ཟླ་འདིའི་ཚེས་ ༡༩ ཉིན་རང་ཁྱིམ་ནས་འདས་གྲོངས་སུ་གྱུར་བའི་སྒོ་ཤུལ་བློ་བཟང་ལགས་ཀྱིས། ༢༠༡༢ ཕྱི་ཟླ་ ༩ ཚེས་ ༢༨ ཉིན་ཀན་སུའུ་ཞིང་ཆེན་ཏེན་ཤེན་གྲོང་ཁྱེར་གྱི་བཙོན་ཁང་ནང་མནར་གཅོད་འོག་བྲིས་པའི་ཞལ་ཆེམས་ཡི་གེ་ཞིག་ཕྱི་རུ་འབྱོར་འདུག
ཁོང་གི་ཞལ་ཆེམས་ཡི་གེ་༼འགྱོད་སེམས་མེད་པའི་ཁྲིམས་པ༽ཞེས་པའི་ནང་དུ། ང་ལ་ཁྱིམ་ཚང་ཡོད་ལ་ཕ་མ་མིང་སྲིང་དང་ཆུང་མ་བུ་རྒྱུད་ཀྱང་ཡོད། དེ་དག་དང་འབྲེལ་བའི་བཅོས་མིན་གྱི་བརྩེ་དུང་ཡོད་ལ། བརྩེ་དུང་དེའི་ཆེད་དུ་ཚེ་སྲོག་གཏོང་ཕོད་པའི་ཆོད་སེམས་ཀྱང་ཡོད། འོན་ཀྱང་རང་མི་རིགས་ཀྱི་ཆེད་དུ་བརྩེ་དུང་དེ་དག་ཤོར་ཀྱང་འགྱོད་སེམས་མེད། ང་ནི་རང་རིགས་ལ་དགའ་བའི་འབྲོག་པ་གླེན་པ་ཞིག་ཡིན་པས་རང་མི་རིགས་ཀྱི་ཆེད་དུ་ཅི་ཞིག་ཀྱང་བསྒྲུབ་ན་འདོད། ཁོག་གདུག་བསྲིངས་པའི་མནར་གཅོད་ཀྱི་འོག་ནས་ན་ཁོས་ཚ་གཟེར་གྱིས་སྐམ་རིད་དུ་གྱུར་བའི་ལུས་པོ་འདི་འདི་ལྟར་ཤོར་སྲིད་ཀྱང་འགྱོད་སེམས་མེད། མེ་ཕུང་གི་ཀློང་ནས་ཡོད་ཚད་ལ་འགྲེལ་བཤད་རྒྱག་ཐུབ་པའི་དཔའ་རྒོད་ཚོའི་རྗེས་སུ་ཞུགས་འདོད་ཀྱང་སྙིང་སྟོབས་ཀྱིས་མ་འདང་། ཡིན་ཡང་དྲང་བདེན་མ་ཡིན་པའི་གནས་སྟངས་དང་རང་དབང་དང་འདྲ་མཉམ་ཟེར་བ་གླེང་ས་མེད་པའི་ཁོར་ཡུག་འདིར་མགོ་སྒུར་མ་འདོད་པར་གནས་བབ་འདི་འདྲར་ལྷུང་བའི་འབྲོག་གླེན་ང་ལ་འགྱོད་སེམས་གང་ཡང་མེད། ཅེས་དང་།
ཡང་ཁོང་གིས། ངས་མཐོང་འདོད་པ་རང་དབང་གི་འཇིག་རྟེན་ན་འཆམ་མཐུན་གྱི་འཚོ་བར་སྤྱོད་པའི་མི་རིགས་དེ་ཡིན་པ་ལས། མུན་ནག་གི་ཁོར་ཡུག་ན་མནར་གཅོད་ཀྱི་ཚོར་བ་རྒུམ་པའི་སྤྱི་ཚོགས་དེ་མ་ཡིན། གཅེས་ཤིང་དུང་བའི་མ་སྲིང་ཕུ་ནུ། བརྩེ་ཞིང་མཐུན་པའི་ཆུང་མ་བུ་རྒྱུད་སོགས་ལ་མི་ཚེའི་ལམ་སྐེད་ནས་རང་དབང་མེད་པར་གློ་བུར་ཏུ་གྱེས་ཕྱག་འབུལ་དགོས་སྲིད་ཀྱང་འགྱོད་སེམས་གང་ཡང་མེད། ང་འདི་ལྟར་སྐྱོ་ལྷང་ལྷང་དང་། ལྗིད་ཏིག་ཏིག་འཁྱག་སིབ་སིབ་ངང་འགྲོ་དགོས་ཡང་རང་སེམས་ན་ནག་ཉེས་ཟེར་བ་ཞིག་དྲན་རྒྱུ་མི་འདུག འདི་ང་རང་འཇིག་རྟེན་འདིར་ཡོང་བའི་ལག་ཡོང་གཅིག་པོ་རེད་བསམ་ཡོད། འདི་མ་གཏོགས་ང་ལ་གང་ཡང་མེད་མོད་དེ་མ་གཏོགས་ང་ལ་ཅི་ཡང་མི་དགོས། ཞེས་བྲིས་འདུག
ཞལ་ཆེམས་ཡི་གེའི་མཇུག་ཏུ། ང་ལ་འགྱོད་སེམས་གཅིག་ལྗིད་ཏིག་གེར་ལྷག་ཡོད། དེ་ནི་ང་ཚོའི་མི་རིགས་འདི་ལ་ནང་ཕན་ཚུན་ན་སྤུན་ཟླའི་འདུ་ཤེས་ཟབ་མོ་ཞིག་མེད་པས་རྡོག་རྩ་གཅིག་སྒྲིལ་གྱི་ཁ་ཕྱོགས་བརྟན་པོ་ཞིག་ཆགས་ཐུབ་མེད་པ་དེ་ཡིན། སྤུན་ཟླ་ཚོ། ང་ཚོ་ལ་མིག་རྒྱང་གིས་འཚོས་པའི་ལངས་ཕྱོགས་ཡོད་དགོས་ལ་ང་ཚོ་ལ་ཁ་ཕྱོགས་བརྟན་པའི་མཐུན་སྒྲིལ་ཡོད་དགོས། རང་གི་མི་རིགས་ལ་བཀའ་དྲིན་ཆེ་བའི་མི་སྣ་དང་། ཆོས་དང་རིག་གཞུང་ཡུལ་སྲོལ་གོམས་གཤིས་སོགས་ལ་ཡིད་ཆེས་ཡག་པོ་ཡོད་དགོས་པ་དེ་རེད། བོད་ཁ་བ་ཅན་གྱི་སྤུན་ཟླ་ཚོ། ཚང་མས་མཐུན་སྒྲིལ་བྱོས། མཐུན་སྒྲིལ་ཁྲི་ལོར་ཤོག ཁྲི་ལོ་ནས་ཁྲི་ལོར་ཤོག ཅེས་བཀོད་འདུག
གསར་འགོད་པ། པདྨ་མཚོ།
