ཚོས་སྤྱི་ལས་ལྷག་བསམ་དང་ལར་ཞེན་སྙིང་སྟོབས་ཉམས་མྱོང་བཅས་ཀྱིས་ཕྱུག་པའི་སྤྱི་འཐུས་ཤིག་དགོས་གལ་ཆེ་ལུགས་ཁ་ལ་འཁྱེར་ཏེ་ལུང་ཚན་གཅིག་པའི་མི་སྤྱི་འཐུས་ཀྱི་རྐུབ་སྟེགས་སྟེང་བསྐྱལ་བ་བོད་མདོ་དབུས་ཁམས་གསུམ་གཅིག་མཚུངས་ཡིན།  མཚམས་འདི་རུ་ངས་འདྲི་ཚིག་འགའ་འཕངས་ཏེ་མུ་མཐུད་དེ་འབྲི་རྒྱུ་ཡིན།  རང་རེའི་བཀའ་ཤག་དང་སྤྱི་འཐུས་ལྷན་ཁང་ནང་རྒྱལ་སྤྱིའི་སྤྱི་ཚོགས་ཀྱི་ཁྲིིམས་ལུགས་ཐད་ཀྱི་གོ་རྟོགས་ཡོད་མཁན་ཅི་ཙམ་ཡོད་དམ།  རང་མི་རིགས་ཀྱི་ལས་དོན་ཐད་ཁ་ཞེ་གཉིས་མེད་ཀྱི་ལས་ཀ་བྱེད་མཁན་ཅི་ཙམ་ཡོད་དམ།  ད་ཡོད་བཀའ་སྤྱི་ལྷན་རྒྱས་ཀྱི་ཁྲོད་དུ་རང་ལྟ་མཆོག་འཛིན་དང་ཕྱོགས་ཞེན་གྱི་བསམ་བློ་ཁོག་ཏུ་གཉེར་མཁན་གཅིག་ཀྱང་མེད་ཅེས་སུས་ཐག་བཅད་དེ་བཤད་ཐུབ་བམ། 

དེས་ན་ངས་བཤད་འདོད་པའི་སྐད་ཆ་གཙོ་བོ་ནི།  ང་ཚོར་ཡང་དག་པའི་དམངས་གཙོའི་ཁེ་དབང་ལོངས་སུ་སྤྱོད་རྒྱུ་ཡོད་པ་ཤེས་པའི་ཐོག་ནས་རྩོམ་བྲིས་གཏམ་བཤད་སོགས་ཀྱི་སྐབས་སུ་རང་གིས་བྲིས་པའི་རྩོམ་ཡིག་དང་བཤད་པའི་སྐད་ཆར་རང་ཉིད་ཀྱིས་འགན་འཁུར་དགོས།  རང་ཉིད་ཀྱིས་བྲིས་བཤད་གནང་བ་དག་གིས་རང་ཉིད་ངོ་སྤྲོད་གསལ་བོ་གནང་ཡོད།  རང་གིས་བཤད་པ་རང་ཉིད་ཀྱིས་འགན་འཁུར་དགོས་ཟེར་དོན་ཡང་།  ང་ཚོས་གཏམ་བཤད་གནང་སྐབས་བོད་རང་ཉིད་ཀྱི་ཆོས་དང་རིག་གཞུང་སྐད་ཡིག་དང་བཅས་པར་སྦྱངས་པ་རྩེར་སོན་ཞིང་། རྒྱལ་སྤྱི་དང་རྒྱ་ནག་ལ་རྒྱུས་མངའ་ཆེ་བ།  རང་ཉིད་ཀྱི་ཕྱོགས་གཏོགས་གྲོགས་དགའ་ཉེ་ཡིན་ཡང་ཕྱོགས་རིས་མི་བྱེད་པ།  སྤྱི་བའི་ཆེད་དུ་རང་ཉིད་ཡོངས་སུ་བློས་གཏོང་ཐུབ་པ་དགོས་ཞེས་བཀའ་སློབ་ལམ་སྟོན་གནང་མཁན་རང་ཉིད་ལ་དེའདྲའི་ཁྱད་ཆོས་དང་ཡང་ན་བློས་གཏོང་ཅི་ཞིག་གནང་ཡོད་དམ་ཞེས་པ་འདི་ཡིན།  ཁ་བཤད་ཆུ་ཡི་ཝུ་བ།། ལག་ལེན་གསེར་གྱི་ཐིགས་པ།། ཞེས་པའི་དཔེ་ལྟར་དོན་དངོས་དང་མཐུན་པའི་ལག་ལེན་དུ་བསྟར་རྒྱུ་ནི་ཁ་ནས་བཤད་པ་ལྟར་དེ་འདྲའི་ལས་སླ་བོ་ཞིག་གཏན་ནས་མིན་འདོད།  འུ་ཅག་མཐོ་སྒང་བ་ཚང་ལག་ལེན་གྱིས་ཕོངས་པ་ལས་གཏམ་བཤད་རྫིག་པོ་དང་ཁ་བདེ་བོས་ཕོངས་མེད། 

དེ་བས་ད་རེའི་མདོ་སྨད་སྤྱི་འཐུས་ཀྱི་བར་མའི་འོས་བསྡུ་སྐབས་ཀྱི་འོས་མི་བཞིས་རང་ཉིད་ཀྱི་ལོ་རྒྱུས་དང་འབྲེལ་བའི་གསལ་བསྒྲགས་ཤིག་ངོ་དེབ་སོགས་སུ་ཆེད་བཀོད་གནང་བར་རྒྱབ་སྐྱོར་བ་དང་རྒྱབ་སྐྱོར་མེད་མཁན་ཚོས་ཚ་ཚ་འུར་འུར་ངང་འཇོན་མདོག་གིས་རང་རང་ས་ན་རྩོམ་ཡིག་དང་གསལ་བསྒྲགས་སྣ་མང་སྤེལ་ཏེ་མཁྱེན་དཔྱོད་ཡངས་མདོག་དང་། སྤྱི་སེམས་ཆེ་ལུགས།  སྐབས་འགར་རང་ཉིད་ཀྱི་བློ་ལ་མ་བབ་པའི་འོས་མི་གཞན་དག་ལ་ངོ་མཚང་གི་ཚིག་མདའ་འཕེན་པ། རིགས་གཅིག་ལ་ཕྱོགས་རིས་འཐེན་འཁྱེར་གྱི་བསམ་བློ་གཏན་ནས་སྐྱེས་མ་མྱོང་བའི་ཟོལ་གྱིས་རྩོམ་ཡིག་བྲིས་ཏེ་ཁྱབ་སྤེལ་གཏོང་བཞིན་པ་དག་ལ་གཞིགས་ཏེ་རང་གི་བསམ་ཚུལ་ཙམ་ཞིག་བརྗོད་ན།  ངས་བསམ་ན་ང་ཚོ་རྩོམ་འབྲི་མཁན་དང་། གཏམ་བཤད་གནང་མཁན་གྱི་སོ་སྐྱེས་སུ་འདྲ་ཡིན་རུང་ཕྱོགས་ཞེན་གྱི་བསམ་བློ་ཡེ་ནས་འཁོར་མ་མྱོང་ཞེས་ཅི་ཙམ་གླེང་ཡང་ཡིད་ཆེས་བསླེབ་དཀའ།  འུ་ཅག་གི་ལས་འགན་ནི་ད་ལྟའི་འོས་མི་ཚོའི་ལོ་རྒྱུས་ལ་གཞིགས་ཏེ་རང་ཉིད་ཀྱི་འོས་མི་སུ་ཡིན་གསལ་བོ་ངོས་བཟུང་རྗེས་འོས་མི་གཞན་དག་གི་མཚང་བྲུས་ཏེ་སྐྱོན་བརྗོད་དང་ཁ་གདོང་ལེན་རྒྱུ་དེ་མིན།