སྐབས་བཅོ་ལྔ་བའི་བཀའ་ཤག་གི་ལས་གཞི་གསར་པའི་གྲས་ཏེ། བོད་མིའི་སྒྲིག་འཛུགས་ཀྱི་གཞུང་ཞབས་ཁོངས་སུ་ཡིག་ཚད་གཏོང་བར་སྔོན་ལ་ཟླ་དྲུག་རིང་སཱ་ར་མཐོ་སློབ་ཏུ་ཟབ་སྦྱོང་གནང་དགོས་པ་གཞིར་བཟུང་། སྔར་ལོ་ཕྱི་ཟླ་ ༦ པ་ནས་བཟུང་སྐབས་གཉིས་པའི་གཞུང་ཞབས་ཚུད་རྒྱུགས་ཀྱི་སློབ་ཕྲུག་ཚོར་ས་རཱ་མཐོ་སློབ་ཏུ་ཟབ་སྦྱོང་ཞིག་སྤྲད་ཡོད་པ་ལྟར། ཁ་སང་ནས་བཟུང་ངྷ་ས་དབུས་བོད་ཀྱི་སྨན་རྩིས་ཚོགས་ཁང་དུ། འདི་ལོའི་གཞུང་ཞབས་ཚུད་རྒྱུགས་ཀྱི་ཡིག་ཚད་དངོས་གཞི་བཏང་སོང་།
ཁ་སང་དང་དེ་རིང་གཉིས་ལ་སྨན་རྩིས་ཚོགས་ཁང་དུ་འབྲི་རྒྱུགས་དང་། སང་ཉིན་འདེམས་ལྷན་ཡིག་ཚང་ཏུ་ངག་རྒྱུགས་གཏོང་རྒྱུ་ཡིན་འདུག་ལ། ཐེངས་འདིའི་ཡིག་རྒྱུགས་ཁྲོད། སཱ་ར་མཐོ་སློབ་ཏུ་གཞུང་ཞབས་ཟབ་སྦྱོང་གནང་ཞུགས་མཁན་དང་། དེ་སྔོན་གཞུང་ཞབས་ཟབ་སྦྱོང་གི་ཚུད་རྒྱུགས་སྐབས་བརྒྱ་ཆ་ལོན་ཡང་ཟབ་སྦྱོང་དངོས་གཞིར་ཞུགས་རྒྱུའི་གོ་སྐབས་མ་ཐོབ་པ་ཁག་ཅིག་བཅས་ཁྱོན་ ༤༤ ཙམ་ཡོད་པ་དང་། ད་ལོ་ཕྱི་ལོགས་ནས་ཐད་ཀར་ཡིག་ཚད་ནང་ཞུགས་པ་དང་གཞུང་ཞབས་ལས་ཐོག་བཅས་ལ་གོ་སྐབས་སྤྲད་མི་འདུག
གཞུང་ཞབས་འདེམས་བསྐོ་ལྷན་ཁང་གི་དྲུང་ཆེ་སྣང་ས་ཆོས་སྒྲོན་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིར་ཡིག་རྒྱུགས་ནང་ཞུགས་མཁན་ ༤༤ ཡོད་པ་དེ་ཚོར། བཀའ་ཤག་གིས་འགན་འཛིན་སྡེ་ཚན་ཁོངས་ས་མིག་སྤྲད་མེད་པ་དང་། དེ་མིན། སྡེ་ཚན་འགན་འཛིན་དང་ལས་དོ། ལས་དྲུང་། གཞོན་དྲུང་། རྩིས་ཞིབ་ལས་ཁུངས་སུ་སྡེ་ཚན་འགན་འཛིན་དང་ལས་དོའི་ས་མིག་བཅས་ཡོད་འདུག
འདི་ལོའི་ཡིག་རྒྱུགས་ལ། བོད་ཡིག་དང་དབྱིན་ཡིག ཆབ་སྲིད། རྩིས་བཅས་ཡིན་པ་དང་། བོད་དབྱིན་གཉིས་དང་ཆབ་སྲིད་གསུམ་ལ་འབྲི་རྒྱུགས་དང་ངག་རྒྱུགས། རྩིས་ལ་འབྲི་རྒྱུགས་གཅིག་པུ་བཅས་ཡིན་འདུག བོད་དབྱིན་གཉིས་དང་ཆབ་སྲིད་བཅས་ཀྱི་འབྲི་རྒྱུགས་ལ་བརྒྱ་ཆ་ ༨༠ དང་། ངག་རྒྱུགས་ལ་བརྒྱ་ཆ་ ༢༠ བཅས་ཡོད་འདུག་ལ། རྩིས་ཀྱི་འབྲི་རྒྱུགས་ལ་བརྒྱ་ཆ་ ༥༠ ལས་མི་འདུག
བོད་ཡིག་དང་དབྱིན་ཡིག་ཆབ་སྲིད་བཅས་སྡེ་ཚན་ ༣ ལ་ཨང་ཐོབ་བརྒྱ་ཆ་ ༡༠༠ ཡོད་པ་ལས་རྒྱུགས་འཕྲོད་ཚད་བརྒྱ་ཆ་ ༥༠ དང་། རྩིས་ལ་བརྒྱ་ཆ་ ༥༠ ཡོད་པ་ལས་རྒྱུགས་འཕྲོད་ཚད་བརྒྱ་ཆ་ ༢༥ ལོན་དགོས་ཀྱི་ཡོད་ཅིང་། བཀའ་ཤག་སྔོན་མའི་སྐབས་ངག་རྒྱུགས་དང་འབྲི་རྒྱུགས་གཉིས་ཀར་བརྒྱ་ཆ་ ༥༠ ལོན་དགོས་པའི་སྒྲིག་གཞི་ཞིག་ཡོད་པ་དེར་བསྐྱར་བཅོས་བྱས་ཏེ། ཐེངས་འདིར་བོད་ཡིག་དང་དབྱིན་ཡིག ཆབ་སྲིད་བཅས་གསུམ་ལ་འབྲི་རྒྱུགས་དང་ངག་རྒྱུགས་བསྡོམས་ཏེ་བརྒྱ་ཆ་ ༥༠ ལོན་དགོས་པ་དང་། རྩིས་ལ་བརྒྱ་ཆ་ ༥༠ ནས་ ༢༥ ངེས་པར་དུ་ལོན་དགོས་པ་བཟོས་ཡོད་འདུག
ཐེངས་འདིར་གཞུང་ཞབས་ས་མིག་གི་གནས་རིམ་ཐད། རྩིས་ཞིབ་ལས་ཁུངས་ཆེད་ཡིག་ཚད་གཏོང་མཁན་ཞིག་དང་། སྤྱིར་བཏང་ལས་བྱའི་སྡེ་ཚན་གྱི་གནས་རིམ་སྡེ་འགན་དང་ལས་དོ། ལས་དྲུང་། གཞོན་དྲུང་བཅས་ཀྱི་ཐོག་ཡིག་ཚད་གཏོང་མཁན་བཅས་གནས་རིམ་ ༤ ཡོད་ཅིང་། ཡིག་ཚད་ཀྱི་གྲུབ་འབྲས་གཞིར་བཟུང་ཨང་རིམ་རྩེ་བཏོག་བྱས་ཏེ། ད་ཡོད་ས་མིག་དག་གི་ཐོག་བསྐོ་བཞག་བྱ་རྒྱུ་ཡིན་པ་དང་། རྒྱུགས་འཕྲོད་པ་གང་ཞིག་རྩེ་བཏོག་ཁོངས་ཚུད་མེད་ན་ཡིག་རྒྱུགས་གྲུབ་འབྲས་གསལ་བསྒྲགས་བྱས་རྗེས་ཀྱི་ཟླ་ ༦ རིང་སྒུག་ཐོའི་ནང་ཉར་ཏེ་ས་མིག་གསར་པ་འཐོན་རིམ་བཞིན་བསྐོ་བཞག་བྱ་རྒྱུ་ཡིན་འདུག
ཡིག་རྒྱུགས་ཀྱི་གྲུབ་འབྲས་གསལ་བསྒྲགས་གནང་སྐབས་གནས་རིམ་བཞིའི་ཐོག་ལ་སྒུག་ཐོ་ཡོད་པ་དང་། གཞན། གཞོན་དྲུང་གནས་རིམ་ཐོག་སྒུག་ཐོ་མེད་པ་དེ་རྒྱུ་མཚན་གང་ལ་ཐུག་ཡོད་མེད་སྐོར་ལ་དྲུང་ཆེ་སྣང་ས་ཆོས་སྒྲོན་ལགས་ཀྱིས། “ ད་རེབ་རྒྱུགས་འབྲས་གསལ་བསྒྲགས་ཞུ་བའི་སྐབས་ལ་གཞོན་དྲུང་གནས་རིམ་ཐོག་ལ་སྒུག་ཐོ་གཅིག་ཀྱང་འཇོག་རྒྱུ་མིན། གང་ཡིན་ཞེ་ན། དེ་སྔོན་ཡིག་ཚད་བཏང་བ་ཞིག་སྒུག་ཐོ་ཡོད་པ་ཞིག་གི་གནས་སྟངས་འོག་ཡོད་སྟབས། ད་རེབ་གཞོན་དྲུང་གནས་རིམ་ནང་ཞུགས་རྒྱུའི་གོ་སྐབས་འདི་ཁྱེད་ཚོར་མ་སྤྲད་པར་སྒུག་ཐོ་ཡོད་པ་དེ་ནས་བཏང་བཞག་པ་ཡིན་ན་ཁྱེད་རང་ཚོར་ས་མིག་གསུམ་ལས་གོ་སྐབས་ཐོབ་ཀྱི་མེད་སྐོར་དང་། གནས་རིམ་གསུམ་པོ་དེར་ད་ལྟ་སྒུག་ཐོ་མེད་དུས་སྒྲིག་གཞི་གཞིར་བཟུང་ཡིག་རྒྱུགས་གྲུབ་འབྲས་ཐོན་པའི་རྗེས་ལ་ཟླ་ ༦ སྟེ་ཉིན་ ༡༨༠ རིང་ལ་སྒུག་ཐོའི་ནང་འཇོག་རྒྱུ་དང་། རྗེས་སུ་བཀའ་ཤག་གི་ས་མིག་གསར་པ་གནང་ན་སྒྲིག་གཞི་གཞིར་བཟུང་བང་རིམ་བྱས་ཏེ་ཡིག་ཚད་གཏང་མི་དགོས་པར་བསྐོ་བཞག་བྱ་རྒྱུ་ཡིན། ” ཞེས་བརྗོད་བྱུང་།
གསར་འགོད་པས་གཞུང་ཞབས་ཚུད་རྒྱུགས་ནང་ཞུགས་མཁན་ལ་དྭགས་བསོད་ནམས་གླིང་ནས་ཡིན་པའི་བསྟན་འཛིན་འཇིགས་མེད་ལགས་སུ་བཅར་འདྲི་ཞུས་པར་ཁོང་གིས། “ ང་སཱ་ར་མཐོ་སློབ་ཐོན་རྗེས་ཟླ་ ༦ ཙམ་རིང་བོད་མིའི་སྒྲིག་འཛུགས་ཀྱི་གོ་སྒྲིག་འོག་གཞུང་ཞབས་ཟབ་སྦྱོང་ནང་ཞུགས་པ་ཡིན། འོན་ཀྱང་ཐེངས་འདིར་གཞུང་ཞབས་ཀྱི་ས་མིག་ཉུང་ཉངུ་ལས་མེད་ཀྱང་རང་ཉིད་ངོས་ནས་གང་ཐུབ་ཅི་ཐུབ་འབད་བརྩོད་བྱེད་རྒྱུ་ཡིན།” ཞེས་དང་། ད་རེབ་ཡིག་ཚད་གཏོང་ཕྱོགས་ཐོག་འདོད་པ་མ་ཁེངས་པ་དེ་འདྲ་བྱུང་མ་སོང་། གང་ཡིན་ཞེ་ན། གཅིག་ཟབ་སྦྱོང་དང་འབྲེལ་བ་ཡོད་པའི་སློབ་ཕྲུག་ཚ་མར་ཡིག་རྒྱུགས་ཀྱི་གོ་སྐབས་སྤྲད་ཡོད་པ་རེད། གཉིས་པ་ད་རེབ་ཡིག་ཚད་ཀྱི་ནང་དོན་ཡང་ཟབ་སྦྱོང་སྐབས་ཀྱི་སློབ་ཚན་དང་འབྲེལ་བ་ཡོད་པ་རྐྱང་རྐྱང་རེད་བསམ་པ་བྱུང་སོང་། དེ་ཧ་ཅང་ཡག་པོ་རེད། ” ཅེས་བརྗོད་སོང་། ཁོང་གིས་ང་གཞུང་ཞབས་ཡིག་ཚད་གཏོང་དགོས་དོན་སྐོར་ལ། “ ང་ཆུང་དུས་ནས་བོད་ཡིག་ལ་དགའ་བོ་ཞེ་དྲག་ཡོད་སྟབས། སཱ་ར་མཐོ་སློབ་ནས་བོད་ཀྱི་རིག་གནས་ཐོག་སློབ་མཐར་ཕྱིན་ཏེ་ད་ཐེངས་ཡིག་རྒྱུགས་ཁྲོད་གཞུང་ཞབས་ནང་ཚུད་ན། ཇི་སྲིད་མ་འོངས་པར་བོད་རང་བཙན་མ་ཐོབ་བར་དེ་སྲིད་གཞུང་ལ་ཞབས་ཕྱི་ཞུ་རྒྱུའི་ཆོད་སེམས་ཡོད” ཅེས་བརྗོད་སོང་།
