དབུ་མའི་ལམ་ལས་འགུལ་ཁང་གིས་འདི་ལོའི་ཕྱི་ཟླ་ ༤ ཚེས་ ༢༥ ཉིན་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་དང་བསྟུན་ཏེ་ལྡི་ལིར་ཉིན་ ༣ རིང་བོད་དོན་ལས་འགུལ་སྤེལ་རྒྱུ་ཡིན་འདུག
དེ་རིང་ཉིན་རྒྱབ་ཆུ་ཚོད་ ༢ པ་ཡོལ་ཙམ་ལ། དབུ་མའི་ལམ་མི་མང་ལས་འགུལ་ཁང་གི་དབུས་ལས་ཁུངས་སུ སྤྱི་ཁྱབ་ཚོགས་གཙོ་ལི་ཐང་སྤྲུལ་སྐུ་འཇམ་དབྱངས་ཡོན་ཏན་ལགས་དང་ཚོགས་གཞོན་བུ་ཡོན་ཏན་ལགས་རྣམ་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ད་ལོའི་ཕྱི་ཟླ་ ༤ ཚེས་ ༢༥ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༢༥ ལ་ཕེབས་པའི་ཉིན་མོ་དང་བསྟུན་ཏེ། དབུ་མའི་ལམ་མི་མང་ལས་འགུལ་ཁང་གི་དབུས་ས་གཉིས་ཀྱི་གོ་སྒྲིག་འོག རྒྱ་གར་རྒྱལ་ས་ལྡི་ལིར་ས་གནས་ཁག་ ༣༠ ཙམ་གྱི་བོད་མི་རྣམས་འདུ་འཛོམས་ཀྱིས་ཉིན་གྲངས་གསུམ་རིང་བོད་དོན་ལས་འགུལ་ཞིག་སྤེལ་རྒྱུ་ཡིན་པའི་གསལ་བསྒྲགས་གནང་སོང་།
གསར་འགོད་གསལ་བསྒྲགས་ཐོག་དབུ་མའི་ལམ་མི་མང་ལས་འགུལ་ཁང་གི་འགན་འཛིན་སྤྲུལ་སྐུ་འཇམ་དབྱངས་ཡོན་ཏན་ལགས་ཀྱིས། རྒྱ་གར་ནང་ལོགས་ཀྱི་ས་གནས་ཁག་ ༣༠ ཙམ་ནང་ཡོད་པའི་ས་གནས་འབྲེལ་མཐུད་པ་བརྒྱུད་ས་གནས་རེ་ནས་མི་ ༡༠ རེ་བཅས་ཁྱོན་མི་གྲངས་ ༣༠༠ ཙམ་འདུ་འཛོམས་བྱ་ཐུབ་པ་གནང་རྒྱུ་དང་། ཐེངས་འདིའི་ལས་འགུལ་ཉིན་དང་པོར་ལས་འགུལ་བ་ཚོས་དབུ་མའི་ལམ་གྱི་དགོངས་འཆར་དང་མཐུན་པའི་འབོད་ཚིག་སྣ་ཚོགས་ཀྱི་འཕྲེད་དར་བཟུང་སྟེ། ཆོག་མཆན་ཐོབ་ཚེ་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་བར་གོམ་བགྲོད་གནང་སྟེ། དགོས་འདུན་དོན་ཚན་གསུམ་དང་འགྲེལ་བཤད་བཅས་རྒྱ་ནག་གཞུང་ཚབ་ལ་འབུལ་རྒྱུ་དང་། ཉིན་གཉིས་པར་རྒྱ་གཞུང་གིས་དགོས་འདུན་དེ་དག་ངེས་པར་དུ་ལག་བསྟར་དགོས་པའི་འབོད་སྐུལ་གྱི་ཟས་བཅད་ངོ་རྒོལ། ཉིན་གསུམ་པར་བོད་མིའི་སྒྲིག་འཛུགས་ཀྱི་སྐུ་ཚབ་གདན་འདྲེན་ཞུས་ཏེ་ལས་འགུལ་བ་རྣམས་ལ་གསུང་བཤད་དང་། དབུ་མའི་ལམ་གྱི་ཐོག་ནས་མ་འོངས་པར་ལས་འགུལ་ག་འདྲ་སྤེལ་དགོས་མིན་ཐོག་གྲོས་བསྡུར་གནང་རྒྱུ་བཅས་ཡིན་འདུག
སང་ཉིན་ནས་བཟུང་རྒྱ་གར་ནང་ལོགས་ཀྱི་ས་གནས་ཁག་ ༣༠ ཙམ་ལ་སྦྱར་ཡིག་སོགས་ཀྱི་ཐོག་ནས་གསལ་བསྒྲགས་སྤེལ་ཏེ། འདི་ལོའི་ཕྱི་ཟླ་ ༣ པའི་ཚེས་ ༡༥ ཉིན་ནང་ཚུད་དུ་མཉམ་ཞུགས་གནང་མཁན་གྱི་མིང་ཐོ་འབྱོར་ཐུབ་དགོས་པ་དང་། ལས་འགུལ་ནང་མི་ག་ཚོད་འདུ་འཛོམས་གནང་ཡང་ལས་འགུལ་ཁང་གི་ངོས་ནས་ལྡི་ལིར་ སྡོད་གནས་དང་ཟ་མ་སོགས་གོ་སྒྲིག་གནང་རྒྱུ་ཡིན་སྐོར་བརྗོད་བྱུང་།
ཐེངས་འདིའི་ལས་འགུལ་ཐད་གསལ་བསྒྲགས་ཤིག་བཀྲམས་ཡོད་པའི་ནང་། “འཛམ་གླིང་རང་དབང་དང་བརྡ་འཕྲིན་ཅན་དུ་ཁ་ཕྱོགས་བཞིན་པའི་དུས་འདིར། རྒྱ་ནག་གཞུང་གི་དཔོན་རིགས་ཚོས་ཀྱང་ཨུ་ཚུགས་མཁྲེགས་འཛིན་དང་། སྒེར་གཅོད་གཉའ་གནོན། སྡིག་པ་མིག་བཙུམ་ཁོ་ན་མིན་པར་རྒྱ་ནག་མི་མང་དུང་ཕྱུར་མང་པོའི་ལ་རྒྱ་དང་མཚན་མཐོང་ལ་སྲུང་སྐྱོབ་དང་། རྒྱ་ནག་གཞུང་གི་རྩ་ཁྲིམས་ནང་གསལ་བོད་མི་རིགས་ཀྱི་མངོན་འདོད་ཡིག་ཆར་རྩ་འཛིན་གྱིས་སྐད་ཡིག་དང་ལེགས་བྱང་། ཁོར་ཡུག གཤིས་ལུགས་སོགས་ལ་མིང་དོན་མཚུངས་བའི་རང་སྐྱོང་སྤྲོད་དགོས་པ། གང་མགྱོགས་འབྲེལ་མོལ་མགོ་འཛུགས་ཀྱིས་བོད་རྒྱ་མི་རིགས་གཉིས་འདྲ་མཉམ་ཞི་མཐུན་གནང་རྒྱུར་རྒྱ་ནག་གཞུང་འཛིན་པ་ཚོའི་བློ་སྒོ་ཕྱེ་པ་དང་། རྒྱལ་སྤྱིའི་བོད་དོན་རྒྱབ་སྐྱོར་བ་ཡོངས་ནས་ཀྱང་སྣོན་ཤུགས་སྤྲོད་དགོས་པའི་འབོད་སྐུལ་ནན་བརྗོད་བྱེད་ཀྱི་ཡིན། ”ཞེས་བཀོད་འདུག
ཐེངས་འདིའི་ལས་འགུལ་གྱི་དགོས་འདུན་དོན་ཚན་ ༣ ནི། དང་པོ། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་གཞིར་བཟུང་འཕྲལ་དུ་བོད་རྒྱ་གྲོས་མོལ་མགོ་འཛུགས་ཀྱིས་བོད་མི་ཚོར་འཛིན་སྐྱོང་གཅིག་གི་རང་སྐྱོང་ལག་བསྟར་བྱེད་དགོས་པ། གཉིས་པ། མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་སྲིད་གཞུང་ཁག་ནས་༸གོང་ས་མཆོག་དང་བོད་མི་མང་གི་དགོས་འདུན་དབུ་མའི་ལམ་གྱི་སྲིད་བྱུས་ལ་མིང་དོན་མཚུངས་བའི་རྒྱབ་སྐྱོར་བྱེད་དགོས་པ། གསུམ་པ། ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་ཆབ་སྲིད་བཙོན་པ་རྣམས་མྱུར་དུ་ཀློད་གྲོལ་གཏོང་དགོས་པ་བཅས་བཀོད་འདུག
གསར་འགོད་པ། པདྨ་མཚོ།
དབུ་མའི་ལམ་གྱི་སྒྲོམ་གཞི་སྟེ་རྒྱ་ནག་གཞུང་ལ་ཕུལ་བའི་ རང་སྐྱོང་བསམ་འཆར་ ནང་དུ་བོད་ཀྱི་རང་སྐྱོང་ལམ་ལུགས་དེ་བོད་མི་མང་གིས་མང་མོས་འོས་བསྡུའི་ལམ་ནས་འཛིན་སྐྱོང་བྱ་རྒྱུ་ཡིན་པ་གསལ་བར་བཀོད་ཡོད། མ་རིག་མ་གོ་བ་ཚོས་སློབ་སྦྱོང་བྱོས།
གཉིས་ནས་དབུ་མའི་ལམ་གྱི་དགོངས་དོན་ནི་བོད་རྒྱ་གཉིས་སྨན་གྱི་ཁེ་ཕན་གཞི་རྩར་བཟུང་བ་ཞིག་ཡིན་པས་ང་ཚོས་རང་གི་མི་རིགས་གཅིག་པུའི་ཆེད་མིན་པར་ཞོར་དུ་སྐྱིད་སྡུག་གཅིག་པའི་སྤུན་ཟླ་མི་རིགས་ཚོར་ཡང་གདུང་སེམས་མཉམ་སྐྱེད་དང་རང་དབང་བདེ་སྐྱིད་མཉམ་རུབ་ཀྱིས་རྩོད་འོས་པ་ཞིག་ཡིན།
ད་དབུ་མའི་ལམ་གྱིས་ཁ་གྲགས་དགོས་པའི་གནས་ལུགས་དེ་གཞི་ནས་བརྙེད་ཡོད་ས་རེད། ཡག་པོ་འདུག དེ་སྔ་དབུ་མའི་ལམ་ཞེས་པ་དེ་ལས་འགུལ་དང་ཁ་བྲལ་དགོས་པ་ཞིག་ཏུ་ངོས་འཛིན་བྱེད་མཁན་ཇེ་མང་རེད། ད་འགྲིགས་འདུག
ཆབ་བྲག་ལགས། དབུ་མའི་ལམ་ལ་མང་གཙོ་དགོས་ཀྱི་མེད་པ་དེ་དེ་སྔ་སྲིད་སྐྱོང་མཆོག་གིས་གསལ་པོ་བཟོས་ཟིན་པ་རེད། ཁྱེད་ཀྱང་སྤྱི་ཟུར་ཞིག་ཡིན་པས་ཤེས་དགོས་ངེས་རེད། དབུ་མའི་ལམ་གྱི་ཟིན་བྲིིས་ནང་མང་གཙོའི་དགོས་འདུན་བཏོན་མེད་པ་གསལ་པོ་རེད། མ་ཟད་རྒྱ་ནག་དམར་ཤོག་གི་རྩ་ཁྲིམ་འོག་ནས་ངམ་གཙོ་ཞིག་ཐོབ་རྒྱུ་ཉིན་མོའི་གཉིད་ལམ་རེད་དོ།
དང་པོ། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་གཞིར་བཟུང་འཕྲལ་དུ་བོད་རྒྱ་གྲོས་མོལ་མགོ་འཛུགས་ཀྱིས་བོད་མི་ཚོར་འཛིན་སྐྱོང་གཅིག་གི་རང་སྐྱོང་ལག་བསྟར་བྱེད་དགོས་པ།
དབུ་མའི་ལམ་གྱི་མི་ཡིན་ཟེར་བ་དེ་ཚོས་བོད་མི་ཚོར་འཛིན་སྐྱོང་གཅིག་གི་རང་སྐྱོང་ལག་བསྟར་དགོས་སྐོར་བཤད་པ་ལས་འཛིན་སྐྱོང་གཅིག་ཅེས་པའི་དོན་གང་ཡིན་ནམ།
དབུ་མའི་ལམ་མི་མང་ལས་འགུལ་ཁང་གི་ལས་འགུལ་འདིར་ལས་འགུལ་བ་བདག་གིས་ཀྱང་རྒྱང་རིང་ནས་ཡི་རང་དང་རྒྱབ་སྐྱོར་ཞི་གིན་ཡོད།
དབུ་མའི་ལམ་གྱི་དགོངས་དོན་འདི་གཉིས་སྨན་སྲིད་བྱུས་གུ་ཡངས་ཤིག་ཡིན་པས་དོན་ཚན་གཅིག་ཁ་སྣོན་ཡོང་བའི་རེ་སྐུལ་ཞུ་རྒྱུར།
༤༽ བོད་དང་ལས་སྐལ་གཅིག་པའི་སྤུན་ཟླ་མི་རིགས་ཡུ་གུར་བ་དང་ནང་སོག་གིས་གཙོས་རྒྱ་ནག་མི་དམངས་ཡོངས་ལ་འགྲོ་བ་མིའི་ཐོབ་ཐང་དང་དམངས་གཙོ་ཡང་དག་ཅིག་ལག་བསྟར་ཡོང་རྒྱུའི་རེ་སྐུལ་ཞུ་གིན་ཡོད།