ཨ་རིའི་རྒྱལ་ཚོཊ་ཀྱི་འགྲོ་བ་མིའི་ཐོབ་ཐང་སྙན་ཐོ།

གཟའ་ཕུར་བའི་ཉིན་ཨ་རིའི་རྒྱལ་ཚོགས་ཀྱིས་ ༢༠༡༣ ལོའི་འགྲོ་བ་མིའི་ཐོབ་ཐང་གི་སྙན་ཐོ་ཞིག་ཕྱིར་བསྒྲགས་བྱས་པའི་ནང་། རྒྱ་གཞུང་གིས་ད་ཆར་ཡང་བོད་དང་ཤིན་ཅང་གཙོས་པའི་མི་རིཊ་ཁག་གི་འགྲོ་བ་མིའི་གཞི་རྩའི་ཐོབ་ཐང་དང་རང་དབང་ལ་རྡོག་རོལ་གཏོང་གི་ཡོད་སྐོར་བཀོད་འདུག

ཟླ་འདིའི་ཚེས་ ༢༧ ཉིན་ཨ་རིའི་རྒྱལ་ཚོགས་ཀྱིས་ ༢༠༡༣ ལོར་འཛམ་གླིང་གི་རྒྱལ་ཁབ་དང་ས་གནས་ཁག་ ༢༠༠ ནང་གི་འགྲོ་བ་མིའི་ཐོབ་ཐང་སྐོར་ལ་ཉམས་ཞིབ་བྱས་པའི་སྙན་ཐོ་ཞིག་ཕྱིར་བསྒྲགས་བྱས་ཡོད་པ་དང་། དེའི་ནང་རྒྱ་ནག་གཞུང་གིས་ད་ཆར་ཡང་རྒྱ་ནག་ནང་ཁུལ་གྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་དང་མི་སྒེར་བཅས་ཀྱི་འདུ་འཛོམས་དང་། ཆོས་དད་རང་མོས། མི་མང་གི་འགྲོ་སྡོད་རང་དབང་བཅས་ལ་བཀག་སྡོམ་བྱེད་ཀྱི་ཡོད་པ་མ་ཟད། བོད་དང་ཤིན་ཅང་ནང་ཆོས་དད་དང་སྨ་བརྗོད། འགྲོ་སྡོད་སོགས་འགྲོ་བ་མིའི་གཞི་རྩའི་རང་དབང་ཐད་བཀག་སྡོམ་ནན་མོ་བྱེད་ཀྱི་ཡོད་སྐོར་སོགས་བཀོད་ཡོད་འདུག

སྙན་ཐོའི་ནང་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐད། ཉེ་བའི་དུས་སུ་རྒྱ་ནག་གིས་ངལ་རྩོལ་བསྒྱུར་བཀོད་ར་བ་མེད་པའི་བཟོས་ཡོད་པ་དང་། བྱིས་པ་གཉིས་བཙས་ཆོག་པའི་གུ་ཡངས་སྲིད་ཇུས་ལག་བསྟར་བྱེད་ཀྱི་ཡོད་ཚུལ་སོགས་བསྒྲགས་ཡོད་ཀྱང་། རྒྱ་ནག་ནང་ད་ཆར་ཚོགས་པ་དང་མི་སྒེར། གཞུང་དང་ལྟ་བ་མི་མཐུན་པའི་མི་སྣ། ཁྲིམས་རྩོད་པ། གསར་འགོད་པ། འགྲོ་བ་མིའི་ཐོབ་ཐང་རྩོད་ལེན་པར་བཅས་ལ་སྟངས་འཛིན་ལྟ་རྟོག་དང་བྱེད་ཀྱི་ཡོད་པ་མ་ཟད། བོད་དང་ཤིན་ཅང་ནང་མི་མང་གི་སྨྲ་བརྗོད་དང་ཆོས་ལུགས་འདུ་འཛོམས་སོགས་ཀྱི་ཐད་བཀག་སྡོམ་ཀྱི་ཡོད་པ་དང་། ད་ལྟའི་བར་དཔལ་འབྱོར་དང་མི་རིགས་དབྱེ་འབྱེད། ཆོས་ལུགས་དང་རིག་གཞུང་སྲུང་སྐྱོབ་སོགས་ཀྱི་ཐད་དམ་དྲག་བཀག་སྡོམ་བྱས་པའི་དབང་གིས། ༢༠༡༣ ལོར་བོད་མི་ ༢༦ རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་སྟེ་སྐུ་གྲོངས་ཡོད་པ་དང་། ཡུ་གུར་བ་ ༡༠༠ ཡས་མས་ཤིག་རྒྱ་གཞུང་བདེ་སྲུང་མི་སྣས་དམར་གསོད་བྱས་ཡོད་ཚུལ་སོགས་བཀོད་འདུག

དེ་བཞིན། སྔར་ལོའི་ཕྱི་ཟླ་ ༩ ནས་བཟུང་རྒྱ་ནག་གཞུང་གིས་སྤྱི་ཚོགས་འབྲེལ་མཐུད་དྲ་རྒྱ་དང་ཝེ་པོ་སོགས་ལ་སྟངས་འཛིན་ལྟ་རྟོག་དང་། དྲ་རྒྱ་དང་བརྒྱུད་ལམ་ཁག་ལ་སྔོག་བཤེར་བཅས་བྱས་ཡོད་པར་མ་ཟད། སྤྱི་དམངས་གསར་བའི་ལས་འགུལ་ཞུགས་ཡོད་པར་ཁ་གཡར་ཏེ་ཉུང་མཐར་ཡོང་མི་ ༢༩ ལྷག་འཛིན་བཟུང་བཀག་ཉར་བྱས་ཡོད་ཚུལ་སོགས་བཀོད་འདུག ཨ་རིའི་རྒྱལ་ཚོགས་ཀྱིས་ལོ་རེར་འདོན་བཞིན་པའི་འཛམ་གླིང་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་སྙན་ཐོར་དགག་ལན་སྤྲོད་ཆེད། ཕྱི་ལོ་ ༢༠༠༠ ལོ་ནས་བཟུང་རྒྱ་ནག་གཞུང་གིས་ཨ་རིའི་འགྲོ་བ་མིའི་ཐོབ་ཐང་སྐོར་ལ་སྙན་ཐོ་ཞིག་འདོན་གྱི་ཡོད་འདུག་ལ། དེ་རིང་ཚེས་ ༢༨ ཉིན་རྒྱ་ནག་དབུས་གསར་འགྱུར་སྡེ་ཁག་གིས་ ༢༠༡༣ ལོའི་ཨ་རིའི་འགྲོ་བ་མིའི་ཐོབ་ཐང་གི་སྙན་ཐོ་ཞེས་པ་ཞིག་ཕྱིར་བསྒྲཊ་བྱས་པའི་ནང་། ཨ་རིའི་གཞུང་གིས་རང་ཉིད་འཛམ་གླིང་གི་ འགྲོ་བ་མིའི་ཐོབ་ཐང་གི་ཁྲིམས་དཔོན་གྱི་ཚུལ་དུ་བསྡད་དེ། འཛམ་གླིང་གི་རྒྱལ་ཁབ་དང་ས་གནས་ཁག་ ༢༠༠ འགྲོ་བ་མིའི་ཐོབ་ཐང་སྐོར་ལ་སྐྱོན་བརྗོད་དང་དཔྱད་བསྡུར་བྱེད་ཀྱི་ཡོད་པ་དེས། ཨ་རིས་ཐབས་བརྒྱ་ཇུས་སྟོང་གིས་རང་གི་འགྲོ་བ་མིའི་ཐོབ་ཐང་གི་གནས་སྟངས་འགེབ་ཐབས་དང་བྱེད་ཀྱི་ཡོད་ཚུལ་དང་། ཨ་རིའི་གཞུང་གིས་ད་ལྟའི་བར་རྒྱལ་སྤྱིའི་ཁྲིམས་དང་འགལ་བའི་ཐོག་རྒྱལ་སྤྱིའི་ནང་གི་གསང་བར་ལྐོག་ཉན་ལྐོག་ལྟ་བྱས་ཡོད་ཚུལ་སོགས་སྐྱོད་བརྗོད་བྱས་ཡོད་འདུག

ཐེངས་འདིའི་ཨ་རིའི་རྒྱལ་ཚོགས་ཀྱི་བཏོན་པའི་སྙན་ཐོའི་ཐད། ད་ལྟ་ཨ་རིའི་ནེའུ་ཡོག་ཏུ་གནས་སྡོད་རྒྱ་རིཊ་འགྲོ་བ་མིའི་ཐོབ་ཐང་སྲུང་སྐྱོབ་པ་ཁྲིན་ཀོང་ཁྲིན་གྱིས། འདས་པའི་དུས་ཡུན་ནང་བཏོན་པའི་ཨ་རིའི་གཞུང་གིས་སྙན་ཐོ་ཁག་གིས་རྒྱ་ནག་གི་འགྲོ་བ་མིའི་ཐོབ་ཐང་གི་ཐོག་ནུས་པ་ཐོན་ཡོད་པ་དང་། ཐེངས་འདིའི་སྙན་ཐོའི་ནང་གི་མངོན་གསལ་དོད་ཤོས་ཀྲུང་གོ་གུང་ཁྲན་ཏང་གི་གནས་བབ་སྔར་དང་མི་འདྲ་བར། རྒྱལ་ཁྲིམས་ཀྱི་གོང་དུ་གནས་ཡོད་པ་གསལ་འདོན་བྱས་ཡོད་སྐོར་བཀོད་ཡོད་ཀྱང་། རྒྱ་ནག་གཞུང་གིས་ལག་བསྟར་བྱེད་ཀྱིན་པའི་གདུག་རྩུབ་ཅན་གྱི་སྲིད་སྐོར་གཏིང་ཟབ་དུ་བཀོད་ཐུབ་མེད་སྐོར་བརྗོད་འདུག

ཡང་ད་ལྟ་རྒྱ་ནག་ནང་གནས་སྡོད་རྒྱ་རིཊ་འགྲོ་བ་མིའི་ཐོབ་ཐང་རྩོད་ལེན་པ་ཧུའུ་ཅྰ་ཡིས་གསར་ལམ་དུ། ཨ་རིའི་གཞུང་གིས་ལོ་ལྟར་རྒྱ་ནག་ནང་ཁུལ་གྱི་འགྲོ་བ་མིའི་ཐོབ་ཐང་གི་གནས་སྟངས་ཐད་སྙན་ཐོ་བཏོན་པར་ཐུགས་རྗེ་ཆེ་ཞུ་བ་དང་སྦྲགས། སྙན་ཐོ་དེ་ནི་ཨ་རིའི་ངོས་ནས་རྒྱ་ནག་གི་འགྲོ་བ་མིའི་ཐོབ་ཐང་གི་ཐད་བྲིས་པའི་ལོ་རྒྱུས་ཤིག་དང་། ཀྲུང་གོ་སྲིད་གཞུང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཟིན་ཐོ་ཞིག་ཆགས་ཡོད་སྟབས། མ་འོངས་པར་རྒྱ་ཡིག་ཐོག་རྒྱ་ནག་ནང་ཡོད་པའི་ཨ་རིའི་གཞུང་ཚབ་ཀྱི་དྲ་ངོས་སུ་བཀོད་པ་ཡིན་ན། རྒྱ་ནག་མི་མང་གིས་རྒྱལ་ནང་གི་འགྲོ་བ་མིའི་ཐོབ་དང་འབྲེལ་བའི་གནས་ཚུལ་མང་དག་ཅིག་ཤེས་རྟོག་འབྱུང་བར་ཕན་ཐོགས་ཡོད་བརྗོད་འདུག

གསར་འགོད་པ། དོན་གོ