ཉེ་ལམ་ཡུའུ་ཁུ་རེན་གྱི་ཤར་ཕྱོགས་རང་སྐྱོང་མངའ་ཁུལ་ཁུ་རེ་མཱེ་ཨུ་རུ་སུའི་མངའ་འོག་ཏུ་འཛུལ་རྗེས་སླར་ཡང་ཁ་ར་མཱ་ཊོར་སི་ཁུའི་གྱེན་ལོག་པ་ཚོས་ཡུའུ་ཁུ་རེན་གཞུང་ལ་ངོ་རྒོལ་བྱེད་བཞིན་ཡོད་འདུག
ཁ་སང་ཕྱི་ཚེས་ ༡༥ ཉིན་ཡུའུ་ཁུ་རེན་བར་བརྒལ་སྲིད་གཞུང་གིས་ཡུའུ་ཁུ་རེན་ཤར་ཕྱོགས་གྲོང་རྡལ་ཁ་ར་མཱ་ཊོར་སི་ཁུ་ (Kramatorsk) ནང་ཡོད་པའི་ཨུ་རུ་སུར་དགའ་མོས་བྱེད་མཁན་གྱེན་ལོག་ཤོག་ཁག་གིས་སྲིད་གཞུང་གི་ལས་ཁུངས་ཁག་ཅིག་བཙན་བཟུང་བྱས་པར་དམག་དཔུང་གིས་འཇབ་རྒོལ་བྱས་ཏེ་ཕྱིར་འཕུད་བཏང་ཡོད་ཀྱང་། གྱེན་ལོག་པ་ཚོས་ཊོབ་ནེ་ཌི་སི་ཁུ་ (Donetsk) གྲོང་སྡེའི་སྤྱི་ཁྱབ་ཀྱི་ལས་ཁུངས་བཙན་བཟུང་བྱས་ཡོད་འདུག
ཁ་སང་ཡུའུ་ཁུ་རེན་བར་བརྒལ་སྲིད་གཞུང་གི་སྲིད་བློན་ཡཱ་ཌི་སིན་ཡོ་ཁུ་ (Arseniy Yatsenyuk) ལགས་ཀྱིས་བརྙན་འཕྲིན་བརྒྱུད་རྒྱལ་ཡོངས་གཏམ་བཤད་ཅིག་སྤེལ་བའི་ནང་། ཨུ་སུ་སུས་ཡང་བསྐྱར་བྷར་ལིན་རྩིག་གྱང་ (Berlin Wall) གསར་བ་ཞིག་རྒྱག་འདོད་པར་སྐྱོན་བརྗོད་དང་སྦྲགས། ཡུའུ་ཁུ་རེན་ནང་གི་གྱེན་ལོག་བྱེད་མཁན་འཇིགས་སྐུལ་དྲག་སྤྱོད་པ་ཚོར་རྒྱབ་སྐྱོར་བྱེད་པ་མཚམས་འཇོག་བྱེད་དགོས་ཞེས་བརྗོད་འདུག
ཡུའུ་ཁུ་རེན་བར་བརྒལ་སྲིད་གཞུང་གིས་དམག་མི་བཏང་སྟེ་ཡུའུ་ཁུ་རེན་ཤར་ཕྱོགས་གྲོང་ཁྱེར་ནང་ཡོད་པའི་གྱེན་ལོག་པ་ཚོར་འཇབ་རྒོལ་བྱེད་རྒྱུ་ཡིན་པའི་གསལ་བསྒྲགས་སྤེལ་རྗེས། ཨུ་རུ་སུའི་སྲིད་འཛིན་པུ་ཊིན་གྱིས་འཇར་མན་སྲིད་བློན་ལྕམ་ཨན་རྗི་ལཱ་ (Angela Merkel) ལགས་སུ་ཁ་པར་བཏང་སྟེ། ཡུའུ་ཁུ་རེན་ནང་ཟིང་འཁྲུག་སློང་ཉེན་ཡོད་པའི་ཉེན་བརྡ་ཞིག་ནུབ་ཕྱོགས་རྒྱལ་ཁབ་ཚོར་བཏང་ཡོད་ཀྱང་། ནུབ་ཕྱོགས་རྒྱལ་ཁབ་ཚོས་ཡུའུ་ཁུ་རེན་ནང་གྱེན་ལོག་བྱེད་མཁན་ཚོའི་རྒྱབ་ལོགས་སུ་ཨུ་རུ་སུས་རྒྱབ་སྐྱོར་བྱེད་ཀྱི་ཡོད་པའི་སྐྱོན་འཛུགས་བྱས་ཡོད་འདུག
ཐེངས་འདིར་མགོ་ཁྲིད་གཉིས་ཀྱིས་ཁ་པར་བརྒྱུད་གྲོས་མོལ་ག་རེ་བྱས་ཡོད་མེད་ཐད། ཨུ་རུ་སུ་སྲིད་གཞུང་གིས་མགོ་ཁྲིད་གཉིས་ཀྱིས་སང་ཉིན་སུད་སིའི་གྲོང་ཁྱེར་ཇི་ནེ་ཝའི་ནང་། ཡུའུ་ཁུ་རེན་གྱི་དཀའ་རྙོག་སེལ་རྒྱུའི་ཐད་ཨ་རི་དང་ཨུ་རུ་སུ། ཡུ་རོབ་མཐུན་ཚོགས། ཡུའུ་ཁུ་རེན་བཅས་ཀྱིས་ཚོགས་འདུ་ཞིག་ཚོགས་འཆར་ཡོད་པའི་སྐོར་ལ་གྲོས་མོལ་བྱས་ཡོད་ཅེས་བརྗོད་འདུག ད་ལྟའི་ཆར་གྱེན་ལོག་པ་ཚོས་ཡུའུ་ཁུ་རེན་ཤར་ཕྱོགས་ཀྱི་གྲོང་ཁྱེར་དང་གྲོང་རྡལ་བཅུ་གྲངས་ཤིག་བཙན་བཟུང་བྱས་ཡོད་འདུག
གནད་དོན་དབྱེ་ཞིབ་པ་ཚོས། སེ་རི་ཡའི་ནང་གི་ཟིང་འཁྲུག་ལྟར་ཡུའུ་ཁུ་རེན་ནང་ཟིང་འཁྲུག་བྱུང་བ་ཡིན་ན་རྒྱལ་ཁབ་ཀྱི་ཆབ་སྲིད་བརྟན་བརླིང་དང་དཔལ་འབྱོར་སོགས་ལ་ཉམས་རྒུད་ཆེན་པོ་ཐེབས་རྒྱུ་ཡིན་ཚུལ་བརྗོད་འདུག
གསར་འགོད་པ། ལྷ་སྐྱབས་རྒྱལ།
