རྒྱ་གཞུང་གིས་ནགས་ཤོད་འབྲི་རུ་རྫོང་གི་ན་གཞོན་རྩོམ་པ་པོ་ཞོགས་དྲིལ་ལགས་དང་ཁོང་གི་གྲོཊ་པོ་གཡུལ་རྒྱལ་གཉིས་ལ་ལོ་ ༡༠ ནས་ ༡༣ བར་གྱི་ཁྲིམས་ཐག་བཅད་འདུག
ཉེ་ཆར་བོད་རང་སྐྱོང་ལྗོངས་མི་དམངས་ཁྲིམས་ཁང་ཟེར་བས། སྔར་ལོའི་ཟླ་ ༡༠ ཚེས ༢༨ ཉིན་ནགས་ཤོད་འབྲི་རུ་རྫོང་གི་གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་ནམ་ཞོགས་དྲིལ་ལགས་སུ་ལོ་ ༡༣ དང་། ཁོང་གི་གྲོགས་པོ་གཡུལ་རྒྱལ་ལགས་སུ་ལོ་ ༡༠ བཙོན་འཇུག་ཁྲིམས་ཐག་བཅད་ཡོད་འདུག
ཤི་འདྲེ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། སྔར་ལོའི་ཕྱི་ཟླ་ ༩ པའི་ཚེས ༢༧ ཉིན་ནགས་ཤོད་འབྲི་རུ་རྫོང་འབྲི་རུ་ཤང་མོ་བ་གྲོང་དང་སྨོན་ཁྱིམ་གྲོང་གཙོས་པའི་ས་གནས་ཡུལ་མི་ཚོས་རྒྱ་མིའི་རྒྱལ་དར་ཁང་སྟེང་དུ་བསྒྲེང་འཛུཊ་མ་བྱས་པར་མོ་རྔུལ་ཆུར་གཡུགས་པའི་གནས་ཚུལ་བྱུང་བ་མ་ཟད། ཚེས ༢༨ ཉིན་བོད་མི་སྟོང་ཕྲག་ལྷག་རྫོང་མི་དམངས་སྲིད་གཞུང་མདུན་དུ་འཛོམས་ཏེ་ཟས་བཅད་ངོ་རྒོལ་དང་། མོ་བ་གྲོང་དང་སྨོན་ཁྱིམ་གྲོང་དུ་ཉེས་མིང་འཛིན་བཟུང་བྱས་པའི་ཡུལ་མི་ཚོ་རྒྱབ་ལངས་བྱས་པ་དང་། རྫོང་གི་སློབ་གྲྭ་ཆུང་འབྲིང་གི་སློབ་མ་ཚོས་ངོ་རྒོལ་གྱིས་སློབ་གྲྭ་སྟོང་ཕ་ཆགས་ཡོད་འདུག
རྫོང་ཐོག་གི་ཛ་དྲག་གནས་སྟངས་ཐད་བོད་རང་སྐྱོང་ལྗོངས་ཀྱི་མགོ་ཁྲིད་ཝུ་ཡེང་ཅེ་དང་རྡོ་ཐོག་སོགས་འབྲི་རུར་ཡོང་སྟེ་འཇམ་རྩུབ་ཅི་རིཊ་ཀྱིས་ངོ་རྒོལ་འཇཊ་ཐབས་བྱས་པ་མ་ཟད། རྒྱ་ནག་མགོ་ཁྲིད་ཝུན་ཡེང་ཅེ་སོགས་ཀྱིས་མཚན་མོར་ཐང་ཉལ་གྱིས་ངོ་རྒོལ་བྱེད་པའི་མི་མང་ལ་ངོ་རྒོལ་མཚམས་འཇོག་དགོས་པའི་གཏམ་བཤད་བྱེད་སྐབས། རྩོམ་པ་པོ་ཞོགས་དྲིལ་དང་ཁོང་གི་གྲོགས་པོ་གཡུལ་རྒྱལ་སོགས་ཀྱིས་མདུན་དུ་ཐོན་ཏེ། མི་དམངས་ཀྱི་བདེ་སྡུག་བཤད་སྟབས། ཟླ་ ༡༠ ཚེས ༡༡ ཉིན་གྱི་མཚན་མོའི་ཆུ་ཚོད ༡།༠༠ ཙམ་ལ་རྫོང་ཉེན་རྟོག་མི་སྣ་ཁ་ཤས་གློ་བུར་དུ་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་དུ་འབྱོར་ཏེ། ཞོགས་དྲིལ་སྡོད་ཁྱིམ་དུ་འཛུལ་ནས་འཛིན་བཟུང་བྱས་ཡོད་འདུག
ཕྱི་ཉིན་སྔ་དྲོ་ཁོང་གི་གྲོགས་པོ་གཡུལ་རྒྱལ་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་དུ་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད། ༢༠༡༤ ལོའི་ཟླ་ ༣ པར་རྒྱ་གཞུང་གིས་ཁོང་གཉིས་ཀྱི་ནང་མི་རེ་རེར་ཐུག་ཆོག་པའི་བཀའ་འཁྲོལ་སྐབས། གཞི་ནས་ལྷ་སའི་ཆུ་ཤུར་བཙོན་ཁང་དུ་བཙོན་འཇུག་བྱས་ཡོད་པ་ཤེས་ཡོད་འདུག་ལ། སྐབས་དེར་ནང་མི་དང་ཁོང་གཉིས་བར་སྐར་མ་ ༡༠ རེའི་སྐད་ཆ་བཤད་པའི་གོ་སྐབས་བྱུང་ཡོད་པ་དང་། ཁྱིམ་ཚང་གིས་དུས་དེར་གཞི་ནས་རྩོམ་པ་པོ་ཞོགས་དྲིལ་ལ་ལོ་ ༡༣ དང་། ཁོང་གི་གྲོགས་པོ་གཡུལ་རྒྱལ་ལ་ལོ་ ༡༠ ཁྲིམས་ཐག་བཅད་ཡོད་པ་ཤེས་འདུག
རྒྱ་གཞུང་གིས་ཁོང་གཉིས་ལ་ཁྲིམས་འགལ་ཐོག་སྲིད་གཞུང་མགོ་ཁྲིད་ལ་སྐད་ཆ་འདྲ་མིན་བཤད་པ་དང་། སྤྱི་ཚོགས་ནང་ཟིང་ཆ་བསླངས་པའི་ཉེས་མིང་འོག བོད་རང་སྐྱོང་མི་དམངས་ཁྲིམས་ཁང་ཟེར་བས་དྲང་བདེན་མིན་པའི་ཁྲིམས་ཐག་བཅད་པ་ལས། ཁྲིམས་རྭ་ཚོགས་པ་དང་ཁྱིམ་མིར་ཁྲིམས་ཆད་ཀྱི་བརྡ་ལན་སོགས་གང་ཡང་སྤྲད་མི་འདུག་ལ། གནས་ཚུལ་གོ་རྗེས་བོམ་ཕན་ཤང་གྲོང་སྟེང་མཁར་གྲོང་། རི་ཞིང་གྲོང་སོགས་གྲོང་ཚོ་ཕལ་ཆེ་བས་ས་གནས་སྲིད་གཞུང་ལ་ཁོང་གཉིས་ཀློད་གྲོལ་གཏོང་དགོས་པའི་སྙན་ཞུ་ཕུལ་བ་དང་ཞུ་སྐུ་བྱས་ཀྱང་། རྒྱ་གཞུང་གིས་ཉན་འཇོག་རྩ་བ་ནས་མེད་པ་མཟད། ཡར་ཞུ་བྱེད་མཁན་ཁག་ཅིག་སྔ་ཕྱི་འཛིན་བཟུང་དང་དངུལ་གྱི་ཆད་པ་སོགས་བཅད་ཡོད་འདུག
ཞོགས་དྲིལ་ལགས་ནི། ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་པ་དང་། ཆུང་དུས་གཤམ་ཆུ་ཤང་སློབ་ཆུང་འགྲིམས་ཡོད་འདུག ༢༠༠༡ ལོར་སྡེ་དགེ་དཔལ་ཡུལ་བཤད་གྲར་ཞུགས་ཏེ་ནང་ཆོས་གཙོས་པའི་བོད་ཀྱི་རིག་གནས་ལ་སློབ་གཉེར་གནང་ཡོད། ༢༠༠༩ བར་སྡེ་དགེ་དཔལ་ཡུལ་དང་གསེར་རྟ་ལྔ་རིག་ནང་བསྟན་སློབ་གླིང་། སྡེ་དགེ་ཞེ་ཆེན། སྡེ་དགེ་རྫོགས་ཆེན། ཡ་ཆེན་སྒར། རྔ་པ་ཀིརྟི་དགོན་བཅས་སུ་སློབ་སྦྱོང་དང་གྲྭ་སྐོར་ལ་ཕེབས་འདུག ༢༠༠༩ ལོའི་མཇུག་ཏུ་སྐྱ་སར་བབས་ཏེ་ནུབ་བྱང་མི་རིགས་སློབ་གླིང་དུ་ལོ་ ༤ རིང་རྒྱའི་སྐད་ཡིག་གི་ཐོག་རྩོམ་རིག་ཆེད་སྦྱོང་གནང་ཡོད་འདུག ༢༠༡༣ ལོའི་ཟླ་ ༥ པར་རྒྱ་གཞུང་གིས་ཁོང་དང་སློབ་ཕྲུག་གཞན་ཁག་ཅིག་གིས་ནམ་རྒྱུན་སློབ་གྲྭའི་ནང་ཁྲིམས་འགལ་ཐོག་བགྲོ་གླེང་གནང་གི་ཡོད་པའི་ཉེས་འཛུཊ་འོག་ནུབ་བྱང་མ་རིགས་སློབ་ཆེན་ནས་ཕྱིར་འཕུད་བཏང་ཡོད་འདུག་ལ། སྔར་ལོའི་ཕྱི་ཟླ ༦ པར་ཕ་ཡུལ་དུ་ལོག་ཏེ་༼མི་རབས་གསར་པའི་མགྲོན་ཁང་༽ཞེས་པ་ཞིག་བཙུགས་ཡོད་པ་དང་། ཞོར་དུ་ཟུར་སྦྱོང་འཛིན་གྲྭ་གཉེར་ནས་ན་གཞོན་ཚོར་རིན་མེད་ཐོག་བོད་ཡིག་དང་རྒྱ་ཡིག་སློབ་ཁྲིད་བྱས་ཡོད་འདུག
ཁོང་གིས་ ༢༠༠༧ ལོར་བརྩམས་ཆོས་༼ཁ་བ་ལ་འཁྲེང་བའི་དུང་སེམས་ཀྱི་ཅོང་སྒྲ༽ ཞེས་པ་དང་། ༼གངས་རིའི་ལས་དབང་༽ ཞེས་པའི་དེབ་གཉིས་པར་བསྐྲུན་བྱས་ཏེ་ཀློག་པ་པོས་གདེང་འཇོག་ཆེན་པོ་གནང་ཡོད། ༢༠༡༢ ལོ་ནས་བཟུང་ནུབ་བྱང་མི་རིགས་སློབ་ཆེན་དུ་སློབ་གཉེར་ཞོར་དུ་སློབ་གྲོཊ་ཁག་ཅིག་དང་མཉ་དུ་༼མི་རབས་གསར་པ༽ཅེས་པའི་ལོ་དེབ་ཅིག་རྩོམ་སྒྲིག་བྱས་ཡོད་ལ། རྒྱ་ཡིག་ཐོག་ཞོགས་དྲིལ་པོད་ཁུག་ཅེས་པ་གཉེར་ནས་༼མདོག་ངན་གྱི་ལྷ་ས༽ དང་། ༼དཀོན་མཆོག་འཆི་བར་འོས༽ཞེས་པའི་རྩོམ་ཡིག་མང་པོ་སྤེལ་ཡོད།
གཡུལ་རྒྱལ་ལགས་ནི། ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་པ་དང་། ད་ལྟ་རང་ལོ་ ༢༦ ཡིན་འདུག ཆུང་དུས་གཤམ་ཆུ་ཤང་སློབ་ཆུང་འགྲིམས། ༢༠༠༥ ལོར་རྫོང་ཉེན་རྟོག་ལས་ཁུངས་སུ་ལས་གནས་བསྐོ་བཞག་གིས་ལོ་ ༧ རིང་ལས་ཀ་བྱས་ཡོད། ༢༠༠༧ ལོར་ཉེན་རྟོག་པའི་ལས་ཀ་ནས་དགོངས་པ་ཞུས་ཏེ་རྫོང་ཐོག་ཏུ་ཚོང་ལས་གཉེར་ཡོད། ཁོང་གིས་ཉེན་རྟོག་པའི་ལས་ཀ་བྱས་སྐབས་མི་དམངས་ལ་དྲང་བདེན་གྱི་ལས་ཀ་བྱས་ཏེ་ཕན་ཐོགས་ཆེན་པོ་བྱུང་ཡོད་འདུག ཁོང་གི་བཟའ་ཟླའི་མིང་ལ་ལྷ་སྐྱིད་སྒྲོལ་མ་ཞུ་བ་དང་། ཁོང་བཟའ་ཟླ་གཉིས་ལ་ཕྲུ་གུ་གཉིས་ཡོད་འདུག
གསར་འགོད་པ། དོན་གོ
