ཏཱ་ལའི་བླ་མའི་ཁ་བཏཊ་ངས་ལས་ཁུངས་ནང་ཉར་ཡོད།

ཁ་སང་ཨ་རིའི་ནུབ་བྱང་བོད་རིགས་ཚོགས་པས་གསུམ་བཅུའི་དུས་དྲན་སྲུང་གཙི་གནང་སྟེ་ཆེད་བཅར་སྐུ་མགྲོན་ཕོརཊ་ལན་གྲོང་ཁྱེར་སྤྱི་ཁྱབ་པས་གཏམ་བཤད་གནང་ཡོད་འདུག

ཕྱི་ཟླ་ ༣ པའི་ཚེས་ ༡༠ རེས་གཟའ་ཟླ་བའི་ཉིན། ཕོར་ཊི་ལན་དང་ཝན་ཀོའི་ཝར་ (Portland/Vanccouver) ས་གནས་གཉིས་ཀྱི་བོད་མི་དང་ཕྱི་རྒྱལ་བོད་དོན་རྒྱབ་སྐྱོར་བ་བཅས་མི་མང་ཉིས་བརྒྱ་མ་ཟིན་ཙམ་གྱིས། ཕོར་ཊི་ལན་གྲོང་འཁྱེར་སྲིད་གཞུང་གི་ལས་ཁུངས་མདུན་ཐང་ལ་འདུ་འཛོམས་བྱས་ཏེ། བོད་མིའི་རང་དབང་སྒེར་ལངས་སུམ་བཅུའི་དུས་དྲན་ཐེངས་ ༥༥ པ་སྲུང་གཙི་གནང་སོང་།

མཛད་སྒོའི་ཐོག་མར་བོད་རྒྱལ་ཁབ་ཆེན་མོའི་རྒྱལ་གླུ་བཏང་བ་དང་སྦྲགས་ནུབ་བྱང་བོད་རིགས་ཚོགས་པའི་ཚོགས་གཙོ་མཆོག་གིས་བཀའ་ཤག་གི་གཏམ་བཤད་སྒྲོགས་སྦྱང་གནང་རྗེས། དུས་དྲན་ལ་ཆེད་བཅར་གནང་བའི་སྐུ་མགྲོན་གཙོ་བོ་ཕོརཊ་ལན་གྲོང་འཁྱེར་སྲིད་གཞུང་གི་སྤྱི་ཁྱབ་པ་སྐུ་ཞབས་ཆའར་ལིས་ཧེལ་སི་(Charlie Hales) མཆོག་གིས་གཏམ་བཤད་གནང་དོན། “ཐོག་མར་ཁྱེད་ཅག་གིས་ང་རང་ལས་འགུལ་འདིར་མཉམ་ཞུགས་བྱེད་པའི་གོ་སྐབས་ གནང་བར་ཐུགས་རྗེ་ཆེ་ཞུ། བོད་མིའི་ཚོགས་སྡེ་འདིའི་ངོས་ནས་གྲོང་འཁྱེར་གྱི་ལས་དོན་སྣ་མང་ལ་འཁུར་མཉམ་ལེན་གནང་སྟེ་ཟས་རིགས་མཁོ་སྤྲོད་ཀྱི་ལས་དོན་དང་། རོགས་སྐྱོར་ལས་འགན་སོགས་ལ་རྒྱབ་སྐྱོར་གནང་བར་ངས་གྲོང་འཁྱེར་འདིའི་ཚབ་བྱས་ཏེ་ཁྱེད་རྣམས་པར་ཐུགས་རྗེ་ཆེ་ཞུ། ཁྱེད་ཅག་གིས་འབད་བརྩོན་ཆེན་པོ་གནང་བ་ལ་བརྟེན་ནས། ལོ་སྔོན་མའི་ནང་༧གོང་ས་ཏཱ་ལའི་བླ་མ་མཆོག་ས་གནས་འདིར་དངོས་སུ་གདན་འདྲེན་ཞུ་ཐུབ་པ་བྱུང་བ་ནི་ང་ཚོ་ཚང་མའི་གཟི་བརྗིད་ཡིན།” ཞེས་བརྗོད་སོང་།

ཁོས་མུ་མཐུད་དུ་བརྗོད་དོན། ” ང་རང་ཉིད་ལ་མཚོན་ནའང་། མི་ཚེའི་ནང་གི་བརྗོད་དཀའ་བའི་ཉམས་མྱོང་ཞིག་ཡིན། གོ་སྐབས་དེ་བརྒྱུད་ནས་ཁོང་གི་ཞི་མཐུན་དང་བྱམས་བརྩེའི་བསླབ་བྱ་དེ་དག་ཕོརཊི་ལན་དང་འཛམ་གླིང་མི་མང་གིས་གོ་ཐུབ་པ་བྱུང་ཡོད། ངས་༧གོང་ས་ཏཱ་ལའི་བླ་མས་གནང་བའི་ཁ་བཏགས་དེ་ང་རང་གི་ལས་ཁུངས་སུ་ཉར་ཏེ། གནད་དོན་གང་རུང་ཐག་གཅོད་བྱས་སྐབས་ཁོང་གི་བསླབ་བྱ་དེ་དག་སེམས་ནང་དྲན་པ་བྱེད་ཀྱིན་ཡོད་ལ། ངས་ཁོང་གི་དགོངས་བཞེད་ལྟར། གྲོང་འཁྱེར་འདིར་ཞི་བདེ་བག་ཕེབས་ཡོང་བའི་འབད་བརྩོན་ཞུ་བཞིན་ཡོད། མ་འོངས་པར་ང་རང་དངོས་སུ་བོད་ལ་འགྲོ་ཐུབ་པའི་རེ་བ་བྱེད་ཀྱིན་ཡོད། རྗེས་ཕྱོགས་ཀྱང་ང་ཚོས་མུ་འཐུད་དུ་ཕན་ཚུན་ལ་མཛའ་བརྩེ་དང་གྲོགས་པོའི་འདུ་ཤེས་བཟུང་སྟེ། ལས་དོན་མང་པོ་བསྒྲུབ་ཐུབ་པའི་རེ་བ་ཡོད།”ཞེས་བརྗོད་སོང་། མཇུག་ཏུ་ས་གནས་གཞོན་ནུའི་དྲུང་ཆེ་ལགས་ཀྱིས་དབུས་གཞོན་ལྷན་གྱི་གཏམ་བཤད་སྒྲོགས་སྦྱང་གནང་རྗེས། མི་མང་གིས་སྐད་འབོད་དང་བྱང་ཆུབ་སེམས་མཆོག་འདོན་བཞིན་གྲོང་འཁྱེར་ནང་སྐོར་སྐྱོད་དང་བོད་དོན་སྐོར་གྱི་ཡིག་ཆ་འགྲེམ་སྤེལ་བྱས་སོང་།

དེ་རིང་གི་ཁྲོམ་སྐོར་སྐབས་ནམ་རྒྱུན་དང་མ་འདྲ་བར་བོད་ནང་གི་གནས་སྟངས་ལ་མྱ་ངན་མཚོན་ཆེད་ཡིན་ཞེས་སྐད་འབོད་ཤུགས་ཆེན་པོ་བརྒྱབ་མེད་པ་དང་། འདས་པའི་ལོ་ཤས་ནས་གྲོང་འཁྱེར་སྲིད་གཞུང་གི་ལས་ཁུངས་མདུན་དུ་སུམ་བཅུའི་དུས་དྲན་ཉིན་བོད་ཀྱི་རྒྱལ་དར་སྒྲེང་འཛུགས་བྱེད་སྲོལ་ཡོད་ཀྱང་། ད་ལོ་རྒྱལ་དར་སྒྲེང་མེད་པའི་སྐོར་ལ་ཚོགས་གཙོ་བདེ་ཆེན་བར་མཚོ་ལགས་ཀྱིས། “སྔོན་མ་ལྟར་རྒྱལ་དར་བསྒྲེང་རྒྱུའི་སྐོར་གྲོང་འཁྱེར་ལས་ཁུངས་ལ་ནན་ཞུ་བྱས་པ་ཡིན་ཏེ། ཁོ་ཚོས་ཆོག་མཆན་ཁྱོན་ནས་གནང་མ་སོང་”། ཟེར།

ནམ་རྒྱུན་ལྟར་ན། ས་ཁུལ་འདི་གཉིས་ཀྱི་བོད་མི་ཚོས་བོད་དོན་ལས་འགུལ་རིགས་སྤེལ་སྐབས། ཕོར་ཊི་ལན་(Portland) གྲོང་འཁྱེར་དང་མངའ་སྡེའི་རྒྱལ་ས་བསེ་ལམ(Salem)། ཛ་དྲག་གི་སྐབས་ལ་རེར། ཁེ་ན་ཌའི་གྲོང་འཁྱེར་ཝན་ཀོའི་ཝར་བྷི་སི་(Vanccouver BC) རུ་ཡོད་པའི་རྒྱ་ནག་གཞུང་ཚབ་ཡན་ལག་ཁང་(རྒྱའི་གཞུང་ཚབ་ཡན་ལག་ཁང་དེ་ནི་ས་གནས་འདི་དང་བར་ཐག་ཉེས་ཤོས་དེ་ཆགས་ཡོད)གི་མདུན་སོགས་སུ་སྤེལ་སྲོལ་ཡོད།

༢༠༡༠ ལོའི་ཡར་སྔོན་དུ་སུམ་བཅུའི་དུས་དྲན་དང་ངོ་རྒོལ་ལས་འགུལ་རིགས་མང་ཆེ་བ་མི་མང་འདུ་ཐང་(Pioneer Squre) དུ་འཛོམས་ཏེ་སྤེལ་ཀྱི་ཡོད་ཀྱང་། ༢༠༡༠ ལོ་ནས་བཟུང་དམིགས་བསལ་གྲོང་འཁྱེར་སྲིད་གཞུང་གི་ལས་ཁུངས་མདུན་དུ་བོད་ཀྱི་རྒྱལ་དར་སྒྲེང་འཛུགས་ཀྱིས་དུས་དྲན་སྲུང་གཙི་ཞུ་བཞིན་ཡོད་ཅིང་། དེ་ནི་ནུབ་བྱང་བོད་རིགས་ཚོགས་པ་གཙོ་བྱས་པའི་ས་གནས་གཞོན་ནུ་དང་མི་མང་བཅས་མཉམ་རུབ་ཀྱིས་གྲོང་འཁྱེར་སྲིད་གཞུང་ལ་ཐེངས་མང་ཞུ་སྐུལ་བྱས་ཏེ། ༢༠༡༠ ལོ་ནས་ཟླ་ ༣ ཚེས་ ༡༠ ཉིན་ལ་༼བོད་ཀྱི་ཉིན་མོ་༽ཞེས་གཏན་འབེབས་གནང་ཏེ། ལོ་ལྟར་གཞུང་འབྲེལ་གྱིས་སྲུང་གཙི་ཞུ་བཞིན་ཡོད། སྐབས་དེའི་ཕོརཊི་ལན་གྲོང་འཁྱེར་སྲིད་གཞུང་གི་ཐག་གཅོད་ལ་རྒྱ་ནག་གཞུང་གིས་དངོས་ཤུགས་བརྒྱུད་གསུམ་ནས་གནོན་ཤུགས་རིམ་པར་སྤྲད་པ་མ་ཟད། རྒྱ་ནག་གཞུང་ཚབ་ནས་ཐེངས་གཉིས་ལ་མི་སྣ་ཆེད་མངགས་ཀྱིས་ཕོར་ཊི་ལན་གྲོང་འཁྱེར་སྲིད་གཞུང་གི་མགོ་ཁྲིད་ཚོར་ཉེན་བརྡ་བཏང་སྟེ། འོར་རྒན་མངའ་སྡེ་དང་རྒྱ་ནག་བར་གྱི་ཚོང་འབྲེལ་ལ་གནོད་པ་ཚབ་ཆེན་ཐེབས་རྒྱུ་ཡིན་ཚུལ་དང་། ཐ་ན་ཕོར་ཊི་ལན་གྱི་ཨེམ་བྷི་ཨེ་(NBA)ལག་རྩེད་སྤོ་ལོའི་རུ་ཁག་(Trail Blazers)གི་རྩེད་རིགས་དག་རྒྱ་ནག་ནང་སྟོན་མི་ཆོག་པ་བཟོ་རྒྱུ་ཡིན་ཚུལ་སོགས་བརྗོད་ཡོད་ཀྱང་། སྐབས་དེའི་གྲོང་འཁྱེར་སྤྱི་ཁྱབ་པ་སེམ་ཨ་དམ་(Sam Adams)ལགས་གཙོས་པའི་མགོ་ཁྲིད་དག་གིས་རྒྱའི་གནོན་ཤུགས་ལ་ཁ་ཡ་བྱས་མེད་པ་མ་ཟད། གྲོང་འཁྱེར་སྲིད་གཞུང་གི་འགན་འཛིན་སྐུ་ཞབས་རན་ཌི་ལན་ནརཊ་(Randy Leonard)ལགས་ཀྱིས་རྒྱ་ནག་གི་འཐུས་མི་ཚོར། “གལ་སྲིད་ཚོང་འབྲེལ་གྱི་དམིགས་ཡུལ་གྲོང་འཁྱེར་གྱི་འགྲོ་ལུགས་དང་ང་ཚོའི་རང་དབང་ཉོ་བའི་ཆེད་དུ་ཡིན་ཚེ་ང་ཚོར་ཚོང་འབྲེལ་དེ་དག་དགོས་དོན་རྩ་ནས་མི་འདུག” ཅེས་སོགས་ལན་འདེབས་གནང་སྟེ། རྒྱ་ནག་གཞུང་ཚབ་ཀྱི་འཐུས་མི་དེ་དག་ཁ་སྐྱེངས་པོའི་ངང་ཕྱིར་ལོག་དགོས་བྱུང་བའི་གནས་ཚུལ་ཡང་བྱུང་ཡོད།

ས་གནས་གསར་འགོད་པ། ཕྱོར་ཚང་འཇམ་དབྱངས།