དེང་སྐབས་རྒྱ་ནག་གི་གྲོང་གསེབ་པ་ཧ་ཅང་མང་པོ་གྲོང་ཁྱེར་ཁག་ནང་ཞོར་ལས་འཚོལ་དུ་ཕྱིན་པའི་དབང་གིས་བྱིས་པ་ས་ཡ་ ༦༡ ལྷག་ཕ་མའི་བདག་སྐྱོང་མ་ཐོབ་པའི་དམུ་རྒོད་ཆགས་ཡོད་འདུག
རྒྱ་ནག་རྒྱལ་ཡོངས་བུད་མེད་མཉམ་འབྲེལ་མཐུན་ཚོགས་ཀྱིས་བསྒྲགས་པ་ལྟར་ན། དེང་སང་རྒྱ་ནག་ནང་གྲོང་རྡལ་ནས་གྲོང་ཁྱེར་ལ་ཞོར་ལས་གཉེར་དུ་འགྲོ་མཁན་མི་གྲངས་དུང་ཕྱུར་ ༢ ལྷག་ཡོད་པ་དང་། གྲོང་ཁྱེར་གྱི་ཁྱིམ་ཐོའི་ནང་གྲོང་ཁྱེར་ཕྱི་ནས་ཡོང་མཁན་ཚོར་སློབ་གསོ་དང་སྨན་བཅོས་ལྟ་སྐྱོང་སོགས་ཚད་བཀག་ངེས་ཅན་ཡོད་པའི་ཁར། ཞོར་ལས་བ་ཚོའི་ཡོང་སྒོ་དང་འཚོ་བའི་ཆ་རྐྱེན་ཞན་པོ་ཡིན་སྟབས། ཁོ་ཚོ་མང་ཆེ་བས་རང་གི་བྱིས་པ་གྲོང་རྡལ་དུ་བསྐྱལ་ནས་རྒན་འཁོགས་ཚོར་གཉོར་དུ་འཇུག་གིན་ཡོད་པ་དང་། ད་ལྟའི་ཆར་རྒྱ་ནག་རྒྱལ་ཡོངས་སུ་ཕ་མའི་བདག་སྐྱོང་མ་ཐོབ་པའི་བྱིས་པ་ས་ཡ་ ༦༡ ལྷག་ཡོད་འདུག
གནད་དོན་དབྱེ་ཞིབ་པ་ཚོས། རྒྱ་ནག་ནང་གནད་དོན་དེ་ཉིན་རེ་བཞིན་ཚབས་ཆེན་ཆགས་བཞིན་ཡོད་པ་དང་། གྲོང་རྡལ་ག་གེ་མོའི་ཕ་མ་རེ་གཉིས་ཀྱི་གདམ་ག་ཙམ་མ་ཡིན་པར་རྒྱལ་ཡོངས་འཕེལ་རྒྱས་གཏོང་བའི་སྲིད་བྱུས་ཀྱི་གནད་དོན་ཞིག་ཡིན་པ་དང་། དེང་སྐབས་རྒྱ་ནག་སྤྱི་ཡོངས་སུ་མ་འོངས་བློས་གཏོང་གི་རྨང་གཞིའི་ཐོག་འཕེལ་རྒྱས་འཛུགས་སྐྲུན་བྱེད་བཞིན་ཡོད་སྟབས། བྱིས་པར་ཕ་མའི་བདག་སྐྱོང་མ་ཐོབ་པ་དང་འཆར་ལྡན་བུ་སྐྱེས། གྲོང་རྡལ་བཅད་བགོས། གྲོང་ཁྱེར་ཁྱིམ་ཐོ་སོགས་གནད་དོན་ཚང་མ་གཅིག་ལ་གཅིག་འབྲེལ་དུ་ཡོད་པ་མ་ཟད། གཞིར་རྩའི་རྒྱ་ནག་གི་གྲོང་རྡལ་སློབ་གསོའི་ཆ་རྐྱེན་ཞན་པའི་ཐོག ཞོར་ལས་གཉེར་བཞིན་པའི་ཕ་མ་དག་སོ་སོའི་བྱིས་པ་དང་མཉམ་དུ་འགྲོག་ཡུན་ཐུང་བ་བཅས་ལ་བརྟེན་ཏེ། བྱིས་པ་མང་པོ་ཞིག་གིས་སློབ་སྦྱོང་མཐའ་འཁྱོལ་གྱི་མེད་པ་མ་ཟད། གྲོང་རྡལ་གྱི་བྱིས་པའི་བརྒྱ་ཆ་ ༧༠ ལྷག་སེམས་པ་སྐྱོ་སྣང་གིས་ཁེངས་པ་སོགས་སེམས་ཁམས་ལ་དཀའ་ངལ་ཡོད་པ། བྱིས་པ་མང་པོ་གནས་ངེས་མེད་དུ་འཁྱམ་ཏེ་རྐྱེན་ལམ་དུ་ཤོར་བ། རྐུ་འཕྲོག་སོགས་ཁྲིམས་འགལ་གྱི་བྱ་བར་ཞུགས་ཀྱི་ཡོད་སྐོར་སོགས་བརྗོད་འདུག
གྲོང་ཁྱེར་དུ་ཞོར་ལས་བྱེད་མཁན་གྱི་གྲོང་གསེབ་པ་ཚོས་ལོ་ངོ་མང་པོར་དཀའ་ལས་བརྒྱབ་ཀྱང་སོ་སོའི་ཁང་རིན་དང་བུ་ཕྲུག་ཚོའི་སློབ་ཡོན་འདང་ངེས་ཤིག་མ་རག་པར་ཕྱིར་གྲོང་རྡལ་དུ་ལོག་དགོས་ཐུག་གི་ཡོད་སྐོར་ལ་ཁ་སང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། རྒྱ་ནག་ཨན་ཝེ་ཞིང་ཆེན་ཅེ་ཧྲོ་གྲོང་ཁྱེར་ཐེན་ཡཱེན་གྲོང་རྡལ་ནས་ཡིན་པའི་ཞིང་པ་ལིས་ཀྲུང་ལགས་ ༡༩༩༩ ལོར་མཐོ་འབྲིང་མཐར་ཕྱིན་རྗེས། རྒྱ་ནག་ཧྲང་ཧེ་གྲོང་ཁྱེར་གྱི་ཁེ་ལས་ཤིག་ཏུ་ཟླ་རེར་རྒྱ་སྒོར་ ༣༠༠ བླངས་ཏེ་དཀའ་ལས་གང་མང་བརྒྱབ་ཡོད་པ་དང་། རིམ་གྱིས་ཁོ་ཁེ་ལས་ཤིག་གི་གཉེར་བར་གྱུར་ཡོད་ཀྱང་། ཁང་རིན་དང་བྱིས་པའི་མཐོ་སློབ་ཀྱི་སློབ་རིན་སོགས་སྤྲོད་མ་ཐུབ་པར་བཟའ་ཟླ་དང་བྱིས་པ་ཁྲིད་དེ་ཕྱིར་གྲོང་རྡལ་དུ་མི་ལོག་ཐབས་མེད་བྱུང་ཡོད་འདུག ཕ་ཡུལ་ཨན་ཝེ་རུ་བསླེབས་རྗེས་ལིས་ཡིས་ལོ་ངོ་བཅུ་གྲངས་རིང་འབད་བརྩོན་བྱས་པའི་ལག་རྩལ་དེ་དག་བེད་སྤྱོད་མེད་པ་དང་། ཞིང་གྲོང་གི་ཁེ་ལས་ཕལ་ཆེ་བ་གཉེན་ཚན་སོགས་ཀྱི་འབྲེལ་བ་བརྒྱུད་དེ་བདག་བཟུང་བྱས་ཡོད་པའི་ཁྱིམ་བརྒྱུད་ཁེ་ལས་སུ་གྱུར་ཡོད་སྟབས། སྐུ་ཞབས་ལིས་ལ་གདམ་ཀ་གང་ཡང་མེད་པ་ཆགས་ཡོད་འདུག
རྗེས་སུ་ལིས་ཡིས་གྲོང་རྡལ་དེར་བྱུག་རྫས་ཆེད་ཚོང་ཁང་ཞིག་ཕྱེས་ཏེ་ཚོང་ལས་གཉེར་མགོ་བརྩམས་ཡོད་ཀྱང་། ས་གནས་སྲིད་གཞུང་གི་ལེགས་སྒྲིག་བྱུག་རྫས་ཚོང་རའི་བྱུག་རྫས་དང་ལིས་ཡི་བྱུག་རྫས་གཉིས་ཀྱི་ཚོང་རྟགས་མཐོ་དམན་ཐོག་རྩོད་རྙོག་བྱུང་སྟེ་ལིས་ཡི་བྱུག་རྫས་ཚོང་ཁང་སྒོ་རྒྱག་དགོས་བྱུང་ཡོད་པ་དང་། ད་ལྟ་ཁོང་གིས་གྲོགས་པོ་ཞིག་དང་མཉམ་འབྲེལ་གྱིས་ར་མ་གསོ་ཚོང་གི་ལས་ཀ་ཐབ་ཆགས་ཤིག་གཉེར་ཏེ་བཟའ་མི་ཚོའི་ཁ་གསོ་ཐབས་བྱེད་བཞིན་ཡོད་ལུགས་བཀོད་འདུག
རྒྱ་ནག་ཧྲིན་ཀྲིན་དུ་སློབ་གསོ་སྦྱོང་བརྡར་གྱི་ལས་རིགས་གཉེར་བཞིན་པའི་མཱོན་ཞིན་ཟེར་བ་ཞིག་གིས། གྲོང་ཁྱེར་ནང་ཞོར་ལས་གཉེར་དུ་ཡོང་བའི་ཞིང་པ་གཅིག་པུ་མ་ཡིན་པར་ལས་རིགས་གཞན་གཉེར་མཁན་མང་པོ་ལའང་དཀའ་ངལ་དེ་འཕྲད་བཞིན་ཡོད་ཅིང་། ཞོར་ལས་གཉེར་ཏེ་ཧ་ཅང་ལེགས་འགྲུབ་བྱུང་བ་ཁེ་ལས་ཀྱི་མཐོ་རིམ་དོ་དམ་པ་དང་ཚོང་བརྒྱབ་ནས་ཕྱུག་པོ་ཆགས་པའི་ཚོང་པ་ཚོ་ཡིན་ལ། ཁོ་ཚོས་ཁང་པ་ཉོ་ཐུབ་ཀྱི་ཡོད་པ་ལས། ཞོར་ལས་བ་བརྒྱ་ཆ་ ༩༠ ཡིས་ཁང་པ་ཉོ་མི་ཐུབ་པ་དང་། བུ་ཕྲུག་སློབ་ཆེན་ལ་འགྲོ་བའི་སློབ་རིན་སྤྲོད་རྒྱུ་མེད་པར་བྱིས་པ་སྒེར་བཙུགས་སློབ་གྲྭར་གཏོང་གི་ཡོད་ལ། སྒེར་བཙུགས་སློབ་གྲྭར་བཏང་ན་སློབ་ཆེན་ལ་རྒྱུགས་འཕྲོད་རྒྱུ་ཧ་ཅང་ཁག་པོ་ཡོད་སྐོར་དང་། གྲོང་ཁྱེར་དུ་འཚོ་བ་མ་འཁྱོལ་ཞིང་གྲོང་རྡལ་དུ་འཚོ་རྟེན་མེད་པ་ཚོས་སེམས་བདེ་ལྷོད་ཀྱིས་སྤྱི་ཚོགས་ལ་བྱས་རྗེས་འཇོག་ཐབས་མེད་པ་མ་ཟད། རྒྱ་གཞུང་གིས་གང་མགྱོགས་ཀྱིས་གནད་དོན་དེ་ཐག་གཅོད་མ་བྱས་ན། འཚོ་བར་ངེས་གཏན་མེད་པའི་ཞོར་ལས་བ་དེ་ཚོ་སྤྱི་ཚོགས་ཟང་ཟིང་སློང་བའི་སྟོབས་ཤུགས་ཤིག་ཏུ་འགྱུར་སྲིད་སྐོར་སོགས་བརྗོད་འདུག
