ནང་ཆེན་ཇ་པ་དགོན་པའི་མཁན་པོ་ཀར་ཚེ་ལགས་ཀྱིས་བཙོན་ཁང་ནས་ཕྱག་འཕྲིན་ཞིག་འབྱོར་ཏེ་ཁོང་ལ་དཀའ་ངལ་རིགས་མེད་སྟབས་གྲྭ་མང་ཚོས་མུ་མཐུད་སློབ་གཉེར་ཐོག་ཤུགས་བསྐྱོན་དགོས་སྐོར་བརྗོད་ཡོད་འདུག
ཟླ་སྔོན་མའི་ཕྱི་ཚེས་ ༦ ཉིན་གྱི་མཚན་མོར་སི་ཁྲོན་ཁྲིན་ཏུའུ་གྲོང་ཁྱེར་ནས་རྒྱ་གཞུང་གིས་འཛིན་བཟུང་བྱས་པའི་ཡུལ་ཤུལ་ནང་ཆེན་ཇ་པ་དགོན་པའི་མཁན་པོ་ཀར་ཚེ་ལགས་ད་ལྟ་ཆབ་མདོར་བཀག་ཉར་བྱས་ཡོད་པ་དང་། ཕྱི་ཚེས་ ༣༡ ཉིན་པེ་ཅིན་དང་སི་ཁྲོན། མཚོ་སྔོན། ནང་ཆེན་བཅས་ཀྱི་ཉེན་རྟོག་པས་མཁན་པོར་འདྲི་གཅོད་བྱས་ཡོད་འདུག
སྐབས་དེར་མཁན་པོས་ནང་ཆེན་རྫོང་གི་ཉེན་རྟོག་པ་བརྒྱུད་ས་གནས་མི་མང་ལ་ཕྱག་བྲིས་ཤིག་བསྐུར་ཡོད་པའི་ནང་། ད་ལྟ་ཁོང་ཆབ་མདོའི་བཀག་ཉར་ཁང་ན་ཡོད། རྡུང་རྡེག་དང་ནད་སྐྱོན་སོཊ་གང་ཡང་མེད་པས་དགོན་སྡེ་གྲྭ་ཚང་དང་། མི་སྡེ་ཡོངས་ལ་སེམས་ཁུར་ཆེན་པོ་མི་བྱེད་རྒྱུའི་རེ་བ་ཞུ། ཁྱད་པར་དུ་དགོན་པའི་བཤད་སྒྲུབ་ཀྱི་བྱ་བ་དང་། མི་སྡེའི་རྒྱུན་ལྟར་གྱི་འཚོ་བ་རྒྱུན་འཁྱོངས་གནང་རྒྱུ་ནི་ཕུགས་རྒྱང་རིང་པོའི་མདུན་ལམ་ཡིན་པས་ངོས་རང་གི་ཆེད་དུ་མི་གཅིག་ཀྱང་དཀའ་ངལ་མི་འཕྲད་པ་གནང་རོགས་ཞེས་རེ་བ་ནན་མོ་ཞུ་རྒྱུ་ཡིན། ཞེས་བཀོད་ཡོད་འདུག
ཟླ་སྔོན་མའི་ཚེས་ ༡༨ ཉིན། ནང་ཆེན་རྫོང་ཇ་པ་དགོན་པའི་གྲྭ་མང་དང་། ས་གནས་མི་མང་ ༢༠༠ ལྷག་འདུ་འཛོམས་ཀྱིས་དགོན་པ་ནས་མགོ་བརྩམས་ཏེ། ལག་ཏུ་བོད་རྒྱ་ཡིག་རིགས་གཉིས་ཐོག “ དགེ་རྒན་དང་བྲལ་བའི་སློབ་མ་རྣམས་ཀྱི་དཀའ་ངལ་ལ་གཟིགས་རོགས། མཁན་པོ་ཀར་ཚེ་བཙོན་གྲོལ་གཏོང་རོགས། ”ཞེས་པའི་འཕྲེད་དར་ཕྱར་བ་དང་སྐད་འབོད་བྱེད་བཞིན་སྦྱི་ལེ་ ༡༠ ཙམ་གྱི་སར་ཡོད་པའི་ནང་ཆེན་རྫོང་ཐོག་ཏུ་གོམ་བགྲོད་བྱེད་སྐབས། གིས་མཁན་ཀློད་གྲོལ་གཏོང་དགོས་པའི་ཞི་འབོད་གོམ་བགྲོད་ཅིག་གནང་སྟེ་རྫོང་ཐོག་ཏུ་བསྐྱོད་འབྱོར་གྲབས་སྐབས། རྫོང་དཔོན་སོགས་མཐོ་རིམ་དཔོན་རིགས་ཁག་ཅིག་བསླེབས་ཏེ། མི་མང་ལ་ཁྱོད་ཚོས་ལས་འགུལ་དེ་འདྲ་མ་སྤེལ་དང་མཁན་པོ་མགྱོགས་པོར་ཀློད་གྲོལ་ཡོང་བ་ང་ཚོས་འགན་ཁུར་ཆོག་ཅེས་སོགས་བརྗོད་དེ་མི་མང་གིས་གོམ་བགྲོད་མཚམས་བཞག་ཡོད་འདུག
མཁན་པོ་ཀར་ཚེ་ལགས་ནི་ཡུལ་ཤུལ་ནང་ཆེན་ཕྱོགས་སུ་སྙན་གྲགས་ཡོད་པའི་མཁན་པོ་ཞིག་ཡིན་འདུག་ལ། ཁོང་གིས་ད་བར་ཁམས་ཁུལ་དང་དམིགས་བསལ་ནང་ཆེན་ས་གནས་སུ་བོད་ཀྱི་ཆོས་དང་རིག་གནས། སྐད་ཡིག་སོགས་ཀྱི་ཐོག་ཕྱག་ལས་མང་པོ་གནང་མྱོང་བ་དང་། ཡུལ་ཤུལ་ས་ཡོམ་གྱི་སྐབས་སུ་དགོན་པའི་སྣེ་འཁྲིད་དེ་གནོད་ཐེབས་མང་ཚོགས་ལ་རོགས་སྐྱོར་གྱི་ལས་དོན་ཤུགས་ཆེན་སྤེལ་ཡོད་འདུག རྒྱ་ནག་གཞུང་གིས་ཁོང་དེ་སྔོན་ནས་ཐེངས་མང་པོར་འཛིན་བཟུང་བྱེད་རྩིས་བྱས་ཡོད་པ་མ་ཟད། ཉེ་ཆར་འཛིན་བཟུང་མ་བྱས་བར་དུ་ཁོང་ནང་ཆེན་རྫོང་ཁོངས་ནས་ས་གནས་གཞན་དུ་འགྲོ་བར་སྲིད་གཞུང་ལ་ཐོ་འགོད་བྱེད་དགོས་པ་སོགས་བྱུང་ཡོད་འདུག
