གུང་ཁྲན་ཏང་གི་ཐག་གཅོད་ལ་ལག་པ་ཞིག་བརྡབ་ནས་ཡོང་རྒྱུ་དེ་རེད།

ཞི་ཅན་ཕིན་དང་ལི་ཁེ་ཆིང་སོགས་ཀྱིས་སྣེ་ཁྲིད་པའི་རྒྱ་ནག་གཞུང་གི་དམངས་ཆེན་དང་སྲིད་གྲོས་གཉིས་ཀྱི་ཚོགས་ཆེན་སྔ་རྗེས་སུ་ཚོགས་སོང་། རྒྱ་ནག་ནང་དང་རྒྱལ་སྤྱི་ཐོག་དོ་སྣང་ཆེན་པོ་བྱེད་ཀྱི་ཡོད་ཀྱང་སྲིད་དོན་དབྱེ་ཞིབ་པ་ཚོས་ཚོགས་ཆེན་འདི་གཉིས་ལ་གྲུབ་འབྲས་ཆེན་པོ་ཐབས་མེད་པའི་ཚོད་དཔག་བྱེད་ཀྱིན་འདུག

ཟླ་འདིའི་ཕྱི་ཚེས་ ༣ དང་ ༥ ཉིན་སོ་སོར་རྒྱ་ནག་གི་རྒྱལ་ས་པེ་ཅིན་གྱི་མི་མང་ཚོགས་ཁང་ཆེན་མོ་རུ། རྒྱ་ནག་གི་སྐབས་ ༡༨ པའི་མགོ་ཁྲིད་གསར་པ་རྣམས་ཀྱི་ལོ་འཁོར་ཚོགས་ཆེན་ཐོག་མ་སྟེ་རྒྱལ་ཡོངས་སྲིད་གྲོས་དང་དམངས་འཐུས་སྐབས་ ༡༢ པའི་གྲོས་ཚོགས་ཐེངས་གཉིས་པ་གཉིས་དབུ་འཛུགས་གནང་ཡོད་ཅིང་། ཚོགས་ཐོག་ཏུ་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆིང་སོགས་དམར་ཤོག་ཚོགས་པའི་མགོ་ཁྲིད་རྣམ་པའི་གཙོས་འཐུས་མི་ ༣༠༠༠ ཙམ་མཉམ་ཞུགས་བྱས་ཡོད་འདུག

ཐེངས་འདིའི་ཚོགས་ཐོག་ཏུ། འདས་ལོའི་ལས་བསྡོམས་སྙན་སྒྲོན་དང་འཆར་ལོའི་སྔོན་རྩིས་གཏན་འབེབས། རྒྱ་ནག་གི་དཔལ་འབྱོར་སྲིད་བྱུས་དང་ཁོར་ཡུག་སྲུང་སྐྱོང་། སྤྱི་ཚོགས་འཛུགས་སྐྲུན་དང་རྒྱལ་ཁོངས་བརྟན་བརླང་སོགས་ཀྱི་སྐོར་ལ་གྲོས་བསྡུར་བྱེད་བཞིན་ཡོད་ཅིང་། ཐེངས་འདི་ནི་ཞི་ཅིན་ཕིན་རྒྱ་ནག་གི་སྲིད་འཛིན་དུ་བསྡད་རྗེས་ཀྱི་ལས་བསྡོམས་སྙན་སྒྲོན་ཐོག་མ་དེ་ཆགས་ཡོད་སྟབས། རྒྱལ་སྤྱིའི་ཐོག་དོ་སྣང་ཆེན་པོ་བྱེད་བཞིན་ཡོད།

གཟའ་ཕུར་བའི་ཉིན་གསར་འགོད་པས་བོད་མི་མང་སྤྱི་འཐུས་དང་རྒྱ་ནག་ཉམས་ཞིབ་པ་འབའ་བ་སྐལ་བཟང་རྒྱལ་མཚན་ལགས་སུ། ཐེངས་འདིར་གནད་དོན་གང་དག་ཐོག་བགྲོ་གླེང་དང་གཏན་འབེབས་འབྱུང་སྐོར་དྲིས་པར། ཁོང་གིས་འདི་ལྟར་བརྗོད་བྱུང་། “ སྤྱིར་བཏང་རྒྱ་ནག་གི་ཚོགས་འདུ་དེ་དག་ཕྱི་ཡི་རྣམ་པ་ཙམ་ལས། ནང་དོན་གྱི་ཆ་ནས་རང་དབང་དམངས་གཙོའི་ལུང་པའི་གྲོས་ཚོགས་ལྟར། ཁྲིམས་དང་སྲིད་བྱུས་གཏན་འབེབས་བྱེད་པའི་དབང་ཚད་ཡོད་པ་མ་རེད། མང་ཆེ་བ་རྒྱ་ནག་ཆབ་སྲིད་ལྷན་ཁང་གིས་ཐག་གཅོད་གང་བྱས་པ་དེར་ད་རེབ་ཚོགས་ཆེན་ཐོག་བགྲོ་གླེང་ཙམ་བྱས་ཏེ་རྒྱབ་སྐྱོར་ཡོད་པའི་རྣམ་པ་ཙམ་སྟོན་ཆེད་རེད།” ཅེས་བརྗོད་བྱུང་།

སྐལ་བཟང་རྒྱལ་མཚན་ལགས་ཀྱིས་ཚོད་དཔག་གི་ཚུལ་དུ་བརྗོད་དོན། “ ཡིན་ནའང་ལོ་གཉིས་ཙམ་གོང་ལ་མི་མང་འཐུས་མིའི་ཚོགས་ཆེན་དེ་དོན་དམ་གྱི་ཁྲིམས་བཟོའི་ངོ་བོར་བསྒྱུར་བར་ཤུགས་རྒྱག་དགོས་པའི་གཏན་འབེབས་བྱུང་བ་ལྟར། བསམ་ཚུལ་དེ་ཤུགས་ཆེན་པོ་ཞེ་དྲག་ཡོང་གི་ཡོད་སྟབས། ཐེངས་འདིའི་ཚོགས་ཆེན་ཐོག་དཔེར་ན། རྒྱ་ནག་ནང་ཁྲལ་འདྲ་མིན་ ༡༨ ཞིག་ཡོད་པ་ལས། ཁྲིམས་ཀྱིས་གཏན་འབེབས་བྱས་པའི་ཁྲལ་རིགས་གསུམ་མ་གཏོགས་མེད་པ་དང་། གཞན་ ༡༥ དེ་འཛིན་སྐྱོང་གི་བཀོད་རྒྱ་ཞིག་གི་འོག་ལ་བསྡུ་བཞིན་ཡོད་པ་དེ་རིགས་ལ་འགྱུར་བ་ཆེན་པོ་འགྲོ་སྲིད་པ་རེད། དེ་བཞིན། རྒྱ་ནག་གཞུང་གཉེར་དཔལ་འབྱོར་དང་། གཞུང་གི་དཔོན་རིགས་དང་ཚོང་པ་ལྐོག་འབྲེལ་གྱི་སྒེར་འདོམས་ལམ་ལུགས་མང་པོ་ཞིག་རྩ་གཏོར་གཏོང་བའི་སྲིད་བྱུས་དེ་སྔར་ལས་ཤུགས་ཆེ་རུ་འགྲོ་རྒྱུ་རེད་བསམ་གྱི་འདུག ” ཅེས་བརྗོད་བྱུང་།

སྐལ་བཟང་རྒྱལ་མཚན་ལགས་ཀྱིས་ཐེངས་འདིའི་ཞི་ཅིན་ཕིན་གྱི་རྣམ་འགྱུར་ཐད་འདི་ལྟར་བརྗོད་བྱུང་། “ སྤྱིར་བཏང་ཐེངས་འདིའི་ཚོགས་ཆེན་གཉིས་ཀྱི་ཐོག དམིགས་བསལ་གྱིས་གྲངས་ཉུང་མི་རིགས་དང་འབྲེལ་བའི་སྲིད་བྱུས་གཏན་འབེབས་བྱེད་ཐུབ་ཀྱི་ཡོད་པ་མ་རེད། ཡིན་ནའང་། ཚོགས་ཆེན་གྱི་ཉིན་དང་པོ་དེར་མགོ་ཁྲིད་རྣམས་ཚོགས་ཆུང་ཁག་ཏུ་ཆ་བགོས་བྱེད་སྐབས། ཞི་ཅིན་ཕིན་མི་རིགས་དང་ཆོས་ལུགས་སྡེ་ཚན་ནང་ཕྱིན་ཡོད་པ་མ་ཟད། མི་རིགས་སྲིད་བྱུས་སྐོར་ལ་སྐད་ཆ་ཤུགས་ཆེན་པོ་བཤད་ཡོང་གི་འདུག དེའི་ཐོག་ནས་ད་ལྟའི་རྒྱ་ནག་གི་སྐབས་ ༡༨ པའི་མགོ་ཁྲིད་གསར་པ་དེ་ཚོས་རྒྱ་ནག་ནང་གི་མི་རིགས་གནད་དོན་དེ་གལ་ཆེན་ཞིག་ཏུ་རྩི་བཞིན་ཡོད་པ་ཤེས་ཐུབ་པ་རེད་དྲན་གྱི་འདུག ”ཅེས་བརྗོད་བྱུང་།

གསར་འགོད་པས། ཐེངས་འདིར་འཐུས་མི་ཧ་ཅང་མང་པོ་ཞིག་ཚོགས་བཅར་ཞུས་ཡོད་པ་དེ་དག་གིས་མི་མང་གི་ཚབ་མཚོན་ཐུབ་ཀྱི་ཡོད་མེད་དྲིས་པར། ཁོང་གིས། “དམངས་འཐུས་ཚོགས་ཆེན་གྱི་འཐུས་མིའི་བརྒྱ་ཆ་ ༧༠ ལྷག་ཙམ་རྒྱ་ནག་གཞུང་གི་དཔོན་རིགས་ཏེ་གུང་ཁྲན་ཏང་མི་ཡིན་པ་དང་། གཞན་རྣམས་གཞས་པ་དང་གློག་བརྙན་འཁྲབ་སྟོན་པ། མི་རིགས་ཁ་ཤས་ཀྱིས་ཧུར་བརྩོན་དཔེ་བཟང་ཅན་སོགས་མཚན་མཐོང་གི་ངོ་བོ་མཚོན་བྱེད་རྐྱང་བསླེབས་ཡོད་པ་ལས། མི་མང་གི་བདེ་སྡུག་ཞུ་ཐུབ་པའི་མི་མང་གི་ངོ་ཚབ་མཚོན་ཐུབ་མཁན་ཧ་ལམ་གཅིག་ཀྱང་ཡོད་པ་མ་རེད། ཚོགས་བཅར་བ་དེ་དག་ལ་མང་ཚོགས་ཁྲོད་ ‘འགྱིག་ཐང་’ ཞེས་ལབ་ཀྱི་ཡོད་པ་ལྟར། རྒྱ་ནག་གུང་ཁྲན་ཏང་གིས་ཐག་གཅོད་གང་བྱས་པ་དེར་ལག་པ་ཞིག་བརྡབ་ནས་ཐོན་ཡོང་རྒྱུ་དེ་རེད། གཞན་ཁོང་ཅག་ལ་དབང་ཚད་གང་ཡང་ཡོད་པ་མ་རེད་ལ། མི་མང་གི་བདེ་སྡུག་སྐྱེལ་ཐུབ་པའི་ནུས་པ་དང་ལྷག་བསམ་ཡོད་མཁན་དེ་འདྲ་ཡང་མ་རེད།” ཅེས་བརྗོད་བྱུང་།

ཁོང་གིས་མུ་མཐུད་དུ་བརྗོད་དོན། “ དེང་སང་མཁས་པ་མང་པོ་ཞིག་གིས། ཆབ་སྲིད་གྲོས་མོལ་ཁང་དང་མི་མང་འཐུས་མིའི་ཚོགས་ཆེན་ཟེར་བ་དེ་དགོས་དོན་མི་འདུག གཅིག་ནས་ཁྲིམས་བཟོ་ཐུབ་ཀྱི་མེད་པ་དང་། གཉིས་ནས་ཁྲིམས་བཟོས་པ་དེ་ལག་བསྟར་ཐུབ་ཀྱི་མེད་སྟབས་ནུས་པ་གང་ཡང་འཐོན་གྱི་མེད། མ་འོངས་པར་དངོས་གནས་ཁྲིམས་བཟོ་ལྷན་ཁང་གི་ངོ་བོར་བསྒྱུར་དགོས་པ་ཡིན་ན། འཐུས་མི་སུམ་སྟོང་ཙམ་དགོས་དོན་མེད་པར་ལྔ་བརྒྱ་དྲུག་བརྒྱ་ཞིག་གིས་འགྲིག་གི་འདུག་ཟེར་གྱི་ཡོད་པ་རེད ” ཅེས་བརྗོད་བྱུང་།

མཇུག་ཏུ་ཁོང་ལ། སྲིད་གྲོས་མགོ་འཛུགས་ཀྱི་སྔར་ཉིན་དེར་རྒྱ་ནག་གཞུང་འབྲེལ་གསར་ལམ་དུ་ཀྲུའུ་ཡཱོང་ཁང་གི་བུ་ཀྲུའུ་པེན་གྱི་ཐོབ་ཐང་དང་ཀྲུའུ་ཡཱོང་ཁང་གི་མིང་དངོས་ལ་ཀྲུའུ་ཡཱན་ཀིན་ཟེར་གྱི་ཡོད་པ་སོགས་ཕྱིར་བསྒྲགས་བྱས་པ་དེའི་ཐོག་ནས་ཚོད་དཔག་ག་རེ་བྱེད་ཐུབ་ཀྱི་ཡོད་སྐོར་ཁོང་གིས། “ཀྲུའུ་ཡཱོང་ཁང་སྔོན་ཆད་རྒྱ་ནག་རྡོ་སྣུམ་ལས་ཁུངས་དང་ཉེན་རྟོག་ལས་ཁུངས། སྲིད་ཁྲིམས་ལྷན་ཁང་བཅས་ཀྱི་མགོ་ཁྲིད་ཡིན་སྐབས། ཁོ་རང་གིས་གསོ་སྐྱོང་བྱས་ཏེ་ད་ལྟ་དཔོན་པོ་ཆགས་ཡོད་པ་ཚང་མ་འཛིན་བཟུང་བཀག་ཉར་བྱས་ཚར་བ་རེད། རྒྱ་ནག་གཞུང་གིས་པགས་པ་བཤུས་པ་བཞིན་རིམ་པ་རིམ་པ་བྱས་ཏེ། ཀྲུའུ་ཡཱོང་ཁང་གི་གཡས་གཡོན་གྱི་ཚང་མ་འཛིན་བཟུང་བྱས་རྗེས། ད་རེབ་ཀྲུའུ་པེན་གྱི་གནས་ཚུལ་དེ་བཏོན་ཡོང་དུས། གཅིག་བྱས་ན་སྔོན་ཆད་པའོ་ཞི་ལེ་བཞིན་མི་མང་འཐུས་མིའི་ཚོགས་ཆེན་སྐབས་ཀྲུའུ་ཡཱོང་ཁང་གི་གནད་དོན་དངོས་སུ་གསལ་བསྒྲགས་བྱེད་པའམ་ཡང་ན་ཁོ་དངོས་སུ་འཛིན་བཟུང་བཀག་ཉར་བྱས་པ་ཁྱབ་བསྒྲགས་བྱེད་སྲིད་པ་རེད། ”ཅེས་བརྗོད་བྱུང་།

གསར་འགོད་པ། པདྨ་མཚོ།