མི་རིཊ་དབྱེ་འབྱེད་རེད།

རྒྱ་གར་ཨ་རུ་ན་ཅལ་མངའ་ཁུལ་གྱི་སློབ་ཕྲུག་ཅིག་ལ་ལྡི་ལིའི་ཚོང་ཁང་གི་བདག་པོ་ཞིག་གིས་ཉེས་བརྡུང་བཏང་སྟེ་རྐྱེན་ལམ་དུ་བཏང་ཡོད་སྟབས་མི་མང་གིས་ངོ་རྒོལ་ཤུགས་ཆེན་བྱེད་བཞིན་ཡོད་འདུག  

ཉིན་ཤས་སྔོན་ཨ་རུ་ན་ཅལ་མངའ་སྡེའི་གྲོས་ཚོགས་ཀྱི་འཐུས་མི་ཎི་དྷུ་པཱ་ཝུ་ཌེ་ར་ལགས་ཀྱི་བུ་དང་། ད་ལྟ་པཎ་ཇེབ་ཇ་ལན་ཏར་གཙུག་ལག་སློབ་གྲྭ་ཞིག་དུ་ཚོང་ལས་དོ་དམ་སྡེ་ཚན་ཁོངས་ཆེད་ལས་སློབ་སྦྱོང་བྱེད་བཞིན་པའི་རང་ལོ་ ༡༨ ཅན་གྱི་སློབ་མ་ཎི་དྷུ་ ( Nido Taniam)ཟེར་བ་ཞིག་ལ་ལྡི་ལིའི་ཚོང་ཁང་ཞིག་གི་བདག་པོས་གཅར་རྡུང་བཏང་སྟེ་རྐྱེན་ལམ་དུ་བཏང་ཡོད་སྟབས། ཉེན་རྟོག་པས་དོགས་ཡོད་ཉེས་ཅན་གསུམ་འཇུ་བཟུང་གིས་ད་ལྟ་དྲི་ཞིབ་བྱེད་བཞིན་ཡོད་ཀྱང་། སྨན་པའི་བརྟག་དཔྱད་སྙན་ཞུ་མ་ཐོན་སྔོན་ལ་ཁྲིམས་གཅོད་གང་ཡང་བྱ་རྒྱུ་མིན་སྐོར་བསྒྲགས་འདུག  

གནས་ཚུལ་དེའི་འབྱུང་རྐྱེན་ནི། སློབ་མ་ཎི་དྷུ་ལགས་ལྡི་ལི་ལཱ་ཇེ་པཱ་ཎ་གྷར་དུ་ཡོད་པའི་གྲོགས་པོ་ཞིག་གི་ཁྱིམ་དུ་གུང་གསེང་དུ་སྐྱོད་པར་ལམ་ཁ་མ་ཤེས་སྟབས། ཟུར་གྱི་ཚོང་ཁང་བདག་པོ་ཞིག་ལ་སྐད་ཆ་དྲིས་སྐབས་ཚོང་ཁང་བདག་པོས་ཁོ་རང་གི་ངོ་གདོང་དང་སྐྲ་མདོག ཆ་ལུགས་སོགས་ལ་བལྟས་ཏེ་རྒྱ་རིགས་ཤིག་ཅེས་མི་རིགས་དབྱེ་འབྱེད་ཀྱི་ཟུར་ཟ་བྱས་སྟབས། ཚོང་ཁང་བདག་པོ་དང་ཁ་འཛིང་ཤོར་ཏེ་ཅ་དངོས་སྒྲིག་སའི་ཤེལ་སྒྲོམ་བཅག་ཡོད་པ་དང་། དེ་ནས་ཚོང་བདག་དང་ལས་རོགས་གཉིས་ཀྱིས་ཁོ་ལ་ཉེས་རྡུང་དང་ཧིན་སྒོར་ ༡༠༠༠༠ ཙམ་གྱི་གུན་གསབ་བླངས་ཏེ་གནས་ཚུལ་ཐག་གཅོད་བྱས་ཡོད་ཀྱང་། ཎི་དྷུ་ལགས་ལ་བསྐྱར་དུ་ཉེན་རྟོག་པས་དྲི་གཅོད་དང་ཚོང་ཁང་བདག་པོར་གནས་ཚུལ་དེ་ཐག་གཅོད་ཅི་འདྲ་བྱས་ཡོད་མེད་སྐད་ཆ་དྲིས་པ་བཅས་ལ་བརྟེན་ཏེ། རྗེས་སུ་ཚོང་ཁང་བདག་པོས་མི་ ༧ ཙམ་སྐད་བཏང་སྟེ་ཉེས་རྡུང་ཤུགས་ཆེན་པོ་བཏང་ཡོད་སྟབས་ཁ་ཉིན་དགུང་དྲོའི་ཆུ་ཚོད་ ༡ ཙམ་ལ་ལཱ་ཇེ་པཱ་ཎ་གྷར་གྲོངས་ཡོད་འདུག

ལྡི་ལི་ས་གནས་གཞུང་གིས་གནས་ཚུལ་དེ་གལ་ཆེར་བརྩིས་ཏེ་ཤེས་རིག་བློན་ཆེན་མཱ་ཎི་ཤི་ (Manish Sisodia) ལགས་ཆེད་གཏོང་གིས་ཐག་གཅོད་མཐིལ་ཕྱིན་པ་ཞིག་བྱ་དགོས་སྐོར་བརྗོད་ཡོད་པ་དང་། འདས་པོའི་ཕ་དང་ཨ་རུ་ན་ཅལ་མངའ་སྡེའི་གྲོས་ཚོགས་ཀྱི་འཐུས་མི་ཎི་དྷུ་པཱ་ཝུ་ཌེ་ར་ (Nido Pavitra) ལགས་ཀྱིས་ད་རེབ་གནས་ཚུལ་དེ་བཟོ་མཁན་ལ་ཁྲིམས་ཐོག་ཁྲིམས་གཅོད་ཡག་པོ་མ་བྱས་ཚེ་ཁྲིམས་གཏུག་ག་རེ་བྱ་དགོས་བྱུང་ཡང་བྱ་རྒྱུ་ཡིན་སྐོར་བརྗོད་འདུག

གནས་ཚུལ་འདིའི་ཐད་རྒྱ་གར་སྤྱི་ཚོགས་ནང་རྒྱ་གར་བྱང་ཤར་ཁུལ་གྱི་སློབ་ཕྲུག་དང་ལས་ཀ་བ་ཚོར་འཕྱ་སྨོད་དང་མཐོང་ཆུང་། མི་རིགས་དབྱེ་འབྱེད་སོགས་ཀྱི་དཀའ་ངལ་མང་པོ་འཕྲད་ཀྱི་ཡོད་སྟབས། དབུས་དང་ས་གནས་སྲིད་གཞུང་གིས་ད་རེབ་གནས་ཚུལ་འདིར་ཁྲིམས་ཐོག་ནས་ཐག་གཅོད་ཡག་པོ་མ་བྱས་ཚེ་རྒྱལ་ཁབ་ནང་ཁུལ་གྱི་མཐུན་སྒྲིལ་ལ་གནོད་རྒྱུ་ཙམ་མ་ཟད། རྒྱལ་སྤྱིའི་སྤྱི་ཚོགས་ནས་ཀྱང་མི་རིགས་འདྲ་མཉམ་དང་ཆོས་ལུགས་དབྱེར་མེད་ཡིན་བརྗོད་མཁན་གྱི་རྒྱལ་ཁབ་འདི་ནི་རྩ་ཁྲིམས་རྫིག་པོ་དང་ལག་ལེན་སྟོང་པ་ཞིག་ཡིན་པར་ངོས་ལེན་བྱ་ངེས་ཡིན་སྐོར་སྐྱོན་བརྗོད་བྱས་འདུག