གཟའ་ཟླ་བའི་ཉིན་༧གོང་ས་མཆོག་གིས་བར་ལམ་བོད་ནང་གི་ལི་ཐང་དགོན་ཆེན་དང་གསེར་རྟ་བླ་རུང་ཆོས་སྒར། རྒྱལ་ཐང་བཅས་སུ་མེ་སྐྱོན་བྱུང་བའི་ཐད་ཐུཊ་གསོའི་གསུང་འཕྲིན་ཞིག་བསྩལ་ཡོད་འདུག
༧གོང་ས་མཆོག་གི་ཐུགས་གསོའི་གསུང་འཕྲིན་ནང་། བར་ལམ་ལི་ཐང་དགོན་ཆེན་དང་། གསེར་རྟ་བླ་རུང་ཆོས་སྒར། རྒྱལ་ཐང་བཅས་པར་སྔ་རྗེས་སུ་མེ་སྐྱོན་ཚབས་ཆེ་བྱུང་སྟེ་རྩ་ཆེའི་རིག་དངོས་ཀྱིས་མཚོན་མི་རྒྱུ་ཟོག་གསུམ་ལ་གོད་ཆགས་ཆེན་པོ་བྱུང་བར་བློ་ཕམ་ཅི་ཆེ་བྱུང་ཡང་། མཆོག་གསུམ་༧རྒྱལ་བ་རྒྱ་མཚོར་གསོལ་འདེབས་ཞུ་རྒྱུ་ལས་གཞན་བྱ་ཐབས་དབེན།ད་དུང་ཡང་ས་ཁུལ་གཞན་ལ་དེ་ལྟའི་གནས་ཚུལ་མི་ཡོང་བའི་ངེས་པ་མེད་པས་གཙོ་ཆེར་སེར་སྐྱ་མང་ཚོགས་ཚང་མ་འཆམ་མཐུན་ཕུ་ནུའི་འདུ་ཤེས་ཀྱིས་ནང་རྩོད་དམེ་འཁྲུག་རིགས་ནམ་ཡང་མི་བྱེད་ངོས། ཕྱིའི་ཞབས་རིམ་ཡུལ་ཁག་སོ་སོའི་ཡུལ་དགོན་སྤྱི་ནས་ཐུབ་པའི་མཚན་སྔགས་དང་། ཡིག་དྲུག སྒྲོལ་མའི་གཟུངས་སྔགས། སྒྲོལ་བསྟོད། རྗེ་དགེ་འདུན་གྲུབ་ཀྱིས་མཛད་པའི་འཇིགས་པ་བརྒྱད་སྐྱོབ་ཀྱི་གསོལ་འདེབས་འབད་སྒྲུབ་ཐོག རྣམ་ཀུན་གློག་དང་། མཆོད་མེ། མེ་ཐབ་སོགས་མེ་སྟག་རིགས་ལ་གཟབ་ནན་གང་ཆེས་སྔོན་འགོག་དང་འབྲེལ་དེང་རབས་ཀྱི་མེ་གསོད་འཕྲུལ་ཆས་གྲ་སྒྲིག་ཚད་ལྡན་ཡོང་ཐབས་འབྲེལ་ཡོད་ལ་ཞུ་བསྐུལ་བྱེད་གལ། འདི་ནས་སེམས་གསོའི་འཚམས་འདྲི་དང་། རྗེས་འཛིན་སྐྱབས་སྨོན་བཅས། རྒྱ་གར་འཕགས་པའི་ཡུལ་ནས་ཤྰཀྱའི་དགེ་སྦྱོང་ཆོས་སྨྲ་བ་ཏྰ་ལའི་བླ་མས། རབ་བྱུང་བཅུ་བདུན་པའི་ཆུ་སྦྲུལ་ཟླ་ ༡༡ ཚེས་ ༢༦ ཕྱི་ལོ་ ༢༠༡༤ ཟླ་ ༡ ཚེས་ ༢༧ ལ།། ཞེས་འཁོད་འདུག
གསར་འགོད་པ། དོན་གོ
