ཉེ་སྔོན་རྒྱ་གཞུང་ཉེན་རྟོག་པས་ཡུལ་ཤུལ་ནང་ཆེན་རྫོང་ནས་ཡིན་པའི་བོད་མི་གཉིས་འཛིན་བཟུང་བྱས་རྗེས་གང་དུ་བཀག་ཉར་བྱས་ཡོད་མེད་ཤེས་རྟོགས་མ་ཐུབ་པར་ལུས་ཡོད་འདུག
འདི་གར་གནས་ཚུལ་མཁོ་སྤྲོད་གནང་བ་ལྟར་ན། སྔར་ལོའི་ཕྱི་ཟླ་ ༩ ཚེས་ ༡༨ ཉིན་ཡུལ་ཤུལ་ནང་ཆེན་རྫོང་ནས་ཡིན་པའི་ཚེ་བརྟན་དོན་འགྲུབ་ལགས། མཚོ་སྔོན་ཟི་ལིང་ནས་གློ་བུར་དུ་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་ མ་ཟད། ཁྱིམ་མི་གཉེན་འབྲེལ་ཚོར་གནས་ཚུལ་གང་ཡང་གསལ་བཤད་བྱས་མེད་སྟབས། ཁྱིམ་མི་ཚོས་ཡུན་རིང་རྩད་གཅོད་བྱས་ཡོད་ཀྱང་ཤི་གསོན་ཤེས་རྟོགས་ཐུབ་མེད་ཀྱང་། ཟླ་འདིའི་ཕྱི་ཚེས་ ༥ ཉིན་གྱི་མཚན་མོར་ཁོང་ཟི་ལིང་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་གོ་ཐོས་བྱུང་ཡོད་ཀྱང་། ད་ལྟའི་ཆར་ཁོང་ལ་འབྲེལ་གཏུག་གང་ཡང་བྱེད་ཐུབ་མི་འདུག
ཚེ་བརྟན་དོན་འགྲུབ་ལགས་ད་ལྟ་རང་ལོ་ ༣༥ ཡིན་ཞིང་། དེ་སྔོན་རྒྱ་གར་དུ་ཡོང་སྟེ་རྫོང་སར་བཤད་གྲྭ་རུ་སློབ་གཉེར་གནང་ཡོད་པ་དང་ཕྱིས་སུ་ཕ་ཡུལ་དུ་ལོག་ཡོད་འདུག ཁོང་གིས་དབྱར་དགུན་གྱི་གུང་གསེང་སྐབས་སུ་ཞིང་འབྲོག་ཁུལ་གྱི་བྱིས་པ་ཚོར་དང་བླངས་ཐོག་བོད་ཡིག་འབྲི་ཀློག་དང་ནང་ཆོས་ངོ་སྤྲོད་གནང་མྱོང་བ་མ་ཟད། རྒྱུན་དུ་ཉམ་ཐག་གི་ནད་པ་ཚོར་རོགས་རམ་དང་ཡུལ་མིའི་རྩོད་རྙོག་འདུམ་སྒྲིག མང་ཚོགས་ནང་ཁོར་ཡུག་སྲུང་སྐྱོབ་དང་གཙང་སྦྲའི་ཕྱོགས་ནས་གོ་རྟོགས་སྤེལ་བ་སོགས། སྤྱི་ཚོགས་ཞབས་ཞུའི་ལས་རིགས་སྣ་མང་གནང་མཁན་གྱི་ཤེས་འཇོན་གཉིས་ལྡན་དང་འགན་འཁྲིའི་འདུ་ཤེས་ཆེ་བའི་གཞོན་སྐྱེས་ཤིག་ཡིན་སྟབས། ས་གནས་བོད་མི་ཚོས་མིག་དཔེ་ལྟ་ས་དང་བསྟོད་བསྔགས་བྱེད་ས་ཞིག་ཡིན་འདུག
གཞན། ཡུལ་ཤུལ་ཁུལ་ནང་ཆེན་རྫོང་གི་བོད་མི་འཛུམ་དགའ་ཟེར་བ་ཞིག་ཟླ་ ༤ ཙམ་གྱི་གོང་ནས་ཉེན་ཡོལ་བྱས་ཏེ་བསྡད་ཡོད་ཀྱང་། ཟླ་སྔོན་མའི་ཚེས་ ༢༥ ཡས་མས་ལ་རྒྱ་གཞུང་ཉེན་རྟོག་པས་འཛིན་བཟུང་བྱས་རྗེས། གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་མེད་པ་དང་། དེ་སྔོན་ཁོང་གིས་ཚེ་བརྟན་དོན་འགྲུབ་ལགས་དང་མཉམ་དུ་ཡུལ་ཤུལ་ཁུལ་དང་བོད་ལྗོངས་ས་ཁུལ་ཁག་ཅིག་གི་རྒྱ་རིགས་གཏེར་རྐུན་ཚོར་བཀག་འགོག་བྱས་ཏེ་ཁོར་ཡུག་སྲུང་སྐྱོབ་དང་། བོད་རིགས་ནང་ཁུལ་གྱི་མཐུན་སྒྲིལ་ཆེད་ཕྱག་ལས་མང་པོ་གནང་མྱོང་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་གཞུང་གིས་ཡུལ་ཤུལ་ཁུལ་ནི་གཙང་གསུམ་འབབ་པའི་མགོ་ཁུངས་ཡིན་སྟབས། རྒྱལ་ཁབ་རིམ་པ་ནས་ཁོར་ཡུག་སྲུང་སྐྱོབ་བྱེད་ཀྱིན་ཡོད་སྐོར་གྱི་འུར་སྒྲོག་བྱེད་བཞིན་ཡོད་ཀྱང་། དོན་དུ་རྫ་སྟོད་རྫོང་སོགས་ཀྱི་གནས་རི་ཁག་ནས་གསེར་དང་དངུལ། ཞ་ཉེ་སོགས་གཏེར་རྫས་རིགས་འབོར་ཆེན་བསྔོག་འདོན་བྱས་ཏེ་རྒྱ་ནག་ནང་ཚོང་འདྲེན་བྱེད་ཀྱི་ཡོད་ཀྱང་། ས་གནས་བོད་མི་ཚོས་ཁོར་ཡུག་སྲུང་སྐྱོབ་ཆེད་གཏེར་ཁ་སྔོག་འདོན་བཀག་འགོག་བྱས་ཚེ། རྒྱ་གཞུང་གིས་ཆབ་སྲིད་ཀྱི་ཉེས་མིང་གཡོགས་ཏེ་རྡུང་རྡེག་དང་བཙོན་འཇུག་སོགས་ ཉེས་ཆད་སྣ་ཚོགས་ཕོག་གི་ཡོད་སྟབས། ས་གནས་བོད་མི་ཚོ་འགུལ་སྐྱོད་མི་ཕོད་པ་བཟོས་ཏེ་བཙན་དབང་གིས་གཏེར་ཁ་སྔོག་འདོན་མུ་མཐུད་དུ་བྱེད་བཞིན་ཡོད་སྐོར་བརྗོད་སོང་།
