ཨ་རིའི་གྲོས་ཚོཊ་གོང་མར་ཐུཊ་སྨོན་དབུ་འབྱེད།

ཁ་སང་གཟའ་ཕུར་བའི་ཉིན་༧གོང་ས་མཆོག་ཨ་རིའི་གྲོས་ཚོཊ་གོང་མའི་ནང་ཕེབས་ཏེ་གྲོས་ཚོགས་ཀྱི་ཚོགས་འདུར་ཐུགས་སྨོན་དབུ་འབྱེད་གནང་ཡོད་འདུག

ཟླ་སྔོན་མའི་ཕྱི་ཚེས་ ༡༩ ཉིན་ནས་བཟུང་༸གོང་ས་མཆོག་གིས་ཨ་རིའི་ནང་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་པ་ལྟར། ཟླ་འདིའི་ཕྱི་ཚེས་ ༥ ཉིན་གྱི་ཕྱི་དྲོའི་ཆུ་ཚོད་ ༤ ཡས་མས་སུ་ཁ་ལེ་ཧྥོ་ནི་ཡ་དང་མེ་ནི་སོ་ཊ་བཅས་ཀྱི་མཛད་འཕྲིན་ལེགས་པར་གྲུབ་སྟེ་ཕྱིར་ཝ་ཤིན་ཌོན་དུ་ཞབས་སོར་བདེ་བར་བཀོད་ཡོད་པ་དང་། ཁ་སང་ཕྱི་ཚེས་ ༦ ཉིན་གྱི་སྔ་དྲོ་༧གོང་ས་མཆོག་ཨ་མི་རི་ཀའི་གྲོས་ཚོགས་གོང་མའི་གསོལ་འདེབས་ཞུས་དོན་ལྟར་གྲོས་ཚོགས་ཚོགས་ཁང་དུ་ཆིབས་བསྒྱུར་གནང་སྟེ། ཆོས་དཔོན་བྷེལ་རེ་བྷི་ལེ་ཁི་ (Bary Black) ཚབ་དུ་གྲོས་ཚོགས་ཀྱི་ཚོགས་འདུ་དབུ་འབྱེད་དང་འབྲེལ་ཐུགས་སྨོན་གནང་ཡོད་འདུག

སྐབས་དེར་གྲོས་ཚོགས་གོང་མའི་ཚོགས་གཙོ་སྐུ་ཞབས་པེ་ཊིར་ལི་ཧྰ (Patrick Leahy) མཆོག་ནས་༧གོང་ས་མཆོག་ལ་གྲོས་ཚོགས་ཀྱི་ཚོགས་དུས་དབུ་འབྱེད་དང་ཐུགས་སྨོན་མཛད་རྒྱུའི་གསོལ་འདེབས་ཞུས་པ་ལྟར། ༧གོང་ས་མཆོག་གིས་ཚོགས་འདུ་དབུ་འབྱེད་དང་འབྲེལ་ཐུགས་སྨོན་གནང་བ་དང་། དབྱིན་སྐད་ཐོག་ཡིག་བསྒྱུར་གནང་ཡོད་པའི་ཡི་གེ་ལྗགས་ཀློག་བཅས་གནང་རྗེས། གྲོས་ཚོགས་གོང་མའི་ཚོགས་གཙོ་མཆོག་གིས་གྲོས་ཚོགས་ནང་གཏམ་བཤད་གནང་སྟེ། ༧གོང་ས་མཆོག་གིས་ནམ་རྒྱུན་ཁོང་ཉིད་ནང་པའི་དགེ་སློང་དཀྱུས་མ་ཞིག་ཡིན་པའི་ངོ་སྤྲོད་གནང་གི་ཡོད་ཀྱང་། དངོས་ཡོད་ཀྱི་ཐོག་ནས་༧གོང་ས་ཏྰ་ལའི་བླ་མ་མཚོག་ནི་བོད་མི་ཙམ་མིན་པར་འཛམ་གླིང་སྤྱི་ཡོངས་ལ་བྱམས་བརྩེ་དང་ཞི་བདེ་ཁྱབ་སྤེལ་མཛད་མཁན་གྱི་སྐྱེས་ཆེན་ཞིག་ཏུ་ངོས་འཛིན་གྱིས་གུས་བཀུར་ཞུ་ཡུལ་ཞིག་ཡིན་པ་དང་། ཐེངས་འདིར་གྲོས་ཚོགས་ནང་ཆིབས་བསྒྱུར་གནང་བར་འཐུས་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་ཡོད་པ་དང་།  དེ་བཞིན། ལོ་མང་རིང་བོད་དོན་རྒྱབ་སྐྱོར་གནང་མཁན་གྲོས་ཚོས་འཐུས་མི་ཞིག་གིས་༧གོང་ས་མཆོག་ལ་ཆེ་བསྟོད་ཀྱི་གཏམ་བཤད་བཅས་གནང་ཡོད་པ་མ་ཟད། ༧གོང་ས་མཆོག་ལ་འཚམས་འདྲི་དང་ཆེ་བསྟོད་ཞུ་ཆེད་ཚོགས་འདུ་བར་གསེང་བཞག་ཡོད་འདུག

གྲོས་ཚོགས་ཚོགས་དུས་དབུ་འབྱེད་ཀྱི་ལས་རིམ་གྲུབ་རྗེས་༧གོང་ས་མཆོག་ཨ་རིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཇོན་བྷེལ་ནེར་མཆོག་དང་། ཕྱོགས་འགལ་མང་གཙོ་ཚོགས་པའི་དབུ་འཁྲིད་ལྕམ་ནན་སེ་པོ་ལོ་སེ་མཆོག གྲོས་ཚོགས་ཀྱི་ལས་བྱེད་ཁག་ཅིག་ལ་བཀའ་སློབ་གསུང་བཤད་དང་གནང་འདུག  ཉིན་རྒྱབ་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མིར་མཇལ་འཕྲད་དང་། གྲོས་ཚོགས་གོང་མའི་དབུ་འཁྲིད་སྐུ་ཞབས་ཧར་རེ་རེས་ཊི་ (Harry Reid) མཆོག་དང་། ཕྱོགས་འགལ་སྤྱི་མཐུན་ཚོགས་པའི་གྲོས་ཚོགས་གོང་མའི་དབུ་འཁྲིད་སྐུ་ཞབས་མེ་ཆི་མེ་ཁོ་ནེར་ (Mich McConnell) སོགས་གྲོས་ཚོགས་གོང་མའི་འཐུས་མི་ཁག་ཅིག་དང་མཇལ་འཕྲད་བཅས་གནང་ཡོད་འདུག

དེ་རིང་ཚེས་ ༧ ཉིན་ཨ་རི་བོད་ཀྱི་སྐུ་ཚབ་དོན་གཅོད་ཁང་དང་རྒྱལ་ཡོངས་ཡི་ཤུ་གཙུག་ལག་ཁང་ (The National Cathedral) གཉིས་ཀྱིས་གསོལ་འདེབས་ཞུས་དོན་ལྟར། ༧གོང་ས་མཆོག་གིས་ཝ་ཤིན་ཌོན་གྱི་ཡེ་ཤུའི་ལྷ་ཁང་ཞིག་ཏུ་མང་ཚོགས་ལ་༼ཆོས་ལས་འདས་པའི་གོ་ལ་སྤྱི་ཡོངས་ཀྱི་བཟང་སྤྱོད༽ཅེས་པའི་བརྗོད་གཞིའི་ཐོག་བཀའ་སློབ་གསུང་བཤད་གནང་གི་ཡོད་པ་མ་ཟད། ཡི་ཤུའི་ཆོས་དཔོན་གྷེ་རེལ་ཧིལ་ (Gary Hall) མཆོག་དང་ལྷན་དུ་འཛམ་གླིང་ནང་ཞི་བདེ་འཚོལ་ཐབས་སྐོར་དགོངས་ཚུལ་སྤེལ་རེས་དང་མང་ཚོགས་ལ་དྲི་བར་ལན་འདེབས་བཅས་ཀྱི་མཛད་རིམ་བསྒྲིགས་ཡོད་འདུག

ཕྱི་ཟླ་ ༣ ཚེས་ ༡༡ ཉིན་༧གོང་ས་མཆོག་གངས་ཅན་སྐྱིད་གཤོངས་དུ་ཆིབས་བསྒྱུར་གྱིས། བོད་མི་མང་སྤྱི་འཐུས་ལྷན་ཚོགས་ཀྱི་ལས་ཁུངས་དང་གྲོས་ཚོགས་ཚོགས་ཁང་དབུ་འབྱེད་རབ་གནས་གནང་རྒྱུ་ཡིན་འདུག་ལ།  ཚེས་ ༡༦ ཉིན་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་སོ་བཞི་པའི་གསུང་ཆོས་བསྩལ་རྒྱུ་ཡིན་འདུག

གསར་འགོད་པ། དོན་གོ