འཇིགས་སྐུལ་དྲག་སྤྱོད་པ་མ་རེད་ཟེར།

ཁ་སང་ཕྱི་ཚེས་ ༡༣ ཉིན་ཨབ་གྷན་གཞུང་གིས་དེ་སྔོན་ཨ་རིའི་དམག་མིས་འཛིན་བཟུང་བྱས་ཡོད་པའི་འཇིགས་སྐུལ་རིང་ལུགས་པ་ ༦༥ ཙམ་ལ་འཇིགས་སྐུལ་དྲག་སྤྱོད་ཀྱི་ནག་ཉེས་གང་ཡང་མེད་པའི་ངོས་འཛིན་འོག་བྷ་གྷི་རམ་བཀག་ཉར་ཁང་ནས་ཀློད་གྲོལ་བཏང་ཡོད་འདུག ཨ་རིའི་གཞུང་གིས་ཐེངས་འདིར་ཨབ་གྷན་གཞུང་གིས་བཙོན་པ་དེ་དག་ལ་འཇིགས་སྐུལ་དྲག་སྤྱོད་སྤེལ་བའི་བདེན་དཔང་ཁག་ལ་ཞིབ་འཇུག་ཡག་པོ་མ་བྱས་པར་ཀློད་གྲོལ་བཏང་བ་དེ་ནི། དེ་སྔ་ཨ་རི་དང་ཨབ་གྷན་བར་བཙོན་པ་དེ་དག་ཐོག་བཞག་པའི་གྲོས་དོན་ལ་རྡོག་རོལ་བཏང་བ་ཞིག་ཡིན་པའི་སྐྱོན་བརྗོད་ཤུགས་ཆེན་བྱས་ཡོད་འདུག

ཨབ་གྷན་སྲིད་འཛིན་ཁཱར་ཛེ་ (Hamid Karzai) ཡིས་ཊུར་ཀེའི་ནང་འཚོགས་བཞིན་པའི་ཚོགས་འདུའི་སྟེང༌། ཨབ་གྷན་ནི་རང་བཙན་རྒྱལ་ཁབ་ཡིན་སྟབས།ཨ་རི་གཞུང་གིས་ངེས་པར་དུ་ཨབ་གྷན་གྱི་ཁྲིམས་ཁང་གི་འགྲོ་སྟངས་དང་དབང་ཚད་ལ་མཐོང་ཆུང་བྱེད་པ་མཚམས་འཇོག་བྱེད་དགོས་པ་དང༌། བྷ་གྷི་རམ་བཀག་ཉར་ཁང་དེར་ཊི་ལི་བྷན་འཇིགས་སྐུལ་རིང་ལུགས་པའི་བཟོ་གྲྭ་ཞིག་རེད་ཅེས་སོགས་བརྗོད་ཡོད་འདུག

ཨབ་གྷན་ནང་ཡོད་པའི་ཨ་རིའི་གཞུང་ཚབ་ཁང་གིས། བཙོན་པ་དེ་དག་གིས་ཨབ་གྷན་དང་ཨ་རི་གཙོས་ནུབ་ཕྱོགས་ཀྱི་མཉམ་འབྲེལ་དམག་དཔུང་ལ་འཇབ་རྒོལ་བྱས་ཏེ་དམག་མི་དང་མི་སེར་དཀྱུས་མ་དམར་གསོད་བྱས་པའི་ནག་ཉེས་ཀྱི་དཔང་རྟགས་ཆ་ཚང་ཡོད་མ་པ་ཟད། ཁོ་ཚོའི་ཁྲོད་འབར་གས་བཟོ་མཁན་དང༌། ཊ་ལི་བྷན་འཇིགས་སྐུལ་ཚོགས་པར་འབྲེལ་བ་བྱེད་མཁན་སོགས་ཡོད་སྟབས། འབྱུང་འགྱུར་ཁོ་ཚོས་མི་གསོད་ཁྲག་སྦྱོར་དང་འཇིགས་སྐུལ་བྱ་སྤྱོད་མི་སྤེལ་རྒྱུར་ཨབ་གྷན་གཞུང་གིས་ཁག་ཐག་བྱེད་དགོས་ཞེས་བརྗོད་འདུག དེ་བཞིན། ཨ་རིའི་བདེ་སྲུང་ལྷན་ཁང་གིས་རྒྱལ་སྤྱིའི་གསར་འགོད་མཐུན་ཚོགས་ལ། ཀློད་གྲོལ་བཏང་བའི་བཙོན་པ་དེ་དག་ཁྲོད་ནས་བཙོན་པ་ ༡༧ ནི་ཚོང་ར་དང་ལམ་འགྲམ་དུ་བྱུང་བའི་འབར་གས་དོན་རྐྱེན་དང་ཐད་ཀར་འབྲེལ་བ་ཡོད་སྐོར་བརྗོད་འདུག

ཁ་སང་ཨ་རིའི་གྲོས་ཚོགས་གོང་མའི་གོ་མཚོན་ཞབས་ཞུ་ཚོགས་ཆུང་གི་ཚོགས་འདུའི་སྐབས།འཐུས་མི་གྷིར་ཧམ་ ( Lindsey Graham) ལགས་ཀྱིས་ཨབ་གྷན་སྲིད་གཞུང་གིས་དོགས་ཡོད་འཇིགས་སྐུལ་རིང་ལུགས་པའི་བཙོན་པ་མུ་མཐུད་ཀློད་གྲོལ་གཏོང་བའི་སྲིད་བྱུས་ཐེར་འདོན་དང་ཁོང་གིས་གྲོས་ཚོགས་གོང་མའི་འཐུས་མི་ཚོ་རེ་སྐུལ་ཞུས་ཏེ་ཨ་རིའི་གཞུང་གིས་ཨབ་གྷན་གྱི་དཔལ་འབྱོར་དང་ཤེས་ཡོན། འགྲིམ་འགྲུལ་སོགས་ལ་དཔལ་འབྱོར་གྱི་རོགས་སྐྱོར་སྤྲོད་བཞིན་པ་དེ་གནས་སྐབས་རིང་མཚམས་འཇོག་བྱེད་དགོས་པའི་གྲོས་ཆོད་འཇོག་ཐུབ་པ་བྱ་རྒྱུ་ཡིན་ཚུལ་བརྗོད་འདུག

ཨབ་གྷན་ནང་ཨ་རིའི་དམག་དཔུང་མུ་མཐུད་སྡོད་ཆེད་ཨ་རི་གཞུང་གིས་དེ་སྔོན་ཨ་རི་དང་ཨབ་གྷན་གཉིས་བར་བཞག་པའི་བདེ་འཇགས་མཉམ་འབྲེལ་གྲོས་ཆོད་ལ་ཡང་བསྐྱར་མིང་རྟགས་འགོད་དགོས་པར་ནན་སྐུལ་བྱས་ཀྱང༌། སྲིད་འཛིན་ཁཱར་ཛེ་ཡིས་ཁས་ལེན་མ་བྱས་པ་མ་ཟད། དམག་འཁྲུག་སྐབས་འཛིན་བཟུང་བྱས་པའི་དོགས་ཡོད་བཙོན་པ་དག་ཀློད་གྲོལ་བཏང་ཡོད་སྟབས་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད་འདུག

གསར་འགོད་པ། ལྷ་སྐྱབས་རྒྱལ།