རྨ་ལྷོ་བོད་རིགས་རང་སྐྱོང་ཁུལ་ཧི་ནན་རྫོང་དུ་ནོར་སྲིད་སྒྲིག་ཁྲིམས་དང་འགལ་བའི་ཉེས་མིང་འོག་རྫོང་དཔོན་གཞོན་པ་སྒྲོལ་མ་མཚོ་ཟེར་བ་ཞིག་ལ་ཞིབ་བཤེར་བྱེད་ཀྱིན་ཡོད་འདུག
མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་ཞིབ་བཤེར་བྱས་པ་བརྒྱུད། མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་ཧི་ནན་རྫོང་སློབ་གསོ་ཁང་དང་འཕྲོད་བསྟེན་ལས་ཁུངས་དུ། ནོར་སྲིད་སྒྲིག་ཁྲིམས་དང་འགལ་བའི་ནག་ཉེས་ཚབས་ཆེན་བྱུང་བའི་ཉེས་མིང་འོག འབྲེལ་ཡོད་དཔོན་རིགས་སོགས་འབྲེལ་ཡོད་མི་སྣ་ ༣༥ ལ་ཉེས་ཆད་དང་ཁག་ཅིག་ལ་ཉེན་བརྡ་བཏང་ཡོད་པ་མ་ཟད། ཧི་ནན་རྫོང་གི་རྫོང་དཔོན་གཞོན་པ་སྒྲོལ་མ་མཚོ་ཟེར་བར་ཉེས་དོན་ཐོ་འགོད་བྱས་ཏེ་ཞིབ་བཤེར་བྱེད་བཞིན་ཡོད་ལུགས་བསྒྲགས་འདུག
དེ་རིང་རྒྱ་ནག་ཤིན་ཧྭ་དྲ་བའི་ཐོག་གནས་ཚུལ་སྤེལ་བ་ལྟར་ན། ༢༠༡༠ ལོའི་ལོ་སྟོད་ནས་ ༢༠༡༣ ལོའི་ཕྱི་ཟླ་ ༣ བར་དུ། ཧི་ནན་རྫོང་ཁོངས་ཀྱི་སློབ་གྲྭ་ ༡༢ ལས་སློབ་གྲྭ་ཁག་ ༡༡ གིས་སློབ་མའི་རོགས་རམ་མ་དངུལ་དང་སྤྱི་དངུལ་རྒྱ་སྒོར་ས་ཡ་ལྔ་དང་འབུམ་གཅིག་ཁྲི་དགུ་ ༥༡༩༠༠༠༠ ལྷག་བེད་སྤྱོད་ལོག་པར་བཏང་ཡོད་པ་དང་། དེའི་ནང་ནས་སྒོར་ས་ཡ་གསུམ་འབུམ་གསུམ་ཁྲི་ལྔ་ལྷག་སློབ་གྲྭའི་རྨང་གཞིའི་སྒྲིག་ཆས་འཛུགས་སྐྲུན་དང་གཞུང་གི་གྲོན་དངུལ་ཁ་གསབ་ཐད་བཀོལ་སྤྱོད་དང་། སྒོར་ས་ཡ་གཅིག་འབུམ་ལྔ་ཁྲི་དགུ་ཡིས་དགེ་རྒན་དང་ལས་བཟོ་བ་རྣམས་ལ་ཁེ་ཕན་བསྐྲུན་ཏེ། ཤུལ་དུ་སྒོར་འབུམ་ ༢ དང་ཁྲི་ལྔ་ལས་ལྷག་མེད་པ་དང་། དེ་བཞིན། ༢༠༡༡ ནས་ ༢༠༡༣ བར་ཧི་ནན་རྫོང་འཕྲོད་བསྟེན་ལས་ཁུངས་ཀྱིས་སྤྱི་པའི་འཕྲོད་བསྟེན་ཞབས་ཞུའི་ཆེད་སྤྱོད་མ་དངུལ་དང་སྨན་རིན་ཁ་གསབ་མ་དངུལ་འབུམ་གཉིས་ཁྲི་ལྔ་ལྷག་འཕྲོད་བསྟེན་ཞབས་ཞུར་བེད་སྤྱོད་མ་བཏང་བར་དངུལ་མཛོད་བཙུགས་པ་དང་། ཧི་ནན་རྫོང་ཁོངས་ཀྱི་མཐོ་ཡས་མ་དང་སུམ་མདོ། ཡེ་རྒན་ཉིན། ཉིན་མཐའ། གསེར་ལུང་། ཁོའུ་སུན་བཅས་གྲོང་ཚོ་དང་གྲོང་རྡལ་ཁག་ ༦ གི་འཕྲོད་བསྟེན་ཁང་དག་གིས། འཕྲོད་བསྟེན་ཆེད་སྤྱོད་མ་དངུལ་འབུམ་གསུམ་ཁྲི་གཉིས་ཙམ་བེད་སྤྱོད་ལོག་པར་བཏང་བ་དང་སྒེར་ལ་བགོ་བཤའ་བརྒྱབ་པ། དངུལ་འཛིན་རྫུན་མ་བཟོས་པ་སོགས་ཀྱི་ཁྲིམས་འགལ་བྱ་སྤྱོད་སྤེལ་ཡོད་པ་མ་ཟད། ཧི་ནན་རྫོང་འཕྲོད་བསྟེན་དང་འཆར་ལྡན་བུ་སྐྱེས་ཁང་གི་མགོ་ཁྲིད་ལུའུ་ཁྲིན་ཡཱན་གྱིས་དབང་ཆ་སྒེར་སྤྱོད་ཀྱིས་སྤྱི་དངུལ་འབུམ་ལྔ་ཁྲི་གཉིས་ལྷག་དུས་ཡུན་རིང་པོར་གཞན་ལ་གཡར་བ་བཅས་ཤེས་རྟོགས་བྱུང་ཡོད་འདུག
གོང་གི་གནད་དོན་དེའི་ཐད་རྨ་ལྷོ་བོད་རིགས་རང་སྐྱོང་ཁུལ་དང་། ཧི་ནན་རྫོང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལྟ་ཞིབ་སྡེ་ཚན་གཉིས་ཀྱིས་ལས་བྱེད་པའི་དོ་དམ་དབང་ཚད་ལྟར། ཧི་ནན་རྫོང་གི་རྫོང་དཔོན་གཞོན་པ་ལུ་གུ་དང་ཧེ་ཞན་ཡོན། རྫོང་དཔོན་གཞོན་པ་ན་ཁོ་བཅས་ལ་ཐ་ཚིག་བསྒྲགས་ཡོད་པ་མ་ཟད། རྫོང་དཔོན་གཞོན་པ་སྒྲོལ་མ་མཚོ་ལ་ཉེས་དོན་ཐོ་འགོད་ཀྱིས་ཞིབ་བཤེར་བྱེད་བཞིན་ཡོད་པ་དང་། ཧི་ནན་རྫོང་སློབ་གསོ་ཁང་གི་མགོ་ཁྲིད་ཟུར་པ་རྒྱ་ཁོ་ལ་ཏང་ནང་ཁུལ་ནས་ལོ་གཅིག་ལ་ལྟ་རྟོག་དང་། རྫོང་འཐབ་ཕྱོགས་གཅིག་གྱུར་ཁང་གི་མགོ་ཁྲིད་གཞོན་པའི་གོ་གནས་ནས་གནས་དབྱུང་གཏོང་རྒྱུ། ཧི་ནན་རྫོང་འཕྲོད་བསྟེན་དང་འཆར་ལྡན་བུ་སྐྱེས་ཁང་གི་མགོ་ཁྲིད་ཏུའུ་ཀོ་ཇེ་ཏང་ནང་ནས་གནས་དབྱུང་གཏོང་བར་ཉེན་བརྡ་ནན་པོ་བཏང་བ་དང་ཆབས་ཅིག སྲིད་འཛིན་ལས་གནས་ནས་ཕྱིར་འཕུད་བཏང་བ་བཅས་ཀྱི་ཉེས་ཆད་བཅད་ཡོད་ལུགས་ཕྱིར་བསྒྲགས་བྱས་འདུག
གསར་འགོད་པ། པདྨ་མཚོ།
