ཁ་སང་རྒྱ་གར་གྱི་སྲིད་བློན་མན་མོ་ཧན་སིང་མཆོག་གིས་གསར་འགོད་གསལ་བསྒྲགས་ཤིག་གི་ཐོག འབྱུང་འགྱུར་ཕྱི་ཟླ་ ༥ པའི་ཚེས་ ༣ ཉིན་གྱི་རྒྱ་གར་རྒྱལ་ཡོངས་འོས་བསྡུ་ཆེན་མོའི་ཁྲོད་ཀོང་རེ་སེ་ཚོགས་པར་རྒྱལ་ཁ་ཐོབ་ཀྱང་ཁོང་སྲིད་བློན་ལ་བསྐྱར་དུ་སྡོད་རྒྱུ་མིན་པར་བགྲེས་ཡོལ་གནང་རྒྱུ་ཡིན་ཚུལ་བསྒྲགས་འདུག
སྲིད་བློན་མཆོག་གིས་ཀོང་རེ་སེ་ཚོགས་པས་མགོ་ཁྲིད་པའི་སྲིད་གཞུང་གིས་འདས་པའི་ལོ་ ༡༠ རིང་ཕྱི་གསལ་ནང་གསལ་གྱི་སྲིད་ཇུས་བཟུང་སྟེ་རྒྱ་གར་ནང་ལྐོག་ཟ་རུལ་སུངས་ལ་གདོང་ལེན་གྱི་ཁྲིམས་ཡིག་གཏན་འབེབས་དང་ཁོར་ཡུག་སྲུང་སྐྱོབ། ཉམ་ཐག་ལ་ལྟ་སྐྱོང་། དེ་བཞིན། སྤྱི་ཚོགས་ཀྱི་དགོས་མཁོ་དང་འཚམ་པའི་ཤེས་ཡོན་སྲིད་ཇུས་སོགས་ལག་བསྟར་བྱས་ཡོད་སྟབས། རྒྱ་གར་ནང་ཕྱོགས་གང་ཐད་ནས་འཕེལ་རྒྱས་ཆེན་པོ་ཕྱིན་ཡོད་སྐོར་དང་། ད་ལོའི་འོས་བསྡུ་ཆེན་མོའི་ཁྲོད་བསྐྱར་དུ་ཀོང་རེ་སེ་ཚོགས་པར་རྒྱལ་ཁ་འཐོབ་རྒྱུ་ཡིན་པའི་གདེང་ཚོད་ཡོད་སྐོར། ཀོང་རེ་སེ་ཚོགས་པའི་སྲིད་བློན་འོས་མི་ར་ཧུལ་གྷན་དྷིར་ ( Rahul Gandhi)ལགས་ནི་མཁྱེན་མཛངས་ཉིས་ལྡན་དང་སྲིད་བློན་གྱི་ཆ་རྐྱེན་ཡོངས་སུ་ཚང་ཡོད་སྐོར་སོགས་བརྗོད་འདུག
སྲིད་བློན་སིང་གིས་མུ་མཐུད་དུ་བརྗོད་པར། བྷེ་ཇཱའེ་པི་ཚོགས་པས་སྐུ་ཞབས་ཎ་རིན་ཌ་མུ་དྷི་ ( Narendra Modi ) ལགས་སྲིད་བློན་འོས་མིར་ཁྱབ་བསྒྲགས་བྱེད་ཀྱི་ཡོད་པ་དེར་སྐྱོན་བརྗོད་བྱས་ཏེ། ཁོ་བོ་ནི་ ༢༠༠༢ ལོར་གྷོ་ཅུ་ར་ཌེ་ (Gujurat)མངའ་སྡེའི་ནང་ཁ་ཆེ་མི་རིགས་ཚོར་རྒོལ་རྡུང་གཏོང་བའི་ཡར་ལངས་ལས་འགུལ་ཆེན་མོའི་ཁྲོད་ཉེས་མེད་མི་སེར་ ༡༠༠༠ ལྷག་དམར་གསོད་གཏོང་མཁན་དེ་ཡིན་སྟབས། སྲིད་བློན་གྱི་འོས་བབ་མེད་སྐོར་སོགས་བརྗོད་འདུག འོན་ཀྱང་བྷེ་ཇཱའི་པི་ཚོགས་པས། འདས་པའི་ལོ་ངོ་བཅུའི་རིང་མན་མོ་ཧན་སིང་གིས་སྣེ་ཁྲིད་པའི་ཀོང་རེ་སེ་སྲིད་གཞུང་ནི་ལྐོག་ཟ་རུལ་སུངས་མང་ཤོས་བྱེད་མཁན་གྱི་གཞུང་ཞིག་དང་། རྩ་ཁྲིམས་ལ་རྡོག་རོལ་དང་ལོག་འགྲེལ་བྱེད་མཁན་ཞིག་ཡིན་སྐོར་སོགས་བརྗོད་འདུག
ད་སྔ་རྒྱ་གར་གྱི་མངའ་སྡེ་ཁག་ ༦ ནང་མངའ་སྡེའི་གྲོས་ཚོགས་འཐུས་མིའི་འོས་བསྡུའི་ཁྲོད་ཀོང་རེ་སེ་ཚོགས་པར་ཀར་ཎ་ཀྲ་ཁཱ་དང་མི་ཛོ་རམ་མངའ་སྡེ་ ༢ ཐོབ་ཡོད་པ་དང་། བྷེ་ཇཱའི་པི་ཚོགས་པར་མཱ་དྷེ་པར་ཌི་ཤི་དང་ར་འཇི་སི་ཐན། གུ་ཆུ་ར་ཌི། དེ་བཞིན་ཆཱ་དྷེ་སི་གྷར་སོགས་མངའ་སྡེ་ ༤ ནང་རྒྱལ་ཁ་ཐོབ་ཡོད་འདུག ད་ལོ་ཀོང་རེ་སེ་དང་བྷེ་ཇཱའི་པི་ཚོགས་པ་གཉིས་ཀྱིས་རེ་བ་ཆེན་པོ་བྱེད་ཀྱིན་པའི་ལྡི་ལི་ས་གནས་སྲིད་གཞུང་དེ་ཨར་ཝུན་ཌི་( Arvind Kejriwal)ལགས་ཀྱིས་སྣེ་ཁྲིད་པའི་མི་སེར་དཀྱུས་མའི་ཚོགས་པ་ ( Aam Aadmi Party)ཞེས་པར་རྒྱལ་ཁ་ཐོབ་ཡོད།
དེང་སྐབས་རྒྱ་གར་གྱི་ཆབ་སྲིད་ཚོགས་པ་ཁག་གིས་འབྱུང་འགྱུར་ཕྱི་ཟླ་ ༥ ཚེས་ ༣ ཉིན་གྱི་འོས་བསྡུ་ཆེན་མོའི་ཆེད་བརྗོད་ཚིག་འདྲ་མིན་འོག་སོ་སོའི་སྲིད་བློན་འོས་མི་ཁྱབ་བསྒྲགས་བྱེད་བཞིན་ཡོད་ཅིང་། ལྷག་པར་དུ་ཆབ་སྲིད་ཚོགས་པ་ཆེ་གྲས་ཀོང་རེ་སེ་དང་བྷེ་ཇཱའེ་པི་གཉིས་ཀྱིས་འགྲན་རྩོད་ཤུགས་ཆེན་བྱས་ཏེ། ཎ་རིན་ཌ་མུ་དྷིས་ (Narendra Modi )སྣེ་ཁྲིད་པའི་བྷེ་ཇཱའི་པི་ཚོགས་པས་ “འོས་ཤོག་གཅིག་དང་དངུལ་ཤོག་གཅིག(One vote,One note) ” ཅེས་པའི་འབོད་ཚིག་འོག་ཁྱབ་བསྒྲགས་བྱེད་བཞིན་ཡོད་པ་དང་། ར་ཧུལ་གྷན་དྷིས་ ( Rahul Gandhi)སྣེ་ཁྲིད་པའི་ཀོང་རེ་སེ་ཚོགས་པས་ “བག་ལེབ་ཧྲིལ་བོ་ཟ་འདོད་ན། ཉིན་བརྒྱར་ལས་ཀ་རག་དགོས་ན། ཀོང་རེ་སེ་ཚོགས་པར་འོས་ལྡུག” ( Eat Full roti,work for 100 days,vote for Congress)ཅེས་པའི་འབོད་ཚིག་འོག་ཁྱབ་བསྒྲགས་བྱེད་བཞིན་ཡོད་འདུག
ཆབ་སྲིད་དབྱེ་ཞིབ་པ་ཚོས་བརྗོད་པ་ལྟར་ན། ཀོང་རེ་སེ་དང་བྷེ་ཇཱའི་པི་ཚོགས་པ་གཉིས་ཀྱིས་རྒྱལ་ཕམ་རྩོད་ཀྱིན་པའི་འཐབ་རྩོད་དང་གཅིག་གཅིག་ལ་སྐྱོན་བརྗོད་བྱེད་པའི་ལམ་ལུགས་ནི་ཀོང་རེ་སེ་ཚོགས་པ་ཁོ་ནས་གཞུང་སྐྱོང་བའི་ལམ་ལུགས་དེ་མཇུག་སྒྲིལ་བ་ནས་བཟུང་བྱུང་བ་ཞིག་ཡིན་སྟབས། རྒྱ་གར་གྱི་ཆབ་སྲིད་ལམ་ལུགས་ནང་འཐབ་རྩོད་དང་སྐྱོན་བརྗོད་བྱ་རྒྱུའི་ལུགས་སྲོལ་དེ་རྒྱུན་ཆད་མེད་པར་གནས་རྒྱུ་ཡིན་སྐོར་དང་། དེ་ནི་དམངས་གཙོའི་རྒྱལ་ཁབ་ནང་མེད་དུ་མི་རུང་བའི་ཆ་རྐྱེན་ཞིག་ཡིན་སྐོར་བརྗོད་འདུག
