ཆབ་མདོ་སྨར་ཁམས་ཕྱོཊ་ཀྱི་བོད་མི་བཀྲ་ཤིས་ཚེ་རིང་ཞུ་བ་ཞིག་རྒྱ་གཞུང་ཉེན་རྟོག་པས་འཛིན་བཟུང་བྱེད་སྐབས་རང་ཤི་བརྒྱབས་འདུག
ཟླ་འདིའི་ཚེས་ ༢༠ ཉིན་རྒྱ་ནག་གཞུང་གིས་ཆབ་མདོ་ཁུལ་སྨར་ཁམས་རྫོང་གི་བོད་མི་བཀྲ་ཤིས་ཚེ་རིང་ཞུ་བ་ཞིག ༢༠༠༨ ལོའི་ས་གནས་ཀྱི་ཞི་རྒོལ་ཁྲོད་མཉམ་ཞུཊ་གནང་ཡོད་པའི་ཉེས་མིང་འོག་འཛིན་བཟུང་བྱེད་སྐབས། ཁོང་གིས་སོ་སོའི་ལུས་པོར་བཏགས་ཡོད་པའི་གྲི་བླངས་ཏེ་སོ་སོར་བརྒྱབས་རྗེས་གྲོངས་ཡོད་འདུག
རྒྱ་གར་ལྷོ་ཕྱོཊ་འབྲས་སྤུངས་དགོན་པའི་གྲྭ་བློ་བཟང་ལགས་ཀྱིས་གསར་ལམ་དུ་གནས་ཚུལ་ངོ་སྤྲོད་གནང་བ་ལྟར་ན། བོད་མི་བཀྲ་ཤིས་ཚེ་རིང་ལགས་ད་ལྟ་རང་ལོ་ ༢༨ ཡིན་པ་དང་། ཁོང་སྨར་ཁམས་རྫོང་ཀ་ཐོག་གྲོང་རྡལ་ལྕགས་ཐག་སྡེ་བ་ནས་ཡིན་འདུག ༢༠༠༨ ལོར་རྒྱ་ནག་གཞུང་གིས་བཀྲ་ཤིས་ཚེ་རིང་ལགས་ཀྱིས་ས་གནས་ཀྱི་ཞི་རྒོལ་སྐབས་སྲིད་གཞུང་གི་སྒོ་བྱང་གཡུགས་ཡོད་ཚུལ་དང་། སྨར་ཁམས་རྫོང་གི་གྲྭ་བ་ ༡༢ ས་གནས་ཀྱི་འགད་རྫས་གས་གཏོར་གྱི་དོན་རྐྱེན་དང་ངོ་རྒོལ་ཟིང་འཁྲུག་སྐུལ་སློང་བྱེད་མཁན་ཡིན་ཚུལ་སོགས་བཤད་དེ་འཛིན་བཟུང་བཀའ་བརྒྱབ་བཀྲམས་ཡོད་འདུག ཕྱིས་སུ་གྲྭ་བ་ཚོ་འཛིན་བཟུང་གིས་འདྲི་གཅོད་བྱས་ཡོད་ཀྱང་། བཀྲ་ཤིས་ཚེ་རིང་ལགས་སྐབས་དེ་ནས་བཟུང་བྲོས་བྱོལ་བྱས་ཡོད་པ་དང་། ཉེ་ལམ་རྒྱ་གཞུང་གིས་ཁོང་འཛིན་བཟུང་བྱེད་རྩིས་བྱེད་སྐབས། ཁོང་གིས་ཉེན་རྟོག་པའི་མདུན་དུ་རང་གི་ལུས་སྟེང་དུ་བཏགས་ཡོད་པའི་གྲི་བླངས་ཏེ་སོ་སོར་བརྒྱབས་རྗེས་ཉིན་དེར་གྲོངས་ཡོད་འདུག
བཀྲ་ཤིས་ཚེ་རིང་ལགས་ཀྱི་གནས་ཚུལ་མ་བྱུང་བའི་ཉིན་སྔའི་ཡར་སྔོན་སྟེ། ཟླ་འདིའི་ཚེས་ ༡༥ ཉིན་རྒྱ་གཞུང་གིས་ཆབ་མདོ་ཁུལ་སྨར་ཁམས་རྫོང་ཀ་ཐོག་གྲོང་རྡལ་མཁན་པ་ལུགས་དགོན་པའི་གྲྭ་བ་ ༢༠ ཡས་མས་ཤིག་འཛིན་བཟུང་གིས་ཉིན་ཤས་རིང་འདྲ་བརྩད་བྱས་ཡོད་འདུག་ལ། ཕྱི་ཚེས་ ༢༡ ཉིན་ས་གནས་རྫོང་དང་གྲོང་རྡལ་གྱི་མགོ་ཁྲིད་ཚོས་རེ་སྐུལ་ལྟར་ཀློད་གྲོལ་བཏང་ཡོད་འདུག་མོད། ས་གནས་བོད་མི་ཁག་ཅིག་གིས་རྒྱ་གཞུང་གིས་གྲྭ་བ་དེ་དག་འཛིན་བཟུང་བྱེད་དོན། ཁོང་ཚོས་སྐད་འཕྲིན་ (wechat) བརྒྱུད་༧གོང་ས་མཆོག་གི་སྐུ་པར་དང་བོད་དོན་དང་འབྲེལ་བའི་གནས་ཚུལ་མཁོ་གཏོང་བྱས་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་། ཡང་བོད་མི་ཁག་ཅིག་གིས་རྒྱ་གཞུང་གིས་ ༢༠༠༨ ལོའི་ས་གནས་ཀྱི་ཞི་རྒོལ་ཁྲོད་མཉམ་ཞུགས་བྱས་པའི་ཉེས་མིང་འོག་འཛིན་བཟུང་བྱས་ཡོད་སྐོར་བརྗོད་ཀྱི་ཡོད་འདུག
གྲྭ་བློ་བཟང་ལགས་ཀྱིས་བརྗོད་པ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༠༨ ལོ་ནས་བཟུང་སྨར་ཁམས་ས་གནས་སུ་དམག་མི་དང་ཉེན་རྟོག་པ་འགྲེམས་འཇོག་གིས་དམ་དྲག་བྱེད་ཀྱིན་པར་མ་ཟད། དམིགས་བསལ་རྒྱ་གར་དང་ཕྱི་རྒྱལ་དུ་ཉེ་འབྲེལ་ཡོད་མཁན་ཚོར་ལྟ་རྟོག་བྱས་ཏེ། རྒྱ་གར་ནས་ཁ་པར་སོགས་ཡོང་ཚེ་ནང་མི་ཉེན་རྟོག་ལས་ཁུང་དུ་སྐད་བཏང་སྟེ་འདྲི་གཅོད་དང་ཉེས་ཆད་སོགས་གཅོད་ཀྱི་ཡོད་པ་དང་། རྗེས་ཕྱོགས་ཁ་པར་སོགས་ཀྱི་ལམ་ནས་འབྲེལ་བ་མི་བྱེད་པའི་ཁས་ལེན་མཚན་རྟགས་སོགས་བཀོད་འཇུག་གི་ཡོད་པ་སོགས་ས་གནས་བོད་མི་ཚོར་དཀའ་ངལ་ཆེན་པོ་འཕྲད་ཀྱི་ཡོད་འདུག
གསར་འགོད་པ། དོན་གོ
