དེ་རིང་སྔ་དྲོ་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་སྲིད་བྱུས་ཉམས་ཞིབ་ཁང་གི་དྲ་རྒྱ་དང་། ཉམས་ཞིབ་ཁང་གིས་བཏོན་པའི་༼ད་ལྟའི་བོད་ནང་གི་དབང་འཛིན་པ༽ཞེས་པའི་དཔེ་དེབ་དབུ་འབྱེད་བཅས་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༠༠ ཐོག་གངས་སྐྱིད་བཀའ་ཤག་ཚོགས་ཁང་དུ། སྲིད་སྐྱོང་བློ་བཟང་སེང་གེ་མཆོག་དང་། སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལཊ། ཉམས་ཞིབ་ཁང་གི་གྲོས་སྟོན་པ་བློ་བཟང་ལཊ། ཟུང་དྲུང་འཕགས་པ་ཚེ་རིང་ལཊ་དང་དོན་འགྲུབ་རྒྱལ་པོ་ལཊ། ཉམས་ཞིབ་ཁང་གི་ལས་བྱེད་བཅས་འདུ་འཛོམས་ཐོག སྲིད་སྐྱོང་མཆོག་གིས་སྲིད་བྱུས་ཉམས་ཞིབ་ཁང་གི་དྲ་རྒྱ་དབུ་འབྱེད་དང་། བོད་རིགས་འདུས་སྡོད་བྱས་པའི་ཁུལ་དང་གྲོང་ཁྱེར་ནས་ལྗོངས་དང་ཞིང་ཆེན་རིམ་པ་བར་གྱི་དཔོན་རིགས་ངོ་སྤྲོད་ཀྱི་དེབ་༼ད་ལྟའི་བོད་ནང་གི་དབང་འཛིན་པ༽ ཞེས་པ་དབུ་འབྱེད་བཅས་གནང་སོང་།
མཛད་སྒོའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་ཟུང་དྲུང་དོན་འགྲུབ་རྒྱལ་པོ་ལགས་ཀྱིས། དྲ་རྒྱ་དེའི་ནང་སྲིད་བྱུས་ཉམས་ཞིབ་ཁང་གི་བགྲོ་གླེང་ཚོགས་འདུ་རིམ་པའི་གནས་ཚུལ་དང་རྩོམ་ཡིག དེ་བཞིན་ཁོང་ཚོས་འགྲེམས་སྤེལ་བྱས་པའི་དཔེ་དེབ་སོགས་ཡོད་སྐོར་ངོ་སྤྲོད་དང་འབྲེལ་བརྗོད་དོན། “ བོད་ཀྱི་སྲིད་བྱུས་ཉམས་ཞིབ་ཁང་གི་དྲ་རྒྱ་ལ་དམིཊ་བསལ་ག་རེ་སྟོན་རྒྱུ་ཡོད་ཟེར་ན། ང་ཚོས་ཟླ་རེ་བཞིན་ཉམས་ཞིབ་པའི་ལྟ་སྟངས་ཀྱི་ཐོག་ནས་བོད་དང་འབྲེལ་བའི་གནས་ཚུལ་གལ་ཆེན་ཁག་གི་རྒྱབ་ལྗོངས་ལ་མཁས་པའི་དཔྱད་གླེང་གི་བརྙན་ཐུང་རེ་བཟོ་བཞིན་ཡོད། ད་རེས་བོད་མིའི་རང་ལུས་མེར་བསྲེགས་སྐོར་བཟོས་ཡོད། ཟླ་བ་རྗེས་མར་དཔྱད་གླེང་གི་བརྗོད་གཞི་གཞན་ཞིག་འདེམས་རྒྱུ་ཡིན། གནས་ཚུལ་དང་བསྟུན་ནས་བོད་སྐད་དང་རྒྱ་སྐད་གང་གི་ཐོག་དགོས་མིན་གོ་བསྡུར་བྱ་འཆར་ཡོད། ད་ལྟའི་ཆར་ང་ཚོའི་དྲ་རྒྱ་(www.tibetpolicy.net) ཐོག་གི་གཙོ་བོ་བོད་ཀྱི་སྲིད་བྱུས་ཉམས་ཞིབ་ཁང་གི་ལས་ཀ་ག་རེ་གནང་གི་ཡོད་པ་དེ་ང་ཚོ་བོད་པའི་ཆེད་དུ་འགྲེམས་སྤེལ་བྱེད་བཞིན་ཡོད་པ་རེད། ཡིན་ནའང་། ང་ཚོའི་ཕུགས་རྒྱང་རིང་པོའི་དམིགས་ཡུལ་རྒྱལ་སྤྱིའི་ནང་བོད་ཀྱི་མཁས་པ་ཚོར་བགྲོ་གླེང་དང་བསམ་ཚུལ་བརྗེ་ལེན་བྱེད་པའི་གླེང་སྟེགས་ཤིག་ཆགས་ཐུབ་རྒྱུ་དེ་ཡིན། ”ཞེས་བརྗོད་སོང་།
སྲིད་སྐྱོང་མཆོག་གིས་དྲ་རྒྱ་དབུ་འབྱེད་དང་འབྲེལ་བའི་གསུང་བཤད་གནང་སྐབས། “ ད་ལྟའི་བར་གྱི་སྲིད་བྱུས་ཉམས་ཞིབ་ཁང་གི་ཚོགས་འདུ་རིམ་པའི་གནས་ཚུལ་དྲ་རྒྱའི་ནང་བླུགས་ཡོད་པ་རེད། བརྙན་པར་བརྒྱུད་དེ་གཟིགས་རྒྱུ་དང་བོད་དབྱིན་གཉིས་ཀྱི་ཐོག་ཡོད་སྟབས། བོད་གཞིས་བྱེས་གཉིས་ཀྱི་བོད་མི་དང་རྒྱལ་སྤྱིའི་ཐོག་ནས་ཀྱང་རིམ་པས་སྲིད་བྱུས་ཉམས་ཞིབ་ཁང་གི་དྲ་རྒྱ་བརྒྱུད་དེ། བོད་དོན་ཐད་ཀྱི་བདེན་པ་གང་ཡིན་གསལ་པོ་ཆགས་ཡོང་གི་རེད་བསམ་པའི་ཡིད་ཆེས་བྱེད་ཀྱི་ཡོད། གང་ཡིན་ཞེ་ན། རྒྱ་ནག་གཞུང་གིས་ཧམ་བཤད་ཁོ་ནར་ཨ་སྒོར་ཐེར་འབུམ་ལྷག་བཏང་སྟེ། བོད་དོན་ཐད་རྫུན་གཏམ་མང་པོ་སྤེལ་གྱི་ཡོད། བརྙན་འཕྲིན་བརྒྱུད་དེ་རང་ལུས་མེར་བསྲེགས་གཙོས་པའི་བོད་ཀྱི་ལོ་རྒྱུས་ཐད་ཁོ་ཚོས་བཟོས་བཞག་པའི་ལོ་རྒྱུས་མང་པོ་ཞིག་འགྲེམས་སྤེལ་བྱེད་ཡོང་སྐབས། མི་མང་པོས་རྒྱ་གཞུང་གི་བཤད་པ་དེ་བདེན་པ་ཨེ་ཡིན་བསམ་མཁན་ཡོང་གི་ཡོད་པ་རེད། གཞི་རྩའི་རྒྱ་གཞུང་ལྟར་ང་ཚོར་འགྲོ་སོང་ཕོན་ཆེན་གཏོང་རྒྱུ་མེད་ཀྱང་། བདེན་པ་ང་ཚོར་ཡོད་པ་དེར་ང་ཚོའི་ངོས་ནས་ལན་འདེབས་བྱས་ཏེ། ཕྱི་གསལ་ནང་གསལ་གྱིས་བཤད་ཐུབ་རྒྱུ་གལ་ཆེན་རེད། དེར་བརྟེན། དྲ་རྒྱ་འདི་བརྒྱུད་བརྒྱུད་ལམ་ཁག་ནང་ཐོན་པའི་ཉིན་རེའི་གསར་འགྱུར་གཅིག་པུ་མ་ཡིན་པར་གཏིང་ཟབ་ཏུ་ཕྱིན་ཏེ། རྒྱ་གཞུང་གིས་ཁོར་ཡུག་དང་འགྲོ་བ་མིའི་ཐོབ་ཐང་། ཆོས་དད་རང་དབང་། ཤེས་ཡོན་སོགས་ཀྱི་སྲིད་བྱུས་འཛིན་སྟངས་ཐོག་དཔྱད་གཏམ་སྤེལ་གྱི་ཡོད་པ་དེར་ལན་འདེབས་དང་སྦྲགས། བདེན་པ་གང་ཡོད་པ་དེར་ཉམས་ཞིབ་པ་ཚོས་སྐུ་ལས་བསྐྱོན་ཏེ་གང་ཐུབ་ཀྱིས་བདུན་ཕྲག་དང་ཟླ་བ་རེ་རེའི་ནང་དྲ་རྒྱའི་ཐོག་བཀོད་ཐུབ་པ་ཡིན་ན། ཉུང་མཐར་བོད་པའི་སྤྱི་ཚོགས་ནང་དཀར་ནག་དབྱེ་འབྱེད་ཐུབ་པ་དང་། རྒྱལ་སྤྱིའི་ཐོག་གསར་འགོད་པ་དང་མཁས་པ་ཚོར་ཐུགས་ཕན་གསོ་ཐུབ་ཀྱི་རེད་བསམ་པའི་ཡིད་ཆེས་བྱེད་ཀྱི་ཡོད། ” ཅེས་གསུངས་སོང་།
ཡང་སྲིད་སྐྱོང་མཆོག་གིས་༼ད་ལྟའི་བོད་ནང་གི་དབང་འཛིན་པ༽ཞེས་པའི་དཔེ་དེབ་ཀྱི་སྐོར་ལ་གསུངས་དོན། “རྒྱ་གཞུང་གིས་བོད་རང་སྐྱོང་ལྗོངས་གཙོས་བོད་ས་ཡོངས་ཀྱི་ལས་བྱེད་པའི་བརྒྱ་ཆ་ ༩༢ བོད་རིགས་དང་། བརྒྱ་ཆའི་ ༨ རྒྱ་རིགས་ཡིན་ཞེས་བཤད་ཀྱི་ཡོད་པ་རེད། དེ་ལྟར་ཡིན་ན་རང་སྐྱོང་ལྗོངས་ཀྱི་ཏང་གི་སྒྲིག་འཛུགས་མཐོ་ཤོས་དེའི་ནང་རྒྱ་རིགས་བརྒྱ་ཆ་ ༨ ཀྱིས། དབང་ཆའི་བརྒྱ་ཆའི་ ༦༥ ནས་ ༧༠ བཟུང་བསྡད་པ་ཡིན་ན། རང་སྐྱོང་ལྗོངས་ནང་བོད་པར་དབང་ཆ་གང་འདྲ་ཡོད་པ་རེད། དེབ་འདིའི་ཞིབ་འཇུག་གི་རྒྱུ་ཆ་མང་ཆེ་བ་རྒྱ་ནག་གཞུང་གི་ཚགས་པར་སོགས་ནས་ཐོན་པ་ཡིན་སྟབས། བདེན་པ་ཁུངས་སྐྱེལ་བྱེད་པར་ཐུཊ་ཕན་གསོ་ཐུབ་པ་དང་། གསར་འགྱུར་བརྒྱུད་ལམ་ཁག་གིས་རྒྱ་ནག་གི་མགོ་ཁྲིད་ཚོའི་གནས་ཚུལ་སྤེལ་སྐབས་ཀྱང་ལོ་རྒྱུས་ཆ་ཚང་བ་ཞིག་ཤེས་རྒྱུར་ཕན་གྱི་རེད། ང་ཚོས་རྒྱ་ནག་གི་འགྲོ་ལུགས་འགྲོ་སྟངས་ག་ཚོད་ཅིག་ཤེས་པ་ཡིན་ན། དེ་ལ་དཔག་པའི་གདོང་ལེན་དང་ཐབས་ཇུས་འདོན་པར་ཡང་ཕན་ཐོགས་ཡོད་པ་རེད། ” ཅེས་གསུངས་སོང་།
སྐབས་དེར་དཔེ་དེབ་རྩོམ་སྒྲིག་པ་དང་སྲིད་བྱུས་ཉམས་ཞིབ་ཁང་གི་དྲུང་འཕར་འཕགས་པ་ཚེ་རིང་ལགས་དང་གྲོས་སྟོན་པ་བློ་བཟང་ལགས་གཉིས་ཀྱིས། དཔེ་དེབ་དེ་ནི་རྒྱ་གཞུང་གིས་བོད་མི་གནས་སྡོད་ས་ཁུལ་གྱི་དབང་འཛིན་པའི་ཁྲོད་བོད་རིགས་མང་བ་ཡོད་ལུགས་བསྒྲགས་ཀྱི་ཡོད་ཀྱང་། དོན་དངོས་སུ་ག་འདྲ་ཡོད་མེད་ཚང་མས་ཤེས་རྟོགས་ཡོང་བའི་ཆེད་དུ་དེབ་དེ་རྩོམ་སྒྲིག་བྱས་པ་ཡིན་སྐོར་དང་། དེབ་དེའི་ནང་དུ་བོད་རང་སྐྱོང་ལྗོངས་གཙོས་བོད་རིགས་འདུས་སྡོད་ཀྱི་ཁུལ་དང་གྲོང་ཁྱེར། ཞིང་ཆེན་རིམ་པ་བར་གྱི་དཔོན་རིགས་ནང་བོད་རིགས་ག་ཚོད་ཡོད་མེད་དང་། རྒྱ་རིགས་ཀྱི་གཙོས་པའི་མི་རིགས་གཞན་ག་ཚོད་ཡོད་མེད། དེ་བཞིན། ཁོང་ཚོའི་ལོ་རྒྱུས་མདོར་བསྡུས་བཅས་བཀོད་ཡོད་སྐོར་སོགས་ངོ་སྤྲོད་གནང་སོང་།
དེབ་ཀྱི་གླེང་གཞིའི་ནང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་ཁོངས་རང་སྐྱོང་གི་བཅའ་ཁྲིམས་ཀྱི་གླེང་བརྗོད་ནང་མི་རིགས་ས་ཁོངས་རང་སྐྱོང་ཞེས་པ་ནི། རྒྱལ་ཁབ་ཀྱི་གཅིག་གྱུར་མགོ་ཁྲིད་འོག གྲངས་ཉུང་མི་རིགས་ཁག་འདུས་སྡོད་བྱེད་སར་ས་ཁོངས་རང་སྐྱོང་དངོས་སུ་བྱས་ནས་རང་སྐྱོང་ལས་ཁུངས་བཙུགས་ཏེ་རང་སྐྱོང་བྱེད་དབང་ལོངས་སུ་སྤྱོད་རྒྱུ་དེ་ཡིན། མི་རིཊ་ས་ཁོངས་རང་སྐྱོང་དངོས་སུ་བྱས་པ་དེའི་ཐོག་རྒྱལ་ཁབ་ཀྱིས་གྲངས་ཉུང་མི་རིཊ་ཁག་གི་མི་རིཊ་སོ་སོའི་ནང་ཁུལ་གྱི་ལས་དོན་བདག་སྐྱོང་བྱེད་དབང་ལོངས་སུ་སྤྱོད་པར་བརྩི་འཇོག་དང་འགན་སྲུང་ལེགས་པར་བྱེད་པའི་དགོངས་དོན་མཚོན་ལུགས་གསལ་ཡོད་ཀྱང་། རྒྱ་དམར་གཞུང་ནི་དབང་ཆ་གཅིག་སྡུད་དང་སྲིད་དབང་སྒེར་འཛིན་པ་ཡིན་སྟབས། ས་ཁོངས་རང་སྐྱོང་གི་དབང་ཆ་རྒྱ་ནག་དམར་ཤོག་ཚོགས་པའི་མགོ་ཁྲིད་དང་མང་ཆེ་བ་རྒྱ་རིགས་ཀྱིས་དབང་འཛིན་བྱས་ཏེ་བོད་རང་སྐྱོང་ལྗོངས་ཟེར་བའི་ས་ཁུལ་དང་གྲོང་ཁྱེར་ ༧ དང་།
མཚོ་སྔོན་ཞིང་ཆེན་ཟེར་བའི་རང་སྐྱོང་ཁུལ་ ༦། དཀར་མཛེས་དང་རྔ་བ། ཀན་ལྷོ། ཡུན་ནན་བདེ་ཆེན་བཅས་རང་སྐྱོང་ཁུལ་ ༤ བཅས་ཀྱི་དམར་ཤོག་དྲུང་ཆེ་ ༡༧ ཁྲོད། བོད་རིགས་ ༧ དང་། རྒྱ་རིགས་ ༡༠ ཡོད་པ་དང་། བོད་རང་སྐྱོང་ལྗོངས་ཟེར་བའི་དམར་ཤོག་རྒྱུན་ལས་ ༡༥ ནང་བོད་རིགས་ ༦ དང་། རྒྱ་རིགས་ ༩ ། དེ་བཞིན་གོང་གསལ་ས་ཁུལ་ཁག་ ༡༧ གྱི་དམར་ཤོག་རྒྱུན་ལས་ ༣༣༩ ཡོད་པའི་ནང་། བོད་རིགས་ ༧༨ དང་རྒྱ་རིགས་ ༡༡༠ ། ཁ་ཆེ་ ༧ ། དབྱིས་རིགས་ ༡། ཐུའུ་ཅ་རིགས་ ༡། ཧོར་རིགས་ ༨ ། སོག་རིགས་ ༡། ཟ་ལར་རིགས་ ༡། ཆང་རིགས་ ༡། ལི་སུའུ་རིགས་ ༡ བཅས་དང་། མཚོ་སྔོན་ཞིང་ཆེན་ཟེར་བའི་དམར་ཤོག་དྲུང་ཆེ་རྒྱ་རིགས་དང་། དམར་ཤོག་རྒྱུན་ལས་ ༡༣ ནང་བོད་རིགས་ ༣ ལས་མེད་པ་དང་། ཟི་ལིང་གྲོང་ཁྱེར་དང་མཚོ་ཤར་ས་ཁུལ་གྱི་དམར་ཤོག་དྲུང་ཆེ་རྒྱ་རིགས་ཡིན་པ་དང་། དེ་དག་གི་དམར་ཤོག་རྒྱུན་ལས་ནང་བོད་རིགས་གཅིག་ཀྱང་མེད་ཚུལ་བཀོད་འདུག
གསར་འགོད་པ། པདྨ་མཚོ།
རྒྱ་མིའི་གང་བྱས་ཀྱང་ང་ཚོས་ཀྱང་རང་སྲུང་རྒོལ་ལེན་