ཡིག་ཆ་ནག་པོ་ཆཊ་དོན་སྐོར་གྱི་དཀྲོག་གཏམ་དེ་སུས་བཟོས་པ་རེད།

སྤེལ་ལྗམ་གྱི་བོད་མི་སྐྱབས་བཅོལ་བའི་ཡིག་ཆ་ནག་པོ་ཆགས་བཞིན་པའི་ཐད་ཚོགས་འདུ་ཚོགས་ཏེ། སྤར་སིལ་སྐུ་ཚབ་དོན་གཅོད་མཆོག་གིས་སྤྱི་ཚོགས་ནང་བོད་མིའི་སྒྲིག་འཛུགས་ཀྱི་དབུ་ཁྲིད་རེ་ཟུང་གི་གཏམ་བཤད་བརྒྱུད་བོད་མི་ཚོའི་ཡིག་ཆ་ནག་པོ་ཆགས་ཚུལ་དེ་བདེན་པ་མིན་པའི་གསལ་བཤད་གནང་འདུག

གཟའ་སྤེན་པའི་ཉིན། སྤེལ་ལྗམ་བོད་རིགས་ཚོགས་པའི་གོ་སྒྲིག་འོག སྦར་སིལ་དུ་ཡོད་པའི་ན་ལན་ཊའི་དགོན་པའི་ནང་། ཉེ་བའི་ཆར་བོད་མི་སྐྱབས་བཅོལ་ཞུ་མཁན་མང་བོ་ཞིག་ལ་ཡིག་ཆ་མ་རག་པའི་དཀའ་ངལ་འཕྲད་ཡོད་པའི་སྐོར་ལ་ཚོགས་འདུ་ཞིག་ཚོགས་ཡོད་ཅིང་། ཚོགས་འདུའི་སྟེང་སྦར་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ་མཆོག་དང་དྲུང་ཆེ་ཀརྨ་ལགས། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་བཅས་ཕེབས་ཡོད་པ་དང་། དེ་མིན། ཡིག་ཆ་ནག་པོ་ཆགས་མཁན་དང་། དྲི་བ་གཉིས་བ་ཡོང་རྒྱུ་ལྷག་བསྡད་ཡོད་མཁན་བཅས་བོད་མི་ ༢༠༠ ཙམ་འདུ་འཛོམས་བྱུང་ཡོད་འདུག

ཚོགས་འདུའི་སྟེང་སྤེལ་ལྗམ་བོད་རིགས་ཚོགས་པའི་ཚོགས་གཙོ་ཐུབ་བསྟན་འཕེལ་རྒྱས་ལགས་ཀྱིས་སྤེལ་ལྗམ་ནང་གསར་དུ་འབྱོར་བའི་བོད་མི་ཕོན་ཆེན་པོ་ཞིག་གི་ཡིག་ཆ་ནག་པོ་ཆགས་ཡོད་པ་དང་། ཁོང་ཚོའི་ཆེད་སྤེལ་ལྗམ་བོད་རིགས་ཚོགས་པས་ཁྲིམས་རྩོད་པ་ཡག་པོ་ཞིག་བཙལ་ཏེ་ཁྲིམས་གཏུག་རོགས་རམ་གྱི་ཐབས་ལམ་འཚོལ་བཞིན་ཡོད་སྟབས་ཡིག་ཆ་ནག་པོ་ཆགས་མཁན་དག་གིས་མིང་ཐོ་སྤྲོད་དགོས་པ་དང་། དྲི་བ་གཉིས་པར་སྒུག་སྡོད་མཁན་ཚོའི་དྲིས་ལན་སྐབས་གནས་ཚུལ་གང་དག་ཐོག་དོ་སྣང་སྤྲོད་དགོས་མིན་ལམ་སྟོན། ཡིག་ཆ་ནག་པོ་ཆགས་མཁན་ཁྲོད་ཕྲུ་གུ་བཙས་མཁན་སོགས་དམིགས་གསལ་དཀའ་ངལ་ཡོད་རིགས་ལ་བོད་རིགས་ཚོགས་པའི་ངོས་ནས་མཚན་ཚོགས་གོ་སྒྲིག་དང་། ཞལ་འདེབས་བསྡུ་སློང་བརྒྱུད་རོགས་རམ་གང་ནུས་བྱ་འཆར་ཡོད་སྐོར་སོགས་བརྗོད་ཡོད་འདུག

སྐབས་དེར་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ཉེ་ཆར་སྤེལ་ལྗམ་དུ་བོད་མི་མང་བོ་ཞིག་གི་ཡིག་ཆ་ནག་པོ་ཆགས་པ་ནི་སྒྲིག་འཛུགས་ཀྱི་མགོ་ཁྲིད་རེ་ཟུང་གིས་སྐད་ཆ་བཤད་སྟངས་མ་འགྲིག་པའི་དབང་གིས་ཡིན་ཚུལ་དཀྲོག་གཏམ་ཞིག་ཁྱབ་ཀྱིན་ཡོད་པའི་སྐོར་ལ་གསལ་བཤད་གནང་དོན།  ༢༠༡༣ ལོའི་ཟླ་ ༣ པའི་ཚེས་ ༦ ཉིན་ལ་སིད་སུ་དང་སྤེལ་ལྗམ་གཞུང་གི་སྐྱབས་བཅོལ་ལས་ཁུངས་ཀྱི་སྐུ་ཚབ་ཚོགས་ཆུང་ཞིག་རྒྱ་གར་དང་བལ་ཡུལ་དུ་བསྐྱོད་ཡོད་པ་དང་། ཁོང་ཚོས་ལྡི་ལི་ནས་སྐུ་ཚབ་དོན་གཅོད་ཁང་དང་བདེ་དོན་ལས་ཁུངས། སྣེ་ལེན་ཁང་། བོད་ཀྱི་སྲིད་བྱུས་ཁང་། མདུན་ལམ་ལམ་སྟོན་ཚོགས་པ། བོད་ཀྱི་ཚོང་དོན་ཚོགས་པ། ད་དུང་རྒྱ་གར་གྱི་མཁས་པ་དང་བོད་མི་སྒེར་བ་ཁག་ཅིག་བཅས་ལ་ཐུག་འཕྲད་གནང་ཡོད་འདུག ངྷ་རམ་ས་ལའི་བོད་ཀྱི་གཞོན་ནུ་ལྷན་ཚོགས་དང་བུད་མེད། དགུ་བཅུ་གསུམ། བོད་རང་བཙན་སློབ་ཕྲུག་ཚོགས་པ། སྒྲོལ་མ་གླིང་སོགས་གཞུང་འབྲེལ་མིན་པའི་ཚོགས་པ་ཁག་དང་། བོད་མིའི་སྒྲིག་འཛུགས་ནང་སྲིད་དང་བདེ་སྲུང་། འཕྲོད་བསྟེན། སྤྱི་འཐུས་ལྷན་ཁང་། སྣེ་ལེན་ཁང་བཅས་ལ་གཟིགས་སྐོར་གནང་ཡོད་འདུག དེ་བཞིན་ངྷ་རམ་ས་ལའི་ SP ལའང་ཐུག་འཕྲད་གནང་ཡོད་འདུག དེའི་རྗེས་ཁོང་ཚོ་བལ་ཡུལ་དུ་བསྐྱོད་དེ་བོད་མིའི་ཚོགས་པ་ཁག་ལ་གཟིགས་སྐོར་གནང་སྟེ། སྤྱི་ཡོངས་ཀྱི་ཆ་ནས་བལ་ཡུལ་ལས་རྒྱ་གར་ནང་གནས་སྡོད་བོད་མི་ཚོའི་གནས་སྟངས་ཡག་པོ་ཡོད་པ་དང་། ས་གནས་ཁ་ཤས་སུ་རྒྱ་གར་ཡུལ་མི་ལས་བོད་མིའི་གནས་སྟངས་ཡག་པ། བོད་མི་ཚོས་རྒྱ་གར་ཡུལ་མི་གཡོག་ཏུ་བཀོལ་བའི་གནས་སྟངས་སོགས་གཟིགས་ཡོད་འདུག ཅེས་བརྗོད་འདུག

སྤྱི་ཚོགས་ནང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་སོགས་སྤེལ་ལྗམ་དུ་སླེབས་སྐབས། སྤེལ་ལྗམ་གཞུང་ལ་བོད་མི་ཚོར་དཀའ་ངལ་མེད་སྐོར་ཞུས་ཡོད་པ་ནི་བདེན་པ་མིན་པའི་སྐོར་ལ། ན་ནིང་ཕྱི་ཟླ་ ༨ པར་ནང་སྲིད་བཀའ་བློན་རྒྱ་རི་སྒྲོལ་མ་ལགས་ཨི་ཊ་ལིར་གཞུང་དོན་ཕྱོགས་བསྐྱོད་ཕེབས་ཞོར་ཏུ་བཀའ་ཤག་གི་གཞིས་ཆགས་རོགས་རམ་གྱི་ལས་འཆར་གསལ་བཤད་ཆེད་སྤེལ་ལྗམ་བོད་རིགས་མི་མང་ལ་ཐུག་ཡོད་པ་ལས་སྤེལ་ལྗམ་གཞུང་དང་གྲོས་ཚོགས་གང་ལའང་ཐུག་ཡོད་པ་མ་རེད། དེའི་རྗེས་སྤྱི་འཐུས་ཚོགས་གཙོ་མཆོག་ཧོ་ལན་ཊི་རུ་ཚོགས་པའི་རྒྱལ་སྤྱིའི་བོད་དོན་ལས་འགུལ་གྱི་འགན་འཛིན་ལྷན་ཚོགས་སྟེང་བཅར་སྐབས་ཞོར་ཏུ་སྤེལ་ལྗམ་མི་མང་ལ་ཐུག་འཕྲད་ཆེད་ཕེབས་པ་ལས་སྤེལ་ལྗམ་གཞུང་ལ་ཡོད་པ་མ་རེད། ཉེ་ཆར་སྤྱི་འཐུས་ཚོགས་གཙོ་མཆོག་གིས་སྣེ་ཁྲིད་པའི་སྤྱི་འཐུས་སྐུ་ཚབ་ཚོགས་ཆུང་གིས་ཡུ་རོབ་གྲོས་ཚོགས་དང་སྤེལ་ལྗམ་གྲོས་ཚོགས་ཁག་ལ་ཐུག་སྐབས་བོད་ནང་གི་ཛ་དྲག་གནས་སྟངས་དང་བོད་མིའི་དཀའ་སྡུག་ཁག་གསལ་བཤད། བོད་དོན་ལ་རྒྱབ་སྐྱོར་གནང་དགོས་བའི་འབོད་སྐུལ་གནང་བ་ལས་བོད་མི་ལ་དཀའ་ངལ་མེད་སྐོར་ཞིག་གཏན་ནས་གླེང་ཡོད་པ་མ་རེད། སྤྱིར་བཏང་རང་རེའི་མཛད་གཙོ་རྣམ་པ་འདིར་ཕེབས་སྐབས་ཀྱི་མཛད་རིམ་ཁག་སྐུ་ཚབ་དོན་གཅོད་ནས་གྲ་སྒྲིག་གནང་གི་ཡོད་ལ། གསུང་མོལ་ག་རེ་གནང་བ་དོན་གཅོད་ནས་ཉར་བསྡད་ཡོད་པ་རེད། ཅེས་བརྗོད་འདུག

དོན་གཅོད་མཆོག་གིས་སྤེལ་ལྗམ་གཞུང་གིས་སྐྱབས་བཅོལ་བའི་ཐོག་སྲིད་ཇུས་དམ་དུ་ཕྱིན་པའི་རྒྱུ་རྐྱེན་སྐོར་གསུངས་དོན། སྤེལ་ལྗམ་གཞུང་གིས་སྐྱབས་བཅོལ་ལ་འཛིན་པའི་སྲིད་ཇུས་ནི་ཁ་སང་བྱ་ཉལ་བསྡད་ཡོད་སར་དེ་རིང་བྱ་ཉལ་བསྡད་མེད་པར་འགྱུར་བ་ཕྱིན་ཡོད་ལ། ད་ལྟའི་སྐྱབས་བཅོལ་འགན་འཛིན་ལྕམ་ (Maggie De Block) ཚོགས་པ་ཡིས་སྐྱབས་བཅོལ་ཐད་དམ་དྲག་སྲིད་ཇུས་བཟུང་སྟེ་སྤེལ་ལྗམ་གཞུང་ལ་ཁེ་ཕན་བསྐྲུན་ཡོད་སྟབས། སྤེལ་ལྗམ་མི་མང་ཁྲོད་ཁོ་མོ་ལ་རྒྱབ་སྐྱོར་གྱི་ཚད་མཐོ་རུ་འགྲོ་བཞིན་ཡོད་པ་མ་ཟད། ཁོ་མོ་མ་འོངས་བར་སྲིད་འཛིན་ཆགས་སྲིད་པའང་རྗོད་ཀྱི་ཡོད་ལ། ཕྱི་ཟླ་ ༣ པའི་ནང་སྤེལ་ལྗམ་གྱི་འོས་བསྡུའི་སྐབས་ཁོ་མོའི་ཚོགས་པ་ལ་རྒྱབ་སྐྱོར་འཐོབ་ཆེད་སྐྱབས་བཅོལ་ཐད་དམ་དྲག་གི་སྲིད་ཇུས་བཟུང་པ་ཡིན་སྲིད་ལ། འོས་ཤོག་རྗེས་སྲིད་ཇུས་ལ་འགྱུར་བ་འགྲོ་མི་སྲིད་པ་མ་རེད་བསམ་གྱི་འདུག ཅེས་བརྗོད་འདུག

དོན་གཅོད་མཆོག་གིས་མུ་མཐུད་དུ། ཡིག་ཆ་ནག་པོ་ཆགས་ཡོད་པའི་དཀའ་ངལ་སེལ་ཆེད་སྤེལ་ལྗལ་གཞུང་གི་མི་སྣ་ཁག་ལ་ཐུག་འཕྲད་གནང་སྟེ་ (RC) སྐོར་འགྲེལ་བཤད་བྱ་རྒྱུ་ཡིན་ལ། ལག་འཁྱེར་( RC )དེ་ལས་བོད་མི་ཚོ་ཕྱི་རྒྱལ་མིའི་ཐོབ་ཐང་ཙམ་ལས་སྐྱབས་བཅོལ་པ་ཡིན་པ་གསལ་མི་འདུག ལོ་རེ་དུས་ཡུན་རྫོགས་ཚེ་ཕར་འགྱངས་ཞུ་དགོས་བ་དང་ས་གནས་གཞན་ལ་འགྲོ་སྐབས་( departure )ཞུ་དགོས་བ། ས་ཆ་ཉོ་ཚོང་གི་ཐོབ་ཐང་མེད་པ་དང་། སློབ་སྦྱོང་དང་ལས་ཀའི་མཐུན་རྐྱེན་མེད་པ་བཅས་ཀྱི་སྐོར་གསལ་བཤད་གནང་སྟེ་སྤེལ་ལྗམ་གཞུང་གིས་བོད་མི་སྐྱབས་བཅོལ་བའི་ཐད་ཀྱི་ཐག་གཅོད་འགྲིག་མེད་པ་གླེང་རྒྱུ་ཡིན། ཅེས་དང་། བོད་མི་ཚོའི་སྐད་འཕྲིན་སྟེང་དཀྲོགས་གཏམ་འདྲ་མིན་བཤད་དེ་གཞུང་དང་མི་མང་བར་འགལ་ཟླ་བཟོ་བཞིན་པ་དེ་ཡག་པོ་མ་རེད། སྐད་འཕྲིན་སུའི་བཟོས་བ་ངོ་ཤེས་དགོས་བ་དང་དཀྲོགས་གཏམ་དེ་དག་དགྲ་བོ་ལ་དགོས་བའི་ལག་ཆ་རུ་གྱུར་སྲིད་སྟབས། བེད་སྤྱོད་སྐབས་བསམ་བློ་གཏོང་དགོས་བ་དང་གཟབ་ནན་བྱ་དགོས་བའི་འབོད་སྐུལ་གནང་སོང་།

ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ཐེངས་འདིའི་ཚོགས་འདུའི་སྟེང་གནས་ཚུལ་ཇི་བྱུང་སྤྱི་འཐུས་གྲོས་ཚོགས་ལ་སྙན་གསེང་ཞུ་རྒྱུ་ཡིན་པ་དང་། བོད་མི་ཚོའི་ས་གནས་བོད་རིགས་ཚོགས་པ་དང་དོན་གཅོད་ལ་ཡིད་ཆེས་གནང་ཚེ་དཀའ་ངལ་སེལ་ཐུབ་ངེས་ཡིན་སྐོར་བརྗོད་ཡོད་འདུག མཐར་སྤེལ་ལྗམ་བོད་རིགས་ཚོགས་པའི་ཚོགས་གཞོན་སྨན་པ་ཆོས་རིགས་ལགས་ནས་ཐུགས་རྗེ་ཆེ་གཏམ་བཤད་དང་སྦྲགས་ཁོང་སྒེར་ངོས་ནས་ཡིག་ཆ་ནག་པོ་ཆགས་མཁན་ཚོའི་ཁྲོད་ནད་མནར་གྱིས་བོད་སྨན་བསྟེན་དགོས་བྱུང་ཚེ་བོད་སྨན་རིན་མེད་ཐོག་སྤྲོད་རྒྱུ་ཡིན་ཚུལ་ཁས་ལེན་གནང་ཡོད་འདུག གཞན། ཉིན་དེའི་ཚོགས་ཐོག་ཏུ། ཡིག་ཆ་ནག་པོ་ཆགས་མཁན་ཚོའི་ངོས་ནས་བཀའ་སྤྱི་གཉིས་ལ་མཚན་འཁོད་སྙན་ཞུ་ཞིག་འབུལ་རྒྱུ་ཡིན་སྐོར་བསྒྲགས་ཡོད་པ་དང་། ཚོགས་འདུའི་རྗེས་ཡིག་ཆ་ནག་པོ་ཆགས་མཁན་ ༡༠༣ ཙམ་གྱིས་བོད་རིགས་ཚོགས་པ་ལ་མིང་ཐོ་སྤྲད་ཡོད་འདུག ཅེས་སྤེལ་ལྗམ་བོད་ཚོགས་དྲུང་གཞོན་ས་དཀར་བཀྲ་ཤིས་ལགས་ཀྱིས་གནས་ཚུལ་བཏང་འབྱོར་བྱུང་སོང་།