རྨ་ལྷོ་སོག་རྫོང་དུ་ནོར་སྲིད་སྒྲིག་ཁྲིམས་དང་འགལ་བའི་ཉེས་མིང་འོག རྫོང་དཔོན་གཞོན་པ་སྒྲོལ་མ་མཚོ་ཟེར་བ་ཞིག་ལ་ཞིབ་བཤེར་བྱེད་བཞིན་ཡོད་འདུག
མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་ཞིབ་བཤེར་བྱས་པ་བརྒྱུད། རྨ་ལྷོ་སོག་རྫོང་སློབ་གསོ་ལྷན་ཁང་དང་འཕྲོད་བསྟེན་ལྷན་ཁང་དུ། ནོར་སྲིད་སྒྲིག་ཁྲིམས་དང་འགལ་བའི་ནག་ཉེས་ཚབས་ཆེན་བྱུང་བའི་ཉེས་མིང་འོག འབྲེལ་ཡོད་དཔོན་རིགས་སོགས་མི་གྲངས་ ༣༥ ལ་ཉེན་བརྡ་དང་ཉེས་ཆད་བཅད་ཡོད་པ་མ་ཟད། སོག་རྫོང་གི་རྫོང་དཔོན་གཞོན་པ་སྒྲོལ་མ་མཚོ་ཟེར་བར་ཉེས་དོན་ཐོ་འགོད་བྱས་ཏེ་ཞིབ་བཤེར་བྱེད་བཞིན་ཡོད་ལུགས་བསྒྲགས་འདུག
ཁ་སང་ཕྱི་ཚེས་ ༡༤ ཉིན་རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ༢༠༡༠ ལོའི་ལོ་སྟོད་ནས་ ༢༠༡༣ ལོའི་ཕྱི་ཟླ་ ༣ བར། རྨ་ལྷོ་སོག་རྫོང་ཁྱབ་ཁོངས་སློབ་གྲྭ་ ༡༢ ལས་སློབ་གྲྭ་ཁག་ ༡༡ གིས་སློབ་མའི་རོགས་རམ་མ་དངུལ་དང་སྤྱི་དངུལ་རྒྱ་སྒོར་ས་ཡ་ལྔ་འབུམ་གཅིག་ཁྲི་དགུ་ལྷག་བེད་སྤྱོད་ལོག་པར་བཏང་ཡོད་པ་དང་། དེའི་ནང་ནས་སྒོར་ས་ཡ་གསུམ་འབུམ་གསུམ་ཁྲི་ལྔ་ལྷག་སློབ་གྲྭའི་རྨང་གཞིའི་སྒྲིག་ཆས་འཛུགས་སྐྲུན་དང་གཞུང་གི་གྲོན་དངུལ་ཁ་གསབ་ཐད་བཀོལ་སྤྱོད་དང་། སྒོར་ས་ཡ་གཅིག་འབུམ་ལྔ་ཁྲི་དགུ་ཡིས་དགེ་རྒན་དང་ལས་བཟོ་བ་རྣམས་ལ་ཁེ་ཕན་བསྐྲུན་ཏེ། ཤུལ་དུ་སྒོར་འབུམ་གཉིས་དང་ཁྲི་ལྔ་ལས་ལྷག་མེད་ཚུལ་བརྗོད་འདུག
དེ་བཞིན། ༢༠༡༡ ལོ་ནས་ ༢༠༡༣ ལོའི་བར་སོག་རྫོང་འཕྲོད་བསྟེན་ལྷན་ཁང་གིས། སྤྱི་བའི་འཕྲོད་བསྟེན་ཞབས་ཞུའི་ཆེད་སྤྱོད་མ་དངུལ་དང་སྨན་རིན་ཁ་གསབ་མ་དངུལ་འབུམ་གཉིས་ཁྲི་ལྔ་ལྷག་འཕྲོད་བསྟེན་ཞབས་ཞུར་བེད་སྤྱོད་མ་བཏང་བར་དངུལ་མཛོད་བཙུགས་པ་དང་། རྫོང་ཁོངས་ཀྱི་མཐོ་ཡས་མ་དང་སུམ་མདོ། ཡེ་རྒན་ཉིན། ཉིན་མཐའ། གསེར་ལུང་། ཁོའུ་སུན་བཅས་གྲོང་ཚོ་དང་གྲོང་རྡལ་ཁག་ ༦ གི་འཕྲོད་བསྟེན་ཁང་དག་གིས། འཕྲོད་བསྟེན་ཆེད་སྤྱོད་མ་དངུལ་འབུམ་གསུམ་ཁྲི་གཉིས་ཙམ་བེད་སྤྱོད་ལོག་པར་བཏང་བ་དང་སྒེར་ལ་བགོ་བཤའ་བརྒྱབ་པ། དངུལ་འཛིན་རྫུན་མ་བཟོས་པ་སོགས་ཀྱི་ཁྲིམས་འགལ་བྱ་སྤྱོད་སྤེལ་ཡོད་པ་མ་ཟད། རྫོང་འཕྲོད་བསྟེན་དང་འཆར་ལྡན་བུ་སྐྱེས་ཁང་གི་མགོ་ཁྲིད་ལུའུ་ཁྲིན་ཡཱན་གྱིས་དབང་ཆ་སྒེར་སྤྱོད་ཀྱིས་སྤྱི་དངུལ་འབུམ་ལྔ་ཁྲི་གཉིས་ལྷག་དུས་ཡུན་རིང་པོར་གཞན་ལ་གཡར་བ་བཅས་ཤེས་རྟོགས་བྱུང་ཡོད་འདུག
གནད་དོན་དེའི་ཐད་རྨ་ལྷོ་བོད་རིགས་རང་སྐྱོང་ཁུལ་དང་། སོག་རྫོང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལྟ་ཞིབ་སྡེ་ཚན་གཉིས་ཀྱིས་ལས་བྱེད་པའི་དོ་དམ་དབང་ཚད་ལྟར། ཧི་ནན་རྫོང་གི་རྫོང་དཔོན་གཞོན་པ་ལུ་གུ་དང་ཧེ་ཞན་ཡོན། རྫོང་དཔོན་གཞོན་པ་ན་ཁོ་བཅས་ལ་ཐ་ཚིག་བསྒྲགས་ཡོད་པ་མ་ཟད། རྫོང་དཔོན་གཞོན་པ་སྒྲོལ་མ་མཚོ་ལ་ཉེས་དོན་ཐོ་འགོད་ཀྱིས་ཞིབ་བཤེར་བྱེད་བཞིན་ཡོད་པ་དང་། རྫོང་སློབ་གསོ་ལྷན་ཁང་གི་མགོ་ཁྲིད་ཟུར་པ་རྒྱ་ཁོ་ལ་ཏང་ནང་ཁུལ་ནས་ལོ་གཅིག་ལ་ལྟ་རྟོག་དང་། རྫོང་འཐབ་ཕྱོགས་གཅིག་གྱུར་ཁང་གི་མགོ་ཁྲིད་གཞོན་པའི་གོ་གནས་ནས་གནས་དབྱུང་བཏང་ཡོད་འདུག རྫོང་འཕྲོད་བསྟེན་དང་འཆར་ལྡན་བུ་སྐྱེས་ཁང་གི་མགོ་ཁྲིད་ཏུའུ་ཀོ་ཇེ་ཏང་ནང་ནས་གནས་དབྱུང་གཏོང་རྒྱུའི་ཉེན་བརྡ་བཏང་བ་དང་ཆབས་ཅིག སྲིད་འཛིན་ལས་གནས་ནས་ཕྱིར་འཕུད་པ་བཅས་ཀྱི་ཉེས་ཆད་བཅད་ཡོད་ལུགས་བསྒྲགས་འདུག
གསར་འགོད་པ། པདྨ་མཚོ།
སྡེ་དཔོན་ཞིག་བཅའ་འདོད་ན། ཞང་དཔོན་ཞིག་ལ་རྫོངས་དགོས་ནི་རེད། ཞང་དཔོན་ཞིག་བཅའ་འདོད་ན། རྫོང་དཔོན་ཞིག་ལ་རྫོངས་དགོས་ནི་རེད། རྫོང་དཔོན་ཞིག་བཅའ་འདོད་ན། ཁུལ་དཔོན་ཞིག་ལ་རྫོངས་དགོས་ནི་རེད། ཁུལ་དཔོན་ཞིག་བཅའ་འདོད་ན། ཞིང་ཆེན་དཔོན་ཞིག་ལ་རྫོངས་དགོས་ནི་རེད། ཞིང་ཆེན་དཔོན་པོ་ཞིག་བཅའ་འདོད་ན། ཀྲུང་དབྱང་དཔོན་པོ་ཞིག་ལ་རྫོངས་དགོས་ནི་རེད། དེའི་གྲས་སུ་ཞི་ཅིན་ཕིན་གྱང་ཡོད་ཡོད་པ་རེད། རྐུན་མས་རྐུན་མར་རྐུས་ཁྲིམས་གཅོད་པ་ནི། བརྐུ་འགོག་པའི་ཆེད་མ་ཡིན་སྟེ། རང་ཕྱོགས་རྐུན་ཚོགས་ཀྱིས་གཞན་ཕྱོགས་རྐུན་ཚོགས་ཀྱི་སྟོབས་ཤུགས་བཅོམ་ནས་རང་ཕྱོགས་ལ་ཁེ་ཕན་ལྷག་མ་ཞིག་ཐོབ་ཆེད་རེད། སྟག་གསོད་མཁན་ཀྱང་རྐུན་མའི་སྟག་རེད་ལ། གསོད་ཀྱིན་པའི་སྟག་ཀྱང་རྐུན་མའི་སྟག་རེད། དེ་གཉིས་བར་ན་དཀར་ནག་གི་ཁྱད་པར་ཅིག་གླེང་ས་མི་འདུག ཡིན་ནའང་། ངས་དགའ་བཞིན་སྤྲོ་བཞིན་རྣ་བས་ཉན་ས་དང་མིག་གིས་གཅེར་་བཞིན་པ་ནི། རྐུན་ཚོགས་དང་རྐུན་ཚོགས་བར་གྱི་ཁེ་རྩོད་ནང་འཁྲུག་རེད། རྐུན་མའི་རྒྱལ་ཁབ་འདི་མགོ་རྟིང་ལོག་པའི་རྗེས་སུ། ད་གཟོད་དཀར་ནག་གི་རིན་ཐང་གླེང་སའི་སྟེགས་བུ་ཞིག་ལ་འཆར་སྣང་བསྐྲུན་ཆོག
གནས་ཚུལ་འདི་ངས་སྔ་ས་ནས་གོ་བྱུང།
སྤྱིར་ཡིན་ན་མཐོ་ཀྲུང་དབྱང་ནས་དམའ་རྫོང་དཔོན་བར་གྱི་ཏང་ཡོན་དཔོན་པོ་བརྒྱ་ཆའི་དགུ་བཅུ་རུལ་སུངས་པ་ཆགས་འདུག་ཟེར། གོང་གསལ་མི་དེ་དག་ངའི་སློབ་གྲོགས་དང་ཡང་ན་བཟང་ས་དེ་འདྲ་རེད། སྤྱིར་དཔོན་ངན་རུལ་སུངས་པ་ཟེར་བ་དེར་ང་གཏན་ནས་མི་དགའ། ཁོ་ཚོས་དེ་འདྲ་མ་བྱས་ན་སྡུག་གྱོང་རེད། ཟ་དགོས་པ་རེད་ཟེར་གྱིན་འདུག་ཟེར། དཔོན་གནས་འཕྲོག་རྩོད་བྱེད་པ་དེ་རུལ་སུངས་ལམ་ལུགས་དེའི་རྐྱེན་གྱིས་ཆགས་འདུག ང་བློ་ཕམ་ནས་བསྡད་ཡོད། ཕ་ཡུལ་གྱི་འགོ་ཁྲིད་མང་ཆེ་བ་རང་གི་ས་གནས་ཀྱི་མི་རེད། དེ་སྔ་ཡིན་ན་ང་ཚོའི་རིག་གནས་སློབ་གསོ་ཁུལ་ཡོངས་ཀྱི་ཨང་དང་པོ་ཡིན། དེང་སང་རུལ་འདུག་ཟེར། ང་ཆེས་སྙིང་ལངས་ས་ནི་སློབ་གྲྭའི་སྒོར་མོ་ཟོས་པ་དང་སློབ་མ་གསོ་སྐྱོང་ཡག་པོ་བྱེད་མ་ཐུབ་པ་དེ་ཡིན།
ངས་ཞི་ཅིན་ཕིན་ལ་རྒྱ་ནག་སྟག་གསོད་རྔོན་པ་ཟེར་ནས་བསྟོད་པ་བྱེད་ཀྱིན་ཡོད། གོང་གསལ་འགོོ་ཁྲིད་དེ་རིགས་ཀྱང་ས་དེའི་ཚོད་ཀྱི་སྟག་ཕྲུག་རྐྱང་རྐྱང་རེད། མི་མང་ཟ་མཁན་གྱི་སྟག་དེ་རིགས་འདུལ་ཐུབ་སོང་ན་མ་མཐར་ཡང་དཔལ་འབྱོར་གྱི་གནས་སྟངས་ཇེ་ལེགས་སུ་འགྲོ་ལ་སློབ་གྲའི་མཐུན་རྐྱེན་དང་སྤུས་ཚད་ཀྱང་ཅུང་ཇེ་ལེགས་སུ་གཏོང་ཐུབ། མུ་མཐུད་དེ་ས་གནས་གཞན་དག་ལ་ཡང་འདི་ལྟར་གཙང་སེལ་ཡོང་ངེས་རེད། དགའ་བ་ལ་སྐྱིད་པ།