ཁ་སང་བོད་རང་བཙན་སློབ་ཕྲུག་ཚོགས་པས་༧ གོང་ས་བཅུ་གསུམ་པ་མཆོག་གིས་བོད་རང་བཙན་གསལ་བསྒྲགས་བསྐྱངས་ཏེ་ལོ་ངོ་ ༡༠༡ འཁོར་བའི་དུས་དྲན་སྲུང་གཙི་དང་འབྲེལ། རྒྱ་ནག་གིས་འདས་པའི་ལོ་ངོ་ ༦༠ རིང་བོད་པའི་ལོ་རྒྱུས་ལ་འཁྱོག་བཤད་བྱེད་བཞིན་པ་དེར་བདེན་པ་ར་སྤྲོད་བྱེད་ཀྱི་ཡོད་ཟེར།
དུས་དྲན་མཛད་སྒོའི་ཐོག་མར་དབྱིན་བོད་གཉིས་ཐོག་ནས་ཐང་བོད་བར་བཞག་པའི་རྡོ་རིང་ཡི་གེ་སྒྲོགས་སྦྱང་གནང་རྗེས་གོ་སྒྲིག་པས་དུས་དྲན་ངོ་སྤྲོད་གནང་བར། ཟླ་ ༢ ཚེས་ ༡༣ ནི་བོད་རང་བཙན་གྱི་ཉིན་མོ་ཞིག་ཡིན་སྟབས། ལོ་སྔོན་མ་ནས་བཟུང་བོད་རང་བཙན་སློབ་ཕྲུག་ཚོགས་པས་རྒྱལ་མཆོག་སྐུ་ཕྲེང་ ༡༣ པ་ཆེན་པོ་མཆོག་གིས་བོད་རང་བཙན་གསལ་བསྒྲགས་བསྐྱངས་ཏེ་ལོ་ངོ་ ༡༠༠ འཁོར་བའི་དུས་དྲན་སྲུང་གཙི་ཞུས་པ་ལྟར། ད་ལོ་རྒྱ་གར་གྱི་གྲོང་ཁྱེར་ ༧ དང་འཛམ་གླིང་གི་གྲོང་ཁྱེར་ཆེ་ཁག་ ༢༠ ཙམ་ཞིག་ནང་དུས་དྲན་སྲུང་བརྩི་ཞུས་ཏེ། འདས་པའི་ལོ་ ༦༠ རིང་རྒྱ་གཞུང་གིས་རྫུན་བཟོ་འཁྱོག་བཤད་བྱེད་བཞིན་པའི་བོད་ཀྱི་ལོ་རྒྱུས་ལོག་འགྲེལ་བྱེད་ཀྱིན་ཡོད་པ་གསལ་སྟོན་གྱིས་རྒྱ་ནག་གཞུང་ཚབ་ཁག་དང་འཛམ་གླིང་མི་མང་ལ་ཕྱི་ལོ་ ༨༢༡ ནས་༨༢༢ བར་བཞག་པའི་བོད་རྒྱའི་བར་གྱི་ཆིངས་ཡིག་གཙོས་བོད་བཙན་པོའི་ལོ་རྒྱུས་དང་། ༧གོང་ས་སྐུ་ཕྲེང་ ༡༣ པ་ཆེན་པོ་མཆོག་གི་ཆུ་གླང་རྩ་ཚིག་བཅས་བོད་ཀྱི་དོན་དངོས་ལོ་རྒྱུས་སོགས་གོ་རྟོགས་སྤེལ་བཞིན་ཡོད་སྐོར་བརྗོད་སོང་།
སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་བོད་པའི་སྤྱི་ཚོགས་ནང་བོད་རང་བཙན་སྐོར་བཤད་དགོས་ན་དང་པོ་ལོ་རྒྱུས་ལས་འཕྲོས་པའི་གནས་སྟངས་ཤེས་དགོས་སྟབས། བོད་བཙན་པོའི་ལོ་རྒྱུས་ལ་ཕྱིར་བལྟས་བྱས་ཏེ་ཞུ་དགོས་པ་ཆགས་ཀྱི་ཡོད་པ་དང་། བོད་ཀྱི་རྒྱལ་རབས་ཐོག་འབུམ་རམས་པའི་ཡོན་ཚད་བཞེས་མཁན་ལོ་རྒྱུས་སྨྲ་བ་སྨན་རིའི་ཡུལ་ལྷ་ཐར་ལགས་ཀྱིས་བརྩམས་པའི་བོད་བཙན་པོའི་ཆབ་སྲིད་ལམ་ལུགས་སྐོར་ཀྱི་ཞིབ་འཇུག་ཅེས་པ་ལས་བོད་ཀྱི་བདག་དབང་གནད་དོན་ཐད་ཀྱི་དོན་ཚན་དྲུག་རེ་རེ་བཞིན་བགྲང་བ་དང་འབྲེལ་བརྗོད་དོན། “ང་ཚོས་བོད་རང་བཙན་སྐོར་ལ་རྒྱུ་མཚན་མང་པོ་ཞིག་འཛམ་གླིང་ཐོག་བགྲང་གི་ཡོད་པ་རེད། དེ་ཚོའི་ནང་ནས་འཇམ་དབྱངས་ནོར་བུ་ལགས་ཀྱི་རྩོམ་ཡིག་ཁག་དང་ང་ཚོས་ནམ་རྒྱུན་ཤོད་བཞིན་པ་དེ་ཚོ་གནས་སྟངས་གཞན་ཞིག་རེད། དེ་བཞིན་སྐད་དང་ཡི་གེ རྒྱལ་རབས་དང་ལོ་རྒྱུས། ཆོས་དང་རིག་གཞུང་ཐད་ཀྱི་ཤོད་སྟངས་དེ་དག་ཡང་ཁ་ཁ་རེད། ངས་ཡུལ་ལྷ་ཐར་ལགས་ཀྱིས་བརྩམས་པའི་བོད་བཙན་པོའི་ཆབ་སྲིད་ལམ་ལུགས་སྐོར་ནི་ཆབ་སྲིད་གཅིག་པུར་ལྟོས་པའི་དེང་དུས་སྤྱི་ཚོགས་དང་མཐུན་པར་གནད་འགག་ཅིག་ཏུ་མཐོང་གི་ཡོད། ང་ཚོས་བོད་རང་བཙན་རྩོད་ཀྱི་ཡོད་ཀྱང་རུང་མེད་ཀྱང་རུང་། དོན་དག་ད་ལྟ་ང་ཚོས་རྒྱ་ནག་དང་མཉམ་དུ་སྐད་ཆ་བཤད་དེ་གོ་བསྡུར་བྱེད་ཀྱི་ཡོད་པ་རེད། ཡིན་ནའང་། རྒྱ་ནག་གིས་ཆ་རྐྱེན་བཏོན་ཡོད་པའི་བོད་རྒྱ་ནག་གི་ཆ་ཤས་སུ་ཁས་ལེན་དགོས་ཟེར་བ་དེ་ད་ལྟ་དབུ་མའི་ལམ་གྱི་སྣེ་འཁྲིད་དང་ཐབས་ལམ་གསར་གཏོད་གནང་མཁན་༧གོང་ས་མཆོག་གིས་ཀྱང་ཞལ་བཞེས་གནང་གི་ཡོད་མ་རེད། ཞལ་བཞེས་མ་གནང་བའི་རྐྱེན་རྩ་ཡང་བོད་ཀྱི་རྒྱལ་རབས་ལོ་རྒྱུས་ཁྲོད་ནས་འགག་རྩ་དང་རྒྱུ་ཆ་འདི་འདྲ་ཞིག་ཡོད་སྟབས། ལོ་རྒྱུས་འདི་སུ་གང་གིས་མེད་པར་བཟོ་ཐུབ་ཐབས་མེད་པ་དང་། ལོ་རྒྱུས་ནི་ལོ་རྒྱུས་རང་ལ་གནས་དགོས་པར་གཟིགས་ཏེ་ཞལ་བཞེས་མ་གནང་བ་རེད།’’ ཅེས་བརྗོད་སོང་།
སྤྱི་འཐུས་བསོད་ནམས་རྒྱལ་མཚན་ལགས་ནས་ཕྱི་ལོ་ ༨༢༡ ནས་ ༨༢༢ ལོར་བཞག་པའི་ཐང་བོད་བར་གྱི་ཆིངས་ཡིག་དང་རྡོ་རིང་སྐོར་གྱི་རྒྱབ་ལྗོངས་གནས་ཚུལ་དང་ནང་དོན་སྐོར་ལ། སད་ན་ལེགས་འཇིང་ཡོན་སྐབས་ནས་རྒྱ་ནག་ཐང་རྒྱལ་རབས་ཀྱིས་བོད་དང་ཆིངས་ཡིག་འཇོག་རྒྱུའི་རྣམ་འགྱུར་ཐེངས་མང་བསྟན་ཡོད་ཀྱང་ཆིངས་ཡིག་འཇོག་མ་ཐུབ་པ་དེ་ཆོས་རྒྱལ་ཁྲི་རལ་སྐབས་ལ་འཇོག་ཐུབ་ཡོད་པའི་རྒྱུ་མཚན་ནི། སྐབས་དེར་རྒྱ་ནག་དང་བོད་དུ་ནང་ཆོས་ཤུགས་ཆེན་དར་ཏེ་ཆོས་པ་ཕན་ཚུན་འགྲོ་འོང་མང་པོ་བྱུང་བ་མ་ཟད། ཆོས་རྒྱལ་ཁྲི་རལ་སྐབས་ཆབ་སྲིད་ཀྱི་གོ་གནས་གཙོ་བོ་འཛིན་མཁན་གྲྭ་པ་ཆགས་ཡོད་སྟབས། ཐང་བོད་ཆིངས་ཡིག་མཚམས་སྦྱོར་བྱེད་མཁན་དང་པོ་དེ་ཆོས་ཕྱོགས་ཆགས་ཡོད། གཉིས་པ། ཐང་བོད་སྟོབས་ཤུགས་འདྲ་མཉམ་གཅིག་མཚུངས་ལྟར་ཡོད་སྟབས་ས་མཚམས་ཁག་ཏུ་དམག་འཁྲུག་བསྟུད་མར་ལངས་བཞིན་ཡོད་པར་བརྟེན་དམག་འཁྲུག་ཞི་འཇགས་ཡོང་ཆེད་དང་། གསུམ་པ། ས་མཚམས་ཁག་ཏུ་དམག་འཁྲུག་ལངས་ཏེ་ཚོང་པ་ཕན་ཚུན་འགྲོ་འོང་བྱེད་དཀའ་བར་གྱུར་སྟབས་ཚོང་པ་ཚོས་རྒྱལ་ཁབ་ཀྱི་བདག་དབང་ཐད་ལ་ཐེ་ཇུས་བྱས་སྟབས། ཆིངས་ཡིག་དེ་འཇོག་ཐུབ་པ་བྱུང་བ། དེ་བཞིན། ཆིངས་ཡིག་ནང་བོད་བཙན་པོའི་མི་རིགས་འབྱུང་ཚུལ་དང་། ས་མཚམས་གཏན་འབེབས་དང་རྒྱལ་ཁབ་བར་གྱི་འབྲེལ་ལམ། ཆིངས་ཡིག་འཇོག་མཁན་གྱི་མིང་སོགས་འཁོད་ཡོད་ཅེས་བརྗོད་སོང་།
མཇུག་ཏུ་རྡོ་རྗེ་ཚེ་བརྟན་ལགས་ཀྱིས། རྒྱ་གཞུང་གིས་ཉེ་ལམ་ཨ་སྒོར་ས་ཡ་མང་པོ་བཏང་སྟེ་པོ་ཏ་ལ་རྫུན་བཟོ་བྱས་ནས་ཡུལ་སྐོར་སྤྲོ་འཆམ་པ་ཚོར་མགོ་སྐོར་གཏོང་གི་ཡོད་པ་མ་ཟད། རྒྱ་བཟའ་ཀོང་ཇོས་བོད་དུ་ནང་ཆོས་འཁྱེར་ཡོང་སྟེ་བོད་ཀྱི་བསྟན་པའི་མེ་རོ་སླར་གསོ་མཛད་པ་དང་། བོད་ཀྱི་སྲོལ་རྒྱུན་རི་མོ་ཐང་བྲིས་སྒྱུ་རྩལ་དར་སྤེལ་མཛད་པ་སོགས་བོད་བཙན་པོའི་ལོ་རྒྱུས་དག་ལ་འཁྱོག་བཤད་བྱེད་བཞིན་ཡོད་སྟབས། ང་ཚོས་གནས་ཚུལ་དེ་ཚོ་ཤེས་རྟོགས་ཐུབ་པའི་ཐོག་རྒྱ་གཞུང་ལ་མདུང་རྩེ་གཏད་དེ་བོད་ཀྱི་རང་དབང་སླར་གསོ་བྱ་རྒྱུ་ནི་བོད་མི་ཡོད་དོ་ཅོག་དང་སྒོས་སུ་ཕྱི་རབས་གཞོན་སྐྱེས་ཚོའི་ཕྲག་ཏུ་བབ་པའི་ལས་འགན་གལ་ཆེན་ཞིག་ཡིན་སྐོར་སོགས་བརྗོད་སོང་།
དབུས་མའི་ལམ་གྱི་སྲིད་བྱུས་ཀྱི་མཐར་ཐུག་ནི། ཕྱི་སྣོད་བཅུད་མི་ཡལ་བ་དང་། ནང་བཅུད་ཀྱི་སེམས་ཅན་རྣམས་མི་རབས་ནས་མི་རབས་སུ་དབུལ་ཕོངས་རྗེས་ལུས་ཅན་མིན་ཁར། རང་མི་རིགས་ཀྱི་བླ་སྲོག་གཅེས་ཉར་ཁོ་ནའི་ཆེད་དུ་ཡིན་པར་སེམས།
འགོ་ལོག་ཟླ་བྷེ། འདས་ཟིན་པའི་བོད་ཀྱི་ལོ་རྒྱུས་དེ་ད་ལྟ་དབུ་ལམ་ཚོགས་པས་ནག་བསུབ་གཏོང་འདོད་ཇི་ཙམ་ཆེ་ཡང་ལོ་རྒྱུས་ཟེར་བ་བྱུང་ཟིན་པ་ཞིག་ཡིན་དུས་ཁྱོད་ཚོར་ཐབས་ཤེས་མེད། འོན་ཀྱང་མ་འོངས་པར་བོད་འདི་རྒྱ་འོག་ཏུ་སྡོད་རྒྱུའི་ཁས་ལེན་གཙང་མ་བྱས་པ་ཡིག་ཐོག་ནས་རྒྱ་ནག་གཞུང་ལ་སྤྲད་ཟིན་པ་དེ་ལ་བློ་གཟུ་བོར་གནས་པའི་གངས་ཅན་པའི་མི་བུ་ཞིག་གིས་མནོ་བསམ་གཏོང་ན། དེ་ནི་ཡ་ང་ལ་ཡི་མུག་པ་ངུ་བྲོ་ལ་ཞེ་མེར་བའི་བྱ་ཙོག་འདི་འདྲ་ཞིག་བྱུང་བ་དངོས་ར་འཕྲོད་ངེས། དེ་ལས་གཞན་པ་བཤད་མི་དགོས།
ཆོས་འཕེལ།
ད་ཡིན་ན། ཚོགས་པ་ཁག་གི་ངོས་ནས་མཉམ་འབྲེལ་ཙམ་ཞིག་བྱེད་མ་ཆོག་པ་ཨེ་རེད། ལྷག་པར་ལོ་རྒྱུས་ཀྱི་བདེན་པར་ངོས་འཛིན་ཙམ་ཡང་མ་ཆོག་པ་རེད་དམ།
མ་གཞི་ནས། འགན་འཁུར་མེད་པའི་མཆན་ཙམ་ལ་དོ་སྣང་བྱེད་རིན་མི་འདུག་མོད། ཆེད་དམིགས་ཀྱིས་འགལ་ཟླ་སློང་སྟངས་ནི། རང་ཉིད་གསལ་བཤད་བྱས་འདུག
ད་ལྟའི་འཐབ་རྩོད་ཀྱི་རྨང་རྩ་ཡང་། འདས་པའི་ལོ་རྒྱུས་ཀྱི་བདེན་པས་བསྐྲུན་པ་མ་རེད་དམ། བོད་ཀྱི་བདེན་སྟོབས་དང་མི་རབས་གསར་བའི་བློས་གཏོང་གིས། ད་ལྟའི་བོད་འདི་ལ་གསོན་ཤུགས་རྒྱས་པ་མ་རེད་དམ།
གོང་ས་བཅུ་གསུམ་པ་ལས་ལྷག་པའི་རླབས་ཆེན་གྱི་དབུ་ཁྲིད་ཅིག་བོད་ལ་འབྱུང་མི་འདུག ཉུང་མཐར་རྒྱལ་ཁབ་ཤོར་རྗེས་སླར་ཡང་ལེན་ཐུབ་ཡོད་པ་རེད། འདི་ནི་དེང་སྐབས་བོད་རྒྱ་ཁོངས་ཡིན་མིན་ཡང་གསལ་བོ་བཤད་མི་ཕོད་པར་བསྡུར་ཐབས་ཤིག་འདུག་གམ། རང་གིས་རང་གིས་མ་གཡོག་རོགས། མགོ་ནག་བོད་པའི་སྡེ།
ཆུ་གླང་(༡༩༡༣) ལོར་༸གོང་ས་བཅུ་གསུམ་པ་ཆེན་པོ་མཆོག་གིས་དོན་ཚན་ལྔ་ཅན་གྱི་བཀའ་རྩ་ཞིག་ཁྱབ་བསྒྲགས་གནང་བ་དེས། ཕྱི་ཕྱོགས་ནས་བོད་དེ་རང་བཙན་གྱི་རྒྱལ་ཁབ་ཅིག་ཏུ་གནས་ཡོད་པ་ཧ་གོ་ཕྱིར་དང་ནང་ཁུལ་ནས་བོད་རང་བཙན་བརྟན་སྲུང་དང་ལམ་ལུགས་ལེགས་བཅོས་ཀྱི་གསར་བརྗེ་ཞིག་དགོས་པའི་ཆེས་གལ་འགངས་ཆེ་བའི་གནད་དོན་ཞིག་གསལ་བཤད་གནང་ཡོད། དེ་བས་ངས་འདི་ལ”བོད་རྒྱལ་ཁབ་བརྟན་སྲུང་ལེགས་བཅོས་ཀྱི་ཆུ་གླང་རྩ་ཚིག་ཆེན་མོ”ཞེས་གདེང་འཇོག་དང་དད་གུས་བྱེད་ཀྱིན་ཡོད།
http://www.chapdaklhamokyab.fr/%E0%BD%91%E0%BD%94-%E0%BD%91-%E0%BD%96%E0%BD%A2-%E0%BD%91/%E0%BD%86%E0%BD%96-%E0%BD%A6-%E0%BD%91-%E0%BD%A6-%E0%BD%A2/%E0%BD%86-%E0%BD%82-%E0%BD%84-%E0%BD%A2-%E0%BD%9A-%E0%BD%82-%E0%BD%86-%E0%BD%93-%E0%BD%98-%E0%BD%A3/
མཆན་འདེབས་པ་བསམ་འགྲུབ་ཕོ་བྲང་ལགས།
ལམ་དབུ་མའི་ཕུགས་འདུན་ནི་བོད་ཀྱི་སྣོད་བཅུད་ཡོངས་རྫོགས་གཅིག་ཏུ་སྒྲིལ་བའི་མིང་དོན་མཚུངས་པའི་རང་སྲིད་རང་སྐྱོང་ཞིག་རག་པ་ཡིན་ན། དེ་ཕན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ཏུ་འདུག་རྒྱུར་འཐད་པ་གཡོ་མེད་སྒྱུ་མེད་བྱས་པ་ལས། བོད་འདི་ལོ་རྒྱུས་ཐོག་སྔོན་མ་ནས་རྒྱ་ནག་གི་ཆ་ཤས་རེད་ཅེས་དབུ་ལམ་པའི་གནད་ཡོད་མི་སྣ་སུས་གསུངས་འདུག དུས་གསུམ་གྱི་དབྱེ་བ་ཙམ་མི་མཁྱེན་ན་ཡུལ་ཆེན་པོ་ལ་ཁ་མི་གཏོང་རོགས་ཞུ་རྒྱུ།
ཆོས་འཕེལ་ཟེར་བའི་དྲ་གྲོགས་འདིས་ཁ་སང་གི་བགྲོ་གླེང་སྟེང་ནས་བཙན་པོའི་རྡོ་རིང་སྟེང་གི་ཆིངས་ཡིག་འགྱེར་འདོན་བྱེད་མཁན་དང་འབྲེལ་སྙོན་འཛུགས་འདྲ་ཞིག་བྱེད་ཁུལ་བྱས་འདུག ཅི་རེད། དབུ་མའི་ལམ་གྱི་སྲིད་ཇུས་བཟུང་ཕྱིན་བོད་བཙན་པའི་མཛད་རྗེས་གླེང་མི་ཆོག་པ་དང་། བོད་ཀྱི་བྱུང་རབས་ལོ་རྒྱུས་རང་གིས་སྦྱང་མི་ཆོག་ཅིང་གཞན་ལ་འཆད་མི་ཆོག་པ་རེད་དམ། ངོ་མ་མི་འདི་ཚོས་ད་ཅི་བཤད་འདི་བཤད་ཤེས་ཀྱི་མི་འདུག
ཁ་སང་གི་བགྲོ་གླེང་དེར་ང་རང་སོང་བ་ཡིན་ཏེ་གོ་སྒྲིག་བྱེད་མཁན་སློབ་ཕྲུག་ཚོགས་པ་ཡིན་གསུངས་སོང་། ཡིན་ནའང་བུད་མེད་ཚོགས་པའི་རྒྱུན་ལས་པད་མ་ཆོས་སྒྲོན་ཟེར་བ་དེ་དང་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་རྣམ་རྒྱལ་སྒྲོལ་དཀར་ཟེར་བ་དེ་གཉིས་ཀྱིས་ཀྱང་ཡིག་ཆ་ཞིག་སྒྲོག་འདོན་བྱེད་བཞིན་འདུག དེ་ག་རེ་ཡིན་ནམ། འདི་གསལ་བོ་ཞིག་མ་བཟོས་ན་ཡག་པོ་མི་འདུག
དོན་དངོས་ཐོག་བུད་མེད་ལྷན་ཚོགས་ཀྱི་ལངས་ཕྱོགས་སྔོན་མ་ནས་དབུ་མའི་ལམ་ལ་ཤར་སྐྱོད་གནང་གི་ཡོད་རེད། དགུ་བཅུ་གསུམ་གྱི་ལངས་ཕྱོགས་ཀྱང་འདས་པའི་ཟླ་གཉིས་གསུམ་གོང་ལ་དབུ་མའི་ལམ་ལ་འགྱུར་བ་བཏང་ཚར་བ་རེད། ཁོ་རང་གཉིས་སྒེར་ངོས་ནས་ལས་ཀ་བྱེད་ཀྱི་ཡོད་རེད་ཟེར་ན་ཁ་སང་ངོ་སྤྲོད་བྱེད་སྐབས་ཚོགས་པ་གཉིས་མིང་འདོན་བྱས་སོང་། འདི་བྱེད་སྟངས་ཡག་པོ་རྩ་བ་མ་རེད།
བོད་འདི་རྒྱ་ནག་མི་དམངས་སྤྱི་འཐུས་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ལ་སྡོད་རྒྱུའི་ཁས་ལེན་ཚར་དུས། ད་དུང་བོད་འདི་རྒྱ་ནག་གི་ཆ་ཤས་སུ་ཁས་བླངས་མེད་ཚུལ་བཤད་པ་ནི་མགོ་བདེ་སྤྲེལ་ལད་ཀྱི་སྐད་ཆ་ལས་ཅི་ཡང་མ་མཐོང་།
(ཆུ་གླང་རྩ་ཚིག)ཟེར་བ་དང་(ཆུ་སྤྲེལ་ཞལ་གདམས།)ཟེར་བ་འདི་རིགས་ལ་ཡིད་ཆེས་རྩ་བ་ཉིད་ནས་མེད། ནམ་རྒྱུན་བོད་པ་ཚོས་ཁུངས་དག་ལ་མ་དག་གི་ཡིག་ཆ་དང་ལོ་རྒྱུས་འདི་འདྲ་རྐྱང་རྐྱང་འཁྱེར་ཡོང་བའི་དབང་གིས་དེང་སྐབས་བོད་པ་ཚོས་རྒྱལ་སྤྱིའི་ཐོག་སྐད་འབོད་བརྒྱབས་ཏེ་གནས་ལུགས་ཅི་ཙམ་བཤད་ཀྱང་བདག་པོ་རྒྱག་མཁན་མེད་སོང་བ་རེད།